Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) NOVEMBER 2012

Dipotšišo tše Tšwago go Babadi

Dipotšišo tše Tšwago go Babadi

Na mantšu a Jesu a hwetšwago go Mateo 19:10-12 a ra gore bao ba kgethago go dula ba se lenyalong ba hweditše ka mohlolo mpho ya go se be lenyalong?

Ela hloko gore boemo e be e le bofe ge Jesu a be a bolela ka taba ye ya go se be lenyalong. Ge Bafarisei ba be ba etla go yena gomme ba mmotšiša ka taba ya tlhalo, Jesu o ile a gatelela tekanyetšo ya Jehofa ya lenyalo. Gaešita le ge Molao wa Moshe o be o dumelela monna gore a ngwalele mosadi wa gagwe lengwalo la bohlatse la tlhalo ge e ba a hweditše go na le “selo se sengwe seo a se bonego se sa hlomphege” go yena, go be go se bjalo go tloga mathomong. (Doit. 24:1, 2) Ke moka Jesu o ile a re: “Mang le mang yo a hlalago mosadi wa gagwe ge e se ka lebaka la bootswa, a nyala yo mongwe, o a hlotlola.”—Mat. 19:3-9.

Ge barutiwa ba gagwe ba ekwa seo ba ile ba re: “Ge e ba boemo bo le bjalo ka monna le mosadi wa gagwe, gona ga se bohlale go nyala.” Jesu ge a ba araba o ile a re go bona: “Ga se batho bohle ba amogelago taba ye, eupša ke bao ba nago le mpho yeo feela. Gobane go na le batho ba opafetšego bao ba tswetšwego ba le bjalo, gape go na le bao ba opafetšego bao ba opafaditšwego ke batho, gomme go na le bao ba opafetšego bao ba itirilego bjalo ka baka la Mmušo wa magodimo. Yo a ka amogelago seo a a se amogele.”—Mat. 19:10-12.

Baopafatšwa ba kgonthe ke bao ba belegwego ba le ka tsela yeo ka baka la bogole goba ke bao ba dirilwego baopafatšwa ka baka la kotsi goba go kgaolwa ditho. Lega go le bjalo, go na le ba bangwe bao ka go rata ga bona ba ilego ba phela maphelo a bona bjalo ka ge eka ke baopafatšwa. Le ge ba be ba ka nyala, ba ile ba itshwara gomme ba dula ba se lenyalong “ka baka la Mmušo wa magodimo.” Ka go swana le Jesu, ba ile ba kgetha go se be lenyalong e le gore ba fetše nako ya bona e ntši ba le tirelong ya Mmušo. Ga se ba tswalwa ba na le mpho ya go se be lenyalong e bile ga se ba e newa. Ge e le gabotse ba ile ba amogela boemo bjoo. Ke gore, ba ile ba ikgethela go ba le mpho yeo.

Ge moapostola Paulo a be a gatelela yona taba yeo Jesu a e boletšego, o ile a hlalosa gore gaešita le ge Bakriste ka moka—bao ba sego lenyalong le bao ba lego lenyalong—ba ka hlankela Modimo ka tsela e amogelegago, ge e le bao ba sego lenyalong bao ‘ba emego ba tiile dipelong tša bona’ ba “dira kaone” ge ba dula ba le boemong bjoo. Seo se kgonega bjang? Banyalani ba swanetše go diriša nako le matla a mangwe a bona go thabišana le go hlokomelana. Ka lehlakoreng le lengwe, Bakriste ba sego lenyalong ba ka fetša nako ya bona e ntši tirelong ya Morena ntle le go šitišwa ke tlemo ya lenyalo. Ba lebelela boemo bja bona e le “mpho” e tšwago go Modimo.—1 Bakor. 7:7, 32-38.

Ka gona, Mangwalo a re botša gore Mokriste ga a hwetše ka mohlolo mpho ya go se be lenyalong. Go e na le moo, o e hlagolela ka go dula a se lenyalong e le gore a tšwetše pele dikgahlego tša Mmušo ntle le tšhitišo. Ba bantši lehono ba ile ba phetha dipelong tša bona gore ba tla dula ba se lenyalong ka lona lebaka le, gomme ba bangwe ba swanetše go ba kgothatša.