Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  October 2012

Anke Ee ya Lena e be Ee

Anke Ee ya Lena e be Ee

“Anke ‘ee’ ya lena e be ee, ‘aowa’ ya lena e be aowa.”—MAT. 5:37.

1. Ke eng seo Jesu a se boletšego ka go dira dikeno, gona ka baka la’ng?

KA KAKARETŠO, Bakriste ba therešo ga ba gapeletšege go dira dikeno. Se ke ka gobane ba kwa Jesu, yo a itšego: “Anke ‘ee’ ya lena e be ee, ‘aowa’ ya lena e be aowa.” O be a bolela gore motho o swanetše go phelela lentšu la gagwe. Pele ga ge Jesu a ka bolela taelo yeo, o itše: “Le se ke la ena le gatee.” O boletše seo gobane a be a sola mokgwa woo batho ba bantši ba bego ba tlwaetše go o diriša dipoledišanong tša bona wa go rata go ena, le ge ba be ba sa ikemišetša go dira seo ba bego ba se bolela. Ka go bolela “se se fetago” go fo re Ee goba Aowa ge ba be ba holofetša go dira selo se itšego, batho ba bjalo ba ka ba ba bontšha gore ge e le gabotse ga ba botege, ka go re’alo ba tutuetšwa ke “yo mobe.”—Bala Mateo 5:33-37.

2. Hlalosa lebaka leo go sa fošagalago ka mehla gore batho ba dire dikeno.

2 Na mantšu a Jesu a bolela gore go dira keno le ge e le efe go fošagetše? Ke ka baka la’ng re re’alo? Go etša ge re ithutile sehlogong se se fetilego, Jehofa Modimo le mohlanka wa gagwe yo a lokilego Aborahama ba ile ba dira dikeno ditabeng tše bohlokwa. Le gona, Molao wa Modimo o be o nyaka gore go dirwe dikeno ge go rarollwa dikgakgano. (Ek. 22:10, 11; Num. 5:21, 22) Ka gona, go ka nyakega gore Mokriste a ene gore o tla bolela therešo ge a nea bohlatse ka kgorong ya tsheko. Goba maemong a mangwe a sa tlwaelegago, Mokriste a ka hwetša go nyakega gore a dire keno ya go kgonthišetša ba bangwe ka maikemišetšo a gagwe goba go thuša gore taba e itšego e rarollwe. Ge e le gabotse, ge Jesu a be a enišwa ke moperisita yo a phagamego, ga se a ka a gana eupša o ile a botša Sanhedrine ya Bajuda therešo. (Mat. 26:63, 64) Lega go le bjalo, Jesu ga se a ka a direla motho keno. Eupša ge a be a gatelela gore molaetša wa gagwe o swanetše go botwa, gantši ge a rola taba o be a thoma ka go bolela mantšu a moswananoši a rego: “Ruriruri ke re go lena.” (Joh. 1:51; 13:16, 20, 21, 38) Anke  re boneng se sengwe gape seo re ka ithutago sona go tšwa mohlaleng wa Jesu, wa Paulo le wa ba bangwe bao Ee ya bona e bego e le Ee.

JESU—MOHLALA O MOBOTSEBOTSE

Go tloga kolobetšong ya gagwe go fihla lehung la gagwe, Jesu o ile a phelela seo a bego a se holofeditše Tatagwe

3. Ke eng seo Jesu a ilego a se holofetša Modimo thapelong, gomme Tatagwe wa legodimong o ile a arabela bjang?

3 “Bona! Ke tlile . . . go dira thato ya gago, wena Modimo.” (Baheb. 10:7) Ka mantšu ao a kwagalago, Jesu o ile a ineela go Modimo gore a dire tšohle tšeo di bego di porofetilwe mabapi le Peu e holofeditšwego, go akaretša le gore o be a tla ‘longwa serethe’ ke Sathane. (Gen. 3:15) Ga go motho le o tee yo a kilego a ithaopela go rwala boikarabelo bjo bjalo bjo boima. Jehofa o ile a bolela a le legodimong gore o bota Morwa wa gagwe ka mo go feletšego, gaešita le ge a ile a se nyake gore Jesu a ikane gore o tla phelela lentšu la gagwe.—Luka 3:21, 22.

