Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) NOVEMBER 2012

“Nthute go Dira Thato ya Gago”

“Nthute go Dira Thato ya Gago”

“Nthute go dira thato ya gago, gobane o Modimo wa ka.”—PS. 143:10.

1, 2. Go nagana ka thato ya Modimo ge re dira dilo go ka re hola bjang, gomme ke eng seo re ka ithutago sona tabeng ye go Kgoši Dafida?

ANKE re re o sepela tseleng yeo e lego dithabeng. Ke moka tsela yeo e thoma go tšwa diripa tše pedi. O tla tšea efe? O ka namela leswika le legolo leo le lego kgauswi le wena gore o kgone go bona moo tsela e nngwe le e nngwe e felelago gona. Re ka diriša mokgwa o swanago ge re dira diphetho tše bohlokwa. Go dira dilo go ya ka pono e phagamego ya Mmopi go tla re thuša gore ‘re sepele tseleng’ yeo Jehofa a e amogelago.—Jes. 30:21.

2 Bophelong bja gagwe ka moka, Kgoši Dafida wa Isiraeleng ya bogologolo o ile a bea mohlala o mobotse tabeng ya go dira dilo a naganne ka thato ya Modimo. Anke re hlahlobeng tše dingwe tša ditiragalo tša bophelong bja Dafida gomme re bone kamoo pelo ya monna yo e bego e le e feletšego go Jehofa Modimo.—1 Dikg. 11:4.

DAFIDA O ILE A SWARA LEINA LA JEHOFA KA TLHOMPHO

3, 4. (a) Ke eng seo se šušumeditšego Dafida gore a lwe le Goliata? (b) Dafida o be a lebelela bjang leina la Modimo?

3 Nagana nakong ya ge Dafida a be a lebane le nkgwete ya Mofilisita e lego Goliata. Ke eng seo se ilego sa šušumetša Dafida yo e bego e sa le yo monyenyane gore a lwe le senatla seo se bego se itlhamile gabotse e bile e le sa botelele bja dimithara tše ka bago tše tharo? (1 Sam. 17:4.) Na e bile sebete seo Dafida a bego a na le sona? Na e bile tumelo ya gagwe go Modimo? Dika tšeo ka bobedi di mo šušumeditše gore a gate mogato woo o mogolo. Lega go le bjalo, selo se segolo seo se šušumeditšego Dafida gore a lwe le senatla se e bile tlhompho ya gagwe go Jehofa le go leina la gagwe. Dafida o ile a botšiša a galefile gore: “Mofilisita yo a sa bollago ke yena mang mo a ka gobošago madira a Modimo yo a phelago?”—1 Sam. 17:26.

4 Ge Dafida yo e bego e sa le yo monyenyane a batamela Goliata, o ile a re go yena: “Wena o tla go nna ka tšhoša le  marumo a mabedi, eupša nna ke tla go wena ka leina la Jehofa wa madira, Modimo wa madira a Isiraele yo o mo gobošitšego.” (1 Sam. 17:45) Ka ge Dafida a be a ithekgile ka Modimo wa therešo, o ile a wiša nkgwete yeo ya Mofilisita ka leswika letee la seragamabje. Ga se feela ka nako yeo moo Dafida a ilego a bota Jehofa le go swara leina la gagwe ka tlhompho, eupša o dirile seo le bophelong bja gagwe ka moka. Ee, Dafida o ile a kgothaletša Baisiraelegotee le yena gore ba ‘ikgantšhe ka leina la Jehofa le lekgethwa.’—Bala 1 Dikoronika 16:8-10.

