Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2012

Jehofa o Kgoboketša Setšhaba sa Gagwe se Thabilego

Jehofa o Kgoboketša Setšhaba sa Gagwe se Thabilego

“Kgoboketšang setšhaba, e lego banna, basadi, bana le badiiledi.”—DOIT. 31:12.

1, 2. Ke dibopego dife tša dikopano tša pušo ya Modimo tšeo re swanetšego go di ela hloko?

DIKOPANO tša ditšhabatšhaba le tša selete tša Dihlatse tša Jehofa e bile ditiragalo tše bohlokwa tšeo di gopolwago ke ba bantši ba rena mehleng yeno. Ba bantši ba rena re ile ra ba gona ditiragalong tše tše di thabišago, e bile go ka direga gore re bile go tše dintši tša tšona nywagasomeng e fetilego.

2 Nywaga e dikete e fetilego, setšhaba sa Modimo le sona se ile sa ba le dipokano tše kgethwa. Re tla ahlaahla e mengwe ya mehlala ya Mangwalo ya mabapi le dikopano tša mehleng yeno, re hlahlobe go swana moo go lego gona magareng ga dipokano tša bogologolo le dikopano tša mehleng yeno, ke moka re bone mehola yeo e hwetšwago ka go ba gona dikopanong tšeo.—Ps. 44:1; Baroma 15:4.

DIKOPANO TŠE BOHLOKWA TŠA BOGOLOGOLO LE TŠA MEHLENG YENO

3. (a) Ke’ng seo se bego se hlaola pokano ya mathomo yeo e begilwego ya setšhaba sa Jehofa? (b) Baisiraele ba be ba biletšwa dipokanong ka tsela efe?

3 Pokano e kgolo ya mathomo yeo e begilwego ka Mangwalong e bile nakong ya ge setšhaba sa Modimo se be se bokane patogeng ya Thaba ya Sinai ka morero wa gore se rutwe ka dilo tša moya. Ruri tiragalo yeo e be e le ya bohlokwa historing ya borapedi bjo bo sekilego. Tiragalong yeo e thabišago, yeo ka ntle le pelaelo bao ba bego ba le moo ba bego ba ka se tsoge ba e lebetše, Jehofa o ile a bontšha Baisiraele matla a gagwe ka go ba nea Molao wa gagwe. (Ek. 19:2-9, 16-19; bala Ekisodo 20:18; Doiteronomio 4:9, 10.) Tiragalo yeo e be e le ya bohlokwa ditirišanong tšeo di ilego tša latela tša Modimo le Isiraele. Nakwana ka morago ga moo, Jehofa o ile a hloma tsela yeo ka yona a bego a tla biletša setšhaba sa gagwe dikopanong. O ile a laela Moshe gore a dire diphalafala tše pedi tša silifera, tšeo di bego di tla dirišwa go bitša “setšhaba ka moka” e le gore se kopane  “mojakong wa tente ya kopano.” (Nu 10:1-4) Leka go bona ditiragalo tše tše thabišago ka leihlo la kgopolo!

4, 5. Ke ka baka la’ng dipokano tšeo di ilego tša swarwa ke Moshe le Joshua e be e le tša bohlokwa kudu?

4 Go ya bofelong bja leeto la nywaga e 40 ya ge Baisiraele ba be ba le lešokeng, nakong yeo e hlobaetšago ya ge e be e le setšhaba se sefsa, Moshe o ile a kgobokanya setšhaba seo. Se be se le kgauswi le go tsena Nageng ya Kholofetšo. Ye e be e le nako ya maleba ya gore Moshe a gopotše bana babo dilo ka moka tšeo Jehofa a ba diretšego tšona le tšeo a sa tlago go ba direla tšona.—Doit. 29:1-15; 30:15-20; 31:30.

