Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) DECEMBER 2012

O Molaki yo a Botegago!

O Molaki yo a Botegago!

“Ga le ba lena.” —1 BAKOR. 6:19.

1. Lefase ka kakaretšo le na le kgopolo efe ka go itaola?

NYWAGA e ka bago e 2 500 e fetilego, mongwadi yo mongwe wa Mogerika o ngwadile gore: “Ga go motho yoo a rwalago joko ya bokgoba ka go rata.” Ba bantši lehono ba tla dumelelana le mantšu ao ntle le go dikadika. Lentšu bokgoba le tšweletša kgopolo ya batho bao ba gateletšwego le bao ba tlemilwego, bao mošomo wa bona le boikgafo bja bona di sa ba holego, eupša di holago batho bao ba ba rekilego le go ba laola.

2, 3. (a) Ke tema efe yeo bahlanka ba Kriste ba thabelago go e kgatha? (b) Ke dipotšišo dife mabapi le bolaki tšeo re tlago go di ahlaahla?

2 Lega go le bjalo, Jesu o bontšhitše gore barutiwa ba gagwe e be e tla ba bahlanka goba makgoba a ikokobeditšego. Eupša go ba ga Bakriste ba therešo makgoba ga go ba nyenyefatše goba go ba gatelela. Bahlanka bao ba maemong a phagamego, ba a botega e bile ba a hlomphega. Ka mohlala, pejana ga ge Jesu a bolawa, ela hloko seo a se boletšego ka “mohlanka” yo mongwe. Kriste o boletše gore o tla abela “mohlanka yo a botegago le wa temogo” boikarabelo.—Mat. 24:45-47.

3 Go a kgahliša gore pegong e swanago le ye, mohlanka yoo o bitšwa “molaki.” (Bala Luka 12:42-44.) Bontši bja Bakriste ba botegago bao ba phelago ga bjale ga se ditho tša sehlopha sa molaki yoo yo a botegago. Lega go le bjalo, Mangwalo a bontšha gore bohle bao ba hlankelago Modimo ba gafetšwe bolaki. Boikarabelo bja bona bo akaretša eng? Boikarabelo bjoo bo swanetše go lebelelwa bjang? E le gore re arabe dipotšišo tšeo, anke re ahlaahleng tema yeo e bego e kgathwa ke balaki mehleng ya bogologolo.

TEMA YEO E KGATHWAGO KE BALAKI

4, 5. Balaki ba bogologolo ba be ba na le boikarabelo bofe? Nea mehlala.

4 Mehleng ya bogologolo, gantši molaki e be e le lekgoba leo le bego le botega leo le gafetšwego go okamela ntlo  ya mong wa lona goba ditaba tša gagwe tša kgwebo. Ka gona, balaki ba be ba na le matla go fihla bokgoleng bjo itšego gomme ba be ba laola dilo tša ka lapeng, tšhelete gotee le bahlanka ba bangwe. Re kgona go bona se tabeng ya Eliesere, yo a bego a gafetšwe go hlokomela dilo tše dintši tša Aborahama. Go ka direga gore Aborahama o ile a romela Eliesere kua Mesopotamia gore a yo kgethela morwa wa gagwe Isaka mosadi. Ruri kabelo ye e be e le ya bohlokwa e bile e akaretša dilo tše dintši!—Gen. 13:2; 15:2; 24:2-4.

5 Setlogotlogolwana sa Aborahama e lego Josefa se be se okametše ntlo ya Potifara. (Gen. 39:1, 2) Ka morago, Josefa le yena o ile a ba le molaki wa gagwe, yo a bego a gafetšwe go okamela ‘ntlong ya gagwe.’ Molaki yoo o ile a amogela bana babo Josefa ba lesome ka borutho. Le gona o ile a latela taelo ya Josefa ya gore a tsenye ka mokotleng senwelo sa silifera seo go bego go thwe se utswitšwe. Go molaleng gore balaki ba be ba na le boikarabelo bjo bogolo.—Gen. 43:19-25; 44:1-12.

