Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2012

O Bontšha Moya wa Mohuta Mang

O Bontšha Moya wa Mohuta Mang

“Eka botho bjo bogolo bja Morena Jesu Kriste bo ka ba le moya wo le o bontšhago.”—FIL. 25.

1. Paulo o ile a bolela ka kholofelo efe ge a be a ngwalela badumedigotee le yena?

GE MOAPOSTOLA Paulo a be a ngwalela badumedigotee le yena, o ile a bolela gantši ka kholofelo ya gagwe yeo Modimo le Kriste ba bego ba e rata yeo diphuthego di e bontšhitšego. Ka mohlala, ge a be a ngwalela Bagalatia o itše: “Bana bešo, anke botho bjo bogolo bja Morena wa rena Jesu Kriste bo be le moya wo le o bontšhago. Amene.” (Bagal. 6:18) O be a e ra go re’ng ge a re “moya wo le o bontšhago”?

2, 3. (a) Ka dinako tše dingwe Paulo o be a e ra go re’ng ge a be a diriša lentšu “moya”? (b) Ke dipotšišo dife tšeo re ka ipotšišago tšona mabapi le moya woo re o bontšhago?

2 Lentšu “moya” leo Paulo a le dirišitšego mo le šupa go matla a tutuetšago ao a re dirago gore re bolele goba re dire dilo ka tsela e itšego. Motho yo mongwe e ka ba yo botho, yo a naganelago, wa moya o boleta, yo a neago ka seatla se bulegilego goba yo a lebalelago. Beibele e kgothaletša go ba le “moya wo o homotšego le o boleta” le go ba le “moya o fodilego.” (1 Pet. 3:4; Die. 17:27) Ka lehlakoreng le lengwe, motho e ka ba yo a tlwaetšego go kodutla, yo a ratago dilo tše di bonagalago, yo a kgopišegago gabonolo goba yo a nago le moya wa go ipuša. Se sebe le go feta, go na le bao ba bontšhago moya wa go se hlweke, wa go se kwe goba gaešita le wa borabele.

3 Ka go re’alo, ge Paulo a be a diriša mantšu a swanago le a rego “Morena a be le moya wo o o bontšhago,” o be a kgothaletša bana babo go bontšha moya woo o dumelelanago le thato ya Modimo le semelo sa go swana le sa Kriste. (2 Tim. 4:22; bala Bakolose 3:9-12.) Lehono ke mo gobotse gore re ipotšiše dipotšišo tše rego: ‘Ke bontšha moya wa mohuta mang? Nka bontšha bjang kutšwanyana moya woo o kgahlišago Modimo? Na nka kaonafatša tsela yeo ke bontšhago moya o kgahlišago ka phuthegong?’ Ka mohlala, ka serapeng sa matšoba, go taga ga letšoba le lengwe le le lengwe go tlaleletša bobotseng bja matšoba a  mangwe ka moka. Na re letšoba leo le tlaleletšago bobotseng bjo bo lego ka phuthegong? Ruri re swanetše go katanela go dira boiteko bja gore re swane le lona. Anke ga bjale re boneng seo re ka se dirago gore re bontšhe moya woo o kgahlišago Modimo.

PHEMA MOYA WA LEFASE

4. “Moya wa lefase” ke eng?

4 Mangwalo a re botša gore: “Ga se ra amogela moya wa lefase, eupša re amogetše moya o tšwago go Modimo.” (1 Bakor. 2:12) “Moya wa lefase” ke eng? Ke moya wo o swanago le woo go boletšwego ka wona go Baefeso 2:2, yeo e rego: “Ka nako e nngwe le [be] le sepela . . . go ya ka tshepedišo ya dilo ya lefase le, go ya ka mmuši wa moya wo o laolago batho, moya woo bjale o šomago go bana ba go se kwe.” “Moya” wo ke boemo bja kgopolo goba moya wa lefase, gomme o re aparetše go etša moya wa kgonthe. O tletše gohle. Gantši o bonagatšwa ke boemo bja kgopolo bjoo batho ba bantši lehono ba nago le bjona bja gore ga go motho yo a tlago go ba botša selo goba bja go lwela ditshwanelo tša bona. Ke “bana ba go se kwe” ba lefase la Sathane.

