Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2012

Ba Ile ba Ikgafa go tšwa Pelong—Kua Brazil

Ba Ile ba Ikgafa go tšwa Pelong—Kua Brazil

NYWAGA e mmalwa e fetilego, Rúbia, e lego kgaetšedi yoo ga bjale a nago le nywaga e 30, o ile a etela Sandra, e lego mmulamadibogo yo a bego a hlankela phuthegong e nyenyane ka borwa bja naga ya Brazil. Nakong ya ge a be a mo etetše, go ile gwa direga selo se sengwe seo se ilego sa kgahla Rúbia kudu moo se fetošitšego bophelo bja gagwe. Selo seo ke eng? Anke re kweng Rúbia ka boyena.

“GA SE KA KGOLWA SEO KE BEGO KE SE KWA”

“Sandra o ile a ya le nna go yo bona mosadi yo a bego a ithuta Beibele le yena. Nakong ya thuto yeo, mosadi yoo o ile a bolela gore: ‘Sandra, banenyana ba bararo ba moo ke šomago gona ba nyaka go ithuta Beibele, eupša ke ba boditše gore ba tla swanelwa ke go leta go fihlela sebaka se bulega. Ke a tseba gore o ka se be le sekgoba sa go ithuta le bona lenyaga.’ Ga se ka kgolwa seo ke bego ke se kwa. Batho bao ba bego ba nyaka go tseba Jehofa ba be ba swanetše go leta go fihlela sekgoba se bulega! Phuthegong  yeo ke bego ke etšwa go yona kua gae, ke be ke thatafalelwa ke go hwetša le ge e le thuto e tee feela. Ka wona motsotso woo, gona ka moo lapeng la morutwana yoo wa Beibele, ke ile ka tlelwa ke kganyogo e matla ya go thuša batho ba motsaneng wa gabo. Gateetee ka morago ga moo, ke ile ka tloga motseng o mogolo woo ke bego ke dula go wona gomme ka hudugela toropong yeo Sandra a bego a bula madibogo go yona.”

Rúbia o ile a sepela bjang? O anega gore: “Dikgwedi tše pedi feela ka morago ga gore ke hudugele moo, ke be ke na le dithuto tša Beibele tše 15, gomme ke re o ka se kgolwe gore go se go ye kae, le nna ke be ke na le batho bao ba bego ba swanetše go leta go swana le ba Sandra!”

O ILE A TUTUELETŠEGA GO HLAHLOBA BODIREDI BJA GAGWE LEFSA

Diego, e lego ngwanabo rena yoo ga bjale a lego nywageng ya mathomong a bo-20, o ile a etela babulamadibogo ba mmalwa bao ba bego ba hlankela toropong e nyenyane ya Prudentópolis, ka borwa bja naga ya Brazil. Ketelo yeo e ile ya mo kgoma kudu; ge e le gabotse o ile a tutueletšega go hlahloba bodiredi bja gagwe lefsa. O hlalosa gore: “Ke be ke bo ja bo fodile ka phuthegong ya gešo, ke fetša diiri tše sego kae kgwedi le kgwedi bodireding. Eupša ge ke be ke etetše babulamadibogo bao gomme ke theeditše diphihlelo tša bona, ke ile ka gapeletšega go bapetša lethabo leo ba bego ba na le lona le moya wa ka wa go goga maoto bodireding. Ge ke be ke bona kamoo ba bego ba thabile ka gona le go hlalala, ke ile ka duma gore bophelo bja ka le bjona bo ka ba le morero go swana le bja bona.” Ka morago ga ketelo yeo, Diego o ile a thoma go bula madibogo.

Go swana le Diego, na le wena o Hlatse ya mofsa yeo e tšeago karolo modirong wa boboledi gomme e eba gona dibokeng tša Bokriste eupša ka nako e swanago e bona eka bodiredi bo a e tšwafiša? Ge e ba go le bjalo, na o ka dira diphetogo bophelong bja gago tšeo di tlago go go dumelela gore o latswe lethabo leo le tlišwago ke go hlankela moo go nyakegago bagoeledi ba oketšegilego ba Mmušo? Ke therešo gore kgopolo ya go gafa bophelo bja boiketlo e ka bonagala e go tšhoša. Eupša bafsa ba bantši ba kgethile go gafa bophelo bjo bjalo. Ba ile ba ba le sebete sa go beakanya dipakane tša bona le dikganyogo tša bona e le gore ba hlankele Jehofa ka botlalo. Ela hloko mohlala o mongwe gape, e lego wa Bruno.

KE BE SEKGWARI SA MMINO GOBA MODIREDI?

Nywaga e mmalwa e fetilego, Bruno, yoo ga bjale a nago le nywaga e 28, o ile a ithutela mmino sekolong se sengwe  se se tumilego, gomme pakane ya gagwe e be e le go ba moopediši wa sehlopha se segolo sa baletši ba mmino. Ge e le gabotse, o ile a dira tšwelopele e kgolo dithutong tša gagwe moo a ilego a kgopelwa ka makga a mmalwa gore a opediše sehlopha se segolo sa baletši ba mmino. Go be go bonagala a be a tlo atlega mošomong wa gagwe. Bruno o anega gore: “Eupša ke ile ka bona gore go na le selo seo se hlaelago bophelong bja ka. Ke be ke ineetše go Jehofa, eupša ke be ke tseba gore ga se ka ikgafela yena ka botlalo, gomme seo se be se ntshwenya. Ke ile ka rapela Jehofa gomme ka mo tšhollela maikwelo a ka, le gona ke ile ka boledišana le bana babo rena bao ba nago le phihlelo ka phuthegong. Ka morago ga go naganišiša ka taba ye ka kelohloko, ke ile ka dira phetho ya gore bodiredi bja ka bo tle pele ga mmino, gomme ke ile ka tlogela sekolo sa mmino ke moka ka ya go hlankela lefelong leo go bego go tloga go nyakega bagoeledi ba oketšegilego ba Mmušo.” Phetho ya gagwe e ile ya ba le mafelelo afe?