6. Bagolo ba fapafapanego ba Bakriste ba gafetšwe bolaki bofe?

6 Nywagakgolo ka morago, moapostola Paulo o ile a ngwala gore balebeledi ba Bakriste e be e swanetše go ba ‘balaki ba Modimo.’ (Tito 1:7) Ka ge balebeledi ba kgethetšwe go diša “mohlape wa Modimo,” ba nea tlhahlo le go etelela pele ka phuthegong. (1 Pet. 5:1, 2) Therešo ke gore boikarabelo bja bona ga bo swane. Ka mohlala, bontši bja balebeledi ba Bakriste lehono bo hlankela phuthego e tee. Balebeledi ba basepedi ba hlankela diphuthego tše dintši. Diphuthego tša dinaga ka moka di hlokomelwa ke ditho tša Dikomiti tše fapafapanego tša Makala. Lega go le bjalo, ka moka ga bona go letetšwe gore ba phethagatše boikarabelo bja bona ka potego; ka moka ga bona ba “ikarabela” go Modimo.—Baheb. 13:17.

7. Re tseba bjang gore Bakriste ka moka ke balaki ka kgopolo e itšego?

7 Lega go bjalo, go thwe’ng ka Bakriste ba bangwe ba bantši bao e sego balebeledi? Moapostola Petro o ile a ngwalela Bakriste ka kakaretšo lengwalo, a re: “Go fihla bokgoleng bjoo ka bjona yo mongwe le yo mongwe a amogetšego mpho, e dirišeng ge le hlankelana le le balaki ba babotse ba botho bjo bogolo bja Modimo bjo bo bontšhwago ka ditsela tše di fapafapanego.” (1 Pet. 1:1; 4:10) Modimo ka botho bja gagwe bjo bogolo o neile yo mongwe le yo mongwe wa rena dimpho, matlotlo, bokgoni goba ditalente tšeo re ka di dirišago go hola badumedigotee le rena. Ka baka leo, bohle bao ba hlankelago Modimo ke balaki, gomme seo se nyaka gore ba hlomphege, ba botege gomme ba bontšhe gore ba na le boikarabelo.

RE BA MODIMO

8. Ke molao ofe wa motheo o bohlokwa woo re swanetšego go o gopola?

8 Ga bjale re tla lebeledišiša melao e meraro ya motheo yeo rena balaki re swanetšego go e hlokomela. Wa pele: Re ba Modimo e bile re ikarabela go yena. Paulo o ngwadile gore: “Ga le ba lena, gobane le rekilwe ka theko e kgolo,” e lego madi a sehlabelo a Kriste. (1 Bakor. 6:19, 20) Ka ge re le ba Jehofa, re tlamegile go theetša ditaelo tša gagwe, gobane ga di boima. (Baroma 14:8; 1 Joh. 5:3) Le gona re fetoga makgoba a Kriste. Ka go swana le balaki ba mehleng ya bogologolo, re na le tokologo e ntši—eupša tokologo ya rena e lekanyeditšwe. Re swanetše go swara boikarabelo bja rena ka tsela yeo re laetšwego ka yona. Go sa šetšwe gore re na le ditokelo dife tša tirelo, re sa dutše re le bahlanka ba Modimo le ba Kriste.

9. Jesu o ile a swantšha bjang tswalano magareng ga mohlanka le mong wa gagwe?

9 Jesu o re thuša go kwešiša tswalano magareng ga mohlanka le mong wa gagwe. Lebakeng le lengwe o kile a botša barutiwa ba gagwe ka mohlanka yo a ilego a tla gae ka morago ga ge a šomile letšatši ka moka. Na mong wa gagwe o re go yena: “Etla mo kapejana o dule tafoleng”? Aowa. O re: “Ntokišetše  dijo tša go lalela, o apare thetho o mphe tše ke di nyakago go fihla ke fetša go ja le go nwa gomme ka morago wena o ka ja le go nwa.” Jesu o ile a hlalosa bjang seswantšho seo? O itše: “Ka gona le lena ge le dirile dilo ka moka tše le di abetšwego le re: ‘Ga re bahlanka ba selo. Seo re se dirilego ke seo re bego re swanetše go se dira.’”—Luka 17:7-10.

