Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2013

Eba le Sebete Gobane Jehofa o na le Wena!

Eba le Sebete Gobane Jehofa o na le Wena!

‘Eba le sebete gomme o tie matla. Jehofa Modimo wa gago o na le wena.’—JOSH. 1:9.

1, 2. (a) Ke dika dife tšeo di tlago go re thuša gore re lebeletšane le diteko? (b) O be o ka hlalosa tumelo bjang? Bontšha.

TIRELO ya Jehofa e re tlišetša lethabo. Lega go le bjalo, re lebeletšana le mathata ao a tlwaelegilego bathong gomme re ka “tlaišetšwa toko.” (1 Pet. 3:14; 5:8, 9; 1 Bakor. 10:13) E le gore re lebeletšane ka katlego le diteko tše bjalo, go nyakega gore re be le tumelo le sebete.

2 Tumelo ke eng? Moapostola Paulo o ngwadile gore: “Tumelo ke tebelelo e kgonthišeditšwego ya seo se holofetšwego, bohlatse bjo bo lego molaleng bja dilo tša kgonthe tšeo di sa bonwego.” (Baheb. 11:1) Phetolelo e nngwe e balega ka gore: “Tumelo ke sešupo sa bohlatse sa dilo tše di holofetšwego. Tumelo ke go kgonthišega ka dilo tšeo re ka se kgonego go di bona.” (The Simple English Bible) Ge e ba re na le bohlatse bjo bo šupago gore re neilwe thoto, gona re ba le kgodišego ya gore thoto yeo ke ya rena. Ka ge re na le tumelo ya gore Modimo o dula a phethagatša lentšu la gagwe, go ba bjalo ka ge eka re swere lengwalo le bohlokwa la sešupo sa bohlatse. Tumelo ya rena e dira gore re kgodišege gore re tla bona go phethagatšwa ga dikholofetšo tše di theilwego ka Beibeleng tšeo re di letetšego, e bile re kgonthišegile ka dilo tša kgonthe tša moya, gaešita le ge re ka se kgone go di bona.

3, 4. (a) Sebete ke eng? (b) Tsela e nngwe ya go matlafatša tumelo ya rena le sebete ke efe?

3 Sebete ke matla a motho a go bolela le go dira dilo ntle le poifo ge a lebeletšane le maemo a thata le a kotsi. Ge e ba re na le sebete, gona re tiile matla, ga re boife selo e bile ka dinako tše dingwe re beta pelo.—Mar. 6:49, 50; 2 Tim. 1:7.

4 Tumelo le sebete ke dika tše di kgahlišago. Eupša a re re re ikwa re hlaelwa ke tumelo e bile re se na sebete. Ge e ba re ikwa ka tsela yeo, ka Beibeleng go na le dipego tša batho ba diketekete bao ba ilego ba bea mohlala wa go bontšha dika tšeo. Ka gona, tsela e nngwe ya go matlafatša tumelo ya rena le sebete ke go ela hloko e mengwe ya mehlala yeo.

 JEHOFA O BE A NA LE JOSHUA

5. Ke eng seo se bego se nyakega e le gore Joshua a atlege kabelong ya gagwe?

5 Anke re boeleng morago nywageng e ka bago e 3 500 e fetilego. Go be go šetše go fetile nywaga e 40 ga e sa le Baisiraele ba dimilione ba lokolotšwe bokgobeng kua Egipita ka letsogo le matla la Jehofa. Moporofeta Moshe e be e le moetapele wa bona. Ge a na le nywaga e 120, o ile a bona Naga ya Kholofetšo a le kgole gomme a hwa a le godimo ga Thaba ya Nebo. Mohlatlami wa gagwe e be e le Joshua, monna wa go ‘tlala moya wa bohlale.’ (Doit. 34:1-9) Baisiraele ba be ba le kgauswi le go tšea naga ya Kanana. E le gore a atlege ka ge e le moetapele wa bona, Joshua o be a swanetše go ba le bohlale bjo bo tšwago go Modimo. Le gona o be a tla swanelwa ke go ba le tumelo go Jehofa gomme a itlhatsele a le sebete e bile a tiile matla.—Doit. 31:22, 23.

6. (a) Joshua 23:6 e re kgothaletša gore re be le sebete sa go dira eng? (b) Re ithuta eng mantšung a lego go Ditiro 4:18-20 le Ditiro 5:29?

