Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2013

Ba Ile ba Ikgafa go tšwa Pelong—kua Norway

Ba Ile ba Ikgafa go tšwa Pelong—kua Norway

NYWAGA e sego kae e fetilego, Roald le mosadi wa gagwe Elsebeth, bao ka nako yeo ba bego ba obelela nywageng ya bo-50, ba be ba dutše gabotse Bergen, e lego toropo ya bobedi ka bogolo ya Norway. Ba be ba hlankela ka potego ka phuthegong ba na le morwedi wa bona Isabel gotee le morwa wa bona Fabian. Roald o be a hlankela e le mogolo gomme Elsebeth e le mmulamadibogo, mola Isabel le Fabian e be e le bagoeledi ba fišegago.

Lega go le bjalo, ka September 2009, lapa le le ile la kgetha go dira selo se fapanego, e lego go dira boboledi lefelong le lego lekatana ka beke e tee. Ka baka leo, Roald, Elsebeth gotee le Fabian yoo ka nako yeo a bego a na le nywaga e 18, ba ile ba etela Nordkyn, e lego pheninsula yeo e lego seleteng sa Finnmark, ka godimo ga Arctic Circle. Ge ba le moo, ba ile ba dira boboledi ba na le bana babo rena le dikgaetšedi bao ba bego ba tlile moo motsaneng wa Kjøllefjord gore le bona ba dire modiro wa boboledi. Roald o gopola gore: “Mathomong a beke yeo, ke be ke ikwa ke kgotsofatšwa ke gore ke kgonne go rulaganya maemo a ka gore ke tšee karolo modirong wo o kgethegilego beke ka moka.” Eupša ka morago bekeng yona yeo, Roald o ile a thoma go se sa dudišega. Go be go diragetše’ng?

 POTŠIŠO E SA LETELWAGO

Roald o re: “Go sa letelwa, mmulamadibogo yo mongwe yo a hlankelago Finnmark e lego Mario, o ile a re botšiša ge e ba re ka kgona go hudugela toropong e bitšwago Lakselv, go yo thuša phuthego yeo e nago le bagoeledi ba 23.” Roald o ile a makala ge a ekwa potšišo ye yeo e sa letelwago. O hlalosa gore: “Nna le Elsebeth re be re kile ra nagana ka go hlankela moo go bego go nyakega bagoeledi ba oketšegilego, eupša re be re ikemišeditše go dira seo ge bana ba rena ba godile.” Ka baka leo, gaešita le matšatšing ao a sego kae ao Roald a a feditšego a dira boboledi lefelong leo le lego lekatana, o be a kgona go lemoga gore batho ba nyaka go ithuta ka Jehofa. Ba be ba nyaka thušo ka yona nako yeo, e sego ka nako e nngwe. Roald o gopola gore: “Ke ile ka naganišiša kudu ka potšišo yeo moo ke ilego ka palelwa ke go robala matšatši a mmalwa.” Ka morago Mario o ile a iša Roald le lapa la gagwe Lakselv, yeo e ka bago dikhilomithara tše 240 ka borwa bja Kjøllefjord. Mario o be a nyaka gore ba etele lefelo leo gore ba bone ka bobona phuthego e nyenyane ya moo.

Ge ba le Lakselv, yo mongwe wa bagolo ba babedi ba moo e lego Andreas, o ile a ba thuša go boga naga le Holo ya Mmušo ya moo. Phuthego e ile ya ba amogela ka borutho gomme ya botša Roald le Elsebeth gore e ka thabela go šoma gotee le lapa la bona ge e ba le ka hudugela moo go tlo thuša ka modiro wa Mmušo. Andreas o ile a bolela a myemyela gore o šetše a rulagantše gore Roald le Fabian ba kopane le motho yo a bego a ka ba thwala! Na lapa le le be le tla hudugela moo?

NA RE HUDUGE?