5. Ke moya ofe o mobe woo Baisiraele ba bangwe ba ilego ba o bontšha?

5 Boemo bjo bjalo bja kgopolo ga bo thome go ba gona. Mehleng ya Moshe, Kora o ile a tsogela bao ba nago le matla a taolo setšhabeng sa Isiraele. Ka mo go kgethegilego, o ile a hlasela Arone le barwa ba gagwe, bao ba bego ba na le tokelo ya go hlankela e le baperisita. Mohlomongwe o ile a bona mafokodi a bona. Goba a ka ba a ile a nagana gore Moshe e be e le mmetlašapo la tlala—a nea ba leloko la gabo ditokelo. Go sa šetšwe gore boemo e be e le bofe, go molaleng gore Kora o ile a thoma go bona dilo ka pono ya nama gomme a bolela gampe ka bao ba bego ba kgethilwe ke Jehofa, a bolela le bona ka lenyatšo gore: “Le re lapišitše . . . Le re’ng le iphagamišetša phuthego?” (Num. 16:3) Ka tsela e swanago, Dathane le Abirama ba ile ba belaela ka Moshe, ba mmotša gore o be a ‘leka go itira kgošana ya bona.’ Ge ba be ba bitšwa gore ba tšwelele pele ga Moshe, ba ile ba araba ka mereba ba re: “Re ka se rotoge!” (Num. 16:12-14) Go molaleng gore Jehofa ga se a ka a kgahlišwa ke moya wa bona. O ile a fediša marabele ao ka moka.—Num. 16:28-35.

6. Ba bangwe lekgolong la pele la nywaga ba bontšhitše bjang gore ba na le boemo bjo fošagetšego bja kgopolo, gomme seo se ka ba se bakilwe ke eng?

6 Ba bangwe lekgolong la pele la nywaga le bona ba ile ba sola bao ba nago le matla a taolo ka phuthegong, “ba nyatša bolaodi.” (Juda 8) Go ka direga gore banna bao ba be ba sa kgotsofatšwe ke ditokelo tšeo ba bego ba na le tšona gomme ba ile ba leka go tutueletša ba bangwe gore ba tsogele banna ba kgethilwego bao ba bego ba phetha ka phišego mediro yeo ba e abetšwego ke Modimo.—Bala 3 Johane 9, 10.

7. Ke ka tsela efe go ka nyakegago gore motho a be šedi ka phuthegong lehono?

7 Go molaleng gore moya o bjalo ga o nyakege ka phuthegong. Ke ka baka leo go nyakegago gore motho a be šedi tabeng ye. Bagolo bao ba etelelago pele ka phuthegong ga se ba phethagala, go fo swana le ge ba mehleng ya Moshe gotee le ba mehleng ya moapostola Johane ba be ba sa phethagala. Bagolo ba ka dira diphošo tšeo di re kgomago ka noši. Ge e ba seo se direga, e ka se be mo gobotse gore setho le ge e le sefe sa phuthego se arabele ka tsela yeo e bontšhago moya wa lefase, ka bogale se tsome gore “toka e phethwe” goba se bolele gore “go dirwe se sengwe ka ngwanabo rena yoo”! Jehofa a ka kgetha go hlokomologa diphošo tše itšego tše dinyenyane. Na le rena ga se ra swanela go dira se swanago? Ka ge batho ba bangwe ka phuthegong ba bona mafokodi ao bagolo ba nago le ona, ba bangwe ba bona bao ba dirago dibe tše dikgolo ba ile ba gana go tšwelela pele ga komiti ya bagolo bao ba abetšwego go ba thuša. Se se ka swantšhwa le molwetši yo a sa nyakego go hwetša kalafo ka gobane go na le selo se itšego seo a sa se ratego ka ngaka.