5 Mohlomongwe pokanong yona yeo, Moshe o boletše ka tokišetšo ya ka mehla ya go kgobokanya setšhaba sa Modimo le go se ruta. Nywageng e mengwe le e mengwe e šupago, nakong ya Monyanya wa Mešaša, go be go swanetše go kgoboketšwa banna, basadi, bana le badiiledi ba Isiraele lefelong leo Jehofa a le kgethilego ‘e le gore ba theetše, ba ithute, ba boife Jehofa gomme ba ele hloko gore ba phetha mantšu ka moka a molao.’ (Bala Doiteronomio 31:1, 10-12.) Ka gona mathomong a histori ya setšhaba sa Modimo, go molaleng gore se be se swanetše go bokana leboelela e le gore se ele hloko lentšu la Jehofa le merero ya gagwe. Ge Baisiraele ba be ba phethile phenyo ya bona ya Naga ya Kholofetšo eupša ba sa dutše ba dikologilwe ke ditšhaba tša baheitene, Joshua o ile a ba kgobokanya ka moka ka morero wa go matlafatša boikemišetšo bja bona bja go dula ba botegela Jehofa. Setšhaba se ile sa arabela ka go dira keno ya go hlankela Modimo.—Josh. 23:1, 2; 24:1, 15, 21-24.

6, 7. Ke dikopano dife tša mehleng yeno tša batho ba Jehofa tšeo e bilego tše bohlokwa?

6 Historing ya mehleng yeno ya batho ba Jehofa, le gona go bile le dikopano tše bohlokwa, e lego ditiragalo tšeo di bego di swaya diphetogo tše dikgolo medirong ya pušo ya Modimo goba kwešišong ya Mangwalo. (Die. 4:18) Kopano ya mathomo e kgolo yeo Barutwana ba Beibele ba bilego le yona ka morago ga Ntwa ya I ya Lefase, e be e le ka 1919 kua Cedar Point, Ohio, U.S.A. Kopanong yeo, moo go bilego le batho ba ka bago 7 000, go ile gwa thongwa lesolo la boboledi la lefase ka bophara. Ka 1922, nakong ya kopano ya matšatši a senyane lefelong lona leo, go ile gwa bontšhwa gore modiro wo o akgofile kudu ge Joseph F. Rutherford a be a kgothaletša batheetši ba gagwe gore: “Ebang dihlatse tše di botegago le tša therešo tša Morena. Tšwelang pele ntweng go fihlela ge karolo e nngwe le e nngwe ya Babilona e le lešope. Kwatšang molaetša kgole le kgauswi. Lefase le swanetše go tseba gore Jehofa ke Modimo le gore Jesu Kriste ke Kgoši ya dikgoši le Morena wa marena. Le ke letšatši le legolo. Bonang, Kgoši e a buša! Lena le batseta ba yona ba go phatlalatša. Ka gona tsebatšang, tsebatšang, tsebatšang Kgoši le mmušo wa yona.” Ruri batlakopanong gotee le batho ba Modimo lefaseng ka bophara ba ile ba amogela kgothatšo yeo ka lethabo.

7 Ka 1931, kua Columbus, Ohio, Barutwana ba Beibele ba be ba thabišitšwe kudu ke go amogela leina la Dihlatse tša Jehofa. Ke moka ka 1935, kua Washington, D.C., Ngwanabo rena Rutherford o ile a hlalosa gore “lešaba le legolo” le be le emela bomang, e lego leo go bolelwago ka lona go Kutollo le “eme pele ga sedulo sa bogoši le pele ga Kwana.” (Kut. 7:9-17) Ka 1942, garegare ga Ntwa ya II ya Lefase, Nathan H. Knorr o ile a nea polelo e kgahlišago yeo e rego: “Khutšo—Na e ka ba ya sa Ruri?” Polelong yeo, o ile a hlalosa “sebata sa mmala o mohwibiduhwibidu” seo se lego go Kutollo 17 gomme a bontšha gore go sa dutše go na le modiro o mogolo wa boboledi woo o tlago go dirwa ka morago ga ntwa.

Kopanong ya ditšhabatšhaba ka 1950, New York City

8, 9. Ke ka baka la’ng dikopano tše dingwe di be di kgoma e le ruri?