4. Jesu o ile a fihla bokgoleng bofe gore Ee ya gagwe e be Ee?

4 Jesu ka mehla o be a dira seo a se bolelago ka go dira gore Ee ya gagwe e be Ee. Jesu ga se a ka a dumelela selo le ge e le sefe go mo aroša go phetha thomo yeo a e hweditšego go Tatagwe ya go bolela ditaba tše dibotse tša Mmušo wa Modimo le go dira barutiwa bathong ka moka bao Modimo a bego a ba gogela go yena. (Joh. 6:44) Beibele e hlalosa bokgole bjoo Jesu a ilego a phelela therešo ka gona ge e re: “Go sa šetšwe gore dikholofetšo tša Modimo ke tše dintši gakaakang, di bile Ee ka yena.” (2 Bakor. 1:20) Ruri Jesu ke mohlala o mobotsebotse wa motho yo a ilego a phelela seo a se holofeditšego Tatagwe. Ga bjale anke re eleng hloko mohlala wa motho yo a ilego a dira sohle seo a ka se kgonago go ekiša Jesu.

PAULO—MONNA YO A PHELETŠEGO LENTŠU LA GAGWE

5. Moapostola Paulo o re beetše mohlala ofe?

5 “Ke dire’ng Morena?” (Dit. 22:10) Ka mantšu ao a tšwago pelong, Paulo, yoo ka nako yeo a bego a bitšwa Saulo, o ile a latela tlhahlo e tšwago go Morena Jesu yo a tagafaditšwego, yoo a bego a iponagaditše go yena ponong go mo thibela gore a se sa hlwa a tlaiša barutiwa ba Kriste. Ka baka la tiragalo yeo, Saulo ka boikokobetšo o ile a itsholela tsela ya gagwe ya nakong e fetilego ya bophelo, a kolobetšwa gomme a amogela kabelo e kgethegilego ya gore a nee bohlatse ka Jesu gare ga ditšhaba. Go tloga nakong yeo go ya pele, Paulo o ile a dula a bitša Jesu gore ke “Morena” wa gagwe, gomme a dira dilo ka go dumelelana le polelwana yeo go ba go fihla mafelelong a bophelo bja gagwe bja mo lefaseng. (Dit. 22:6-16; 2 Bakor. 4:5; 2 Tim. 4:8) Paulo o be a sa swane le ba bangwe bao Jesu a boletšego ka bona gore: “Ka gona, ke ka baka la’ng le mpitša Morena, Morena, eupša le sa dire dilo tše ke di bolelago?” (Luka 6:46) Ee, Jesu o letetše gore bohle bao ba amogelago gore ke Morena wa bona ba phelele lentšu la bona, go etša ge moapostola Paulo a dirile.

6, 7. (a) Ke ka baka la’ng Paulo a ile a fetoša thulaganyo ya gagwe ya gore a boele Korinthe, gomme ke ka baka la’ng seo se bego se bolelwa ke bao ba bego ba mo swaya diphošo se be se sa kwagale? (b) Re swanetše go lebelela bjang bao ba kgethilwego go etelela pele gare ga rena?

 6 Paulo o ile a phatlalatša ka phišego molaetša wa Mmušo go dikologa Asia Minor go ba go fihla Yuropa, a hloma diphuthego e bile a di etela gape. Ka dinako tše dingwe, o ile a bona go swanetše gore a dire keno ya gore seo a bego a se ngwadile e be e le therešo. (Bagal. 1:20) Ge ba bangwe kua Korinthe ba be ba latofatša Paulo ka gore ga a botege, o ile a itwela ka go ngwala gore: “Modimo a ka holofelwa gore seo re le botšago sona ga se Ee yeo e lego Aowa.” (2 Bakor. 1:18) Nakong ya ge a be a ngwala mantšu ao, Paulo o be a tlogile Efeso gomme a phatša Matsedonia a lebile Korinthe. Mathomong, o be a rulagantše go boela Korinthe pele ga ge a ka ya Matsedonia. (2 Bakor. 1:15, 16) Eupša go swana le modirong wa balebeledi ba basepedi lehono, ka dinako tše dingwe dithulaganyo tša go etela diphuthego di ka fetošwa. Diphetogo tše bjalo ga di dirwe ka mabaka a sa kwagalego le a boithati, eupša di dirwa ka baka la maemo a itšego a tšhoganetšo. Mo tabeng ya Paulo, lebaka leo a ilego a diegiša ketelo ya gagwe ya go ya Korinthe e be e le gore phuthego yeo e holege. Go bjalo bjang?

