Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2013

Na o na le ‘Pelo ya Gore o Tsebe’ Jehofa?

Na o na le ‘Pelo ya Gore o Tsebe’ Jehofa?

“Ke tla [ba] nea pelo ya gore [ba] ntsebe gore ke nna Jehofa; e tla ba batho ba ka.”—JER. 24:7.

1, 2. Ke ka baka la’ng ba bangwe ba rata mago?

NA O thabela go ja mago, e ka ba a sa tšwago go fulwa goba a omišitšwego? Ba bantši ba a thabela, ke ka baka leo mago a bjalwago mafelong a mantši. Bajuda ba bogologolo ba be ba tšeela godimo mego. (Nah. 3:12; Luka 13:6-9) Mago a na le diagammele le diminerale; ke ka baka leo ba bangwe ba rego a loketše pelo.

2 Jehofa o kile a swantšha mago le pelo. Modimo o be a sa hlalose kamoo go ja mago go bego go hola mmele ka gona. O be a bolela ka tsela ya seswantšhetšo. Seo a se boletšego ka moporofeta Jeremia se na le seo se se bolelago ka pelo ya gago le dipelo tša baratiwa ba gago. Ge re dutše re ahlaahla seo a se boletšego, naganišiša kamoo seo se kgomago Bakriste.

3. Mago ao go bolelwago ka ona go Jeremia kgaolo 24 a emela eng?

3 Anke re thomeng ka go hlahloba taba e nngwe yeo Modimo a ilego a e bolela mehleng ya Jeremia mabapi le mago. Ka 617 B.C.E., setšhaba sa Juda se be se le boemong bjo bobe bja moya. Modimo o ile a bontšha Jeremia pono ya kamoo bokamoso bo bego bo tla ba ka gona, gomme a bo swantšha le mehuta e mebedi ya mago—mago “a mabotse kudu” le “a mabe kudu.” (Bala Jeremia 24:1-3.) Mago a mabe a be a šupa go Kgoši Tsedekia le ba bangwe bao ba swanago le yena bao ba bego ba tlo hlaselwa ke Kgoši Nebukadinetsara le madira a gagwe. Eupša go thwe’ng ka Hesekiele, Daniele le bagwera ba gagwe ba bararo bao ba bego ba šetše ba le Babilona, gotee le Bajuda ba bangwe bao ba bego ba le kgauswi le go tlo išwa moo? Ba be ba swana le mago a mabotse. Mašaledi a bona a be a tlo boela morago go yo tsošološa Jerusalema le tempele ya yona. Selo seo se ile sa feleletša se diregile.—Jer. 24:8-10; 25:11, 12; 29:10.

4. Re kgothatšwa ke’ng go tšwa go seo Modimo a se boletšego ka mago a mabotse?

4 Jehofa o ile a bolela ka bao ba swantšhetšwago ke mago a mabotse gore: “Ke tla [ba] nea pelo ya gore [ba] ntsebe gore ke nna Jehofa; e tla ba batho ba ka.” (Jer. 24:7) Leo ke lona  lengwalo la sehlogo se, gomme le tloga le kgothatša! Modimo o ikemišeditše go nea batho ‘pelo ya gore ba mo tsebe.’ Mo tabeng ye, “pelo” e tswalanywa le tshekamelo ya motho. Ga go pelaelo gore wena o nyaka go ba le pelo e bjalo gomme o be karolo ya batho ba gagwe. Megato yeo motho a swanetšego go e gata gore a fihlelele seo e akaretša gore a ithute Lentšu la gagwe le go le diriša, a itshole gomme a sokologe, a neele bophelo bja gagwe go Modimo ke moka a kolobetšwe leineng la Tate le la Morwa le la moya o mokgethwa. (Mat. 28:19, 20; Dit. 3:19) O ka no ba o šetše o gatile megato yeo, goba mohlomongwe o ka ba o šetše o kopanela ka mehla le Dihlatse tša Jehofa gomme o thomile go gata megato yeo ka go latelana ga yona.

