Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2012

Khutšo ka Nywaga e Sekete le go Feta Moo!

Khutšo ka Nywaga e Sekete le go Feta Moo!

“Gore Modimo e be tšohle go yo mongwe le yo mongwe.”—1 BAKOR. 15:28.

1. Ke dilo dife tšeo di tlago go diragalela “lešaba le legolo”?

NA O ka kgona go nagana dilo ka moka tše dibotse tšeo mmušo o matla woo o laolwago ke mmuši yo a nago le toka le kwelobohloko o ka di direlago balata ba wona ka nywaga e sekete? Ditiragalo tše di kgahlišago di emetše go diragalela “lešaba le legolo” leo le sa balegego—baphologi ba “masetlapelo a magolo,” e lego ao a tlago go fediša ka mo go feletšego tshepedišo ya gona bjale e kgopo ya dilo.—Kut. 7:9, 14.

2. Batho ba fetile gare ga eng nywageng e 6 000 e fetilego?

2 Nywageng e 6 000 e fetilego ya histori ya batho, boitaolo le boipušo di tlišeditše batho bohloko bjo bogolo le tlaišego. Ke kgale Beibele e boletše gore: ‘Motho o bušitše yo mongwe gore a mo gobatše.’ (Mmo. 8:9) Ke eng seo re se bonago lehono? Ka ntle le dintwa le go tsogelwa ga mebušo, go na le mathata a setlago pelo a bodiidi, malwetši, go senywa ga tikologo yeo re phelago go yona, go fetoga ga boemo bja leratadima, le a mangwe a mantši. Bahlankedi ba mebušo ba lemošitše gore ge e ba re sa fetoše tsela ya rena ya go dira dilo ya go se šetše selo, ditlamorago e tla ba tše šoro kudu.

3. Pušo ya Nywaga e Sekete e tla tliša eng?

3 Ka tlase ga bolaodi bja Kgoši ya pušo ya Mesia e lego Jesu Kriste gotee le babušigotee le yena ba 144 000, Mmušo wa Modimo o tla gata megato e sa kgaotšego ya go dirolla bohloko bjoo bo baketšwego batho gotee le tshenyo yeo e dirilwego polaneteng ye e lego legae la rena. Pušo ya Nywaga e Sekete e tla phethagatša kholofetšo e ruthetšago pelo ya Jehofa Modimo ya gore: “Ke hlola magodimo a mafsa le lefase le lefsa; dilo tša pele di ka se sa gopolwa, e bile di ka se sa rotoga pelong.” (Jes. 65:17) Ke dilo dife tše di kgahlišago tšeo re emetšego go di bona, gaešita le ge re sa di bone gona bjale? Ka go thušwa ke Lentšu la Modimo la boporofeta, anke re boneng go se nene dilo tše di kgahlišago tšeo di sego tša hlwa ‘di bonwa.’—2 Bakor. 4:18.

 ‘BA TLA AGA DINTLO LE GO BJALA DIRAPA TŠA MERARA’

4. Ke maemo afe a madulo ao ba bantši ba lebeletšanego le ona lehono?

4 Ke mang a ka se ratego go ba le ntlo ya gagwe ka noši, lefelo leo yena le lapa la gagwe ba ka ikwago ba šireletšegile le go bolokega ka gare ga lona? Lega go le bjalo, bothata bja madulo ke bjo bogolo kudu lefaseng lehono. Batho ba pitlagane ditoropong. Ba bantši ba gapeletšega go dula mekhukhung le mekutwaneng. Go bonagala eka e tla ba mohlolo gore ba feleletše ba na le dintlo tša bona.

5, 6. (a) Jesaya 65:21 le Mika 4:4 di tla phethagala bjang? (b) Re ka hwetša bjang tšhegofatšo yeo?