La mathomo ge Fabian a nagana ka se o ile a re: “Ga ke kganyoge go hudugela mo.” Taba ya go tlogela bagwera ba gagwe ba bohlokwa bao a godilego le bona phuthegong ya gabo gore a yo dula torotswaneng e be e sa mo thabiše. Le gona, o be a se a fetša go ithutela mošomo wa go ba ramohlagase. Lega go le bjalo, ge Isabel (yo ka nako yeo a bego a na le nywaga e 21) a be a botšišwa ge e ba a ka rata go huduga, o ile a bolela ka lethabo gore: “Ke kgale ke nyaka go dira selo sa mohuta wo!” Eupša o ile a tšwela pele ka gore: “Ge ke be ke naganišiša ka mo go tseneletšego ka taba ye, ke ile ka ipotšiša gore: ‘Na ye ruri e tla ba phetho e botse? Na nka se hlologele bagwera ba ka? Na ke fo dula phuthegong ya gešo, moo dilo di lego bonolo e bile di fetogilego setlwaedi?’” Na Elsebeth yena o ile a ikwa bjang ka go huduga? O re: “Ke be ke ikwa eka Jehofa o neile lapa la ka kabelo, eupša gape ke ile ka naganišiša ka ntlo ya rena yeo e sa tšwago go mpshafatšwa le dilo ka moka tšeo di lego ka gare ga yona tšeo re di kgobokeditšego nywageng e 25 e fetilego.”

Elsebeth le Isabel

Roald gaešita le lapa la gagwe ba ile ba boela Bergen ka morago ga beke yeo e kgahlišago, eupša ba be ba sa fetše go nagana ka bana babo bona le dikgaetšedi ba Bakriste ba dulago Lakselv, yeo e lego dikhilomithara tše ka bago tše 2 100. Elsebeth o re: “Ke ile ka rapela Jehofa gantši gomme ka romelana diswantšho le diphihlelo le bagwera bao ke bego ke kopane le bona.” Roald o re: “Ke be ke nyaka nako gore taba ye e nwelele monaganong wa ka. Le gona, ke ile ka swanelwa ke go kgonthišetša gore maemo a ka a tla ntumelela go dira seo. Ke ile ka ipotšiša ge e ba go na le tsela yeo re ka iphedišago ka yona. Ke ile ka rapela Jehofa gantši gomme ka boledišana le lapa la ka gotee le bana bešo ba nago le phihlelo.” Fabian o gopola gore: “Ge ke be ke naganišiša ka mo go oketšegilego ka taba ye, ke ile ka lemoga gore ge e le gabotse ga ke na lebaka la go gana. Ke ile ka rapela Jehofa gantši, gomme kganyogo ya ka ya go huduga e ile ya gola ganyenyane-ganyenyane.” Go thwe’ng ka Isabel? O ile a ba mmulamadibogo torotswaneng ya gabo gore a kgone go itokišeletša go huduga. Ka morago ga dikgwedi tše tshela e le mmulamadibogo, e lego tšeo a di feditšego a diriša nako ya gagwe e ntši thutong ya motho ka noši ya Beibele, o ile a ikwa a loketše go huduga.

GO GATA MEGATO YA GO FIHLELELA PAKANE YA BONA

Ge kganyogo ya lapa leo ya go hlankela moo go nyakegago bagoeledi ba oketšegilego e gola, le ile la gata megato ya go fihlelela pakane ya lona. Roald o be a na le mošomo wo o lefago gabotse woo a bego a o rata, eupša o ile a kgopela go se šome ngwaga ka moka ntle le tefo. Lega go le bjalo, mothwadi wa gagwe o ile a mo kgopela gore e be mošomi wa nakwana—a šome dibeke tše pedi gomme a khutše ka dibeke tše tshela. Roald o re: “Moputso wa ka o ile wa fokotšwa kudu, eupša o ile wa re phediša.”

Elsebeth o hlalosa gore: “Monna wa ka o ile a nkgopela gore ke leke go hwetša ntlo yeo re ka dulago go yona Lakselv gomme re hiriše ntlo ya rena ya Bergen. Le ge go tšere nako e ntši le boiteko, re ile ra atlega.” O tlaleletša ka gore: “Ka moragonyana, bana ba rena ba ile ba hwetša mešomo ya nakwana, gomme ba re thuša go lefelela ditshenyagalelo tša dijo le dinamelwa.”