8. Ke mangwalo afe ao a ka re thušago go dula re na le pono e swanetšego ka bao ba etelelago pele ka phuthegong?

 8 E le gore re pheme moya woo, re ka gopola gore ka Beibeleng Jesu o hlaloswa a “swere dinaledi tše šupago seatleng sa gagwe sa le letona.” “Dinaledi” tšeo di emela balebeledi bao ba tloditšwego ka moya, e bile go ka bolelwa gore di šupa go balebeledi ka moka bao ba lego ka diphuthegong. Jesu a ka hlahla “dinaledi” tše di lego ka seatleng sa gagwe ka tsela le ge e le efe yeo a bonago e le e swanetšego. (Kut. 1:16, 20) Ka go re’alo, ka ge Jesu e le Hlogo ya phuthego ya Bokriste, o laola dihlopha tša bagolo. Ge e ba go tloga go nyakega gore mogolo yo mongwe a phošollwe, gona Yoo a nago le ‘mahlo a etšago kgabo ya mollo’ o tla bona gore seo se dirwa ka nako ya Gagwe le ka tsela ya gagwe. (Kut. 1:14) Ka nako e swanago, re dula re hlompha bao ba kgethilwego ke moya o mokgethwa, ka ge Paulo a ngwadile gore: “Kwang bao ba etelelago pele gare ga lena gomme le ikokobetše, gobane ba hlokomela meoya ya lena gomme ba tla ikarabela ka seo; e le gore ba dire se ka lethabo e sego ka go fegelwa, gobane seo se tla le gobatša.”—Baheb. 13:17.

Go naganišiša ka tema yeo Jesu a e kgathago go kgoma bjang tsela yeo o arabelago ka yona ge o eletšwa?

9. (a) Ke teko efe yeo Mokriste a ka lebeletšanago le yona ge e ba a phošollwa goba a newa tayo? (b) Ke tsela efe e kaonekaone yeo re swanetšego go arabela ka yona ge re phošollwa?

9 Le gona Mokriste a ka lebeletšana le teko ge e ba a phošollwa goba a tšeelwa ditokelo ka phuthegong. Ngwanabo rena yo mongwe o ile a newa keletšo ka bohlale ke bagolo mabapi le go bapala dipapadi tša bidio tšeo di nago le bošoro. Ka manyami, ga se a ka a amogela keletšo yeo gabotse gomme o ile a se  sa swanelega go ba mohlanka wa bodiredi ka ge a se sa hlwa a fihlelela ditshwanelego tša Mangwalo. (Ps. 11:5; 1 Tim. 3:8-10) Ka morago ga moo, ngwanabo rena yoo o ile a bolela phatlalatša gore o be a sa dumelelane le seo, a ngwalela ka go se kgaotše ofisi ya lekala mangwalo ao a bego a swaya bagolo diphošo, gomme a tutueletša le ba bangwe ka phuthegong gore ba dire se swanago. Lega go le bjalo, ruri go ka se be le mohola gore re bee khutšo ya phuthego kotsing ka go leka go lokafatša ditiro tša rena. Ke mo go holago kudu gore re lebelele phošollo e le tsela yeo e re bulago mahlo gore re bone mafokodi ao re bego re sa a lemoge ke moka re lokiše boemo bjoo re ikhomoletše.—Bala Dillo 3:28, 29.

10. (a) Hlalosa seo re ka ithutago sona go Jakobo 3:16-18 mabapi le moya woo o swanetšego go bontšhwa ka phuthegong le woo o sa swanelwago go bontšhwa. (b) Go bontšha “bohlale bjo bo tšwago godimo” go ba le mafelelo afe?

10 Jakobo 3:16-18 e re nea tlhahlo e botse ya seo se bolelwago ke go ba le moya woo o swanetšego go bontšhwa ka phuthegong le woo o sa swanelwago go bontšhwa. E re: “Moo go lego lehufa le tshele, go tla ba le tlhakatlhakano le selo se sengwe le se sengwe se sebe. Eupša bohlale bjo bo tšwago godimo, sa pelepele bo sekile, gape bo na le khutšo, bo lekalekane, bo ikemišeditše go kwa, bo tletše kgaugelo le dienywa tše botse, ga bo kgetholle e bile ga bo na boikaketši. Godimo ga moo, peu ya seenywa sa toko e bjalwa maemong a khutšo gare ga bao ba dirago khutšo.” Ge re dutše re dira dilo ka go dumelelana le “bohlale bjo bo tšwago godimo,” dika tša rena tše di bontšhago gore re boifa Modimo di tla tlaleletša moyeng o mobotse woo re o bontšhago bana babo rena.