5. Ge e le gabotse Jeremia o ngwadile mabapi le dipelo tša bomang?

5 Go sa šetšwe gore re šetše re gatile e mengwe ya megato yeo goba ka moka ga yona, go sa dutše go nyakega gore re ele hloko dikgopolo tša rena le boitshwaro bja rena. Re kgona go bona lebaka la seo go tšwa tabeng e nngwe gape yeo Jeremia a e ngwadilego mabapi le pelo. Dikgaolo tše dingwe tša puku ya Jeremia di be di bolela ka ditšhaba tšeo di bego di dikologile Juda, eupša tabakgolo e be e le setšhaba sa Juda nakong ya pušo ya dikgoši tša yona tše hlano. (Jer. 1:15, 16) Ee, ge e le gabotse Jeremia o be a bolela ka banna, basadi le bana bao ba bego ba ineetše go Jehofa. Borakgolokhukhu ba bona ba be ba ikgethetše go ba setšhaba seo se ineetšego go yena. (Ek. 19:3-8) Le gona mehleng ya Jeremia, batho ba ile ba tiišetša gore ba ineetše go Modimo. Ba ile ba re: “Re tlile go wena, gobane Wena Jehofa, o Modimo wa rena.” (Jer. 3:22) Lega go le bjalo, o nagana gore boemo bja dipelo tša bona e be e le bofe?

NA GO BE GO NYAKEGA GORE GO BUIWE DIPELO TŠA BONA TŠA SESWANTŠHETŠO?

6. Ke ka baka la’ng re swanetše go kgahlegela go kwa seo Modimo a se boletšego mabapi le pelo?

6 Dingaka tša mehleng yeno di kgona go diriša thekinolotši go bona ge e ba pelo ya motho e phetše gabotse. Lega go le bjalo, Jehofa o kgona go dira se se fetago seo, go etša ge a dirile mehleng ya Jeremia. Modimo o swanelega ka botlalo go dira seo, go etša ge re bona mantšung a gagwe a rego: “Pelo e boradia kudu go feta selo le ge e le sefe e bile ke e kgopo. Ke mang yo a ka e tsebago? Nna Jehofa ke fetleka pelo, . . . le go nea yo mongwe le yo mongwe go ya ka ditsela tša gagwe, go ya ka dienywa tša mediro ya gagwe.” (Jer. 17:9, 10) Go “fetleka pelo” ga go akaretše go hlahloba pelo ya kgonthe, yeo ka nywaga e 70 goba e 80 e ka bethago ka makga a dibilione tše tharo. Go e na le moo, Jehofa o be a bolela ka pelo ya seswantšhetšo. “Pelo” yeo e šupa go seo motho a lego sona ka garegare, gomme e akaretša dikganyogo tša gagwe, dikgopolo tša gagwe, tshekamelo ya gagwe, mekgwa ya gagwe le dipakane tša gagwe. Le wena o na le pelo e bjalo. Modimo a ka e hlahloba, e bile le wena o ka kgona go dira seo go fihla bokgoleng bjo itšego.

7. Jeremia o ile a hlalosa bjang boemo bja dipelo tša bontši bja Bajuda ba mehleng ya gagwe?

7 E le gore re itokišetše go hlahloba dipelo tša rena, re ka ipotšiša gore: ‘Boemo bja dipelo tša seswantšhetšo tša bontši bja Bajuda ba mehleng ya Jeremia e be e le bofe?’ Go araba potšišo yeo, ela hloko polelwana e latelago e sa tlwaelegago yeo Jeremia a ilego a e diriša: “Bohle ba ntlo ya Isiraele ga se ba bolla pelong.” O be a sa bolele ka go bolla mo go tlwaelegilego ga banna ba Bajuda, ka gobane o itše: “‘Tsebang! Matšatši a etla,’ o re’alo Jehofa, ‘gomme ke tla sekiša yo mongwe le yo mongwe yo a bolotšego eupša a sa dutše a le yo a sa bollago.’” Ka baka leo, gaešita le banna ba bolotšego ba Bajuda ba be ‘ba sa bolla pelong.’ (Jer. 9:25, 26) Seo se be se bolela’ng?

8, 9. Ke’ng seo Bajuda ba bantši ba bego ba swanetše go se dira ka dipelo tša bona?