8 Selo se sengwe seo se lemogegago kudu ka Kopano ya Pušo ya Modimo ya “Ditšhaba tše di Thabilego” ka 1946 kua Cleveland, Ohio, e be e le polelo ya Ngwanabo rena Knorr yeo e rego: “Mathata a go Aga Lefsa le Koketšego.” Yo mongwe wa batlakopanong o lekile go bontšha kamoo batheetši ka moka ba bego ba kgahlilwe ke polelo yeo ge a be a ngwala  gore: “Ke bile le tokelo ya go ba ka morago ga gagwe ge a be a le sethaleng mantšiboeng ao, gomme ge a hlalosa modiro woo ke moka a bolela ka dithulaganyo tša go katološa legae la Bethele la Brooklyn le bogatišetšo bja lona, batho ba bantši ba ile ba opa magoswi ka lethabo le legolo. Gaešita le ge go be go se bonolo go bona motho yo mongwe le yo mongwe go tšwa sethaleng, go be go le bonolo go lemoga lethabo la bona.” Ka 1950, kopanong ya ditšhabatšhaba kua New York City, batheetši ba ile ba thabišwa ke go lokollwa ga Phetolelo ya Lefase le Lefsa ya Mangwalo a Bakriste a Segerika, e lego phetolelo ya pele ya Beibele ya leleme la mehleng yeno yeo e ilego ya bušetša leina la Modimo lefelong la lona ka Lentšung la gagwe.—Jer. 16:21.

9 Dikopano tšeo go tšona Jehofa a ilego a kgoboketša Dihlatse tša gagwe tše di botegago nakong ya tlaišo goba thibelo le tšona di be di kgoma e le ruri. Adolf Hitler o ile a ikana gore o tla fediša Dihlatse tša Jehofa kua Jeremane, eupša ka 1955 kopanong ya kua Nuremberg, Dihlatse tše 107 000 di ile tša tlatša mapatlelo ao yena le balatedi ba gagwe ba bego ba fela ba bokana go wona. Bontši bja bao ba bego ba le gona bo ile bja palelwa ke go swara megokgo ya lethabo! Magareng ga ba 166 518 bao ba bego ba tlile dikopanong tše tharo tša “Boineelo go Modimo” tšeo di bego di swaretšwe kua Poland ka 1989, go be go na le ba bantši bao ba tšwago dinageng tšeo peleng e bego e le tša Soviet Union le Czechoslovakia le ba tšwago dinageng tše dingwe tša Bohlabela bja Yuropa. Go ba bangwe, e be e le la mathomo ba eba gona kopanong ya batho ba Modimo ba fetago ba 15 goba 20. Le gona akanya ka lethabo leo le bilego gona Kopanong ya Ditšhabatšhaba ya “Thuto ya Modimo” yeo e bego e swaretšwe Kiev, kua Ukraine, moo go kolobeditšwego batho ba 7 402, e lego palo e kgolo kudu ya Dihlatse tša Jehofa tšeo di kolobeditšwego ka letšatši letee.—Jes. 60:22; Hag. 2:7.

10. Ke dikopano dife tšeo o sa dutšego o di gopola, le gona ka baka la’ng?

10 Mohlomongwe go na le dikopano tša selete goba tša ditšhabatšhaba tšeo o sa dutšego o di gopola. Na o sa gopola kopano ya mathomo yeo o kilego wa ba go yona goba mohlomongwe yeo o kolobeditšwego go yona? Tše e be e le ditiragalo tše bohlokwa tša moya bophelong bja gago. Tšeela godimo ditiragalo tšeo!—Ps. 42:4.

DIPOKANO TŠA KA MEHLA TŠE THABIŠAGO

11. Ke menyanya efe ya ka mehla yeo Modimo a ilego a e thoma Isiraeleng ya bogologolo?

11 Jehofa o ile a laela gore Baisiraele ba bokane kua Jerusalema menyanyeng e meraro ka ngwaga—Monyanya wa Dinkgwa tše di sa Omelwago, Monyanya wa Dibeke (woo ka morago o ilego wa bitšwa Pentekoste) le Monyanya wa Mešaša. Mabapi le menyanya ye, Modimo o ile a laela gore: “Yo mongwe le yo mongwe yo motona mo go lena a tšwelele gararo ka ngwaga pele ga sefahlego sa Morena wa therešo, Jehofa.” (Ek. 23:14-17) Dihlogo tše dintši tša malapa di be di eba gona menyanyeng ye le malapa a tšona ka moka, ka ge di be di lemoga gore e humiša moyeng.—1 Sam. 1:1-7; Luka 2:41, 42.

12, 13. Go ba gona menyanyeng ya ngwaga le ngwaga go be go bolela’ng go Baisiraele ba bantši?