5 Ka tlase ga pušo ya Mmušo wa Modimo, kganyogo ya modudi yo mongwe le yo mongwe ya gore a be le ntlo ya gagwe ka noši e tla phethagatšwa, ka gobane Jesaya o ile a porofeta gore: “Ba tla aga dintlo ba dula go tšona; ba tla bjala dirapa tša merara ba ja dienywa tša tšona.” (Jes. 65:21) Le gona, ga se ba lebelela gore ba be le dintlo feela. Therešo ke gore batho ba bangwe lehono ba na le dintlo tša bona, e bile ba sego kae ba dula ka gare ga dintlo tša manobonobo. Eupša ba dula ba tšhogile gore ba ka loba dintlo tšeo ka baka la mathata a itšego a tša ditšhelete goba gore mahodu a ka thuba a utswa goba gore selo se sengwe se sebe go feta seo se ka ba diragalela. Ruri maemo ao ka moka a ka se swane le a nakong ya ge Mmušo wa Modimo o buša! Moporofeta Mika o ngwadile gore: “Yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe, go ka se be le yo a ba tšhošago.”—Mika 4:4.

6 Ka baka la ge re letetše gore seo se direge, ke eng seo re swanetšego go se dira? Therešo ke gore ka moka ga rena re nyaka madulo a makaone. Lega go le bjalo, go e na le gore re phegelele go ba le ntlo ya ditoro tša rena gona bjale—mohlomongwe e bile re ikgama ka dikoloto gore re e hwetše—na e ka se be gabohlale gore re naganišiše ka kholofetšo yeo ya Jehofa? Gopola seo Jesu a se boletšego ka yena ge a re: “Diphukubje di na le melete le dinonyana tša legodimo di na le dihlaga, eupša Morwa wa motho ga a na mo a ka latšago hlogo ya gagwe gona.” (Luka 9:58) Jesu o be a na le matla e bile o be a ka kgona go aga goba go ba le ntlo e botsebotse go feta ya motho le ge e le ofe. Ke ka baka la’ng a ile a se dire seo? Go molaleng gore Jesu o be a nyaka go phema tšhitišo le ge e le efe yeo e bego e ka mo palediša gore a nyake Mmušo pele. Na re ka latela mohlala wa gagwe gomme ra boloka leihlo la rena le lokile—ra se tatetšwe ke dipelaelo le go rata dilo tše di bonagalago?—Mat. 6:33, 34.

“PHIRI LE KWANA DI TLA FULA GOTEE”

7. Ke tswalano efe magareng ga batho le diphoofolo yeo Jehofa a ilego a e thoma go tloga mathomong?

7 Nakong ya ge Jehofa a bopa dilo mo lefaseng, o ile a bopa batho mafelelong. Ge a be a bolela le Mošomi wa gagwe yo a nago le Bokgoni, e lego Morwa wa gagwe wa leitšibulo, Jehofa o mmoditše morero wa gagwe ka go lebanya gore: “A re dire motho ka seswantšho sa rena, a swane le rena, a buše dihlapi tša lewatle, dinonyana tše di fofago magodimong, diruiwa, lefase ka moka le segagabi se sengwe le se sengwe seo se gagabago lefaseng.” (Gen. 1:26) Ka go re’alo, Adama le Efa, go akaretša le batho ka moka bao ba bego ba tla latela, ba be ba laetšwe gore ba buše diphoofolo.

8. Ke semelo sefe sa diphoofolo seo se bonagalago kudu lehono?

8 Na ruri go a kgonega gore batho ba laole diphoofolo ka moka gomme go be le khutšo magareng ga bona le tšona? Batho ba bantši ba rata diruiwa tša bona kudu, tše bjalo ka dimpša le dikatse. Lega go le bjalo, go thwe’ng ka diphoofolo tša naga? Pego e nngwe e re: “Borathutamahlale bao ba ilego ba phela kgauswi kudu le dibata gomme ba ithuta tšona ba hweditše gore diamuši ka moka di na le maikwelo.” Go ba gona, re fela  re bona gore diphoofolo tša naga di a tšhoga goba e ba tše bogale ge di ikwa di sa šireletšega, eupša na di ka kgona go ba bonolo ka tsela yeo ba bangwe ba di hlalosago ka yona? Pego yeo e tšwela pele ka gore: “Nakong ya ge diamuši di godiša bana ba tšona, ke ka yona nako yeo di tšweletšago seka sa tšona se segolo kudu—seka se se makatšago sa go kgona go bonagatša borutho.”

