Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2013

Lesolo Leo le Rulagantšwego Gabotse le Enywa Dienywa

Lesolo Leo le Rulagantšwego Gabotse le Enywa Dienywa

María Isabel ke mogoeledi yo monyenyane yoo a fišegago motseng wa San Bernardo kua nageng yeo e lego Amerika Borwa ya Chile. Yena gotee le lapa labo ke batho ba setlogo sa Mapuche. Lapa ka moka le be le dutše le thekga ka mafolofolo maiteko a gore go thongwe phuthego e mpsha ka leleme la Mapuche, leo gape le bitšwago Sepudungun.

Ge go be go tsebišwa gore Segopotšo sa lehu la Kriste se tla swarwa ka Sepudungun e bile go gatišitšwe le ditaletšo tša segopotšo tša leleme leo tše 2 000 gore di phatlalatšwe, se se ile sa dira gore María Isabel a tlelwe ke kgopolo e itšego. Ke eng seo a bego a ka thuša ka sona? O ile a gopola diphihlelo tša bafsa ba bangwe ba Dihlatse bao ba ilego ba thabela go boledišana ka Beibele le bao ba tsenago sekolo le bona gotee le barutiši ba bona. O ile a boledišana le batswadi ba gagwe ka taba ye, gomme ka moka ga bona ba ile ba phetha ka gore María Isabel a loge leano la go phatlalatša ditaletšo tšeo kua sekolong. Yena o ile a tla ka leano lefe?

Sa pele María Isabel o ile a kgopela tumelelo go balaodi ba sekolo gore a kgomaretše taletšo kgorong e kgolo yeo go tsenwago ka yona sekolong. Ba ile ba mo nea tumelelo gomme ba mo reta ka go tšea kgato yeo. Letšatši le lengwe mesong ge go be go kgobokanwe bakeng sa dithapelo sekolong, hlogo ya sekolo e ile ya dira tsebišo ka segodišamodumo mabapi le taletšo yeo.

Ka morago ga moo, María Isabel o ile a kgopela barutiši ba gagwe gore a tsene le diklaseng tše dingwe. Ka morago ga go hwetša tumelelo yeo go tšwa go barutiši, o ile a botšiša diklase tšeo ka moka ge e ba go na le Mopuche. O re: “Ke be ke nagana gore mohlomongwe sekolong ka moka go be go tla ba le baithuti ba 10 goba ba 15 bao ba tšwago malapeng a Mapuche, eupša e be e le ba bantši kudu moo ke feleleditšego ke abile ditaletšo tše 150!”

“O BE A LETETŠE GO BONA MOTHO YO MOGOLO”

Mosadi yo mongwe yo a bonego taletšo yeo e kgomareditšwego kgorong yeo e tsenago ka sekolong o ile a botšiša gore a ka bolela le mang ka tiragalo yeo. Nagana ka mokgwa woo a ilego a makala ka gona ge a be a šupetšwa ngwanenyana wa nywaga e 10! María Isabel o bolela a myemyela gore: “O be a letetše go bona motho yo mogolo.” Ka morago ga go mo nea taletšo le tlhaloso e kopana, María Isabel o ile a kgopela mosadi yoo aterese ya gagwe gore yena gotee le batswadi ba gagwe ba tle ba mo etele gomme ba mmotše mo go oketšegilego ka Mmušo wa Modimo. Bagoeledi ba 20 bao ba hlankelago tšhemong ya leleme la Sepudungun ba be ba thabile kudu go bona mosadi yo le batho ba bangwe ba 26 bao ba thabelago ba Mapuche ba le gona segopotšong. Ga bjale sehlopha seo ke phuthego yeo e golago ka lebelo!

Go sa šetšwe gore o na le nywaga e mekae, na o ka dira maiteko a bjalo a go laletša bao o tsenago sekolo le bona goba bašomigotee le wena go tla segopotšong, polelong ya phatlalatša goba kopanong ya selete? Ke ka baka la’ng o sa dire dinyakišišo ka dikgatišong tša rena gore o hwetše diphihlelo tšeo di ka go thušago go bona kamoo o ka dirago gore selo sa go swana le se se atlege? Le gona, o ka rapelela moya o mokgethwa wa Jehofa gore o go thuše go ba le sebete sa go bolela ka yena. (Luka 11:13) Ge e ba o dira bjalo o tla makala kudu gomme wa kgothatšwa ke mafelelo a mabotse a maiteko a gago ao a rulagantšwego gabotse.