12 Nagana ka seo lapa la Moisiraele le bego le swanetše go se dira e le gore le tšee leeto leo.  Ka mohlala, Josefa le Maria ba be ba sepela dikhilomithara tše ka bago tše 100 go tloga Natsaretha go ya Jerusalema. O nagana gore go be go ka go tšea nako e kaaka’ng go fetša leeto le bjalo o sepela le bana ba banyenyane? Pego ya mabapi le go ya ga Jesu kua Jerusalema ge e be e sa le mošemane e bontšha gore ba metswalo le bao ba bego ba tlwaelane ba ka ba ba be ba sepela maeto a bjalo e le sehlopha. E swanetše go ba e be e le tlhohlo go tšea leeto le bjalo gotee le go lokišetša dijo ba le mmogo gaešita le go dira dithulaganyo tše swanetšego tša marobalo mafelong ao a bego a sa tlwaelega. Lega go le bjalo, maemo a be a bolokegile gore ngwana wa nywaga e 12 go swana le Jesu a newe tekanyo e itšego ya tokologo. Nagana kamoo tiragalo yeo e ka se lebalegego ka gona, kudukudu go bana ba banyenyane!—Luka 2:44-46.

13 Ka ge Baisiraele ba bangwe ba be ba dula dinageng tše dingwe tšeo di lego ka ntle ga naga ya gabo bona, bao ba tlilego menyanyeng yeo ba be ba etšwa ditšhabeng tše dintši. Ka Pentekoste ya ngwaga wa 33 C.E., Bajuda le basokologi bao ba bego ba ile Jerusalema ba be ba etšwa mafelong a bjalo ka Italia, Libia, Kereta, Asia Minor le Mesopotamia.—Dit. 2:5-11; 20:16.

14. Baisiraele ba ile ba holwa bjang ke go ba gona menyanyeng ya ngwaga le ngwaga?

14 Morero o mogolo wa gore Baisiraele ba botegago ba tšee maeto ao a borapedi e be e le go rapela Jehofa ka phišego ba na le barapedi ba diketekete bao ba bego ba tšeela godimo dilo tša moya. Mafelelo e be e tla ba afe go bao ba bego ba le gona? Karabo e ka hwetšwa taelong yeo Jehofa a e neilego setšhaba sa gagwe mabapi le go ya Monyanyeng wa Mešaša ge a re: “O thabe mohlang wa monyanya wa gago, wena, morwa le morwedi wa gago, lekgoba la gago la monna le la mosadi, Molefi, modiiledi, tšhiwana gotee le mohlologadi, e lego bao ba lego ka gare ga dikgoro tša gago. O binele Jehofa Modimo wa gago monyanya ka matšatši a šupago o le lefelong leo Jehofa a tlago go le kgetha, ka gobane Jehofa Modimo wa gago o tla go šegofatša punong ya gago ka moka gotee le medirong ka moka ya diatla tša gago gomme o thabe.”—Doit. 16:14, 15; bala Mateo 5:3.

KE KA BAKA LA’NG O SWANETŠE GO TŠEELA GODIMO DIKOPANO TŠA MEHLENG YENO?

15, 16. Ke boikgafo bofe bjoo o ilego wa swanelwa ke go bo dira gore o be gona dikopanong? Boikgafo bjoo bo go tšwetše mohola ka tsela efe?

15 Ruri dipokano tše tša bogologolo di nea batho ba Modimo lehono mohlala o mobotse kudu! Gaešita le ge ka nywaga e makgolo e fetilego go ile gwa fetoga dilo tše dintši, dibopego tše bohlokwa tša dikopano tšona ga se tša fetoga. Mehleng ya Beibele, batho ba be ba swanetše go dira boikgafo gore ba be gona dipokanong tšeo. Le lehono ba bantši ba sa dutše ba dira bjalo. Lega go le bjalo, o ka se tsoge o itsholetše gore o dirile seo. Ditiragalo tše di be di bula sebaka se bohlokwa sa go thabela dilo tša moya—gomme di sa dutše di dira seo lehono. Di re nea tsebišo le kwešišo yeo e lego ya bohlokwa gore re kgomarele tswalano ya kgauswi le Modimo. Di re tutueletša go diriša seo re ithutago sona, di re thuša go phema mathata le go re kgothaletša go dula re tsepamišitše menagano ya rena dilong tšeo re swanetšego go di phegelela le dilo tšeo di tlago go re lapološa go e na le go re imela.—Ps. 122:1-4.