6 Bohlale, sebete le tumelo tšeo di bontšhitšwego ke Joshua nakong ya ge a be a thopa naga ya Kanana di swanetše go ba di matlafaditše Baisiraele. Lega go le bjalo, go oketša tabeng ya go tia matla ntweng, go be go tloga go nyakega gore ba be le sebete sa go dira seo Joshua a ba kgothaleditšego sona. Mafelelong a bophelo bja gagwe ge a be a šadiša setšhaba gabotse o itše: “Le beng sebete gore le lote le go dira tšohle tšeo di ngwadilwego pukung ya molao wa Moshe ka gore le ka mohla le se di tlogele gomme la ya ka go le letona goba le letshadi.” (Josh. 23:6) Go nyakega gore le rena re be le sebete gore re kwe Jehofa ka dinako tšohle. Se se akaretša mabakeng ao batho ba nyakago gore re dire dilo tše di thulanago le thato ya Modimo. (Bala Ditiro 4:18-20; 5:29.) Ge e ba re ithekga ka Jehofa ka thapelo, gona o tla re thuša gore re be le sebete.

KAMOO RE KA ATLEGIŠAGO TSELA YA RENA

7. Go be go nyakega eng gore Joshua a dire dilo ka sebete e bile a atlege?

7 Re swanetše go ithuta Lentšu la Modimo gomme re le diriše e le gore re be le sebete se se nyakegago sa go dira thato ya gagwe. Ge Joshua a eba mohlatlami wa Moshe, o ile a botšwa sona seo ka gore: “Wena eba le sebete gomme o tie matla kudu gore o ele hloko go dira go ya ka molao ka moka woo Moshe mohlanka wa ka a go laetšego wona. . . . . Puku ye ya molao e se ke ya tloga molomong wa gago, o e bale ka lentšu la tlasana mosegare le bošego e le gore o ele hloko go sepela ka tšohle tšeo di ngwadilwego ka go yona; ke mo o tla atlegišago tsela ya gago ke moka wa dira ka bohlale.” (Josh. 1:7, 8) Joshua o ile a latela keletšo yeo, gomme o ile a ‘atlegiša tsela ya gagwe.’ Ge e ba le rena re dira seo, gona re tla ba le sebete kudu gomme ra atlega tirelong ya Modimo.

Temana ya rena ya ngwaga ya 2013 e re: ‘Eba le sebete gomme o tie matla. Jehofa Modimo wa gago o na le wena.’—Joshua 1:9

8. Temana ya ngwaga ya 2013 e tšerwe lengwalong lefe, gomme o nagana gore mantšu ao a tla go thuša bjang?

8 Joshua o swanetše go ba a ile a matlafatšwa kudu ke ge a ekwa mantšu a Jehofa a latelago: “O be le sebete gomme o tie matla . . . O se ke wa boifa goba wa tšhoga, ka gobane Jehofa Modimo wa gago o na le wena gohle moo o yago gona.” (Josh. 1:9) Ka mo go swanago, Jehofa o na le rena. Ka gona anke re se ‘boife goba ra tšhoga,’ go sa šetšwe diteko tša rena. Seo se lemogegago kudu ke mantšu a rego: ‘Eba le sebete gomme o tie matla. Jehofa Modimo wa gago o na le wena.’ Mantšu ao a lego go Joshua 1:9 a kgethilwe go ba temana ya ngwaga ya 2013. Ruri a tla re matlafatša  dikgweding tšeo di letšego ka pele, go etša ge mantšu le ditiro tša ba bangwe bao ba bontšhitšego tumelo le sebete di tla re matlafatša.

BA ILE BA BA LE SEBETE

9. Rahaba o bontšhitše tumelo le sebete ka ditsela dife?

9 Ge Joshua a be a romela dihlodi tše pedi kua Kanana, Rahaba wa mogweba-ka-mmele o ile a di uta gomme a lahletša manaba a tšona. Ka baka la ditiro tša gagwe tša tumelo le sebete, Rahaba le ba lapa la gabo ba ile ba phološwa ge Baisiraele ba thopa motse wa Jeriko. (Baheb. 11:30, 31; Jak. 2:25) Therešo ke gore Rahaba o ile a tlogela boitshwaro bja gagwe bjo bo gobogilego e le gore a kgahliše Jehofa. Ba bangwe bao ba ilego ba fetoga Bakriste ba be ba na le tumelo, sebete le matla a boitshwaro a go dira diphetogo tše di swanago le tšeo gore ba kgahliše Modimo.

