Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2012

Kamoo Lefase le le Tlago go Fedišwa ka Gona

Kamoo Lefase le le Tlago go Fedišwa ka Gona

“Ga le leswiswing moo letšatši leo le tla le fihlelago bjalo ka ge le be le tla fihlela mahodu.”—1 BATHES. 5:4.

1. Ke eng seo se tla re thušago gore re dule re phakgame gomme re fenye diteko?

GO SE go ye kae lefase le le tla welwa ke dimaka. Go phethagala ga diporofeto tša Beibele go tiišetša therešo yeo, ka gona re swanetše go dula re phakgame. Ke eng seo se tlago go re thuša go dira seo? Moapostola Paulo o re kgothaletša gore “re [iše] mahlo a rena dilong tše di sa bonwego.” Re swanetše go dula re gopola ka moputso wa rena wa bophelo bjo bo sa felego, e ka ba e le wa go phela legodimong goba mo lefaseng. Go etša ge taba yeo e dikologilego mantšu ao e bontšha, Paulo o ngwadile mantšu ao gore a kgothaletše badumedigotee le yena go dula ba gopola mafelelo a thabišago a go phegelela tsela ya go botega. Go dira ga bona seo go tla ba thuša le gore ba fenye diteko le tlaišo.—2 Bakor. 4:8, 9, 16-18; 5:7.

2. (a) Ke eng seo re swanetšego go se dira gore kholofelo ya rena e dule e tiile? (b) Re tlo ahlaahla eng sehlogong se le seo se latelago?

2 Kgothatšo ya Paulo e na le molao o bohlokwa wa motheo wa gore: E le gore kholofelo ya rena e dule e tiile, re swanetše go lebelela ka kua ga dilo tšeo di lego pele ga mahlo a rena. Re swanetše go naganišiša ka ditiragalo tše bohlokwa tšeo re sego ra tšwa re di bona. (Baheb. 11:1; 12:1, 2) Ka gona, anke re ahlaahleng ditiragalo tše lesome tša nakong e tlago tšeo di tswalanago kgauswi kudu le kholofelo ya rena ya go hwetša bophelo bjo bo sa felego. *

KE ENG SEO SE TLAGO GO DIREGA NAKWANA PELE GA BOFELO?

3. (a) Ke selo sefe seo se tlago go direga seo go boletšwego ka sona go 1 Bathesalonika 5:2, 3? (b) Ke eng seo baetapele ba dipolitiki ba tlago go se dira, gomme ke bomang bao ba ka ba tlatšago tiragalong yeo?

3 E nngwe ya ditiragalo tšeo di tlago go direga nakong e tlago e bolelwa ke Paulo lengwalong leo a le ngwaletšego  Bathesalonika. (Bala 1 Bathesalonika 5:2, 3.) O bolela ka “letšatši la Jehofa.” Ka tsela yeo polelwana “letšatši la Jehofa” e dirišitšwego ka yona mo, e šupa go lebaka la nako leo le tlago go thoma ka go fedišwa ga bodumedi bja maaka gomme la fihla seremong ka ntwa ya Haramagedone. Lega go le bjalo, nakwana pele ga ge letšatši leo la Jehofa le thoma, baetapele ba lefase ba tla re: “Go na le khutšo le polokego.” Seo e ka ba tiragalo e tee goba lelokelelo la ditiragalo. Ditšhaba di tla nagana gore di kgauswi le go rarolla a mangwe a mathata a tšona a magolo. Go thwe’ng ka baetapele ba bodumedi? Le bona ke karolo ya lefase, ka gona go ka direga gore ba tla thekga baetapele ba dipolitiki tabeng ye. (Kut. 17:1, 2) Ka go re’alo baruti ba tla ba ba ekiša baporofeta ba maaka ba Juda ya bogologolo. Jehofa o boletše ka bona gore: “Ba re: ‘Go khutšo! Go khutšo!’ mola go se khutšo.”—Jer. 6:14; 23:16, 17.