5. Ke boemo bofe bjo o ka lebeletšanago le bjona bjo bo ka swantšhwago le bja lenyatšo la Goliata?

5 Na o ikgantšha ka gore Jehofa ke Modimo wa gago? (Jer. 9:24) O arabela bjang ge baagišani ba gago, bašomigotee le wena, bao o tsenago le bona sekolo goba ba leloko ba bolela gampe ka Jehofa e bile ba kwera Dihlatse tša gagwe? Na o lwela leina la Jehofa ge le gobošwa, o holofetše gore o tla go thuša? Ke therešo gore go na le “nako ya go homola,” eupša ga se ra swanela go lewa ke dihlong tša go ba Dihlatse tša Jehofa le balatedi ba Jesu. (Mmo. 3:1, 7; Mar. 8:38) Gaešita le ge re swanetše go ba šedi le go bontšha tlhompho ge re dirišana le batho bao ba sa re ratego, anke re se swane le Baisiraele bao ba ilego “ba tšhoga gomme ba boifa kudu” ge ba be ba ekwa mantšu a lenyatšo a Goliata. (1 Sam. 17:11) Go e na le moo, anke re gateng mogato ka go se dikadike e le gore re kgethagatše leina la Jehofa Modimo. Kganyogo ya rena ke go thuša batho gore ba tsebe gore Jehofa ke Modimo wa mohuta mang. Ka baka leo, re diriša Lentšu la gagwe go thuša ba bangwe go bona bohlokwa bja go batamela Modimo.—Jak. 4:8.

6. Ke eng seo Dafida a bego a nyaka go se fihlelela ge a be a elwa le Goliata, gomme selo se segolo seo re swanetšego go tshwenyega ka sona ke eng?

6 Ntwa ya Dafida le Goliata e re ruta thuto e nngwe gape e bohlokwa. Ge Dafida a be a etla a kitimela go madira, o ile a botšiša gore: “Go tla dirwa’ng ka monna yo a ka bolayago Mofilisita yola le yo a ka tlošago kgobošo go Isiraele?” Batho bao ba bego ba le moo ba ile ba mo araba ka go mmotša mantšu ao ba ilego ba mmotša ona pele ba re: “Monna yo a ka mmolayago, kgoši e tla mo humiša ka mahumo a mantši, ya ba ya mo nea le morwedi wa yona.” (1 Sam. 17:25-27) Eupša selo se segolo seo Dafida a bego a tshwenyegile ka sona e be e se go hwetša dilo tše di bonagalago. O be a naganne ka selo se sengwe se segolo go feta seo. Dafida o be a nyaka go tagafatša Modimo wa therešo. (Bala 1 Samuele 17:46, 47.) Go thwe’ng ka rena? Na re tshwenyegile kudu ka go itirela maina ka gore re hume gomme re tume mo lefaseng? Ga go pelaelo gore re swanetše go swana le Dafida yo a opetšego gore: “Anke le godišeng Jehofa gotee le nna, anke re phagamišeng leina la gagwe re le gotee.” (Ps. 34:3) Ka gona, a re boteng Modimo, re dule re tšeela leina la gagwe godimo go e na le la rena.—Mat. 6:9.

7. Re ka hlagolela bjang tumelo e matla yeo e nyakegago nakong ya ge re kopana le batho bao ba sa re ratego?

7 Mogato woo Dafida a o gatilego wa go ba le sebete ge a be a elwa le Goliata o be o nyaka gore a bote Jehofa ka mo go feletšego. Dafida yo e bego e sa le yo monyenyane o be a na le tumelo e matla. Tsela e nngwe yeo a ilego a matlafatša tumelo ya gagwe ka yona e bile ka go ithekga ka Modimo ge e be e le modiši. (1 Sam. 17:34-37) Le rena re nyaka tumelo e le gore re tšwele pele ka bodiredi bja rena, kudukudu ge re kopana le batho bao ba sa re ratego. Re ka hlagolela tumelo e bjalo go Modimo medirong ya rena ya letšatši le letšatši. Ka mohlala, re ka thoma dipoledišano ka therešo ya Beibele le batho bao ba dutšego kgauswi le rena ge re sepela ka dinamelwa tša batho bohle. Le gona, go re’ng re ka lesa go bolela le batho bao re kopanago le bona setarateng nakong ya ge re le bodireding bja ntlo le ntlo?—Dit. 20:20, 21.

DAFIDA O ILE A LETA JEHOFA

Ke eng seo se thibetšego Dafida gore a se bolaye Saulo ge a be a bulegetšwe ke sebaka sa go dira seo?