10. Ke eng seo se bontšhago gore Jehofa o tšeela godimo maiteko a rena a go mo hlankela?

10 Therešo ke gore Jehofa o tšeela godimo maiteko a rena a go mo hlankela. Beibele e re kgonthišetša gore: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.” (Baheb. 6:10) Le ka mohla Jehofa ga a re kgopele go dira dilo tšeo a tsebago gore di tla re palela. Go oketša moo, selo le ge e le sefe seo a kgopelago gore re se dire se hola rena e bile ga se imele le ka mohla. Lega go le bjalo, ka go dumelelana le seswantšho se sa Jesu, mohlanka ga a ikgahliše, ga a etiše dikgahlego tša gagwe pele. Tabakgolo ke gore, ge re ineela go Modimo, re kgetha go etiša dikgahlego tša gagwe pele maphelong a rena. Na ga o dumelelane le seo?

SEO JEHOFA A SE NYAKAGO GO RENA KA MOKA

11, 12. Ka ge re le balaki, re swanetše go ba le seka sefe gomme re pheme sefe?

11 Molao wa bobedi wa motheo šo: Ka ge re le balaki, ka moka ga rena re swanetše go kgomarela ditekanyetšo tše swanago. Ke therešo gore boikarabelo bjo bongwe bo abelwa ba sego kae feela ka phuthegong ya Bokriste. Eupša go nyakega gore bontši bja rena re phethagatše boikarabelo bjo bo swanago. Ka mohlala, ka ge re le barutiwa ba Kriste le Dihlatse tša Jehofa, re laetšwe gore re ratane. Jesu o boletše gore lerato ke leswao la Bakriste ba therešo. (Joh. 13:35) Lega go le bjalo, ga re rate feela bana babo rena ba moya. Re katanela go rata le bao ba sa tswalanago le rena tumelong. Seo ke sona seo ka moka ga rena re ka kgonago go se dira, e bile re swanetše go dira bjalo.

12 Le gona ka moka ga rena re swanetše go itshwara gabotse. Re swanetše go phema boitshwaro le mekgwa ya bophelo tšeo di ganetšwago ke Lentšu la Modimo. Paulo o ngwadile gore: “Ge e le diotswa goba barapedi ba medimo ya diswantšho goba dihlotlolo goba banna ba ba boloketšwego merero yeo e sego ya tlhago goba banna ba ba robalago le banna, goba mahodu goba batho ba megabaru goba matagwa goba ba maroga goba bahlakodi ba ka se je bohwa bja mmušo wa Modimo.” (1 Bakor. 6:9, 10) Go ba gona, go nyakega boiteko bjo bogolo gore motho a phele ka go dumelelana le ditekanyetšo tša Modimo tša go loka. Eupša boiteko bjoo bo a nyakega, ka gobane bo re tšwela mehola e mentši, go akaretša le tsela ya bophelo yeo e dirago gore re phele gabotse mmeleng, re be le ditswalano tše dibotse le ba bangwe gomme re amogelwe ke Modimo.—Bala Jesaya 48:17, 18.

13, 14. Ke boikarabelo bofe bjoo bo rwešitšwego Bakriste ka moka, gomme re swanetše go bo lebelela bjang?

13 Le gona gopola gore molaki o be a na le mošomo wo a swanetšego go o dira. Go bjalo le go rena. Re neilwe mpho e bohlokwahlokwa—re tseba therešo. Modimo o letetše gore re abele ba bangwe tsebo yeo. (Mat. 28:19, 20) Paulo o ngwadile gore: “A motho a re tšee re le bahlankedi ba Kriste e bile re le balaki ba diphiri tše kgethwa tša Modimo.” (1 Bakor. 4:1) Paulo o ile a lemoga gore bolaki bjo bo be bo akaretša go hlokomela ka šedi “diphiri tše kgethwa” le go di ruta ba bangwe ka potego, go etša ge Mong wa rena Jesu Kriste a laetše.—1 Bakor. 9:16.