4. Go fapana le batho ka kakaretšo, ke eng seo rena re se lemogago?

4 Go sa šetšwe gore ke bomang bao ba tlago go tšea karolo go bolela gore: “Go na le khutšo le polokego,” tiragalo yeo e tla bontšha gore letšatši la Jehofa le kgauswi le go thoma. Ke ka baka leo Paulo a bego a ka re: “Bana bešo, ga le leswiswing moo letšatši leo le tla le fihlelago bjalo ka ge le be le tla fihlela mahodu, gobane ka moka le barwa ba seetša.” (1 Bathes. 5:4, 5) Go fapana le batho ka kakaretšo, rena re lemoga seo Mangwalo a se bolelago ka ditiragalo tšeo di diregago gona bjale. Ge e le gabotse boporofeta bjo rego: “Go na le khutšo le polokego,” bo tla phethagala bjang? Re swanetše go leta gore re tle re bone seo se tlago go direga. Ka gona, anke re ikemišetšeng go “[dula] re phafogile gomme re dule re hlaphogetšwe monaganong.”—1 Bathes. 5:6; Tsef. 3:8.

“KGOŠIGADI” YEO E ITŠHETŠEGO PHORI MAHLONG

5. (a) “Masetlapelo a magolo” a tla thoma bjang? (b) Ke “kgošigadi” efe yeo e tlago go itšhela phori mahlong?

5 Ke selo sefe seo se sego sa tšwa se bonwa seo se tlago go direga ka morago ga moo? Paulo o itše: “Nakong ya ge batho ba re: ‘Go na le khutšo le polokego,’ ke moo tshenyego ya tšhoganyetšo e tla ba welago gateetee.” Karolo ya pele ya “tshenyego ya tšhoganyetšo” ke ya ge go hlaselwa “Babilona o Mogolo,” e lego mmušo wa lefase wa bodumedi bja maaka, yeo gape e tsebjago e le “mogweba-ka-mmele.” (Kut. 17:5, 6, 15) Nako yeo ya go hlaselwa ga dibopego ka moka tša bodumedi bja maaka, go akaretša le Bojakane, ke yona nako ya go thoma ga “masetlapelo a magolo.” (Mat. 24:21; 2 Bathes. 2:8) Tiragalo ye e tla direga ba bantši ba sa itebetše. Ka baka la’ng? Ka gobane go fihla motsotsong woo, mogweba-ka-mmele o tla ba a ipotša ka kgodišego  gore ke yena “kgošigadi” yeo e ka se kego ya “bona tlhokofalo.” Eupša gateetee o tla lemoga gore o be a itšhetše phori mahlong. O tla fedišwa ka tšhoganyetšo, bjalo ka ge eka ke “ka letšatši letee.”—Kut. 18:7, 8.

6. Bodumedi bja maaka bo tla fedišwa ke mang?

6 Lentšu la Modimo le bolela gore mogweba-ka-mmele yoo o tla hlaselwa ke “sebata” sa “dinaka tše lesome.” Seo re ithutago sona pukung ya Kutollo se bontšha gore sebata seo ke Ditšhaba tše Kopanego (United Nations [UN]). “Dinaka tše lesome” di emela mebušo ka moka ya dipolitiki yeo e thekgago “sebata [se] sa mmala o mohwibiduhwibidu.” * (Kut. 17:3, 5, 11, 12) Tlhaselo yeo e tla ba e šoro gakaaka’ng? Ditšhaba tšeo di lego karolo ya UN di tla hula mahumo a mogweba-ka-mmele yoo, tša pepentšha semelo sa gagwe sa kgonthe, tša mo ja gomme tša mo “fiša ka mo go feletšego.” O tla fedišetšwa sa ruri.—Bala Kutollo 17:16.

7. Ke eng seo se tlago go huetša tlhaselo ya “sebata”?

7 Le gona boporofeta bja Beibele bo bontšha seo se tlago go huetša tlhaselo ye. Ka tsela e itšego, Jehofa o tla tsenya dipelong tša babuši ba dipolitiki “gore [ba] phethe kgopolo ya gagwe,” kgopolo ya gore ba fediše mogweba-ka-mmele yoo. (Kut. 17:17) Bodumedi ka ge bo rata ntwa bo tšwela pele bo senya ditaba tša lefase; ka baka leo, ditšhaba di ka nagana gore di tla ba di hlomola naga mootlwa ka go fediša mogweba-ka-mmele. Ge e le gabotse, ge babuši bao ba thoma go hlasela, ba tla ba ba nagana gore ba phetha “kgopolo ya [bona] e tee.” Lega go le bjalo, e tla ba e le sedirišwa sa Modimo sa go fediša bodumedi bja maaka ka mo go feletšego. Ka go re’alo, sa go makatša ke gore karolo e nngwe ya tshepedišo ya Sathane e tla hlasela e nngwe, gomme Sathane o tla hloka matla a go thibela seo.—Mat. 12:25, 26.