8 Seo se re thušago go hwetša karabo ya seo se bolelwago ke ‘go se bolle pelong’ se hwetšwa mantšung ao Modimo a ilego a kgothatša Bajuda go se dira ge a re: “Itlhwekišeng pele ga Jehofa gomme le bolotše dipelo tša lena, lena batho ba Juda le badudi ba Jerusalema; e le gore pefelo ya ka e se ke ya le tlela . . . ka baka la bobe bja ditiro tša lena.” Eupša modu wa  boitshwaro bja bona bjo bobe e be e le eng? E be e le ka gare ga bona, ka dipelong tša bona. (Bala Mareka 7:20-23.) Ee, Modimo o ile a diriša Jeremia go bontšha gabotse mothopo wa ditiro tše mpe tša Bajuda. Dipelo tša bona di be di ngangabaletše go rabela. O be a sa thabele dilo tšeo ba bego ba ikemišeditše go di dira le tšeo ba bego ba di nagana. (Bala Jeremia 5:23, 24; 7:24-26.) Modimo o ile a ba botša: “Itlhwekišeng pele ga Jehofa gomme le bolotše dipelo tša lena.”—Jer. 4:4; 18:11, 12.

9 Ka baka leo, Bajuda ba mehleng ya Jeremia ba be ba nyaka go buiwa dipelo tša bona tša seswantšhetšo—‘ba bolle dipelong’—go etša ge bao ba phetšego mehleng ya Moshe ba dirile. (Doit. 10:16; 30:6) Go ‘bolotša dipelo tša bona’ go be go bolela gore ba tloše seo se bego se dira gore dipelo tša bona tša seswantšhetšo di rabele—dikgopolo tša bona, dilo tšeo ba di ratago goba maikemišetšo a bona ao a bego a thulana le melao ya Modimo.—Dit. 7:51.

‘GO BA LE PELO YA GO TSEBA’ MODIMO LEHONO

10. Re ka ekiša bjang mohlala wa Dafida ge re hlahloba dipelo tša rena?

10 Ruri re tloga re leboga kudu gore Modimo o re thušitše go lemoga seo e lego pelo ya seswantšhetšo! Ba bangwe ba ka botšiša gore: ‘Eupša ke ka baka la’ng taba ye e swanetše go tshwenya Dihlatse tša Jehofa lehono?’ Ga se gore bontši bja Bakriste diphuthegong ba phelela go dira bobe goba ba fetoga “mago a mabe,” go etša ge go be go le bjalo ka Bajuda ba bogologolo. Go fapana le seo, bahlanka ba Modimo lehono ke batho ba ineetšego le ba hlwekilego. Lega go le bjalo, nagana ka seo Dafida a ilego a se kgopela Jehofa ge a re: “Mphetleke o tsebe pelo ya ka, hle Modimo. Ntlhahlobe o tsebe dikgopolo tša ka tše di mpherekanyago, o bone ge e ba go nna go na le tsela e kwešago bohloko.”—Ps. 17:3; 139:23, 24.

11, 12. (a) Ke ka baka la’ng yo mongwe le yo mongwe wa rena a swanetše go hlahloba pelo ya gagwe? (b) Ke eng seo Modimo a ka se se dirego?

11 Jehofa o nyaka gore yo mongwe le yo mongwe wa rena a be boemong bjoo yena a bo amogelago gomme a dule a le go bjona. Jeremia o boletše ka baloki gore: “Wena Jehofa wa madira, o hlahloba yo a lokilego; o bona dipshio le pelo.” (Jer. 20:12) Ge e ba Ramatlaohle a hlahloba gaešita le pelo ya yo a lokilego, na rena ka noši ga se ra swanela go itlhahloba ka potego? (Bala Psalme 11:5.) Ge re dutše re itlhahloba, mohlomongwe re ka lemoga gore re na le mokgwa o itšego, pakane e itšego goba maikwelo a tseneletšego ao a nyakago gore re a gatele megato. Re ka lemoga selo se itšego seo se dirago gore pelo ya rena e retele, e be e sa ‘bollago’ ka kgopolo ya seswantšhetšo, gomme go nyakege gore re e bolotše. Seo e tla ba e le go bua pelo ya rena ya seswantšhetšo. Ge e ba o dumela gore e tla ba mo gobotse go hlahloba pelo ya gago ya seswantšhetšo, ke eng seo o ka se dirago ge o e hlahloba? Le gona o ka dira bjang diphetogo le ge e le dife tšeo di nyakegago?—Jer. 4:4.

12 Seo re swanetšego go se tseba se se: Ga se ra swanela go letela gore Jehofa a re gapeletše go fetoga. O boletše ka “mago a mabotse” gore o tla ‘a nea pelo ya gore a mo tsebe.’ Ga se a ka a re o tla a gapeletša go fetoša dipelo tša ona. Dipelo tša ona di be di swanetše go ba le kganyogo ya go tseba Modimo. Na re be re ka se nyake go ba ka tsela yeo?