Isabel o re: “Ka ge toropo yeo re hudugetšego go yona e  le e nyenyane, tlhohlo ya ka e kgolo e bile go hwetša mošomo woo nka iphedišago ka wona ge ke dutše ke le mmulamadibogo. Ka dinako tše dingwe, ke be ke se na kholofelo.” Lega go le bjalo, ka go šoma mošomo le ge e le ofe wa nakwana woo a bego a o hwetša, Isabel o be a kgona go lefelela ditshenyagalelo tša gagwe ka moka. Ngwageng wa gagwe wa mathomo o šomile mešongwana e senyane ya nakwana. Dilo di ile tša sepelela Fabian bjang? O re: “E le gore ke kgone go fetša dithuto tša ka tša gore ke be ramohlagase, ke ile ka swanelwa ke go ithutela go dira mošomo woo. Ke ile ka dira seo kua Lakselv. Ka morago, ke ile ka atlega ditlhahlobong tša ka gomme ka hwetša mošomo wa nakwana wa go ba ramohlagase.”

KAMOO BA BANGWE BA KATOLOŠITŠEGO BODIREDI BJA BONA

Marelius le Kesia ba nea bohlatse go mosadi wa Mosami kua Norway

Marelius le mosadi wa gagwe, Kesia, le bona ba be ba nyaka go hlankela moo go bego go nyakega bagoeledi ba oketšegilego. Marelius yo ga bjale a nago le nywaga e 29, o re: “Dipolelo le diphihlelo tša dikopanong tša selete tšeo di bolelago ka go tsenela bobulamadibogo di ile tša dira gore ke naganišiše ka go katološa bodiredi bja ka.” Lega go le bjalo, Kesia yo ga bjale a nago le nywaga e 26, o be a bona e le lepheko go hudugela kgole a šia lapa la gabo. O hlalosa gore: “Ke be ke boifa kgopolo ya go ba kgole le batho bao ke ba ratago.” Go oketša moo, Marelius o be a na le mošomo wa nako e tletšego gore a kgone go lefelela ntlo ya bona. O re: “Ka thušo ya Jehofa le dithapelo tše dintši tšeo go tšona re mo kgopetšego gore a re thuše go dira diphetogo, re ile ra kgona go huduga.” Sa pele, ba ile ba fetša nako e ntši ba ithuta Beibele. Ka morago, banyalani ba ba ile ba rekiša ntlo ya bona, ba tlogela mešomo ya bona gomme ka August 2011 ba hudugela toropong ya Alta, ka leboa la Norway. Ge ba le moo, Marelius o ile a šoma e le ramatlotlo gomme Kesia a šoma lebenkeleng gore ba kgone go iphediša ge ba bula madibogo.

Knut le Lisbeth, e lego banyalani bao ba lego nywageng ya magareng ya bo-30, ba ile ba kgongwa ke dipego tšeo di lego ka gare ga Yearbook tša bao ba hlankelago moo go nyakegago bagoeledi ba oketšegilego ba Mmušo. Lisbeth o re: “Diphihlelo tše di ile tša dira gore re naganišiše ka go hlankela nageng e šele, eupša ke ile ka belaela ge e ba motho yo a tlwaelegilego bjalo ka nna a ka kgona go dira seo.” Lega go le bjalo, ba ile ba gata megato ya go fihlelela pakane ya bona. Knut o re: “E le gore re bee tšhelete, re ile ra rekiša folete ya rena gomme ra yo dula le mma. Ka morago, re ile ra hudugela phuthegong ya Seisemane kua Bergen ka ngwaga o tee e le gore re kgone go bona gore go bjang go hlankela nageng e šele, gomme ra dula le mmago Lisbeth moo.” Go se go ye kae, Knut le Lisbeth ba be ba ikwa ba loketše go huduga, gomme ba ile ba gata mogato o mogolo ka go hudugela Uganda. Ba boela Norway dikgwedi tše pedi ngwaga o mongwe le o mongwe gore ba tle ba šome. Ka tsela yeo, ba ba le tšhelete e lekanego ya go iphediša ngwaga ka moka ge ba le modirong wa boboledi Uganda.

“LATSWANG LE BE LE BONENG GORE JEHOFA O LOKILE”

Dilo di ile tša sepelela bjang bašomi ba ba ilego ba ikgafa go tšwa pelong? Roald o re: “Re fetša nako e ntši re le lapa lefelong le la lekatana go feta nako yeo re bego re e fetša re le gotee kua Bergen. Lapa la rena le batamelane kudu. Go bona bana ba rena ba gola moyeng e  bile tšhegofatšo.” O tlaleletša ka gore: “Le gona, re na le pono e lekalekanego ka dilo tša nama. Ga di sa le bohlokwa go etša kamoo re bego re nagana ka gona.”

