Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) NOVEMBER 2012

Jesu o re Beetše Mohlala wa Boikokobetšo

Jesu o re Beetše Mohlala wa Boikokobetšo

“Ke le beetše mohlala gore go etša ge ke dirile go lena, le lena le dire bjalo.”—JOH. 13:15.

1, 2. Ke thuto efe e bohlokwa yeo Jesu a e rutilego baapostola ba gagwe bošegong bja mafelelo pele a bolawa?

KE BOŠEGO bja mafelelo bja Jesu pele a bolawa, gomme o bo fetša a na le baapostola ba gagwe ka phapošing ya ka godimo ka ngwakong kua Jerusalema. Nakong ya selalelo, Jesu o a ema gomme o beela ka thoko diaparo tša gagwe tša ka ntle. O itata ka lešela mathekeng. O tšhela meetse ka sebjaneng gomme o thoma go hlapiša barutiwa ba gagwe dinao le go di phumola ka lešela. Ke moka o apara seaparo sa gagwe sa ka ntle. Ke ka baka la’ng Jesu a ile a dira tiro ye ya boikokobetšo?—Joh. 13:3-5.

2 Jesu ka boyena o hlalositše gore: “Na le kwešiša seo ke se dirilego go lena? . . . Ge e ba nna gaešita le ge ke le Morena le Morutiši ke le hlapišitše dinao, le lena le swanetše go hlapišana dinao. Gobane ke le beetše mohlala gore go etša ge ke dirile go lena, le lena le dire bjalo.” (Joh. 13:12-15) Ka go bontšha boikokobetšo ka gore a dire modiro o bjalo wa tlasana, Jesu o ile a ruta baapostola ba gagwe thuto e bohlokwa yeo le ka mohla ba bego ba ka se e lebale le yeo e bego e tla ba kgothaletša gore ba ikokobetše matšatšing ao a letšego ka pele.

3. (a) Jesu o ile a gatelela bjang bohlokwa bja boikokobetšo ka makga a mabedi? (b) Ke eng seo se tlago go ahlaahlwa sehlogong se?

3 Ge Jesu a be a hlapiša baapostola dinao, e be e se la mathomo a gatelela bohlokwa bja boikokobetšo. Pejana ge ba bangwe ba baapostola ba be ba bontšha moya wa phadišano, Jesu o ile a bea ngwana yo monyenyane hleng ga gagwe gomme A ba botša gore: “Mang le mang yo a amogelago ngwana yo bjalo ka baka la leina la ka, le nna o a nkamogela gomme mang le mang yo a nkamogelago, o amogela le Yo a nthomilego. Gobane yo a itshwarago bjalo ka yo monyenyane gare ga lena, ke yena yo mogolo.” (Luka 9:46-48) Ka morago bodireding bja gagwe ge a be a lemoga gore Bafarisei ba be ba nyaka maemo, Jesu o boletše gore: “Yo mongwe le yo mongwe yo a ikgodišago o  tla kokobetšwa gomme yo a ikokobetšago o tla godišwa.” (Luka 14:11) Go molaleng gore Jesu o nyaka gore balatedi ba gagwe ba ikokobetše, ke gore ba ipoetše, ba hloke boikgogomošo le boikgantšho. E le gore re kgone go mo ekiša, anke re hlahlobeng mohlala wa gagwe wa boikokobetšo ka kelohloko. Le gona re tla bona kamoo seka se se sa holego feela yoo a se bontšhago eupša se holago le ba bangwe.

“GA SE KA NGANGABALA”