GO HLASELWA GA BATHO BA MODIMO

8. Tlhaselo ya “Gogo wa naga ya Magogo” ke eng?

8 Ka morago ga gore bodumedi bja maaka bo fedišwe, bahlanka ba Modimo ba tla hwetšwa ba ‘dula ka polokego’ e bile ba le “mo go sego morako.” (Hesek. 38:11, 14) Go tla direga’ng ka sehlopha se sa batho bao ba bonagalago ba ka se kgone go itšhireletša bao ba tšwelago pele ba rapela Jehofa? Go bonagala ba tla hlaselwa ka mo go feletšego ke “meraforafo.” Lentšu la Modimo le hlalosa tiragalo yeo e le tlhaselo ya “Gogo wa naga ya Magogo.” (Bala Hesekiele 38:2, 15, 16.) Re swanetše go lebelela bjang tlhaselo yeo?

9. (a) Ke selo sefe se segolo seo Mokriste a tshwenyegilego ka sona? (b) Ke megato efe yeo re swanetšego go e gata gona bjale gore re tiiše tumelo ya rena?

9 Go tseba ga rena gore batho ba Modimo ba tla hlaselwa ga se gwa swanela go  re tšhoša ka mo go feteletšego. Go e na le moo, selo se segolo seo re tshwenyegilego ka sona ga se go phološwa ga rena, eupša ke go kgethagatšwa ga leina la Jehofa le go godišwa ga bogoši bja gagwe. Ge e le gabotse, Jehofa o boletše ka makga a fetago a 60 gore: “Le tla tseba gore ke nna Jehofa.” (Hesek. 6:7; bona mongwalo wa ka tlase wa Reference Bible) Ka gona, re tloga re fagahletše go bona ge karolo yeo e kgahlišago ya boporofeta bja Hesekiele e phethagala, re holofetše gore “Jehofa o tseba go hlakodiša batho ba boineelo go Modimo molekong.” (2 Pet. 2:9) Ge re sa dutše re letile seo, re nyaka go diriša sebaka se sengwe le se sengwe go matlafatša tumelo ya rena e le gore re ka dula re botegela Jehofa go sa šetšwe teko yeo e ka re welago. Ke eng seo re swanetšego go se dira? Re swanetše go rapela, re ithute Lentšu la Modimo le go naganišiša ka lona, ke moka re botše ba bangwe molaetša wa Mmušo. Ge e ba re dira seo, re dira gore kholofelo ya rena ya go phela ka mo go sa felego e dule e tiile, e le bjalo ka “tshetledi.”—Baheb. 6:19; Ps. 25:21.

DITŠHABA DI TLA GAPELETŠEGA GO TSEBA GORE JEHOFA KE MANG

10, 11. Ke eng seo se tlago go bontšha gore Haramagedone e a thoma, gomme ke eng seo se tlago go direga nakong yeo?

10 Ke tiragalo efe e boifišago yeo e tlago go thongwa ke go hlaselwa ga bahlanka ba Jehofa? Jehofa, a diriša Jesu le madira a legodimong, o tla tsena ditaba gare gore a phološe batho ba Gagwe. (Kut. 19:11-16) Tiragalo yeo e tla ba “[ntwa] ya letšatši le legolo la Modimo Ramatlaohle,” e lego Haramagedone.—Kut. 16:14, 16.

11 Ge Jehofa a bolela ka ntwa yeo, o boletše a diriša Hesekiele gore: “‘Ke tla [bitša] tšhoša go tlo lwa le [Gogo] tikologong ka moka ya dithaba tša ka,’ o re’alo Mmuši Morena Jehofa. ‘Yo mongwe le yo mongwe o tla lwa le ngwanabo ka tšhoša ya gagwe.’” Ka ge ba tla ba ba tšhogile, bohle bao ba emago le Sathane ba tla gakanega gomme ba thoma go bolayana ka dibetša tša bona—mohlabani a lwa le mohlabani. Le gona, Sathane le yena o tla welwa ke tlalelo. Jehofa o re: “Ke tla dira gore a nelwe ke mollo le sebabole, yena le mephato ya gagwe ya madira le meraforafo yeo e tlago go ba e na le yena.” (Hesek. 38:21, 22) Kgato yeo ya Modimo e tla ba le mafelelo afe?