9. Re ka letela diphetogo dife tšeo di tlago go diragalela diphoofolo?

9 Ka gona ga se ra swanela go makala ge re bala ka Beibeleng gore go tla ba le khutšo magareng ga batho le diphoofolo. (Bala Jesaya 11:6-9; 65:25.) Ka baka la’ng? Gopola gore ge Noa le lapa la gagwe ba be ba etšwa ka arekeng ka morago ga Meetsefula, Jehofa o ba boditše gore: “Sephedi se sengwe le se sengwe sa lefase [se tla dula se] le tšhaba le go le boifa.” Ga bjale diphoofolo di tšhaba batho e le gore di itšhireletše. (Gen. 9:2, 3) Na Jehofa a ka palelwa ke go tloša poifo e bjalo go fihla bokgoleng bjo itšego, e le gore morero wa gagwe wa mathomong o phethagale? (Hos. 2:18) Yeo ruri e tla ba nako e thabišago yeo e letetšego bohle bao ba tlago go phologa gore ba phele mo lefaseng ka nako yeo!

“O TLA PHUMOLA MEGOKGO KA MOKA”

10. Ke ka baka la’ng bophelo bja batho bo tletše ka megokgo?

10 Ge Solomone a be a bona “ditiro ka moka tša kgatelelo tšeo di dirwago ka tlase ga letšatši,” o ile a lla ka gore: “Ka bona le megokgo ya bao ba gatelelwago, eupša ba be ba se na mohomotši.” (Mmo. 4:1) Dilo di sa dutše di le bjalo le lehono, e bile mohlomongwe di feteletše. Ke mang gare ga rena yo a ilego a se tšwe megokgo ka mabaka a itšego? Ke therešo gore ka dinako tše dingwe re ka ntšha megokgo ya lethabo. Lega go le bjalo, ka kakaretšo megokgo e ntšhwa ke ge re bonagatša bohloko bjo bo kwelwego ke pelo.

11. Ke pego efe ya Beibele yeo e kgomago pelo ya gago?

11 Gopola ditiragalo tše dintši tšeo di kgomago maikwelo tšeo re di badilego ka Beibeleng. Ge Sara a be a ehwa a na le nywaga e 127, “Aborahama [o ile] a tla a hlokofalela Sara le go mo llela.” (Gen. 23:1, 2) Ge Naomi a be a laelana le dingwetši tša gagwe tše pedi tšeo e bego e le bahlologadi, di ile ‘tša hlaboša mantšu tša lla,’ ke moka ‘tša buša tša hlaboša mantšu tša lla.’ (Ruthe 1:9, 14) Ge Kgoši Hesekia a be a babja wa go hwa, o ile a rapela Modimo gomme “a lla gabohloko,” e lego selo seo go bonagalago se ile sa kgoma Jehofa. (2 Dikg. 20:1-5) Le gona ke mang yo a sa kgomego ke pego ya moapostola Petro ya nakong ya ge a latola Jesu? Ge a ekwa mogogonope o lla, Petro o ile “a tšwela ka ntle a lla gabohloko.”—Mat. 26:75.

12. Pušo ya Mmušo wa Modimo e tla tlišetša bjang batho kimologo ya kgonthe?

12 Ka baka la dikotsi—tše dinyenyane le tše dikgolo—tšeo di re welago, batho ba tloga ba nyaka khomotšo le kimologo. Se ke sona seo Pušo ya Nywaga e Sekete e tlago go se tlišetša balata ba yona: “[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Kut. 21:4) Le ge go thabiša kudu gore manyami, sello le bohloko di ka se hlwe di sa ba gona, kholofetšo ya Modimo e akaretša le gore lenaba le legolo la batho le tla fedišwa—lehu. Seo se tla direga bjang?