14 Ge e le gabotse, go abela ba bangwe therešo ke pontšho ya gore re a ba rata. Go ba gona, maemo a Bakriste ga a swane. Ga se ka moka ga bona ba ka fihlelelago dilo tše di swanago bodireding. Jehofa o kwešiša seo. Selo se bohlokwa ke gore re dire sohle seo re ka se kgonago. Ka go dira bjalo re tla ba re  bonagatša moya wa go se be le boithati wa go rata Modimo le moagišani wa rena.

Anke re phetheng ka potego boikarabelo bjoo re bo abetšwego

BOHLOKWA BJA GORE RE BOTEGE

15-17. (a) Ke ka baka la’ng go le bohlokwa gore molaki a botege? (b) Jesu o bontšhitše bjang ditlamorago tša go se botege?

15 Molao wa motheo wa boraro, e lego woo o tswalanago kgauswi le e mebedi e fetilego šo: Re swanetše go botega. Molaki a ka ba a na le dika tše dintši tše dibotse le bokgoni, eupša di ka se bolele selo ge e ba a sa phethe boikarabelo bja gagwe goba a sa botegele mong wa gagwe. Go bohlokwa gore molaki a botege ge e ba a tla atlega. Gopola gore Paulo o ngwadile gore: “Seo se letetšwego go balaki ke gore ba hwetšwe ba botega.”—1 Bakor. 4:2.

16 Ge e ba re botega, re tlo putswa; ga go tselapedi. Ge e ba re sa botege, re tlo loba. Re bona molao woo wa motheo seswantšhong sa Jesu sa ditalente. Bahlanka bao ka potego ba ilego ba “gweba” ka tšhelete ya mong wa bona ba ile ba retwa gomme ba šegofatšwa kudu. Mohlanka yo a ilego a se bontšhe boikarabelo ka seo mong wa gagwe a bego a mo neile sona o ile a ahlolwa ka go botšwa gore ke yo “kgopo,” “sebodu” le “mohlanka yoo e sego wa selo.” O ile a amogwa talente yeo a bego a e neilwe, gomme a lahlelwa ka ntle.—Bala Mateo 25:14-18, 23, 26, 28-30.

17 Lebakeng le lengwe, Jesu o ile a bontšha ditlamorago tša go se botege. O itše: “Monna yo mongwe wa mohumi o be a na le molaki yoo a bego a latofatšwa ka gore o mo senyetša thoto. Ka gona, a mmitša a re: ‘Ke’ng seo ke se kwago ka wena? Tliša pego ya bolaki bja gago, gobane o ka se hlwe o sa laka ntlo ye.’” (Luka 16:1, 2) Ka ge molaki yoo a ile a gašanya thoto ya mong wa gagwe, mong wa gagwe o ile a mo raka. Ruri yeo ke thuto e matla go rena! Le ka mohla ga re nyake go hwetšwa re sa botege ka ge re sa dira seo re kgopetšwego go se dira.

 NA KE GABOHLALE GO IPAPIŠA LE BA BANGWE?

18. Ke ka baka la’ng re sa swanela go ipapiša le ba bangwe?

18 Yo mongwe le yo mongwe wa rena a ka ipotšiša gore: ‘Ke lebelela bjang bolaki bja ka?’ Bothata bo ka tsoga ge e ba re ipapiša le ba bangwe. Beibele e re eletša gore: “Anke yo mongwe le yo mongwe a hlahlobe ditiro tša gagwe gomme o tla ba le lebaka la go hlalala ka yena ka noši, e sego ka go ipapiša le motho yo mongwe.” (Bagal. 6:4) Go e na le gore re bapiše seo re se dirago le seo ba bangwe ba se dirago, re swanetše go šetša seo rena ka noši re ka kgonago go se dira. Seo se tla re šireletša gore re se ke ra ikgogomoša goba ra nyama. Ge re dutše re itlhahloba, re swanetše go lemoga gore maemo a motho a a fetoga. Mohlomongwe ka baka la bolwetši, botšofadi goba boikarabelo le ge e le bofe bjo bongwe, re ka no palelwa ke go dira seo re bego re kgona go se dira peleng. Ka lehlakoreng le lengwe, re ka kgona go dira mo gontši go feta kamoo re dirago ka gona ga bjale. Ge e ba go le bjalo, go re’ng o sa leke go oketša mediro ya gago?