10. Ruthe o ile a tsena borapeding bja therešo ka tlase ga maemo afe, gomme o hweditše ditšhegofatšo dife?

10 Ka morago ga lehu la Joshua, Ruthe e lego mosadi wa Momoaba o ile a ba le sebete sa gore a be borapeding bja therešo. Ka ge a be a kile a nyalwa ke Moisiraele, go ka direga gore o be a tseba se itšego ka Jehofa. Mmatswale wa gagwe wa mohlologadi e lego Naomi, o be a dula Moaba eupša o ile a dira phetho ya go boela motseng wa Isiraele wa Betlelehema. Ge ba le tseleng, Naomi o ile a kgothaletša Ruthe go boela bathong ba gabo, eupša mosadi yoo wa Momoaba o ile a araba ka gore: “O se ke wa nthapeletša gore ke go tlogele, ke se hlwe ke sepela le wena . . . Batho ba geno e tla ba ba gešo, gomme Modimo wa gago ya ba Modimo wa ka.” (Ruthe 1:16) Ruthe o be a tloga a tiišitše. Ge nako e dutše e eya, monna yo a tswalanego le Naomi, e lego Boase, o ile a nyala Ruthe yo a ilego a mmelegela morwa gomme a ba makgolokhukhu wa Dafida le wa Jesu. Ee, Jehofa o šegofatša ditiro tša tumelo le sebete.—Ruthe 2:12; 4:17-22; Mat. 1:1-6.

BA BANTŠI BA ILE BA BEA MAPHELO A BONA KOTSING!

11. Jehoyada le Jehosheba ba bontšhitše sebete bjang, gomme se se bile le mafelelo afe?

11 Sebete sa rena le tumelo ya rena di matlafatšwa ke ge re bona gore Modimo o na le bao ba etišago pele dikgahlego tša gagwe le katlego ya badumedigotee le bona. Ka mohlala, ela hloko Moperisita yo a Phagamego Jehoyada le mosadi wa gagwe, Jehosheba. Ka morago ga lehu la Kgoši Ahasia, mmagwe e lego Athalia o ile a bolaya bana ba šetšego ba ka bogošing ka ntle le Jehoashe gomme a tšea bogoši ka kgang. Jehoyada le Jehosheba ba be ba beile maphelo a bona kotsing ka go phološa morwa wa Ahasia e lego Jehoashe ke moka ba mo khutiša ka nywaga e tshelelago. Ka ngwaga wa bošupa, Jehoyada o ile a dira gore Jehoashe a bewe kgoši gomme a laela gore Athalia a bolawe. (2 Dikg. 11:1-16) Ka morago Jehoyada o ile a thekga Kgoši Jehoashe gore a lokiše tempele. Ke moka ge Jehoyada a ehwa a na le nywaga e 130, o ile a bolokwa le dikgoši “ka gobane o be a dirile gabotse Isiraeleng, kudukudu go Modimo wa therešo le ntlong ya Gagwe.” (2 Dikor. 24:15, 16) Go oketša moo, ditiro tša sebete tša Jehoyada le mosadi wa gagwe di ile tša šireletša lešika la bogoši la go tloga go Dafida go ya go Mesia.

12. Ebede-meleke o ile a gata mogato ofe wa go ba le sebete?

12 Ebede-meleke, yo e bego e le molaki ntlong ya Kgoši Tsedekia, o ile a bea bophelo bja gagwe kotsing bakeng sa Jeremia. Kgoši e be e gafetše Jeremia go dikgošana tša Juda, tšeo di ilego tša mo latofatša ka maaka a gore o lwantšha mmušo gomme tša mo lahlela ka petseng ya leraga gore a hwele moo. (Jer. 38:4-6) Gaešita le ge Ebede-meleke a be a tseba gore Jeremia o be a hloilwe ke dikgošana tšeo, o ile a ipea kotsing ka go lopela moporofeta yoo go Tsedekia. Tsedekia o ile a arabela gabotse gomme a laela banna ba 30 gore ba sepele le Ebede-meleke ba yo lokolla Jeremia. A diriša moporofeta yoo, Modimo o ile a kgonthišetša Ebede-meleke gore a ka se fedišwe  ge Bababilona ba rakelela Jerusalema. (Jer. 39:15-18) Modimo o putsa batho bao ba nago le sebete sa go dira thato ya gagwe.

13. Ke mogato ofe wa go ba le sebete woo Baheberu ba bararo ba ilego ba o gata, gomme phihlelo ya bona e ka re hola bjang?