4. Morwa yo a tswetšwego a nnoši wa Modimo o ile a bontšha boikokobetšo bjang pele e ka ba motho wa nama?

4 Morwa yo a tswetšwego a nnoši wa Modimo o ile a bontšha boikokobetšo le pele a etla mo lefaseng. Jesu o ile a fetša nywaga e mentšintši a na le Tatagwe wa legodimong pele e ka ba motho wa nama. Puku ya Beibele ya Jesaya e bolela ka tswalano ya kgauswi yeo Morwa a bego a na le yona le Tatagwe, ge e re: “Mmuši Morena Jehofa o nneile leleme la ba ba rutilwego, e le gore nka tseba go araba yo a lapilego ka lentšu. O mphafoša mesong e mengwe le e mengwe; o phafoša tsebe ya ka gore e kwe go swana le bao ba rutilwego. Mmuši Morena Jehofa o thibolotše tsebe ya ka, ge e le nna ke be ke sa rabele. Ga se ka ngangabala.” (Jes. 50:4, 5) Morwa wa Modimo o ile a bontšha moya wa boikokobetšo gomme a theetša ka kelohloko seo Jehofa a ilego a mo ruta sona. O be a fagahletše e bile a ikemišeditše go ithuta go Modimo wa therešo. Ruri Jesu o swanetše go ba a ile a bona mohlala wa Jehofa wa boikokobetšo ge a bontšha kgaugelo go batho bao ba nago le sebe!

5. Boemong bja ge Jesu e le Mikaele morongwa yo mogolo, o ile a bea bjang mohlala wa boikokobetšo le boipoetšo ge a be a swaragane le Diabolo?

5 Ga se sebopiwa se sengwe le sengwe seo se ilego sa ba le boemo bja kgopolo bjo bo swanago le bja Morwa yo a tswetšwego a nnoši wa Modimo. Go e na le gore a nyake go ithuta go Jehofa, morongwa yo mongwe yo a ilego a fetoga Sathane Diabolo, o ile a itumelela gore a šušumetšwe ke dika tšeo di fapanego le boikokobetšo, e lego tša boithati le boikgogomošo, gomme a rabela go Jehofa. Ka lehlakoreng le lengwe, Jesu o be a sa nyamišwe ke boemo bjoo a bego a na le bjona legodimong goba a nyaka go šomiša matla a gagwe gampe. Ka ge e le Mikaele morongwa yo mogolo, Jesu ga se a tshela mellwane ya bolaodi bja gagwe ge “a be a fapana le Diabolo . . . ka setopo sa Moshe.” Go e na le moo, Morwa wa Modimo o ile a bontšha boikokobetšo le boipoetšo. O be a thabela gore Jehofa, e lego Moahlodi yo Mogolo wa legohle, a swaragane le ditaba ka tsela ya Gagwe le ka nako ya gagwe.—Bala Juda 9.

6. Jesu o bontšhitše bjang boikokobetšo ge a amogela kabelo ya go ba Mesia?

6 Ga go pelaelo gore dilo tšeo Jesu a ithutilego tšona pele ga ge e ka ba motho wa nama di be di akaretša diporofeto tšeo di bego di bolela ditaba ka botlalo mabapi le bophelo bja gagwe bja mo lefaseng e le Mesia. Ka baka leo, go bonagala a tsebile e sa le pele dilo tše di sa kgahlišego tšeo di bego di tla mo diragalela. Lega go le bjalo, Jesu o ile a amogela kabelo ya go phela mo lefaseng le go hwa e le Mesia yo a holofeditšwego. Ke ka baka la’ng a dirile se? Ge a bontšha boikokobetšo bja Morwa yo a tswetšwego a nnoši wa Modimo, moapostola Paulo o ngwadile gore: “Gaešita le ge a be a le ka sebopego sa Modimo [ga se a ka] a nagana ka go thopa bolaodi, e lego gore o swanetše go lekana le Modimo. Aowa, eupša o ile a itlhohlora a ba ka sebopego sa mohlanka, a ba motho.”—Bafil. 2:6, 7.

‘O ILE A IKOKOBETŠA’ NAKONG YA GE E LE MOTHO

Mohlala wa Jesu wa boikokobetšo o re hola bjang?

7, 8. Jesu o bontšhitše boikokobetšo ka ditsela dife bjaneng bja gagwe le bodireding bja gagwe bja mo lefaseng?