7 Nako e itšego ka morago ga gore Paulo a dire dithulaganyo tša gagwe tša mathomo, o ile a kwa ditaba tše di hlobaetšago tša gore Bakorinthe ba be ba dumeletše go se kwane gotee le boitshwaro bjo bo gobogilego gare ga bona. (1 Bakor. 1:11; 5:1) E le gore a lokiše boemo bjoo, o ile a ngwala keletšo e matla lengwalong la gagwe la pele leo a le ngwaletšego Bakorinthe. Ke moka, go e na le gore a sese ka go lebanya go tloga Efeso go ya Korinthe, Paulo o ile a phetha ka gore a nee bana babo nako e lekanego ya gore ba diriše keletšo ya gagwe e le gore ge mafelelong a fihla moo, ketelo ya gagwe e tle e be e agago le go feta. E le gore a ba bontšhe go rereša ga lebaka la gagwe la gore a dire phetogo yeo, Paulo o ngwadile lengwalong la gagwe la bobedi leo le yago go bona gore: “Ke bitša Modimo gore e be hlatse ya go ntatofatša gore ge ke sešo ka tla Korinthe, ke ka gobane ke le babalela.” (2 Bakor. 1:23) Anke le ka mohla re se swane le bao ba ilego ba swaya Paulo diphošo; go e na le moo, anke re hlompheng ka mo go tseneletšego bao ba kgethilwego go etelela pele gare ga rena. Therešo ke gore re tla ba re dira gabotse ge re ekiša Paulo, go etša ge le yena a ile a ekiša Kriste.—1 Bakor. 11:1; Baheb. 13:7.

MEHLALA E MENGWE E MEBOTSE

8. Ke mohlala ofe woo Rebeka a re beetšego wona?

8 “Ee, ke rata go sepela le yena.” (Gen. 24:58) Ka mantšu ao a bonolo, Rebeka o ile a araba mmagwe le kgaetšedi ya gagwe gore o ikemišeditše go tloga gagabo ka lona letšatši leo gomme a sepele le motho yo a bego a sa mo tsebe, ke moka ba tšee leeto la dikhilomithara tša ka godimo ga tše 800 gore a ye go ba mosadi wa morwa wa Aborahama e lego Isaka. (Gen. 24:50-58) Ee ya Rebeka e be e le Ee, gomme o ile a ba mosadi yo a bego a botega wa Isaka e bile a boifa Modimo. O ile a fetša bophelo bja gagwe ka moka a dula ka ditenteng e le modiiledi Nageng ya Kholofetšo. O ile a putswa ka baka la potego ya gagwe gomme a ba yo mongwe wa bomakgolokhukhu ba Peu e holofeditšwego, e lego Jesu Kriste.—Baheb. 11:9, 13.

9. Ruthe o ile a phelela bjang lentšu la gagwe?

9 “Aowa hle, re tla boela le wena bathong ba geno.” (Ruthe 1:10) Bahlologadi ba Bamoaba e lego Ruthe le Oropa ba ile ba phegelela go botša mmatswale wa bona wa mohlologadi e lego Naomi mantšu ao, gomme yena o be a tloga Moaba a boela Betlelehema. Mafelelong, Oropa o ile a boela gagabo ka morago ga gore Naomi a mo phegelele. Eupša Aowa ya Ruthe e ile ya ba Aowa. (Bala Ruthe 1:16, 17.) O ile a kgomarela Naomi, a tlogela lapa la gabo sa ruri gotee le borapedi bja maaka bja Moaba. O ile a kgotlelela e le morapedi yo a botegago wa Jehofa gomme a putswa ka gore e be yo mongwe wa basadi ba bahlano bao Mateo a boletšego ka bona lešikeng la Kriste.—Mat. 1:1, 3, 5, 6, 16.

10. Ke ka baka la’ng Jesaya e bile mohlala o mobotse go rena?

10 “Ke nna yo! Roma nna.” (Jes. 6:8) Pele ga  ge Jesaya a ka bolela seo, o ile a bona pono e kgahlišago ya Jehofa a dutše sedulong sa Gagwe sa bogoši ka godimo ga tempele ya Isiraele. Nakong ya ge a lebeletše pono yeo e makatšago, Jesaya o ile a kwa Jehofa a re: “Ke tla roma mang, gomme ke mang a tlago go re yela?” Yeo e be e le taletšo ya Jehofa ya gore e be mmoleledi wa go fetišetša molaetša wa Modimo go setšhaba sa Gagwe seo se bego se arogile. Jesaya o ile a phelela lentšu la gagwe—Ee ya gagwe e ile ya ba Ee. Ka nywaga ya ka godimo ga e 46, o ile a hlankela ka potego e le moporofeta, a bolela melaetša e matla ya kahlolo gotee le dikholofetšo tše di kgahlišago tša mabapi le go tsošološwa ga borapedi bja therešo.