13 Lekgolong la bošupa la nywaga B.C.E., bahlanka ba Jehofa ba bararo ba Baheberu ba ile ba newa bohlatse bja gore Modimo o putsa ditiro tšeo di bontšhago gore motho o na le tumelo le sebete. Kgoši Nebukadinetsara o ile a kgobokanya bahlomphegi ba Babilona gomme a laela gore ba rapele seswantšho se setelele sa gauta. Motho le ge e le ofe yo a bego a ka se dire bjalo o be a tla lahlelwa sebešong se se tukago mollo. Baheberu bao ba bararo ba ile ba botša Nebukadinetsara gore: “Modimo wa rena yo re mo hlankelago o tla kgona go re hlakodiša. O tla re hlakodiša sebešong se se tukago mollo le seatleng sa gago, wena kgoši. Eupša ge e ba go ka se be bjalo, wena kgoši o tsebe gore ga re hlankele medimo ya gago, le seswantšho sa gauta seo o se hlomilego re ka se se rapele.” (Dan. 3:16-18) Go phološwa mo go kgahlišago ga Baheberu ba ba bararo go hlalositšwe gabotse go Daniele 3:19-30. Gaešita le ge go ka se direge gore re tšhošetšwe ka lehu sebešong se se tukago mollo, re lebeletšana le diteko tša potego e bile re kgodišegile gore Modimo o tla šegofatša tumelo ya rena le sebete.

14. Go ya ka Daniele kgaolo 6, Daniele o ile a bontšha bjang sebete, gomme ka mafelelo afe?

14 Daniele o ile a bontšha tumelo le sebete ge manaba a gagwe a be a atlega leanong la go botša Kgoši Dario gore a ntšhe lengwalo le le laelago gore “mang le mang yo a ka rapelago modimo le ge e le ofe goba motho le ge e le ofe ge e se wena kgoši, a lahlelwe moleteng wa ditau.” Gateetee ge Daniele a lemoga gore lengwalo leo le tiišitšwe ka seka, o ile “a tsena ka ntlong ya gagwe yeo mafasetere a yona ao a lebeletšego Jerusalema a bego a butšwe, a khunama ka matolo gararo ka letšatši a rapela Modimo wa gagwe le go mo tumiša, go etša ge a be a tlwaetše go dira bjalo peleng.” (Dan. 6:6-10) Daniele yo a nago le sebete o ile a lahlelwa ka moleteng wa ditau—eupša Jehofa o ile a mo hlakodiša.—Dan. 6:16-23.

Bakriste ba lekgolong la pele la nywaga ga se ba kwanantšha

15. (a) Akhwila le Perisila ba beile mohlala ofe wa tumelo le sebete? (b) Ke’ng seo se bolelwago ke mantšu a Jesu a lego go Johane 13:34, gomme Bakriste ba bantši ba ile ba bontšha bjang lerato le bjalo?

15 Beibele ga e re botše ka seo se ilego sa dira gore Akhwila le Perisila ‘ba ipee kotsing ya go kgaolwa melala bakeng sa moya wa Paulo.’ (Dit. 18:2; Baroma 16:3, 4) Ka sebete ba ile ba dira dilo ka go dumelelana le mantšu a Jesu a rego: “Ke le nea taelo e mpsha ya gore le ratane; go etša ge ke le ratile, gore le lena le ratane.” (Joh. 13:34) Molao wa Moshe o be o nyaka gore motho a rate moagišani wa gagwe ka mokgwa wo a ithatago ka wona. (Lef. 19:18) Eupša taelo ya Jesu e be e le “e mpsha” ge a hlalosa gore lerato le be le tla fihla bokgoleng  bja gore re gafe bophelo bja rena bakeng sa ba bangwe, go etša ge yena a dirile. Bakriste ba bantši ba ile ba bontšha lerato ka sebete ka ‘go ipea kotsing ya go kgaolwa melala’ e le gore ba pheme go bea badumedigotee le bona kotsing ya gore ba se swarwe ka sehlogo goba ba bolawe ke manaba a bona.—Bala 1 Johane 3:16.

16, 17. Balatedi ba bangwe ba Kriste ba lekgolong la pele la nywaga ba ile ba lebana le teko efe ya tumelo, gomme se se ka bapetšwa bjang le diphihlelo tša Bakriste ba itšego ba mehleng ya rena?