Go hlahloba pelo le go phošolla dikganyogo tše di fošagetšego go tla re tlišetša ditšhegofatšo

13, 14. Mokriste a ka gobatšwa bjang ke seo se lego ka pelong ya gagwe?

13 Jesu o boletše gore: “Pelong go tšwa dikeleletšo tše kgopo, dipolao, bohlotlolo, bootswa,  bohodu, bohlatse bja maaka le dithogako.” (Mat. 15:19) Go molaleng gore ge e ba pelo e nago le dikganyogo tše fošagetšego ya ngwanabo rena e ka mo šušumeletša gore a dire bohlotlolo goba bootswa gomme a se itshole, gona Modimo a ka no se sa hlwa a mo amogela. Le gona, dikganyogo tše di fošagetšego di ka gola ka pelong ya motho yo a sego a tšwa a dira sebe se bjalo. (Bala Mateo 5:27, 28.) Motho yo bjalo a ka holega ge a ka itlhahloba pelo. Ge e ba o hlahloba pelo ya gago, na o tla hwetša e na le kganyogo e fošagetšego ka motho yo a itšego wa bong bjo bo fapanego le bja gago, wa hwetša dikganyogo tše di utamego tšeo Modimo a ka se di amogelego le tšeo go nyakegago gore di tlošwe go yona?

14 Goba ngwanabo rena yo a sego a tšwa a baka “dipolao” tša kgonthe a ka befelwa o šoro ka pelong ya gagwe go fihla bokgoleng bja gore a hloye Mokristegotee le yena. (Lef. 19:17) Na o tla dira boiteko bjo bo tseneletšego bja gore a tumole maikwelo a bjalo ao a ka dirago gore pelo ya gagwe e ngangabale?—Mat. 5:21, 22.

15, 16. (a) Nea mohlala wa kamoo Mokriste e ka bago ‘yo a sa bollago pelong.’ (b) Ke ka baka la’ng o nagana gore ‘pelo e sa bollago’ e ka se kgahliše Jehofa?

15 Se se thabišago ke gore bontši bja Bakriste ga ba na ‘bothata bjo bjalo bja pelo.’ Lega go le bjalo, Jesu o boletše le ka “dikeleletšo tše kgopo.” Tše ke dikgopolo goba dipono tšeo di ka senyago dibopego tše dintši tša bophelo. Ka mohlala, motho a ka botegela ba leloko la gabo ka tsela e fošagetšego. Go ba gona, Bakriste ba nyaka go ba le “lerato la tlhago” la go rata ba leloko, ba se swane le batho ba bantši bao ba se nago lerato le bjalo ‘mehleng ye ya bofelo.’ (2 Tim. 3:1, 3) Lega go le bjalo, go a kgonega gore motho a bontšhe lerato le bjalo ka tsela e sa nepagalago. Ba bantši ba nagana gore ‘mmetlašapo la tlala o swanetše go betla a lebišitše gabo.’ Ka baka leo, ba ka emelela goba go thekga ba leloko go sa šetšwe seo se diregago, gomme ba tšeega maikwelong ge wa leloko a fošeditšwe. Nagana ka seo maikwelo a bjalo a fošagetšego a ilego a šušumeletša dikgaetšedi tša Dina go se dira. (Gen. 34:13, 25-30) Le gona nagana ka seo se bego se le ka pelong ya Abesalomo, seo se mo dirilego gore a bolaye morwarragwe e lego Aminone. (2 Sam. 13:1-30) Na ditiro tšeo ka moka ga tša bakwa ke “dikeleletšo tše kgopo”?

16 Ke therešo gore Bakriste ba therešo ga ba bolaye batho ba bangwe. Eupša na ba ka ba le maikwelo a mabe ka ngwanabo bona goba kgaetšedi yo a ilego a swara gampe yo mongwe wa ba leloko la bona goba motho yo ba naganago gore o dirile seo? Ba ka gana ge modumedigotee le bona a ba laletša ge e ba ba nagana gore o ile a swara wa leloko la bona gampe, goba ba ka kgetha go se mo laletše magaeng a bona. (Baheb. 13:1, 2) Maikwelo a bjalo a fošagetšego le a go gana go laletša ba bangwe a bontšha go hloka lerato gomme ga se a swanelwa  go tšewa gabohwefo. Ee, Mohlahlobi wa dipelo a ka bona seo gomme a bolela gore “ga se [ra] bolla pelong.” (Jer. 9:25, 26) Gopola bao Jehofa a ilego a ba kgothaletša gore: “Le bolotše dipelo tša lena.”—Jer. 4:4.