Bruno o ile a hudugela toropong ya Guapiara (ya baagi ba ka bago 7 000), yeo e lego dikhilomithara tše 260 go tloga motseng o mogolo wa São Paulo. Yeo e bile phetogo e kgolo. O hlalosa gore: “Ke ile ka dula ka ngwakwaneng woo o bego o se na setšidifatši, thelebišene goba Inthanete. Eupša jarata ya ngwakwaneng woo e be e na le dilo tše dingwe tšeo ke bego ke se na tšona peleng, e lego serapa sa merogo le sa dienywa!” Ge Bruno a be a hlankela moo phuthegong e nyenyane, gatee mo bekeng o be a tlatša mokotla wa gagwe ka dijo, lepotlelwana la meetse le dikgatišo gomme a sepela ka sethuthuthu go yo nea bohlatse metsemagaeng. Batho ba bantši tikologong yeo ba be ba thoma go kwa ditaba tše dibotse ka lekga la pele. O anega gore: “Ke be ke na le dithuto tša Beibele tše 18. Ke ile ka thaba kudu ge ke bona barutwana ba ba dira diphetogo maphelong a bona!” O oketša ka gore: “Ka nako yeo, ke ile ka lemoga gore ke hweditše seo se bego se hlaela bophelong bja ka—go ikwa ke kgotsofetše kudu ka baka la go etiša pele dikgahlego tša Mmušo. Nkabe ke se ka ka ka thabela dilo tše ge nkabe ke ile ka phegelela dipakane tša nama.” Bruno o ile a itlhokomela bjang nameng ge a le Guapiara? O araba a myemyela gore: “Ka go ruta batho go letša katara.” E be e sa dutše e le sekgwari—ka tsela e itšego.

“KE ILE KA GAPELETŠEGA GORE KE DULE”

Mariana, yoo ga bjale a nago le nywaga e ka bago e 30, o ile a ikhwetša a le boemong bja go swana le bja Bruno. O be a šoma e le ramolao, eupša go sa šetšwe mošomo woo wa gagwe o kgahlišago, o be a ikwa a sa kgotsofala le ganyenyane. O re: “Ke be ke ikwa eka ke ‘kitimiša phefo.’”  (Mmo. 1:17) Bana babo rena le dikgaetšedi ba mmalwa ba ile ba mo kgothaletša gore a naganišiše ka modiro wa go bula madibogo. Ka morago ga gore a naganišiše ka bjona, Mariana gotee le bagwera ba gagwe e lego Bianca, Caroline le Juliana, ba ile ba phetha ka gore ba thuše phuthego ya kua Barra do Bugres, e lego torotswana e lego lekatana ya kgauswi le Bolivia, dikhilomithara tše diketekete go tloga magaeng a gabo bona. Go ile gwa direga’ng ka morago?

Mariana o re: “Ke be ke ikemišeditše go dula moo dikgwedi tše tharo feela. Eupša ge dikgwedi tšeo di fela, ke be ke na le dithuto tša Beibele tše 15! Therešo ke gore barutwana bao ba be ba nyaka thušo e kgolo gore ba dire tšwelopele therešong. Ka gona, ke ile ka hloka sebete sa go ba botša gore ke a sepela. Ke ile ka gapeletšega gore ke dule.” Dikgaetšedi tše dingwe ka moka le tšona di ile tša dula. Ka gona, na mošomo o mofsa wa Mariana o ile wa feleletša ka gore a phele ka tsela e nago le morero? O re: “Ke thabišwa kudu ke gore Jehofa o ntirišetša go thuša batho go fetoša maphelo a bona go ba a kaone. Ke ikwa ke šegofaditšwe go tseba gore ga bjale ke diriša nako ya ka le matla a ka go dira selo seo se tlogago se na le mohola.” Maikwelo a Caroline a akaretša gabotse maikwelo a dikgaetšedi tšeo ka moka tše nne ge a re: “Ge ke robala bošego, ke ikwa ke kgotsofetše kudu ka gobane ke dirišitše matla a ka ka moka go phegelela dikgahlego tša Mmušo. Morero o mogolo bophelong bja ka ke go thuša barutwana ba ka ba Beibele. Go tloga go kgahliša go ba bona ba gatela pele. Ke thabela go bona therešo ya mantšu a rego: ‘Latswang le be le boneng gore Jehofa o lokile.’”—Ps. 34:8.

Ruri Jehofa o tloga a thaba kudu ge a bona palo e oketšegago ka mehla ya bana babo rena le dikgaetšedi ba bafsa go dikologa lefase bao ‘ba ithaopelago’ go bolela ditaba tše dibotse tša Mmušo wa gagwe mafelong a lego lekatana! (Ps. 110:3; Die. 27:11) Mafelelo e ba gore bašomi bao ka moka ba ikgafilego ka go rata, ba thabela ditšhegofatšo tše dintši tše tšwago go Jehofa.—Die. 10:22.

Ithute ka mo go oketšegilego

Babulamadibogo ba na le Dikolo Dife?

Bao ba fetšago nako e ntši ba le modirong wa go bolela ka Mmušo wa Modimo ba diretšwe dikolo dife tše di kgethegilego?