8, 9. Dafida o ile a bontšha bjang gore o be a dula a naganne ka go dira thato ya Jehofa ditirišanong tša gagwe le Kgoši Saulo?

8 Mohlala o mongwe wa boikemišetšo bja  Dafida bja go bota Jehofa o be o akaretša kgoši ya pele ya Isiraele e lego Saulo. Saulo yo a bego a na le lehufa o ile a leka ka makga a mararo gore a hlabe Dafida ka lerumo gomme a mo pataganye le leboto, eupša mabakeng ao ka moka Dafida o ile a široga, a se nyake le go itefeletša. Mafelelong o ile a tšhabela Saulo. (1 Sam. 18:7-11; 19:10) Ke moka Saulo o ile a tšea banna ba 3 000 ba hlaotšwego Isiraeleng ka moka a ya go tsoma Dafida kua lešokeng. (1 Sam. 24:2) Saulo ka go se lemoge o ile a feleletša a tsene ka leweng leo Dafida le banna ba gagwe ba bego ba le go lona. Dafida nkabe a dirišitše sebaka seo go bolaya kgoši yeo e bego e beile bophelo bja gagwe kotsing. Ge e le gabotse, thato ya Modimo e be e le gore Dafida e be kgoši ya Isiraele legatong la Saulo. (1 Sam. 16:1, 13) Ruri ge nkabe Dafida a ile a theetša keletšo ya banna ba gagwe, nkabe kgoši yeo e bolailwe. Eupša Dafida o itše: “Jehofa a ka se ntumelele gore ke dire selo se go mong wa ka, yena motlotšwa wa Jehofa.” (Bala 1 Samuele 24:4-7.) Saulo e be e sa dutše e le kgoši e tloditšwego ke Modimo. Dafida o be a sa nyake go tšeela Saulo bogoši, ka ge Jehofa a be a se a tšwa a mo tloša go bjona. Ka go fo ripa seaparo sa go hloka matsogo sa Saulo, Dafida o bontšhitše gore o be a sa ikemišetša go gobatša Saulo.—1 Sam. 24:11.

9 Le gona Dafida o ile a bontšha gore o hlompha motlotšwa wa Modimo nakong ya ge a be a bona kgoši yeo ka lekga la mafelelo. Ka nako yeo, Dafida le Abishai ba ile ba fihla lefelong leo Saulo a bego a hlomile mešaša go lona gomme ba mo hwetša a robetše. Gaešita le ge Abishai a be a nagana gore Modimo o be a gafetše lenaba le seatleng sa Dafida gomme a nyaka go hlaba Saulo ka lerumo le phuleletše le tsene fase, Dafida ga se a mo dumelela go dira seo. (1 Sam. 26:8-11) Ka ge Dafida a ile a dula a nyaka tlhahlo ya Modimo, ga se a ka a šišinyega boikemišetšong bja gagwe bja go dira dilo ka go dumelelana le thato ya Jehofa go sa šetšwe seo Abishai a bego a mo kgothaletša go se dira.

10. Ke boemo bofe bjo thata bjo re ka lebeletšanago le bjona, gomme ke eng seo se tla re thušago gore re eme re tiile?

10 Le rena re ka lebeletšana le boemo bjo thata bjoo go bjona bagwera ba rena ba re phegelelago gore re dire dilo ka tsela ya batho go e na le gore ba re thekge go dira thato ya Jehofa. Ka go swana le Abishai, ba bangwe ba ka ba ba re kgothaletša gore re gate mogato tabeng e itšego ntle le go nagana ka thato ya Modimo. E le gore re eme re tiile, re swanetše go tseba gabotse pono ya Jehofa ka taba yeo gomme re ikemišetše go kgomarela ditsela tša gagwe.

