Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2013

Homotšega Gomme o Homotše ba Bangwe

Homotšega Gomme o Homotše ba Bangwe

Ka ge re le batho ba sa phethagalago, ka moka ga rena re kile ra babja, ba bangwe ba rena ra ba ra babja wa go hwa. Re ka lebeletšana bjang ka katlego le maemo a bjalo a boima?

Selo se sengwe seo se ka re thušago kudu go lebeletšana le maemo a bjalo ke ge re homotšwa ke ba lapa, bagwera le badumedigotee le rena.

Mantšu a botho le a lerato a mogwera a ka swana le setlolo se se fodišago gomme a re tsošološa. (Die. 16:24; 18:24; 25:11) Eupša Bakriste ba therešo ga ba tshwenyega feela ka go fo homotšwa. Le bona ba katanela gore ba “kgone go homotša ba bangwe ditlaišegong tša mohuta le ge e le ofe ka khomotšo yeo [ba] e hwetšago go Modimo.” (2 Bakor. 1:4; Luka 6:31) Antonio, e lego molebeledi wa selete wa kua Mexico, o ile a feta boemong bjo bjalo.

Ge Antonio a be a botšwa gore o na le bolwetši bja lymphoma, e lego mohuta wa kankere ya madi, o ile a nyama o šoro. Lega go le bjalo, o ile a katanela go laola maikwelo a gagwe a fošagetšego. Bjang? O be a leka go swara dikopelo tša Mmušo ka hlogo gomme a di opela e le gore a ka kwa mantšu a tšona gomme a naganišiše ka ona. Le gona o ile a homotšwa kudu ke go rapelela godimo le go bala Beibele.

Lega go le bjalo, Antonio o lemoga gore selo se sengwe se segolo kudu seo se mo thušitšego e bile thekgo ya badumedigotee le yena. O re: “Ge nna le mosadi wa ka re be re ikwa re imelwa, re be re kgopela yo mongwe wa ba leloko yoo e bego e le mogolo wa phuthego gore a tle go re rapelela. Seo se ile sa re homotša gomme sa dira gore re iše maswafo fase. O oketša ka gore:“Ge e le gabotse, ka baka la thekgo ya ba lapa le bana babo rena ba moya, go se go ye kae re ile ra kgona go fenya maikwelo a rena a fošagetšego.” Ruri o tloga a leboga bagwera ba bjalo ba lerato le bao ba naganelago!

Thušo e nngwe yeo re ka bago le yona nakong ya tlalelo ke moya o mokgethwa woo re o holofeditšwego. Moapostola Petro o boletše gore moya o mokgethwa wa Modimo ke “mpho e sa lefelelwego.” (Dit. 2:38) Seo se ile sa bonagala gabotse gore ke therešo ge ba bantši ba be ba tlotšwa ka Pentekoste ya 33 C.E. Eupša ka moka ga rena re sa dutše re ka amogela moya woo. Moya wo ga o fele, ka gona go re’ng o sa o kgopele ka bontši?—Jes. 40:28-31.

TSHWENYEGA KA BAO BA TLAIŠEGAGO

Moapostola Paulo o ile a feta mathateng a mantši, gaešita le go lebana le lehu ka dinako tše dingwe. (2 Bakor. 1:8-10) Lega go le bjalo, Paulo o be a sa tshwenyega kudu ka go loba bophelo bja gagwe. O ile a homotšwa ke gore Modimo o be a mo thekga. O ngwadile gore: “Go tumišwe Modimo le Tatago Morena wa rena Jesu Kriste, Tate wa dikgaugelo le Modimo wa khomotšo yohle, yo a re homotšago ditlaišegong tša rena tšohle.” (2 Bakor. 1:3, 4) Paulo ga se a ka a dumelela mathata a gagwe gore a mo imele. Go e na le moo, diteko tšeo a ilego a feta go tšona di ile tša mo thuša gore a hlagolele kwelobohloko, e le gore a hlamelwe gakaone go homotša ba bangwe ge ba be ba le tlaišegong.

Ka morago ga gore Antonio a hlaphogelwe bolwetšing bja gagwe, o ile a kgona go boela modirong wa bosepedi. O be a dula a tshwenyega ka badumedigotee le yena, eupša yena le mosadi wa gagwe ba ile ba dira boiteko bjo bo kgethegilego bja go etela bao ba babjago gomme ba ba kgothatše. Ka mohlala, ka morago ga go etela Mokriste yo mongwe yo a bego a babja o šoro, Antonio o ile a lemoga gore ngwanabo rena yoo o be a sa nyake go ya dibokeng. Antonio o hlalosa gore: “Ga se gore o be a sa rate Jehofa goba bana babo rena, eupša bolwetši bjoo bo be bo mo kgomile maikwelong go fihla bokgoleng bja gore a ikwe a se na mohola.”

Selo se sengwe seo Antonio a ilego a se dira go kgothatša ngwanabo rena yoo a babjago e bile gore a mo kgopele go rapela pokanong e nngwe ya segwera. Le ge ngwanabo rena a ile a ikwa a sa swanelege, o ile a dumela go dira seo. Antonio o re: “O ile a rapela gabotse, gomme ka morago ga moo, o be a se sa swana le peleng. O be a ikwa a na le mohola gape.”

Ee, go fihla bokgoleng bjo itšego, ka moka ga rena re kile ra kgotlelela tlaišego e itšego maphelong a rena. Eupša go etša ge Paulo a boletše, seo se ka re hlamela gore re tle re homotše ba bangwe nakong ya ge ba tlaišega. Ka gona, anke re tshwenyegeng ka tlaišego ya Bakristegotee le rena gomme re ekiše Modimo wa rena, Jehofa, ka gore re homotše ba bangwe.