7 Paulo o ngwadile gore: “Ge [Jesu] a tšwelela e le motho, [o ile] a ikokobetša gomme a ba yo a kwago go fihla lehung, ee, lehung koteng ya tlhokofatšo.” (Bafil. 2:8) Jesu o ile a re beela mohlala wa boikokobetšo go tloga bjaneng. Gaešita le ge a be a godišitšwe ke batswadi bao ba sa phethagalago, e lego Josefa  le Maria, Jesu o ile “a tšwela pele a ikokobeleditše bona.” (Luka 2:51) Ruri wo ke mohlala o mobotse go bana bao ba tlago go šegofatšwa ke Modimo ka ge ba ikokobeletša batswadi ba bona ka go rata!

8 Ge a šetše a godile, Jesu o ile a bontšha boikokobetšo ka gore a etiše pele thato ya Jehofa, e sego ya gagwe. (Joh. 4:34) Bodireding bja gagwe, Jesu Kriste o ile a diriša leina la Modimo gomme a thuša batho ba dipelo tše di botegago gore ba tsebe dika tša Jehofa gabotse le morero wa Gagwe ka batho. Le gona Jesu o ile a phela ka go dumelelana le seo a bego a se ruta ka Jehofa. Ka mohlala, selo sa pele seo Jesu a boletšego ka sona thapelong ya gagwe ya mohlala ke se: “Tatago rena wa magodimong, leina la gago a le kgethagatšwe.” (Mat. 6:9) Ka go re’alo Jesu o laetše balatedi ba gagwe gore go kgethagatšwa ga leina la Jehofa e swanetše go ba selo sa bohlokwa kudu go bona. Le yena o dirile seo bophelong bja gagwe ka moka. Go ya mafelelong a bodiredi bja gagwe mo lefaseng, Jesu o ile a rapela Jehofa ka gore: “Ke ba [baapostola] tsebišitše leina la gago e bile ke tla le tsebatša.” (Joh. 17:26) Go feta moo, bodireding bja gagwe ka moka, Jesu o ile a tumiša Jehofa ka seo a se fihleletšego ge a le lefaseng.—Joh. 5:19.

9. Ke eng seo Sakaria a se porofetilego ka Mesia, gomme Jesu o ile a se phethagatša bjang?

9 Sakaria o porofetile ka Mesia gore: “Hlalala kudu wena morwedi wa Tsione. Hlaba mekgolokwane ya phenyo, wena morwedi wa Jerusalema. Bona! Kgoši ya gago e tla go wena. Ke yeo e lokilego, e bile e a phološa; e ikokobeditše gomme e nametše pokolo, yona pokolwana e nago le mmago yona.” (Sak. 9:9) Se se ile sa phethagala ge Jesu a tsena Jerusalema pejana ga Paseka ka ngwaga wa 33 C.E. Lešaba le ile la ala diaparo tša lona le makala a dihlare tseleng. Ruri motse ka moka o ile wa huduega ge a tsena moo. Gaešita le ge batho ba be ba tumiša Jesu ka gore ke Kgoši, o ile a ikokobetša.—Mat. 21:4-11.

10. Go ikemišetša ga Jesu go kwa go fihla lehung go hlatsetše eng?

10 Ge Jesu Kriste a be a le mo lefaseng, o ile a bontšha boikokobetšo le go kwa bophelong bja gagwe ka moka go fihlela a ehwa koteng ya tlhokofatšo. Ka go re’alo o bontšhitše ka ntle le pelaelo gore batho ba ka  dula ba botegela Jehofa gaešita le ge ba lekwa o šoro. Le gona Jesu o ile a bontšha gore Sathane o be a fošitše ka go bolela gore batho ba hlankela Jehofa ka mabaka a boithati. (Jobo 1:9-11; 2:4) Pego ya Kriste ya go botega ka mo go feletšego le yona e bontšhitše gore bogoši bja Jehofa bja legohle ke bja maleba e bile bo lokile. Ruri Jehofa o ile a thaba ge a bona potego e sa šišinyegego ya Morwa wa gagwe yo a ikokobeditšego.—Bala Diema 27:11.