11. Ke eng seo o ithutilego sona go Dafida mabapi le go dula o naganne ka go etiša thato ya Modimo pele bophelong?

11 Dafida o ile a rapela Jehofa Modimo a re:  “Nthute go dira thato ya gago.” (Bala Psalme 143:5, 8, 10.) Go e na le gore a ithekge ka dikgopolo tša gagwe goba a latele seo batho ba bangwe ba bego ba mo kgothaletša gore a se dire, Dafida o be a fišegela go rutwa ke Modimo. O ile a ‘naganišiša ka mediro ya Jehofa ka moka gomme a nagana ka modiro wa diatla tša Modimo.’ Le rena re ka tseba thato ya Modimo ka gore re nwelele ka Mangwalong gomme re naganišiše ka dipego tše dintši tša Beibele tšeo di bolelago ka ditirišano tša Jehofa le batho.

DAFIDA O BE A KWEŠIŠA MOKO WA SEO SE BEGO SE BOLELWA KE MOLAO

12, 13. Ke ka baka la’ng Dafida a ile a tšholla meetse ao banna ba gagwe ba bararo ba bego ba mo tlišeditše ona?

12 Le gona re ka ekiša tsela yeo Dafida a bego a kwešiša moko wa seo se bego se bolelwa ke Molao gotee le kganyogo ya gagwe ya go phela ka kwešišo yeo. Ela hloko seo se ilego sa direga ge Dafida a be a kganyogile go “nwa meetse a sedibeng sa Betlelehema.” Banna ba bararo ba Dafida ba ile ba šwahlela ka moo motseng—woo ka nako yeo go bego go dula Bafilisita—gomme ba tla ba rwele meetse. Lega go le bjalo, “Dafida [o ile] a gana go a nwa, eupša a a tšhollela Jehofa.” Ka baka la’ng? Dafida o hlalositše gore: “E tla ba selo se se sa kgahlišego go Modimo wa ka ge nka dira se! A nka nwa madi a banna ba bao ba beilego maphelo a bona kotsing? Ka gobane ba beile maphelo a bona kotsing ka go tliša meetse a mo.”—1 Dikor. 11:15-19.

Re ithuta’ng tabeng ya Dafida ya go gana go nwa meetse ao banna ba gagwe ba bego ba mo tlišeditše ona?

13 Dafida o be a tseba gore Molao o re madi a swanetše go tšhollelwa Jehofa gomme a se jewe. Le gona o be a kwešiša lebaka la seo. Dafida o be a tseba gore “bophelo bja sephedi bo mo mading.” Eupša banna bao ba be ba tlile le meetse, e sego madi. Ke ka baka la’ng Dafida a ile a gana go a nwa? O be a kwešišitše moko wa seo se bego se bolelwa ke taelo yeo. Go ya ka Dafida, meetse ao a be a le bohlokwa go swana le madi a banna bao ba bararo. Ka gona, e be e tla ba selo se se sa kgahlišego gore a nwe meetse ao. Go e na le gore a a nwe, o ile a phetha ka gore a a tšhollele fase.—Lef. 17:11; Doit. 12:23, 24.

14. Ke eng seo se thušitšego Dafida gore a be le pono ya Jehofa ka ditaba?

14 Dafida o ile a leka go nwelela ka mo go feletšego molaong wa Modimo. O ile a opela  ka gore: “Wena Modimo wa ka, ke kgahlwa ke go dira thato ya gago, molao wa gago o ka garegare ga ka.” (Ps. 40:8) Dafida o ile a ithuta molao wa Modimo gomme a naganišiša ka mo go tseneletšego ka wona. O ile a bota bohlale bja ditaelo tša Jehofa. Ka baka la seo, Dafida o be a tloga a ikemišeditše go latela moko wa Molao wa Moshe, e sego feela seo se bego se ngwadilwe go wona. Ge re ithuta Beibele, ke gabohlale gore re naganišiše ka seo re se balago gomme re se boloke dipelong tša rena e le gore re ka tseba seo se kgahlago Jehofa boemong bjo itšego.

