Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  September 2012

Ithute go Seka sa Jehofa le Jesu sa go se Fele Pelo

Ithute go Seka sa Jehofa le Jesu sa go se Fele Pelo

“Tšeang go se fele pelo ga Morena wa rena e le phološo.”—2 PET. 3:15.

1. Ke eng seo ba bangwe bao ba botegago ba ipotšišago sona?

KGAETŠEDI yo mongwe yo a botegago yo a kgotleletšego mathata a mantši ka nywagasome o ile a botšiša ka boikokobetšo gore: “Na bofelo bo tla tla ke sa phela?” Ba bangwe bao ba hlanketšego Jehofa ka nywaga e mentši le bona ba ipotšiša se swanago. Re fagahletše letšatši leo Modimo a tlago go dira dilo ka moka gore e be tše mpsha, ka gore a fediše mathata ao ga bjale re lebeletšanego le ona. (Kut. 21:5) Gaešita le ge re na le lebaka le le kwagalago la go dumela gore bofelo bja tshepedišo ya Sathane bo kgauswi kudu, go ka ba thata go letela letšatši leo ka go se fele pelo.

2. Re tla ahlaahla dipotšišo dife mabapi le go se fele pelo ga Modimo?

2 Lega go le bjalo, Beibele e bontšha gore ga se ra swanela go fela pelo. Go etša bahlanka ba Modimo bao ba phetšego pele ga mehla ya rena, re tla hwetša seo Modimo a se holofeditšego ge e ba re na le tumelo e tiilego gomme re letile ka go se fele pelo nako ya gagwe ya gore a phethagatše dikholofetšo tšeo. (Bala Baheberu 6:11, 12.) Jehofa ka boyena o be a dutše a sa fele pelo. A ka ba a ile a fediša bokgopo nakong le ge e le efe e fetilego, eupša o letetše nako e swanetšego gore a dire seo. (Baroma 9:20-24) Ke ka baka la’ng a sa fele pelo? Jesu o bile bjang mohlala wa go se fele pelo ga Modimo? Ke mehola efe yeo re tlago go e hwetša ge e ba re hlagolela go se fele pelo ga Modimo? Dikarabo tša dipotšišo tše di ka re thuša go hlagolela go se fele pelo le go ba le tumelo e tiilego gaešita le ge go ka bonagala eka Jehofa o a diega.

KE KA BAKA LA’NG JEHOFA A SA FELE PELO?

3, 4. (a) Ke ka baka la’ng Jehofa a ile a se fele pelo ge a phethagatša morero wa gagwe ka lefase? (b) Jehofa o ile a arabela bjang borabeleng bja kua Edene?

3 Jehofa o na le lebaka le lebotse la go se fele pelo. Ke therešo gore o laola dilo ka moka legohleng ka dinako tšohle;  eupša borabele bja kua Edene bo rotošitše dipotšišo tše bohlokwa kudu. Jehofa o be a dutše a sa fele pelo, a tseba gore go be go tla tšea nako gore dipotšišo tšeo di arabje gabotse. Ka ge a tseba gabotse ditiro le mekgwa ya yo mongwe le yo mongwe yo a lego legodimong le lefaseng, o tloga a dira dilo ka tsela yeo e tlago go re hola kudu.—Baheb. 4:13.

4 E be e le morero wa Jehofa gore ditlogolwana tša Adama le Efa di tlale lefaseng. Ge Sathane a be a goketša Efa gomme Adama a sa kwe, Modimo ga se a ka a lahla morero wa gagwe. Ga se a ka a tšhoga, a dira diphetho tša kapejana goba a tšewa ke maikwelo, gomme a ngala batho. Go e na le moo, o ile a nyaka tsela ya go phethagatša seo a bego a se reretše batho le polanete ye. (Jes. 55:11) E le gore a phethagatše morero wa gagwe le go godiša bogoši bja gagwe, Jehofa o ile a bontšha boitshwaro bjo bogolo le go se fele pelo, a ba a leta ka nywaga e diketekete gore dibopego tše dingwe tša morero wa gagwe di phethagale ka tsela e kaonekaone.