BONTŠHA MOYA WA GO HLOMPHA KA PHUTHEGONG

11. (a) Go dula re na le moya o swanetšego go tla re thuša go phema eng? (b) Ke eng seo re ithutago sona mohlaleng wa Dafida?

11 Re swanetše go dula re gopola gore Jehofa o laetše bagolo gore ba “[diše] mohlape wa Modimo.” (Dit. 20:28; 1 Pet. 5:2) Ka go re’alo, re lemoga gore go bohlale gore re hlomphe tokišetšo ya Modimo, go sa šetšwe gore re na le tokelo ya go hlankela re le bagolo goba go se bjalo. Go dula re bontšha moya o swanetšego go ka re thuša gore re pheme go tshwenyega kudu ka maemo a rena. Ge Kgoši Saulo wa Isiraele a be a nagana gore Dafida o be a bea bogoši bja gagwe kotsing, Saulo ‘o ile a lebelela Dafida ka go mmelaela.’ (1 Sam. 18:9) Kgoši e ile ya ba le moya o mobe gomme ya ba ya nyaka go bolaya Dafida. Go e na le go tshwenyega kudu ka maemo a rena go etša Saulo, e ka ba mo gobotse kudu gore re ekiše Dafida. Go sa šetšwe go lebeletšana le go hloka toka, lesogana le le ile la dula le hlompha thulaganyo ya Modimo ya bolaodi.—Bala 1 Samuele 26:23.

12. Ke eng seo se tlago go tlaleletša boteeng bja phuthego?

12 Go se be le pono e swanago ka dilo ka phuthegong go ka baka dikgohlano—gaešita le magareng ga balebeledi. Keletšo e tšwago Beibeleng e ka re thuša tabeng ye, ge e re: “Go bontšhaneng kgodišo, etelelang pele” gomme “le se ke la ipona le le bao ba lego bohlale mahlong a lena.” (Baroma 12:10, 16) Go e na le go gapeletša gore re nepile, re swanetše go dumela gore gantši go na le ditsela tše dintši tšeo di amogelegago tša gore batho ba bone taba. Ge e ba re leka go lebelela dilo ka tsela yeo ba bangwe ba di bonago ka yona, gona re ka tlaleletša boteeng bja phuthego.—Bafil. 4:5.

13. Re swanetše go lebelela bjang dipono tša rena, gona ke mohlala ofe wa ka Beibeleng woo o bontšhago se?

13 Na se se bolela gore go fošagetše go botša motho yo mongwe pono ya rena ge e ba re bona gore go na le selo se sengwe seo se swanetšego go lokišwa ka phuthegong? Le gatee. Lekgolong la pele la nywaga go ile gwa tsoga kgang e kgolo yeo go bego go ngangišanwa ka yona. Bana babo rena ba ‘ile ba rulaganya gore Paulo, Baranaba le ba bangwe ba bona ba rotogele go baapostola le bagolo kua Jerusalema  mabapi le ngangišano ye.’ (Dit. 15:2) Ga go pelaelo gore yo mongwe le yo mongwe wa bana bao babo rena o be a na le pono e itšego ka taba ye le gore ba be ba ka swaragana le yona ka tsela efe. Lega go le bjalo, ka morago ga ge yo mongwe le yo mongwe a tšweleditše pono ya gagwe gomme go dirilwe phetho yeo e bego e hlahlwa ke moya o mokgethwa, bana bao babo rena ga se ba ka ba tšwela pele ba bolela dipono tša bona ka taba yeo. Ka morago ga gore lengwalo leo le nago le phetho yeo le fihle diphuthegong, ‘ba ile ba thabela kgothatšo yeo’ gomme ba “matlafatšwa tumelong.” (Dit. 15:31; 16:4, 5) Le lehono, ka morago ga gore re tšweletše taba e itšego go bana babo rena bao ba ikarabelago, re swanetše go e tlogelela bona gore ba e hlahlobišiše.