19. Ke ka baka la’ng re sa swanela go felelwa ke matla ge e ba re sa newe tokelo e itšego?

19 Taba e nngwe yeo re swanetšego go e ela hloko ke ya boikarabelo bjo re nago le bjona goba bjoo re kganyogago go ba le bjona. Ka mohlala, ngwanabo rena a ka ba a kganyoga go hlankela e le mogolo ka phuthegong goba go abelwa dipolelo dikopanong tša tikologo le tša selete. Ke gabotse gore motho a šome ka thata gore a swanelegele ditokelo tše bjalo, eupša ga se ra swanela go felelwa ke matla ge e ba re sa di newe ka nako yeo re bego re holofetše gore re tla di newa ka yona. Mohlomongwe ka mabaka ao re ka se a kwešišego gabonolo, re ka newa ditokelo tše dingwe ka moragonyana ga nako yeo re bego re e letetše. Gopola gore Moshe o ile a ipona a loketše go etelela Baisiraele pele go ba ntšha Egipita, eupša o ile a swanelwa ke go leta ka nywaga e 40 pele ga ge a ka dira seo. Seo se ile sa mo nea sebaka se se lekanego sa gore a hlagolele dika tšeo a bego a di nyaka gore a etelele pele setšhaba seo sa melala e methata le sa marabele.—Dit. 7:22-25, 30-34.

20. Re ka ithuta thuto efe go tšwa phihlelong ya Jonathane?

20 Ka dinako tše dingwe go na le ditokelo tše dingwe tšeo re ka se tsogego re di neilwe. Seo se ile sa diragalela Jonathane. E be e le morwa wa Saulo, ka go re’alo a swanelega go ba kgoši ya ka moso ya Isiraele. Eupša Modimo o ile a kgetha Dafida yo e bego e sa le yo monyenyane gore e be kgoši. Jonathane o ile a arabela bjang ge seo se direga? O ile a amogela seo gomme a thekga Dafida go fihla bokgoleng bja gore a bee le bophelo bja gagwe ka noši kotsing. O boditše Dafida gore: “Wena o tla ba kgoši ya Isiraele, wa ba yo bohlokwa go mpheta.” (1 Sam. 23:17) Na o bona thuto tabeng ye? Ka go se swane le tatagwe, Jonathane o ile amogela boemo bja gagwe gomme a se hufegele Dafida. Go e na le gore re hufegele ba bangwe ka ge ba neilwe dikabelo tše itšego, ka moka ga rena re ka šetša kudu go phethagatša boikarabelo bjo re nago le bjona. Re ka kgodišega gore lefaseng le lefsa, Jehofa o tla kgonthišetša gore dikganyogo tša maleba tša bahlanka ba gagwe ka moka di a kgotsofatšwa.

21. Re swanetše go lebelela bjang bolaki bjo re bo gafetšwego?

21 Anke re gopoleng gore ka ge re le balaki bao ba neilwego boikarabelo, ga re bokgobeng bjo sehlogo bjoo re gateletšwego e bile re tšhollago megokgo. Re tloga re le boemong bjo bo kgahlišago. Re boemong bjo bo hlomphegago kudu, e bile re gafetšwe go dira modiro woo o ka se tsogego o boeleditšwe wa go bolela ditaba tše dibotse mehleng ya bofelo bja tshepedišo ye ya dilo. Ge re dutše re dira seo, re swaragana le boikarabelo bja rena re na le tokologo e kgolo. Ka gona, anke re beng balaki ba botegago. Le gona anke re tšeeleng godimo tokelo yeo re nago le yona ya go hlankela Motho yo mogolo kudu legohleng.