Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) DECEMBER 2012

Hlokomelang go Dirišwa ga Beibele ka Tsela ya Tumelakhwele

Hlokomelang go Dirišwa ga Beibele ka Tsela ya Tumelakhwele

“LENTŠU la Modimo le a phela e bile ke le matla.” (Baheb. 4:12) Ka mantšu ao moapostola Paulo o bontšhitše gore matla a lentšu la Modimo a kgoma dipelo gomme a fetoša maphelo.

Lega go le bjalo, go ba le pono ye ka matla a molaetša wa Beibele go ile gwa gakantšhwa ge bohlanogi bjoo go boletšwego ka bjona bo tsema medu ka morago ga lehu la baapostola. (2 Pet. 2:1-3) Ge nako e dutše e eya, baetapele ba kereke ba ile ba thoma go nagana gore motho a ka diriša Lentšu la Modimo go dira maleatlana. Moprofesara Harry Y. Gamble o ile a ngwala mabapi le “go dirišwa ga mangwalo a Bakriste go dira maleatlana.” O lemogile gore lekgolong la boraro la nywaga, Moruti wa Kereke e lego Origen o boletše gore “go fo kwa mantšu a makgethwa go hola ka tsela e itšego: ge e ba mantšu a kgona go kgoma maleatlana a baheitene ka tsela e matla, gona ke mo go kwagalago gore mantšu ao a tloga a swanetše go ba a tšwago go Modimo ka mangwalong.” John Chrysostom yo a phetšego mafelelong a lekgolong la bone la nywaga o ngwadile gore “diabolo le ka mohla a ka se batamele ntlo yeo e nago le Ebangedi.” Le gona o begile gore ba bangwe ba be ba bofelela mantšu ao a tšwago Diebangeding melaleng ya bona e le dipheko tše matla. Moprofesara Gamble o okeditše ka gore rathutatumelo wa Mokatholika e lego Augustine o ile a “bona go amogelega gore ge e ba motho a opša ke hlogo o swanetše go robala a tsentše kopi ya Ebangedi ya Johane ka tlase ga mosamelo wa gagwe”! Ka go re’alo mangwalo a Beibele a ile a dirišwa ka tsela ya maleatlana. Na o nagana gore Beibele e ka ba e le pheko goba tsela ya go ikhweletša mahlatse yeo e ka go šireletšago dilong tše mpe?

Mohlomongwe tsela e tlwaelegilego kudu ya go diriša Lentšu la Modimo gampe ke mokgwa wa go bula Beibele ka bofofu. Seo se bolela eng? Se bolela go fo bula puku, kudukudu Beibele, gomme wa fo bala lengwalo leo o kopanago le lona la mathomo o na le tumelo ya gore mantšu ao a tla go nea tlhahlo e nyakegago. Ka mohlala, go ya ka Moprofesara Gamble, lebakeng le lengwe ge Augustine a be a ekwa lentšu la ngwana ntlong ya kgauswi le moo a dulago le re: “Tšea gomme o bale, tšea gomme o bale,” Augustine o ile a bona seo e le taelo e tšwago go Modimo ya gore a phetle Beibele gomme a bale lengwalo la mathomo leo a kopanago le lona.

Na o ile wa kwa ka batho bao ba ilego ba rapela Modimo gomme ba fo phetla Beibele nakong ya ge ba lebane le boemo bjo thata, ba na le tumelo ya gore temana ya mathomo yeo ba kopanago le yona e be e tla ba thuša go lebeletšana le bothata bjoo? Gaešita le ge ba ka ba ba be ba na le maikemišetšo a mabotse, ye ga se yona tsela yeo Bakriste ba swanetšego go tsoma tlhahlo e tšwago Mangwalong.

Jesu o ile a kgonthišetša barutiwa ba gagwe gore o be a tla ba romela “mothuši, e lego moya o mokgethwa.” O ile a tšwela pele ka gore: “O tla le ruta tšohle le go le gopotša tšohle tšeo ke le boditšego tšona.” (Joh 14:26) Go fapana le seo, go bula Beibele ka bofofu ga go nyake gore motho a be le tsebo ya Mangwalo.

Mokgwa woo wa go bula Beibele gotee le e mengwe ya ditumelakhwele e tlwaelegile. Lega go le bjalo, Lentšu la Modimo le sola go dirišwa ga dipheko. (Lef. 19:26; Doit. 18:9-12; Dit. 19:19) “Lentšu la Modimo le a phela e bile ke le matla,” eupša re swanetše go le diriša ka bokgoni. Go ba le tsebo e nepagetšego ka Beibele go kaonefatša maphelo a batho, e sego go e diriša ka tsela ya tumelakhwele. Tsebo e bjalo e thušitše ba bantši go hlagolela boitshwaro bjo bobotse, go lahla tsela ya bophelo e senyago, go matlafatša bophelo bja lapa gotee le go dira gore motho a be le tswalano le Mongwadi wa Beibele.