5. Go se fele pelo ga Jehofa go dira gore re hwetše ditšhegofatšo dife?

5 Lebaka le lengwe leo le dirago gore Jehofa a lete ka go se fele pelo ke ka gobane o nyaka gore batho ba oketšegilego ba hwetše bophelo bjo bo sa felego. Ga bjale o dira ditokišetšo tša gore a phološe “lešaba le legolo.” (Kut. 7:9, 14; 14:6) Jehofa o fihlelela batho ka modiro wa boboledi, o ba laletša gore ba ithute ka Mmušo wa gagwe le ditekanyetšo tša gagwe tša go loka. Molaetša wa Mmušo ke ditaba tše di kgahlišago kudu tše di yago go batho—ee, ke ‘ditaba tše dibotse.’ (Mat. 24:14) Motho yo mongwe le yo mongwe yoo Jehofa a mo gogago o ba karolo ya phuthego ya lefase ka bophara ya bagwera ba kgonthe bao ba ratago seo se nepagetšego. (Joh. 6:44-47) Modimo wa rena yo lerato o thuša batho bao e le gore a ba amogele. Le gona o be a dutše a kgetha bao e tlago go ba ditho tša mmušo wa gagwe wa legodimong gare ga batho. Ka morago ga gore ditho tše di amogelwe maemong a tšona a legodimong, di tla thuša batho bao ba kwago gore ba fihlelele phethego le bophelo bjo bo sa felego. Go molaleng gore gaešita le ge Jehofa a letile ka go se fele pelo, o be a dutše a šoma gore a phethagatše dikholofetšo tša gagwe—gore re holege.

6. (a) Ke ka kgopolo efe Jehofa a ilego a se fele pelo mehleng ya Noa? (b) Ke ka tsela efe Jehofa a sa felego pelo mehleng ya rena?

6 Jehofa ga a fele pelo gaešita le ge a rumolwa ka boomo, go etša ge re bona kamoo a ilego a swaragana ka gona le bokgopo pele ga Meetsefula. Nakong yeo, lefase le be le tletše ka boitshwaro bjo bo gobogilego le bošoro, gomme “pelo ya [Jehofa] ya kwa bohloko” ka gobane boemo bja batho bo be bo mpefetše. (Gen. 6:2-8) O be a ka se kgotlelele boemo bjoo ka mo go sa felego, ka gona o ile a tlišetša batho bao ba sa kwego meetsefula. Gaešita le “ge [Jehofa] Modimo a be a letile ka go se fele pelo mehleng ya Noa,” o ile a dira ditokišetšo tša go phološa Noa le ba lapa la gagwe. (1 Pet. 3:20) Ka nako e swanetšego, Jehofa o ile a botša Noa ka phetho ye ya gagwe gomme a mo laela gore a age areka. (Gen. 6:14-22) Go oketša moo, Noa e be e le “mmoledi wa toko,” a botša batho ba mehleng ya gagwe ka tshenyego yeo e tlago. (2 Pet. 2:5) Jesu o ile a bolela gore mehla ya rena e swana le ya Noa. Jehofa o dirile phetho ya gore o tla fediša neng tshepedišo ye e kgopo. Ga go motho yo a tsebago gore “letšatši leo le iri” di tla fihla neng. (Mat. 24:36) Mo nakong ye, Modimo o re neile modiro wa gore re lemoše batho le go ba botša kamoo ba ka phološwago ka gona.

7. Na Jehofa o diega go phethagatša dikholofetšo tša gagwe? Hlalosa.

7 Go molaleng gore go se fele pelo ga Jehofa ga go bolele gore o fo letela nako gore e fete. Le ka mohla ga se ra swanela go gakantšha go se fele pelo ga gagwe le go se šetše goba go hloka kgahlego! Lega go le bjalo, e ka ba tlhohlo go dula re gopola ka se ge re tšofala goba ge re tlaišega tshepedišong ye e kgopo. Re ka nolega moko goba ra ikwa eka Modimo o diega go phethagatša dikholofetšo  tša gagwe. (Baheb. 10:36) Le ka mohla ga se ra swanela go lebala gore o na le mabaka a mabotse a go se fele pelo le gore o diriša nako ye go hola bahlanka ba gagwe ba botegago. (2 Pet. 2:3; 3:9) Le gona ela hloko kamoo Jesu a ilego a bontšha go se fele pelo ga Modimo.