GO AMOGELA LE GO KGOMARELA ‘PELO YA GORE RE TSEBE’ MODIMO

17. Go boifa ga rena Jehofa go ka re thuša bjang gore re be le pelo e tšeelago dilo godimo?

17 Go thwe’ng ge e ba o hlahloba pelo ya gago ya seswantšhetšo gomme o hwetša gore ga e nape e tšeela godimo keletšo ya Jehofa ka tsela yeo e bego e swanetše go e tšeela godimo ka yona le gore ka tsela e itšego ‘ga se ya bolotšwa’? Mohlomongwe o lemoga gore e boifa batho, e rata botumo goba matsaka, goba gaešita le go rata bonganga goba boitaolo. E tla ba e se wena wa pele go lemoga seo. (Jer. 7:24; 11:8) Jeremia o ngwadile gore Bajuda ba sa botegego ba mehleng ya gagwe ba be ba na le “pelo e ngangabetšego le e rabelago.” O okeditše ka gore: “Dipelong tša bona ga se ba ka ba re: ‘Bjale anke re boifeng Jehofa Modimo wa rena, Yena yo a nešago pula ya matlorotloro le yo a neago dipula tša lehlabula.’” (Jer. 5:23, 24) Na se ga se bontšhe gore selo seo se ka re thušago ‘go bolotša dipelo tša rena’ ke gore re hlagolele poifo e oketšegilego ya go boifa Jehofa le go mo tšeela godimo? Poifo e bjalo e botse e ka thuša yo mongwe le yo mongwe wa rena gore a be le pelo yeo e tšeelago godimo kutšwanyana tsela yeo Modimo a kganyogago gore re be ka yona.

18. Ke eng seo Jehofa a holofeditšego go se direla bao ba lego kgweranong e mpsha?

18 Re ka dirišana le Jehofa ge a dutše a re nea ‘pelo ya gore re mo tsebe.’ Ge e le gabotse, seo ke sona a holofeditšego go se direla batlotšwa kgweranong e mpsha ge a re: “Ke tla tsenya molao wa ka ka go bona gomme ka o ngwala pelong ya bona. Ke tla ba Modimo wa bona gomme bona e tla ba setšhaba sa ka.” Go thwe’ng ka taba ya go mo tseba ka botlalo? O okeditše ka gore: “Motho a ka se hlwe a ruta mogagabo gomme yo mongwe le yo mongwe a ka se hlwe a ruta ngwanabo, a re: ‘Tsebang Jehofa!’ Ka ge ka moka ga bona ba tla be ba ntseba, go tloga ka yo monyenyane wa bona go fihla ka yo mogolo wa bona . . . Gobane ke tla ba lebalela molato wa bona gomme nka se sa gopola sebe sa bona.”—Jer. 31:31-34. *

19. Bakriste ba therešo ba fagahletše eng?

19 Go sa šetšwe gore o fagahletše go holwa sa ruri ke kgwerano yeo e mpsha kua legodimong goba mo lefaseng, o swanetše go ba le kganyogo ya go tseba Jehofa le go ba karolo ya batho ba gagwe. Selo sa pele seo se swanetšego go direga pele re amogela ditšhegofatšo tšeo ke gore dibe tša rena di lebalelwe motheong wa sehlabelo sa Kriste sa topollo. Taba ya gore o ka lebalelwa e swanetše go go šušumeletša gore o lebalele ba bangwe, gaešita le ge go ka bonagala go le boima gore re dire seo. Go ikemišetša ga gago go ntšha ka pelong ya gago maikwelo le ge e le afe a mabe ao o ka bago o na le ona go tla hola pelo ya gago. Ka go re’alo o tla ba o sa bontšhe feela gore o nyaka go hlankela Jehofa eupša o tla ba o bontšha le gore o thomile go mo tseba gakaone. O tla swana le bao Jehofa a boletšego ka bona a diriša Jeremia gore: “Le tla nnyaka gomme la nkhwetša, ka gobane le tla ntsoma ka pelo ya lena ka moka. Ke tla dira gore le nkhwetše.”—Jer. 29:13, 14.

^ ser. 18 Kgwerano e mpsha e ahlaahlwa go kgaolo 14 ya puku ya Modimo o Bolela le Rena ka Jeremia.