Korea Borwa

16 Bao ba bago gona dikopanong ba dula ba thabile. Pego ya mabapi le kopano e kgolo yeo e bego e swerwe ka 1946 e bolela gore: “Go be go tloga go kgahliša go bona Dihlatse tše diketekete di dutše ka go iketla, le gona go be go bile go thabiša kudu go theetša ge sehlopha se segolo sa bao ba bego ba letša diletšo se kopane le mantšu a opelago a mašabašaba gomme se dira gore lepatlelong go kwagale mmino o thabišago wa dikopelo tša Mmušo tša go tumiša Jehofa.” Pego yeo e okeditše ka gore: “Lefapheng la Tirelo la Baithaopi go be go na le batlakopanong bao e bego e le bašomi ba ba ingwadišeditšego go šoma mafapheng ka moka, ba dirile se ka ge ba thabela go hlankela badumedigotee le bona.” Na le wena o kile  wa thaba ka tsela yeo ge o be o le dikopanong tša selete goba tša ditšhabatšhaba?—Ps. 110:3; Jes. 42:10-12.

17. Go rulaganywa ga dikopano go ile gwa kaonefatšwa bjang morago bjale?

17 Go bile le diphetogo tše itšego mabapi le tsela yeo dikopano di rulaganywago ka yona. Ka mohlala, ba bangwe ba batho ba Modimo ba sa gopola ge dikopano di be di fetša matšatši a seswai! Go be go na le lenaneo la mesong, la thapama le la mantšiboa. Tirelo ya tšhemo e be e le karolo ya ka mehla ya lenaneo leo. Go be go na le dikarolo tše mmalwa tšeo di bego di thoma ka iri ya senyane mesong, e bile mananeo gantši a be a fela ka iri ya senyane bošego. Baithaopi ba be ba šoma ka thata gore ba lokišetše batlakopanong dijo tša go fihlola, tša matena le tša go lalela. Ga bjale go rulagantšwe lenaneo leo le tšeago matšatši a sego kae, le gona malapa gotee le batho ba bangwe ba itirela mefago gomme se se dira gore ba kgone go tsepamiša menagano ya bona gakaone lenaneong la dijo tša moya.

Mozambique

18, 19. Ke dibopego dife tša kopano tšeo o di fagahlelago, gona ka baka la’ng?

18 Dibopego tša kopano tšeo go tloga kgale e bego e le karolo ya lenaneo di dula di fagahlelwa. ‘Dijo tša moya tšeo di newago ka nako e swanetšego’ di re thuša go kwešiša gakaone diporofeto le dithuto tša Beibele, le gona ga di hwetšwe dipolelong feela, eupša di hwetša gape ka go lokollwa ga dikgatišo tše mpsha dikopanong. (Mat. 24:45) Gantši dikgatišo tše bjalo ke didirišwa tšeo di thušago batho ba dipelo tše di botegago go kwešiša Mangwalo. Diterama tše tutuetšago tšeo di theilwego Beibeleng di kgothatša ba bagolo le ba banyenyane go hlahloba maikemišetšo a bona le go itiša kgahlanong le dikgateletšo tše di tšwago lefaseng la go se boife Modimo. Polelo ya kolobetšo le yona e re nea sebaka sa go lekodišiša dilo tšeo di tlago pele maphelong a rena le go bona lethabo leo le tlišwago ke go bona ba bangwe ba bontšha boineelo bja bona go Jehofa.

19 Ruri dikopano ke kgale e le karolo ya borapedi bjo bo sekilego, gomme di hlamela batho ba thabilego ba Jehofa go mo hlankela ka tsela e swanetšego dinakong tše tše hlohlago. Dipokano tše bjalo di kgothatša moyeng, di re nea dibaka tša go kopana le bagwera ba bafsa, di re thuša go tšeela godimo mokgatlo wa lefase ka bophara wa bana babo rena, e bile ke tsela yeo ka yona Jehofa a šegofatšago le go hlokomela batho ba gagwe. Ruri yo mongwe le yo mongwe wa rena o swanetše go dira dithulaganyo tša gore a be gona le go holwa ke lenaneo le lengwe le le lengwe la kopano.—Die. 10:22.