‘BOHLE BAO BA LEGO MABITLENG BA TLA TŠWA’

13. Lehu le kgomile batho bjang go tloga mola Adama a dirago sebe?

13 Go tloga mola Adama a dirago sebe, lehu le bušitše batho e le kgoši. Le bile lenaba leo le sa fenyegego, moo go felelago batho ka moka bao ba nago le sebe, e bile ke sebaki sa bohloko bjo bogolo le manyami a tseneletšego. (Baroma 5:12, 14) Ge e le gabotse, ka baka la “go boifa lehu,” ba dimilione “ba [bile] bokgobeng bophelo bja bona ka moka.”—Baheb. 2:15.

14. Go tla direga’ng ge lehu le fedišwa?

 14 Beibele e bolela gore “lehu ke lenaba leo le tlago go fedišwa mafelelong.” (1 Bakor. 15:26) Go na le dihlopha tše pedi tšeo di tlago go holwa ke seo. Go “lešaba le legolo,” e lego sehlopha sa batho bao ba phelago gona bjale, go tla kgonega gore le phologele lefaseng le lefsa leo le holofeditšwego gomme le be le tebelelo ya go phela ka mo go sa felego. Go dibilione tša batho bao ba šetšego ba ubutšwe ke lehu, ba ka tla ba tsošwa. Na o ka kgona go nagana lethabo le tlhalalo tšeo di tlago go ba gona ge ba lešaba le legolo ba amogela batho ba dibilione nakong ya tsogo? Go ithuta ka kelohloko dipego tša tsogo tša ka Beibeleng go ka re thuša go bona kamoo go tlago go ba ka gona nakong yeo.—Bala Mareka 5:38-42; Luka 7:11-17.

15. O tla ikwa bjang nakong ya ge o bona motho yo o mo ratago a tsošwa bahung?

15 Nagana ka polelwana e rego “ba thaba wa go se kgone go itshwara” le ya gore “ba tagafatša Modimo.” Ge e ba o be o le gona ditiragalong tšeo, mohlomongwe le wena nkabe o ile wa ikwa ka tsela yeo. Ga go pelaelo gore nakong ya ge re bona baratiwa ba rena ba bušetšwa bophelong ka tsogo re tla thaba le go hlalala ka tsela e sa tlwaelegago. Jesu o itše: “Nako e a tla yeo ka yona bohle bao ba lego mabitleng ba tlago go kwa lentšu la gagwe gomme ba tšwa.” (Joh. 5:28, 29) Ga go le yo tee wa rena yo a kilego a bona selo se bjalo se direga; go molaleng gore tsogo e tla ba e nngwe ya dilo tše di makatšago kudu ya “dilo tše di sa bonwego.”

MODIMO E TLA BA “TŠOHLE GO YO MONGWE LE YO MONGWE”

16. (a) Ke ka baka la’ng re swanetše go bolela ka mafolofolo ka ditšhegofatšo tšeo di sego tša hlwa di bonwa? (b) Paulo o ile a bolela mantšu afe go kgothatša Bakriste ba Korinthe?

16 Ruri bokamoso bjo bo kgahlišago bo emetše bao ba botegelago Jehofa dinakong tše tše di hlobaetšago! Gaešita le ge ditšhegofatšo tše tše di kgahlišago di  sa hlwa di bonwa, go dula re naganišiša ka tšona go tla re thuša go phegelela dilo tšeo e tlogago e le tša bohlokwa gomme ra phema go arošwa ke dilo tše di gogelago tša nakwana tša tshepedišo ye ya dilo. (Luka 21:34; 1 Tim. 6:17-19) Nakong ya ge re ithuta le go rapela re le lapa, ya ge re boledišana le badumedigotee le rena le ya ge re ruta barutwana ba rena ba Beibele le bao ba thabelago, anke re boleleng ka mafolofolo ka kholofelo ya rena e kgahlišago le dilo tšeo re letetšego go di bona. Seo se tla re thuša go boloka dilo tše gabotse ka menaganong ya rena le dipelong tša rena. Moapostola Paulo o ile a dira sona seo ge a be a kgothatša Bakristegotee le yena. O ile a dira gore ba nagane ka dilo tšeo di tlago go direga mafelelong a Pušo ya Kriste ya Nywaga e Sekete. Leka go nagana ka botlalo ka seo se bolelwago ke mantšu a Paulo a hwetšwago go 1 Bakorinthe 15:24, 25, 28.—Bala.