11. (a) Ke ka baka la’ng go le bohlokwa gore re phelele lentšu la rena? (b) Ke mehlala efe ya temošo yeo e lego gona ya bao ba ilego ba se phelele therešo?

11 Ke ka baka la’ng Jehofa a ile a dira gore mehlala e lego ka mo godimo e ngwalwe ka Lentšung la gagwe gore re e bale? Le gona taba ya gore Ee ya rena e be Ee e tloga e le ya bohlokwa gakaaka’ng? Beibele e lemoša gabotse gore motho wa “go se botegele ditumelelano” o balwa gare batho ba go “swanelwa ke lehu.” (Baroma 1:31, 32) Farao wa Egipita, Kgoši Tsedekia wa Juda gotee le Ananiase le Safira ba gare ga mehlala e mebe yeo go boletšwego ka yona ka Beibeleng ya batho bao Ee ya bona e ilego ya se be Ee. Ka moka ga bona ba ile ba senya gomme ke mehlala ya temošo go rena.—Ek. 9:27, 28, 34, 35; Hesek. 17:13-15, 19, 20; Dit. 5:1-10.

12. Ke eng seo se tla re thušago gore re phelele lentšu la rena?

12 “Mehleng [ye] ya bofelo” yeo re phelago go yona, re phela gare ga batho “ba go se botege,” batho “bao ba bonagalago eka ke barapedi ba Modimo eupša ba latola matla a borapedi bjoo maphelong a bona.” (2 Tim. 3:1-5) Go fihla bokgoleng bjo bo kgonegago, re swanetše go phema go kopana le batho ba bjalo ba babe. Go e na le moo, re swanetše go bokana ka mehla le bao ba dulago ba katanela gore Ee ya bona e be Ee.—Baheb. 10:24, 25.

EE YA GAGO YEO E LEGO BOHLOKWAHLOKWA

13. Ke Ee efe yeo e lego bohlokwahlokwa yeo e bolelwago ke molatedi wa Jesu Kriste?

13 Kholofetšo e bohlokwahlokwa yeo motho a ka e dirago ke ya mabapi le boineelo bja gagwe go Modimo. Ka makga a mararo ka go lebanya, bao ba nyakago go itatola gore e be barutiwa ba Jesu ba na le sebaka sa gore ba arabe ka gore Ee ge ba botšišwa seo ba ikemišeditšego go se dira. (Mat. 16:24) Ge bagolo ba babedi ba boledišana le motho yo a nyakago go ba mogoeledi yo a sa kolobetšwago, motho yoo o botšišwa gore: “Na ruri o tloga o nyaka go ba yo mongwe wa Dihlatse tša Jehofa?” Ka morago ga ge motho yoo a šetše a dirile tšwelopele moyeng gomme a rata go hlahlobelwa kolobetšo, bagolo ba kopana le yena gomme ba mmotšiše gore: “Na o ineetše go Jehofa ka thapelo?” Mafelelong, e lego ka letšatši la kolobetšo, yo mongwe le yo mongwe yo a yago kolobetšong o botšišwa gore: “Motheong wa sehlabelo sa Jesu Kriste, na o sokologile dibeng tša gago gomme wa ineela go Jehofa gore o dire thato ya gagwe?” Ka go re’alo, ge bao ba  yago kolobetšong ba eme pele ga dihlatse, ba bolela gore Ee gomme ba holofetša gore ba tla hlankela Modimo ka mo go sa felego.

Na o phelela “Ee” ya gago e bohlokwahlokwa?

14. Ke boitlhahlobo bofe bjoo re swanetšego go bo dira kgafetšakgafetša?

14 Go sa šetšwe gore o sa tšwa go kolobetšwa goba o hlanketše Modimo ka nywagasome, o swanetše go itlhahloba kgafetšakgafetša gomme o ipotšiše dipotšišo tše bjalo ka tše rego: ‘Ge ke dutše ke ekiša Jesu Kriste, na ke tšwela pele ke phelela Ee ya ka e bohlokwahlokwa? Na ke dula ke ekwa Jesu ka go dira gore modiro wa boboledi le wa go dira barutiwa e be selo se bohlokwahlokwa bophelong bja ka?’—Bala 2 Bakorinthe 13:5.