11. Sehlabelo sa topollo sa Jesu Kriste se ile sa bulela batho ba dumelago tebelelo efe?

11 Ka go hwela ga gagwe koteng ya tlhokofatšo, Jesu o ile a ba a lefelela theko ya topollo bakeng sa batho. (Mat. 20:28) Se se ile sa bulela batho ba sebe sebaka sa gore ba tle ba phele ka mo go sa felego ge ba dutše ba dira dilo tše di lokilego. Paulo o ngwadile gore: “Ka tiro e tee ya go loka, mafelelo go mehuta ka moka ya batho ke gore go bolelwe gore ba lokile gore ba hwetše bophelo.” (Baroma 5:18) Lehu la Jesu le ile la bulela Bakriste ba tloditšwego ka moya tebelelo ya go se hwe kua legodimong gomme la bulela ba “dinku tše dingwe” bophelo bjo bo sa felego mo lefaseng.—Joh. 10:16; Baroma 8:16, 17.

KE WA “PELO E IKOKOBEDITŠEGO”

12. Jesu o bontšhitše bjang boleta le boikokobetšo ge a be a dirišana le batho bao ba sa phethagalago?

12 Jesu o laleditše bohle bao ba “lapišitšwego le go imelwa” gore ba tle go yena. O itše: “Rwalang joko ya ka le ithute go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo.” (Mat. 11:28, 29) Go ba le boikokobetšo le boleta go šušumeditše Jesu gore a be le botho le go se kgetholle ge a dirišana le batho bao ba sa phethagalago. O be a na le tekatekano ka seo a bego a se letetše go barutiwa ba gagwe. Jesu o ile a ba reta le go ba kgothatša. Ga se a dira gore ba ikwe ba sa swanelege goba ba se na mohola. Ruri Jesu o be a sa sware batho ka makgwakgwa goba go ba gatelela. Ka lehlakoreng le lengwe, o ile a tiišetša balatedi ba gagwe gore ge ba ka batamela go yena gomme ba diriša dithuto tša gagwe, ba be ba tla ikwa ba lapologile, ka ge joko ya gagwe e le botho gomme morwalo wa gagwe o le bohwefo. Batho ba bong ka moka le ba nywaga ka moka ba be ba ikwa ba iketlile ge ba na le yena.—Mat. 11:30.

Tsela yeo Jesu a bontšhitšego kwelobohloko ka yona e re beetše mohlala

13. Jesu o bontšhitše bjang kwelobohloko go batho bao ba bego ba na le mathata?

13 Ge Jesu a be a na le batho ba tlwaelegilego ba Isiraele, o ile a ba kwela bohloko ka ge ba be ba na le mathata gomme a ela hloko dinyakwa tša bona. Ge a le kgauswi le Jeriko, o ile a kopana le mokgopedi wa sefofu yo a bitšwago Baratimeo le mogwera wa gagwe wa sefofu yo a sa bolelwago ka leina. Difofu tšeo di ile tša phegelela gore Jesu a di thuše, eupša lešaba le ile la di kgalemela gore di homole. Ruri go be go ka ba bonolo gore a hlokomologe dikgopelo tša banna bao ba difofu! Go e na le moo, Jesu o ile a kgopela gore ba tlišwe go yena, ke moka ka ge a be a ba kwela bohloko, o ile a budulla mahlo a bona. Ee, Jesu o ile a ekiša Tatagwe, e lego Jehofa, ka  go bontšha boikokobetšo le kgaugelo go badiradibe ba ba ikokobeditšego.—Mat. 20:29-34; Mar. 10:46-52.

“MANG LE MANG YO A IKOKOBETŠAGO O TLA GODIŠWA”

14. Ke mehola efe yeo e hwetšwago ka baka la tsela ya Jesu ya boikokobetšo?

14 Tsela ya Jesu Kriste ya go phela ka boikokobetšo e a thabiša e bile e hola kudu. Jehofa o ile a thaba ge a bona Morwa wa gagwe yo a rategago a ikokobeletša go dira thato ya gagwe. Baapostola le barutiwa ba ile ba lapološwa ke moya o boleta wa Jesu le go ba ga gagwe le pelo e ikokobeditšego. Mohlala wa gagwe, dithuto tša gagwe gotee le go ba reta ga gagwe ka borutho di ile tša ba šušumeletša gore ba gatele pele moyeng. Batho bao ba tlwaelegilego ba ile ba holwa ke boikokobetšo bja Jesu ka gobane o ile a ba thuša, a ba ruta le go ba kgothatša. Ge e le gabotse, batho bohle bao ba lopolotšwego ba tla hwetša mehola ya ka mo go sa felego yeo e tšwago sehlabelong sa Jesu sa topollo.