BONTŠHANG MOYA O MOBOTSE DITSWALANONG TŠA LENA

14. Re ka bontšha bjang moya o mobotse ditswalanong tša rena?

14 Ditswalanong tša rena, go na le dibaka tše dintši tša gore re bontšhe moya o mobotse. Yo mongwe le yo mongwe wa rena o tla ba a dira gabotse ge e ba a bontšha moya wa go lebalela ge ba bangwe ba mo kgopiša. Lentšu la Modimo le re botša gore: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.” (Bakol. 3:13) Polelwana e rego “le ge e ba motho a na le lebaka la go ba le pelaelo” e šišinya gore go ka ba le mabaka a kwagalago a gore re be le dikgohlano le ba bangwe. Lega go le bjalo, go e na le gore re tshwenyege kudu ka diphošo tša bona tše dinyenyane gomme re šitiše khutšo ka phuthegong, re leka go ekiša Jehofa le go ba lebalela ka bolokologi, ke moka re tšwele pele ka tirelo ya rena re le ngatana e tee.

15. (a) Re ka ithuta eng go Jobo mabapi le go lebalela? (b) Thapelo e ka re thuša bjang gore re bontšhe moya o kgahlišago?

15 Mabapi le go lebalela, re ka ithuta go tšwa go monna yo a bitšwago Jobo. Bao ba bego ba ipitša bagwera ba gagwe ba bararo ba ile ba mo kgopiša ka mantšu a mantši a go hlaba. Lega go bjalo, Jobo o be a lebalela. Re tseba se bjang? ‘O ile a rapelela bagwera ba gagwe.’ (Jobo 16:2; 42:10) Go rapelela ba bangwe go ka fetoša boemo bja rena bja kgopolo ka bona. Go rapelela Bakristegotee le rena go re thuša go hlagolela moya wo o swanago le wa Kriste. (Joh. 13:34, 35) Go tlaleletša tabeng ya gore re rapelele bana babo rena, re swanetše go rapelela le thušo ya moya o mokgethwa. (Luka 11:13) Moya wa Modimo o tla re thuša gore re bontšhe dika tša kgonthe tša Bokriste ge re dirišana le ba bangwe.—Bala Bagalatia 5:22, 23.

EBA LE MOYA O MOBOTSE KA MOKGATLONG WA MODIMO

16, 17. Mabapi le ‘moya wo re o bontšhago,’ ke eng seo wena o ikemišeditšego go se dira?

16 Ruri go ka ba le mafelelo a kgahlišago ge e ba setho se sengwe le se sengwe sa phuthego se itirela pakane ya go ba le moya o mobotse ka phuthegong! Ka morago ga go naganišiša ka ditaba tše, re ka dira phetho ya gore le rena ka noši re ka kaonefatša tabeng ya go bontšha moya o agago. Ge e ba go le bjalo, gona ga se ra swanela go dikadika go itumelela gore re hlahlobje ke Lentšu la Modimo. (Baheb. 4:12) Paulo, yoo a bego a tshwenyegile kudu ka ditiro tša ka phuthegong, o itše: “Ga ke lemoge selo se sebe ka nna. Lega go le bjalo, ga ke hlatselwe ke lokile ka se, eupša yo a ntlhahlobago ke Jehofa.”—1 Bakor. 4:4.

17 Ge re dutše re katanela go dira dilo ka go dumelelana le bohlale bjo bo tšwago godimo, re sa tshwenyege kudu ka maemo a rena, re tla tlaleletša moyeng o mobotse wa ka phuthegong. Ka go ba le moya wa go lebalela le go nagana ka dika tše dibotse tša ba bangwe, re tla thabela ditswalano tša khutšo le barapedigotee le rena. (Bafil. 4:8) Ge re dutše re dira dilo tše, re ka kgodišega gore Jehofa le Jesu ba tla kgahlišwa ke “moya wo [re] o bontšhago.”—Fil. 25.