JESU O BEILE BJANG MOHLALA O MOBOTSE WA GO SE FELE PELO?

8. Jesu o bontšhitše go se fele pelo ka tlase ga maemo afe?

8 Jesu o dira thato ya Modimo e bile o be a dutše a fagahlela go dira bjalo ka nywaga e diketekete. Ge Sathane a be a rabela, Jehofa o ile a dira phetho ya gore Morwa wa gagwe yo a tswetšwego a nnoši o be a tla tla lefaseng gore e be Mesia. Nagana gore seo se be se bolela eng go Jesu—go leta ka go se fele pelo ka nywaga e dikete go fihlela ge nako yeo e fihla. (Bala Bagalatia 4:4.) O be a se a leta feela a sa dire selo nakong yeo ka moka, go e na le moo o be a swaregile ka modiro woo Tatagwe a bego a mo laetše gore a o dire. Mafelelong ge a be a etla lefaseng, o be a tseba gore o tla hwela diatleng tša Sathane go etša ge go be go porofetilwe. (Gen. 3:15; Mat. 16:21) Ka go se fele pelo o ile a ikokobeletša go dira thato ya Modimo, gaešita le ge seo se be se bolela go tlaišwa gabohloko. Potego ya gagwe e be e le ya moswananoši. O be a sa tshwenyega ka yena le boemo bja gagwe, ka gona re ka holwa ke seo.—Baheb. 5:8, 9.

9, 10. (a) Ke eng seo Jesu a bego a dutše a se dira ge a letile ka go se fele pelo gore Jehofa a gate mogato? (b) Re swanetše go lebelela bjang thulaganyo ya Jehofa ya nako?

9 Ka morago ga go tsošwa ga gagwe bahung, Jesu o ile a newa matla legodimong le lefaseng. (Mat. 28:18) O diriša matla ao go phethagatša morero wa Jehofa go ya ka nako yeo Modimo a e beilego. Jesu o ile a leta ka go se fele pelo letsogong la le letona la Modimo go fihlela ka 1914 ge manaba a gagwe a bewa e le bogato bja dinao tša gagwe. (Ps. 110:1, 2; Baheb. 10:12, 13) Kgauswinyane o tla gata mogato gore a fediše tshepedišo ya Sathane. Go sa dutše go le bjalo, Jesu o dirišana le batho ka go se fele pelo gomme o ba iša “didibeng tša meetse.”—Kut. 7:17.

10 Go tšwa mohlaleng wa Jesu, na o bona tsela yeo o swanetšego go lebelela thulaganyo ya Jehofa ya nako? Ga go pelaelo gore Jesu o be a fagahlela go dira selo le ge e le sefe seo Tatagwe a bego a mo kgopela gore a se dire; eupša o be a ikemišeditše go letela nako yeo Modimo a e beilego. Ge re dutše re letetše bofelo bja tshepedišo ya Sathane, go nyakega gore ka moka ga rena re se fele pelo go swana le Modimo, le gona re se ete Modimo pele goba go ineela ka gobane re nolegile moko. Re ka dira eng gore re hlagolele go se fele pelo ga Modimo?

NKA HLAGOLELA BJANG GO SE FELE PELO GA MODIMO?

11. (a) Go na le tswalano efe magareng ga tumelo le go se fele pelo? (b) Ke ka baka la’ng re na le mabaka a kwagalago a go ba le tumelo e tiilego?

11 Pele ga ge Jesu a etla mo lefaseng, baporofeta le bahlanka ba bangwe ba ba botegago ba ile ba bea mohlala wa gore gaešita le batho ba sa phethagalago ba ka kgotlelela ka go se fele pelo. Go be go na le tswalano e kgolo magareng ga tumelo ya bona le go se fele pelo ga bona. (Bala Jakobo 5:10, 11.) Ge e ba ba be ba sa dumele e le ka kgonthe seo Jehofa a bego a ba boditše sona—ba se na tumelo—na ba be ba tla letela ka go se fele pelo go phethagatšwa ga dikholofetšo tša gagwe? Nako le nako ge ba be ba lebeletšana le diteko tše tšhošago goba tše hlohlago tumelo, ba be ba kgodišegile gore mafelelong Modimo o be a tla phetha seo a se holofeditšego. (Baheb. 11:13, 35-40) Re na le mabaka a oketšegilego a go ba le tumelo e tiilego, ka ge Jesu ga bjale a hlankela e le “Mophethagatši wa tumelo ya rena.” (Baheb. 12:2) O ile a phethagatša boporofeta gomme a utolla morero wa Modimo ka tsela yeo e re neago mabaka a kwagalago a go ba le tumelo.