15. Solomone o ile a palelwa ke go hlompha Molao wa Modimo ka tsela efe?

15 Jehofa Modimo o be a rata morwa wa Dafida e lego Solomone kudu. Lega go le bjalo, ka morago ga nako Solomone o ile a palelwa ke go hlompha Molao wa Modimo. Ga se a ka a kwa taelo ya Jehofa ya gore kgoši ya Isiraele e se ke ya “ikatišetša basadi.” (Doit. 17:17) Ge e le gabotse, Solomone o ile a nyala basadi ba bantši bašele. Ge a be a tšofala, “basadi ba gagwe ba [ile ba] aroša pelo ya gagwe gore e latele medimo e šele.” Go sa šetšwe gore a ka ba a ile a lebelela taba yeo bjang, “Solomone [o ile] a dira tše mpe mahlong a Jehofa gomme a se latele Jehofa ka mo go feletšego go etša Dafida tatagwe.” (1 Dikg. 11:1-6) Ruri ke gabohlokwa gore re latele melao gotee le melao ya motheo yeo e hwetšwago ka Lentšung la Modimo! Ka mohlala, se ke sa bohlokwa kudu ge re naganela go tsena lenyalong.

16. Go kwešiša ga rena moko wa taelo ya go nyala “feela Moreneng” go tla kgoma bjang bao ba nyakago go tsena lenyalong?

16 Ge e ba re ferewa ke bao ba sa dumelego, na karabelo ya rena e bonagatša pono ya go swana le ya Dafida goba ya go swana le ya Solomone? Barapedi ba therešo ba botšwa gore ba nyale “feela Moreneng.” (1 Bakor. 7:39) Ge e ba Mokriste a kgetha go tsena lenyalong, o swanetše go nyala goba go nyalwa ke modumedigotee le yena. Le gona ge e ba re kwešiša moko wa taelo ya Lengwalo le, re ka se pheme feela go tsena lenyalong le motho yo a sa dumelego eupša re tla phema le go nagana ka go ba lefereyong le motho yo bjalo.

17. Ke’ng seo se ka re thušago gore re se wele molabeng wa go bogela diswantšho tšeo di kgothaletšago bootswa?

17 Le gona, nagana kamoo mohlala wa Dafida wa go nyaka tlhahlo ya Modimo ka phišego o re thušago ka gona go phema teko ya go bogela diswantšho tšeo di kgothaletšago bootswa. Bala mangwalo a latelago, nagana ka melao ya motheo yeo e lego moo gomme o katanele go lemoga pono ya Jehofa tabeng ye. (Bala Psalme 119:37; Mateo 5:28, 29; Bakolose 3:5.) Go naganišiša ka ditekanyetšo tša gagwe tše di phagamego go re hlamela gore re se wele molabeng wa go bogela diswantšho tšeo di kgothaletšago bootswa.

EBA LE PONO YA MODIMO KA DINAKO TŠOHLE

18, 19. (a) Ke’ng seo se thušitšego Dafida gore a dule a amogelwa ke Modimo gaešita le ge a be a sa phethagala? (b) Ke’ng seo wena o ikemišeditšego go se dira?

18 Gaešita le ge Dafida a be a bea mohlala o mobotse ka ditsela tše ntši, o ile a dira dibe tše mmalwa tše dikgolo. (2 Sam. 11:2-4, 14, 15, 22-27; 1 Dikor. 21:1, 7) Lega go le bjalo, Dafida bophelong bja gagwe ka moka o be a itshola ge a dirile sebe. O ile a sepela pele ga Modimo “ka pelo e botegago.” (1 Dikg. 9:4) Ke ka baka la’ng re ka bolela seo? Ke ka gobane Dafida o ile a leka go dira dilo ka go dumelelana le thato ya Jehofa.

19 Re ka dula re amogelwa ke Jehofa go sa šetšwe go se phethagale ga rena. Ka baka leo, anke re ithuteng Lentšu la Modimo ka mafolofolo, re naganišiše ka mo go tseneletšego ka seo re ithutago sona go lona gomme re gate megato ya maleba ka go dumelelana le seo re se beilego dipelong tša rena. Ge e le gabotse, ge e ba re dira seo re tla ba re rapela Jehofa go swana le mopsalme yo a ilego a mo kgopela ka boikokobetšo gore: “Nthute go dira thato ya gago.”