15. Jesu o hotšwe bjang ke go ba yo a ikokobeditšego?

15 Go thwe’ng ka Jesu? Na boikokobetšo bja gagwe bo ile bja mo hola? Ee, ka gobane Jesu o boditše barutiwa ba gagwe gore: “Mang le mang yo a ikokobetšago o tla godišwa.” (Mat. 23:12) Mantšu ao a itlhatsetše e le a therešo boemong bja gagwe. Paulo o hlalosa gore: “Modimo o . . . phagamišeditše [Jesu] boemong bja godimo gomme ka botho a mo nea leina leo le lego ka godimo ga leina le ge e le lefe le lengwe, e le gore letolo le lengwe le le lengwe la bao ba lego legodimong le bao ba lego lefaseng le bao ba lego ka tlase ga mmu le khuname leineng la Jesu, le gore leleme le lengwe le le lengwe le dumele phatlalatša gore Jesu Kriste ke Morena, e le gore go išwe letago go Modimo Tate.” Ka baka la tsela ya Jesu ya boikokobetšo le potego, Jehofa Modimo o ile a phagamiša Morwa wa gagwe, a dira gore a laole dibopiwa tšohle tša legodimong le tša mo lefaseng.—Bafil. 2:9-11.

JESU O TLA ‘NAMELA PERE A LWELE THEREŠO LE BAIKOKOBETŠI’

16. Ke eng seo se bontšhago gore seka sa boikokobetšo se tla tšwela pele se bonagala medirong ya Morwa wa Modimo?

16 Seka sa boikokobetšo se tla tšwela pele se bonagala medirong ya Morwa wa Modimo. Ge a porofeta kamoo Jesu a tlago go gata mogato wa go lwa le manaba a Gagwe a le boemong bjo bo phagamego legodimong, mopsalme o opetše ka gore: “Eya o atlege o le letagong la gago; namela pere ya gago o lwele baikokobetši, o lwele therešo le toko.” (Ps. 45:4) A na le therešo le toko, Jesu Kriste o tla namela pere a lwele baikokobetši ntweng ya Haramagedone. Le gona ke eng seo se tlago go direga mafelelong a Pušo ya Nywaga e Sekete ge Kgoši Mesia “a fedišitše mebušo ka moka le bolaodi ka moka le matla”? Na o tla bontšha boikokobetšo? Ee, ka gobane o tla “gafela mmušo go Modimo wa gagwe yo e bilego e le Tatagwe.”—Bala 1 Bakorinthe 15:24-28.

17, 18. (a) Ke ka baka la’ng e le gabohlokwa gore bahlanka ba Jehofa ba latele mohlala wa Jesu wa boikokobetšo? (b) Ke eng seo se tlago go ahlaahlwa sehlogong se se latelago?

17 Go thwe’ng ka rena? Na re tla latela mohlala woo re o beetšwego ke Jesu gomme re bontšhe boikokobetšo? Go tla direga eng ka rena ge Kgoši Jesu Kriste a etla go phethagatša kahlolo ya gagwe ntweng ya Haramagedone? Tsela yeo a nametšego pere ka yona e bontšha gore o tla phološa feela bao ba ikokobeditšego le bao ba nago le toko. Ka gona, go hlagolela ga rena boikokobetšo go bohlokwa e le gore re phologe. Go oketša moo, go etša ge tsela ya bophelo ya Jesu Kriste ya boikokobetšo e hotše yena le ba bangwe, go bontšha ga rena boikokobetšo go tla re hola ka ditsela tše di fapafapanego.

18 Ke eng seo se ka re thušago gore re latele mohlala wa Jesu wa boikokobetšo? Re ka katanela bjang go ba ba ikokobeditšego go sa šetšwe ditlhohlo tšeo re ka lebeletšanago le tšona? Dipotšišo tše di tla ahlaahlwa sehlogong se latelago.