12. Re ka dira eng gore re hlagolele tumelo ya rena?

12 Ke megato efe e holago yeo re ka e gatago gore re matlafatše tumelo ya rena, gomme  re hlagolele go se fele pelo? Go bohlokwa gore re diriše keletšo ya Modimo. Ka mohlala, nagana ka mabaka ao o nago le ona a go etiša Mmušo pele bophelong bja gago. Na o ka dira boiteko bjo bo oketšegilego bja go diriša keletšo e tšwago go Mateo 6:33? Seo se ka bolela gore o fetše nako e oketšegilego bodireding goba gore o dire diphetogo dibopegong tše itšego tša bophelo bja gago. O se ke wa hlokomologa tsela yeo Jehofa a šegofaditšego maiteko a gago go fihla ga bjale. A ka ba a ile a dira gore o kgone go swara thuto e mpsha ya Beibele goba go go thuša go ba le “khutšo ya Modimo yeo e fetago kwešišo yohle.” (Bala Bafilipi 4:7.) Ge o dutše o nagana ka mehola yeo o šetšego o e hweditše ka go latela ditaelo tša Jehofa, gona o tla tšeela godimo seka sa go se fele pelo.—Ps. 34:8.

13. Re ka swantšha bjang tsela ya go aga tumelo le go se fele pelo?

13 Tsela ye ya go dira dilo e swana le modikologo wa tlhago wa go bjala, go hlagola le go buna. Nako le nako ge molemi a buna ka boati, o tloga a kgodišega gore o tla bjala peu sehleng se latelago. Ke therešo gore o tla swanela go leta puno a sa fele pelo, eupša seo se ka se mo thibele gore a bjale peu, mohlomongwe gaešita le go e bjala mašemong a oketšegilego go feta sehleng se fetilego. O holofela gore o tla buna. Ka tsela e swanago, ge re dutše re boeletša modikologo wo wa go ithuta tlhahlo ya Jehofa, re e latela gomme re buna mehola ya seo, gona go bota ga rena Jehofa go tla gola. Tumelo ya rena le yona e a gola, le gona go ba bonolo gore re letele ditšhegofatšo tšeo re tsebago gore di tla tla.—Bala Jakobo 5:7, 8.

Ruri go se fele pelo ga Modimo go tla go thuša go dula o nagana ka dikgahlego tša Mmušo gomme wa hwetša ditšhegofatšo!

14, 15. Re swanetše go ba le pono efe ka go tlaišega ga batho?

14 Tsela e nngwe ya go hlagolela go se fele pelo ke ka go nagana kamoo re swanetšego go lebelela lefase gotee le maemo a rena ka noši. Leka go bona dilo go ya kamoo Jehofa a di bonago ka gona. Ka mohlala, nagana kamoo a lebelelago tlaišego ya batho ka gona. Ke kgale a ekwa bohloko ge batho ba tlaišega; eupša ga  se a ka a fenywa ke manyami, a se kgone go dira go loka. O ile a romela Morwa wa gagwe yo a tswetšego a nnoši gore a “[fediše] mediro ya Diabolo” le go dirolla tshenyo ka moka yeo Sathane a e tlišeditšego batho. (1 Joh. 3:8) Ge e le gabotse, go tla ba molaleng gore tlaišego yeo e be e le ya nakwana, eupša tharollo ya Modimo ke ya ka mo go sa felego. Ka tsela e swanago, go e na le go itumelela gore re fenywe ke bokgopo bja pušo ya Sathane goba re fele pelo gore e tla fela neng, anke re bontšheng tumelo dilong tše di sa bonwego tšeo di tlago go ba gona ka mo go sa felego. Jehofa o beile nako yeo a tlago go fediša bokgopo ka yona, le gona o tla gata mogato ka yona nako yeo.—Jes. 46:13; Nah. 1:9.