15. Ke dibopegong dife tša bophelo moo go lego bohlokwa gore Ee ya rena e be Ee?

15 Go phelela ga rena boitlamo bja rena bja kolobetšo go bolela gore re swanetše go botega le ditabeng tše dingwe tše bohlokwa. Ka mohlala: Na o tsene lenyalong? Gona tšwela pele o phelela tlamo ya gago e bohlokwa ya gore o tla rata molekane wa gago le go mo hlokomela. Na o saenne konteraka ya kgwebo goba o tladitše fomo ya go tsenela tirelo e itšego ya nako e tletšego? Gona botegela seo o se saenetšego le seo o se holofeditšego. Na o dumetše taletšo ya go ya dijong e tšwago go motho yo a se nago sa gagwe? Gona o se ke wa tlogela go e phethagatša ka ge go tlile e nngwe e kaone go yona. Goba na o holofeditše motho yo o kopanego le yena bodireding bja ntlo le ntlo gore o tla boela go yena go tlo tšwetša pele poledišano? Gona kgonthišetša gore Ee ya gago e ba Ee, gomme Jehofa o tla šegofatša bodiredi bja gago.—Bala Luka 16:10.

GO HOLWA KE KGOŠI YEO E LEGO MOPERISITA WA RENA YO A PHAGAMEGO

16. Re swanetše go dira eng ge e ba re paletšwe ke go phethagatša seo re se holofeditšego?

16 Beibele e bolela gore ka ge re le batho ba sa phethagalago, “ka moka ga rena re kgopša gantši,” kudukudu tseleng yeo re dirišago leleme la rena ka yona. (Jak. 3:2) Ke eng seo re ka se dirago ge e ba re lemoga gore ga se ra phethagatša seo re se holofeditšego? Molaong wa Modimo woo a bego a o neile Isiraele, go be go na le tokišetšo ya go gaugela motho yoo a bego a na le molato wa go “bolela a sa nagana.” (Lef. 5:4-7, 11) Go sa dutše go na le tokišetšo e lerato bakeng sa Bakriste bao ba dirago sebe se bjalo. Ge e ba re ipobola go Jehofa gore re dirile sebe se bjalo, o tla re gaugela ka gore a re lebalele a diriša Moperisita wa rena yo a Phagamego, Jesu Kriste. (1 Joh. 2:1, 2) Lega go le bjalo, e le gore Modimo a dule a re amogela, re swanetše go bonagatša dienywa tše di swanelago boitsholo ka gore re se tlwaele go dira dibe tše bjalo gomme re dire sohle seo re ka se kgonago go lokiša bohloko le ge e le bofe bjoo re bo bakilego ka go bolela ga rena re sa nagana. (Die. 6:2, 3) Go ba gona, selo se sekaone le go feta ke gore re nagane ka kelohloko e le gore re se holofetše dilo tšeo re tlago go palelwa ke go di phethagatša.—Bala Mmoledi 5:2.

17, 18. Ke bokamoso bofe bjo bo kgahlišago bjoo bo letilego bohle bao ba katanelago gore Ee ya bona e be Ee?

17 Ruri barapedi ka moka ba Jehofa bao ba dulago ba katanela gore Ee ya bona e be Ee ba letetšwe ke bokamoso bjo bo kgahlišago! Bakeng sa batlotšwa ba 144 000, ba tla amogela bophelo bja go se hwe legodimong, moo ba tlago go ba le Jesu Mmušong wa gagwe “gomme ba . . . buša le yena e le dikgoši ka nywaga e sekete.” (Kut. 20:6) Bakeng sa ba bangwe ba dimilionemilione, se se tla bolela gore ba tla holwa ke pušo ya Mmušo wa Kriste lefaseng la paradeise. Ke gona moo ba tlago go thušwa gore e be ba phethagetšego mmeleng le monaganong.—Kut. 21:3-5.

18 Ge e ba re tla botega tekong ya mafelelo ge Pušo ya Jesu ya Nywaga e Sekete e fihla mafelelong, gona le ka mohla re ka se belaele seo motho le ge e le ofe a re botšago sona. (Kut. 20:7-10) Ee e nngwe le e nngwe e tla ba e le Ee, gomme Aowa e nngwe le e nngwe e tla ba e le Aowa. Lebaka ke gore yo mongwe le yo mongwe yoo a tlago go ba a phela ka nako yeo o tla ba a ekiša ka mo go phethagetšego Tatago rena yo lerato wa legodimong, Jehofa, yena “Modimo wa therešo.”—Ps. 31:5.