16 Go swana le Jesu, Bakriste ba lekgolong la pele la nywaga ba ile ba ba le sebete sa go rapela Jehofa feela. (Mat. 4:8-10) Ba ile ba gana go fišetša mmušiši wa Roma diorelo. (Bona seswantšho.) Daniel P. Mannix o ngwadile gore: “Ke Bakriste ba sego kae feela bao ba ilego ba latola tumelo, gaešita le ge aletare yeo e bego e tuka mollo gantši e be e bewa moo ba bego ba ka kgona go e diriša gabonolo. Seo mogolegwa a bego a swanetše go se dira e be e le go fo gaša seorelo kgabong ya mollo gomme a newa Lengwalo la bohlatse la Sehlabelo ke moka a lokollwa. O be a bile a hlalosetšwa ka botlalo gore o be a sa rapele mmušiši; o be a botšwa gore o fo hlompha bomodimo bja mmušiši ka ge e le hlogo ya mmušo wa Roma. Lega go le bjalo, mo e ka bago Bakriste ka moka ga se ba ka ba dumelelana le seo.”—Those About to Die.

17 Bakriste ba mehleng yeno bao ba bego ba golegilwe dikampeng tša tlaišo tša Nazi gomme ba lebeletšane le kgonagalo ya go hwa, ba ile ba newa dibaka leboelela gore ba ka lokollwa ge feela ba ka saena boipolelo bja go latola Jehofa. Eupša ke feela ba sego kae bao ba ilego ba saena. Morago bjale, Dihlatse tša Matutsi le Mahutu di ile tša šireletšana ka go ipea kotsing ya go bolawa nakong ya polao ya molokwanarite kua Rwanda. Diteko tše bjalo di nyaka gore motho a be le tumelo le sebete.

GOPOLA GORE JEHOFA O NA LE RENA!

18, 19. Ke mehlala efe ya ka Beibeleng ya tumelo le sebete yeo e ka re thušago go dira modiro wa rena wa boboledi?

18 Ga bjale re na le tokelo ya go tšea karolo modirong o mogologolo wo o kilego wa gafelwa bahlanka ba Modimo, e lego wa go bolela ka molaetša wa Mmušo le wa go dira barutiwa. (Mat. 24:14; 28:19, 20) Re leboga gakaakaang mohlala wa Jesu woo o sa bapišwego le selo! O ile a “tloga motseng o mongwe a ya go o mongwe le go tloga motsaneng o mongwe go ya go o mongwe a bolela le go tsebatša ditaba tše dibotse tša Mmušo wa Modimo.” (Luka 8:1) Go swana le yena, re swanetše go ba le tumelo le sebete e le gore re bolele molaetša wa Mmušo. Ka thušo ya Modimo, re ka ba le sebete go swana le Noa, “mmoledi wa toko” yo a bego a na le sebete “lefaseng la batho ba go se boife Modimo” leo le bego le le kgauswi le go fedišwa ka meetsefula.—2 Pet. 2:4, 5.

19 Thapelo e re thuša go dira modiro wa boboledi. Ge balatedi ba itšego ba Kriste ba tlaišwa gomme ba rapelela gore ba ‘bolele lentšu la Modimo ka sebete, thapelo yeo e ile ya arabja. (Bala Ditiro 4:29-31.) Ge e ba ka tsela e itšego o lešwa dihlong ke go dira boboledi ka ntlo le ntlo, gona Jehofa o tla araba dithapelo tša gago tša gore o be le tumelo e oketšegilego le sebete.—Bala Psalme 66:19, 20. *

20. Re na le thekgo efe ka ge re le bahlanka ba Jehofa?

20 E tloga e le tlhohlo go phegelela tsela ya Modimo ge re welwa ke diteko lefaseng le le kgopo le le nago le mathata. Lega go le bjalo, ga re noši. Modimo o na le rena. Morwa wa gagwe yo e lego Hlogo ya phuthego, le yena o na le rena. Le gona go na le Dihlatsegotee le rena tša Jehofa tše fetago 7 000 000 lefaseng ka bophara. Anke ka moka ga rena re tšweleng pele re bontšha tumelo gomme re bolele ditaba tše dibotse ge re dutše re gopola temana ya rena ya ngwaga ya 2013 e rego: ‘Eba le sebete gomme o tie matla. Jehofa Modimo wa gago o na le wena.’—Josh. 1:9.

^ ser. 19 Bona mehlala e oketšegilego ya bao ba ilego ba bontšha sebete sehlogong seo se rego: “Eba le Sebete Gomme o Tie Matla Kudu” go Morokami wa February 15, 2012.