15 Nakong ye e thata ya bofelo bja tshepedišo ye ya dilo, re ka lebeletšana le dilo tšeo di hlohlago tumelo ya rena ka mo go kgethegilego. Go e na le gore re arabele ka go galefa ge e ba re lebeletšane le bošoro goba ge baratiwa ba rena ba tlaišega, re swanetše go ikemišetša go bota Jehofa ka mo go feletšego. Ga se ra phethagala, ka gona ga go bonolo gore re dire seo. Lega go le bjalo, gopola seo Jesu a ilego a se dira go etša ge se bontšhitšwe go Mateo 26:39.—Bala.

16. Ke eng seo re swanetšego go phema go se dira nakong ye e šaletšego?

16 Selo se sengwe seo se re paledišago gore re se fele pelo go swana le Modimo ke go ba le pono e fošagetšego ka bofelo. Seo se bolela’ng? Go ba gona, motho yo a sa kgodišegego gore bofelo bo a batamela a ka thoma go dira ditokišetšo tše dingwe, a naganne gore di tla mo tšwela mohola ge e ba dilo di sa direge go ya kamoo Jehofa a bego a boletše gore di tla direga ka gona. Ka mantšu a mangwe, a ka nagana gore: ‘Ke tla bona ge e ba Jehofa a tla phethagatša seo a se boletšego.’ Ke moka a ka leka go itirela leina lefaseng le, a nyaka go šireletšega ka tša ditšhelete go e na le gore a etiše Mmušo wa Modimo pele, goba a holofela gore thuto e phagamego e tla mo phediša bophelo bja manobonobo gona bjale. Ge e le gabotse, na seo e be e ka se be bohlatse bja go hloka tumelo? Gopola gore Paulo o re kgothaleditše gore re ekiše bao “ka tumelo le go se fele pelo” ba ilego ba amogela dikholofetšo tše di tšwago go Jehofa. (Baheb. 6:12) Morero wa Jehofa ke gore a se dumelele tshepedišo ye e kgopo go tšwela pele go feta ka mo go nyakegago ka gona. (Habak. 2:3) Ge go sa letetšwe seo, re swanetše go phema go ithola kgwara ge re hlankela Jehofa. Go e na le moo, re swanetše go dula re phakgame e bile re šome ka mafolofolo modirong wa go bolela ditaba tše dibotse woo e lego mothopo wo o sa bapišegego wa kgotsofalo gona bjale.—Luka 21:36.

GO SE FELE PELO GO TLIŠA MEHOLA EFE?

17, 18. (a) Ga bjale re na le sebaka sefe sa go bontšha go se fele pelo? (b) Re tla hwetša ditšhegofatšo dife ge e ba re sa fele pelo gona bjale?

17 Go sa šetšwe gore re hlanketše Modimo ka dikgwedi tše sego kae goba ka nywagasome, re nyaka go mo hlankela ka mo go sa felego. Go se fele pelo go re thuša gore re kgotlelele go fihlela re phološwa, go sa šetšwe nako yeo e re šaletšego tshepedišong ye. Ga bjale Jehofa o re nea sebaka sa go itlhatsela gore re bota diphetho tša gagwe ka mo go feletšego, le gore ge e ba go nyakega, re ikemišeditše go tlaišega ka baka la leina la gagwe. (1 Pet. 4:13, 14) Le gona Modimo o re nea tlwaetšo yeo e ka re thušago gore re se fele pelo, e lego seo se nyakegago gore re phološwe.—1 Pet. 5:10.

18 Jesu o neilwe matla legodimong le lefaseng, e bile ga go selo se se ka go ubulago seatleng sa gagwe se se šireletšago—ntle le wena. (Joh. 10:28, 29) Ga go nyakege gore o boife bokamoso goba gaešita le lehu. Bao ba kgotlelelago ka go se fele pelo go fihla bofelong ba tla phološwa. Ka gona re swanetše go kgonthišetša gore ga re dumelele lefase le re goketša le go re dira gore re kgaotše go ithekga ka Jehofa. Go e na le moo, re swanetše go ikemišetša go gola tumelong le go diriša ka bohlale nako ya go se fele pelo ga Modimo.—Mat. 24:13; bala 2 Petro 3:17, 18.