Elsebeth o ile a lemoga bohlokwa bja go ithuta leleme le lengwe. Ka baka la’ng? Tšhemo ya phuthego ya Lakselv e akaretša motse wa Karasjok, moo go dulago Basami—badudi ba setlogo ba tikologong ya leboa la Norway, Sweden, Finland le Russia. E le gore re kgone go boledišana gabonolo le badudi ba moo, Elsebeth o ile a ithuta Sesami. Ga bjale o kgona go boledišana le motho ka leleme leo. Na o ipshina ka tšhemo yeo e mpsha? Elsebeth o bolela ka go myemyela gore: “Ke swara dithuto tše tshela tša Beibele. Le gatee ga ke nyake go ba lefelong le lengwe!”

Fabian, yoo ga bjale a hlankelago e le mmulamadibogo le mohlanka wa bodiredi, o laodiša gore yena le Isabel ba ile ba thuša bafsa ba bararo ba lego mahlalagading. Bafsa bao ba be ba le phuthegong ya gabo bona e mpsha gomme ba nyaka go kgothatšwa gore ba tšee karolo kutšwanyana medirong ya phuthego. Bjale bafsa ba ba bararo ba mafolofolo bodireding. Ge e le gabotse, ba babedi ba bona ba kolobeditšwe gomme ba ile ba tsenela bobulamadibogo bja go thuša ka March 2012. Yo mongwe wa bafsa bao yo a bego a aroga therešong o ile a leboga Fabian le Isabel gore ba mo thušitše go “tia tumelong gape.” Fabian o re: “Ke ile ka kgomega kudu ge a bolela seo. Go tloga go thabiša go thuša motho yo mongwe!” Isabel o re: “Ge ke le kabelong ye, ke ile ka ‘latswa le go bona gore Jehofa o lokile.’” (Ps. 34:8) O tlaleletša ka gore: “E bile go hlankela mo go tloga go thabiša!”

Marelius le Kesia ga bjale ba phela bophelo bjo bonolo eupša e le bjoo bo tlogago bo humile. Phuthego yeo ba ilego ba hudugela go yona ya kua Alta, ga bjale e na le bagoeledi ba 41. Marelius o re: “Ge ke gadima morago, go kgothatša kudu go bona kamoo bophelo bja rena bo ilego bja fetoga ka gona. Re leboga Jehofa gore re hlankela re le babulamadibogo lefelong le. Ga go na selo seo se kgotsofatšago go phala se.” Kesia o tlaleletša ka gore: “Ke ile ka ithuta go bota Jehofa ka mo go feletšego, gomme o ile a re hlokomela. Le gona ke ile ka hwetša gore go phela kgole le ba leloko go nthušitše gore ke tšeele godimo dinako tšeo re di fetšago re na le bona. Le ka mohla ga ke itsholele phetho ya rena.”

Knut le Lisbeth ba ithuta le lapa la kua Uganda

Bjale Knut le Lisbeth bona di ba sepelela bjang kua Uganda? Knut o laodiša ka gore: “Go tšere nako e telele gore re tlwaele tikologo e mpsha le setšo sa gona. Re fela re eba le mathata a meetse, mohlagase le go dubega teng, eupša re kgona go swara dithuto tše dintši tša Beibele!” Lisbeth o re: “Mo e ka bago seripa sa iri go tloga moo re dulago gona, go na le ditšhemo tšeo di sa kago tša fihlelelwa ka ditaba tše dibotse. Eupša ge re eya moo, re hwetša batho ba bala Beibele gomme ba kgopela gore re ba rute. Ruri lethabo la go ruta batho ba bjalo ba ikokobeditšego molaetša wa Beibele le ka se bapišwe le selo!”

Ruri Moetapele wa rena, e lego Kriste Jesu, o thabišwa ke go bona a le legodimong kamoo modiro wa boboledi woo a o thomilego o dirwago ditikologong tše oketšegilego tša lefase! Ee, batho ba Modimo ka moka ba thabišwa ke go ithaopela go phetha taelo ya Jesu ya gore ba “dire batho ba ditšhaba ka moka barutiwa.”—Mat. 28:19, 20.

Ithute ka mo go oketšegilego

KE BOMANG BAO BA DIRAGO THATO YA JEHOFA LEHONO?

Babulamadibogo ba na le Dikolo Dife?

Bao ba fetšago nako e ntši ba le modirong wa go bolela ka Mmušo wa Modimo ba diretšwe dikolo dife tše di kgethegilego?