17, 18. (a) Jehofa e be e le “tšohle go yo mongwe le yo mongwe” ka tsela efe mathomong a histori ya batho? (b) Jesu o tla dira’ng go bušetša botee le kwano?

17 Ga go mantšu a kaonekaone ao re ka a dirišago go hlalosa kamoo dilo di tlago go ba ka gona mafelelong a nywaga e sekete go feta mantšu a “gore Modimo e be tšohle go yo mongwe le yo mongwe.” Seo se ra go re’ng? Nagana ka nako ya kua Edene ge batho ba phethagetšego, e lego Adama le Efa, ba be ba bopa karolo ya lapa la Jehofa le le lego khutšong le boteeng legohleng ka moka. Jehofa, yena Mmuši wa Legohle, o be a buša ka go lebanya bohle bao a bego a ba bopile—barongwa gotee le batho. Ba be ba kgona go boledišana le yena ka go lebanya le go mo rapela gomme yena a ba šegofatša. E be e le “tšohle go yo mongwe le yo mongwe.”

Ka morago ga gore Jesu a fetše dikabelo tša gagwe e le Kgoši, o tla gafela Mmušo go Tatagwe ka boikokobetšo

18 Botee bjoo bo ile bja senywa nakong ya ge batho ba tutuetšwa ke Sathane gomme ba rabela bogošing bja Jehofa. Lega go le bjalo, go tloga ka 1914, Mmušo wa Mesia o be o dutše o gata megato e sa kgaotšego ya go bušetša botee bjoo le kwano. (Baef. 1:9, 10) Nakong ya Pušo ya Nywaga e Sekete, dilo tše di kgahlišago tšeo ga bjale di sa “bonwego” di tla bonagala. Ke moka go tla tla “bofelo,” ke gore, go fela ga Pušo ya Kriste ya Nywaga e Sekete. Go tla direga eng ka morago ga moo? Gaešita le ge Jesu a “neilwe matla ka moka legodimong le lefaseng,” ga a rate maemo. Ga a ikemišetša go amoga Jehofa maemo a gagwe. Ka boikokobetšo o tla “gafela mmušo go Modimo wa gagwe yo e bilego e le Tatagwe.” O tla diriša boemo bja gagwe bja moswananoši le matla a gagwe “gore go išwe letago go Modimo Tate.”—Mat. 28:18; Bafil. 2:9-11.

19, 20. (a) Balata ka moka ba Mmušo wa Modimo ba bontšha bjang gore ba amogela bogoši bja Jehofa? (b) Ke tebelelo efe e kgahlišago yeo e letšego kua pele bakeng sa rena?

19 Ka nako yeo, balata ba lefaseng ba Mmušo wa Modimo ba tla ba ba phethagetše. Ba tla latela mohlala wa Jesu gomme ka boikokobetšo le ka go rata ba tla amogela bogoši bja Jehofa. Ba tla ba le sebaka sa go bontšha kganyogo ya bona ya go dira seo ka gore ba fenye teko ya mafelelo. (Kut. 20:7-10) Ka morago ga moo, marabele ka moka—a batho le a moya—a tla fedišetšwa sa ruri. Yeo ruri e tla ba nako e thabišago le ya go hlalala! Lapa ka moka la legohleng le tla tumiša Jehofa le thabile, gomme yena e tla ba “tšohle go yo mongwe le yo mongwe.”—Bala Psalme 99:1-3.

20 Na dilo tše tša kgonthe tše di kgahlišago tša mabapi le Mmušo wa Modimo tšeo di letšego ka pele ga rena di tla go tutueletša gore o dire sohle seo o ka se kgonago go dira thato ya Modimo? Na o ka kgona go phema go arošwa ke dikholofetšo tša maaka le manobonobo tša lefase la Sathane? Na o tla matlafatša boikemišetšo bja gago bja go thekga le go kgomarela bogoši bja Jehofa? Anke ditiro tša gago di bontšhe gore o kganyoga go dira seo ka mo go sa felego. Ke moka o tla ba le tokelo ya go thabela khutšo le katlego ka nywaga e sekete le go feta moo!