12. Ditšhaba di tla gapeletšega go dira eng?

12 Ditšhaba di tla gapeletšega go lemoga gore go fenywa ga tšona gabohloko go tlišitšwe ke taelo ya Jehofa. Ke moka, go swana le ge go diregile ka Baegipita ba bogologolo bao ba ilego ba hlasela Baisiraele Lewatleng le Lehwibidu, madira a Sathane a ka tla a goeletša a tlaletšwe gore: “Jehofa o [a] ba lwela”! (Ek. 14:25) Ee, ditšhaba di tla gapeletšega go tseba gore Jehofa ke mang. (Bala Hesekiele 38:23.) Go šetše nako e kaaka’ng gore ditiragalo tše di thome go direga ka go latelana?

GA GO MMUŠO O MONGWE GAPE WA LEFASE WOO O TLAGO GO THOMA GO BUŠA

13. Re tseba’ng ka karolo ya bohlano ya seswantšho seo Daniele a boletšego ka sona?

13 Boporofeta bjo bo lego ka pukung ya Daniele bo re thuša go bona moo re lego gona nakong ye. Daniele o bolela ka seswantšho sa motho yo a dirilwego ka dilo tša mehutahuta. (Dan. 2:28, 31-33) Seswantšho seo se emela mebušo ya lefase yeo e bušitšego ka go latelana gomme e kgomile batho ba Modimo ka tsela e kgolo, e ka ba e le mehleng ya bogologolo goba gona bjale. Yona ke Babilona, Media le Peresia, Gerika, Roma—le wa mafelelo woo o lego gona mehleng ya rena. Go ithuta ga rena boporofeta bja Daniele go re bontšha gore mmušo wo wa mafelelo wa lefase o swantšhetšwa ke dinao le menwana ya seswantšho seo. Ntweng ya I ya Lefase, Brithania le United States di ile tša thoma segwera se se kgethegilego. Ruri karolo ya bohlano ya seswantšho sa Daniele ke Mmušo wa Lefase wa Maisemane le Maamerika. Dinao di bopa karolo ya mafelelo ya seswantšho seo, e lego seo se bontšhago gore ga go mmušo o mongwe wa batho woo o tlago go tšwelela ka morago  ga wona. Taba ya gore dinao le menwana di dirilwe ka tšhipi le letsopa e swantšhetša boemo bja go fokola ga Mmušo wa Lefase wa Maisemane le Maamerika.

14. Ke mmušo ofe wa lefase woo o tlago go ba o buša ge Haramagedone e thoma?

14 Bjona boporofeta bjoo bo bontšha gore Mmušo wa Modimo, e lego woo o swantšhetšwago ke leswika le legolo, o ile wa kgerešwa thabeng ya bogoši bja Jehofa ka 1914. Ga bjale leswika leo le lebile dinaong tša seswantšho seo. Nakong ya Haramagedone, dinao tšeo le seswantšho seo ka moka di tla šilaganywa. (Bala Daniele 2:44, 45.) Ka gona, Mmušo wa Lefase wa Maisemane le Maamerika e tla ba e le wona o bušago lefase ge Haramagedone e thoma. Ruri e tla ba selo se se kgahlišago gakaakang go bona ge boporofeta bjo bo phethagala ka botlalo! * Eupša ke eng seo Jehofa a tlago go se dira ka Sathane?

KAMOO LENABA LE LEGOLO LA MODIMO LE TLAGO GO FEDIŠWA KA GONA

15. Ke eng seo se tlago go direga ka Sathane le batemona ba gagwe ka morago ga Haramagedone?

15 Sa pele, Sathane o tla gapeletšega go bona go tloga mathomong go fihla mafelelong ge mokgatlo wa gagwe ka moka mo lefaseng o fedišwa. Ka morago ga moo, ditaba ka moka di lebana le Sathane ka boyena. Moapostola Johane o bega seo se diregago ka morago ga seo. (Bala Kutollo 20:1-3.) Jesu Kriste—yena ‘morongwa yo a swerego senotlelo sa sekoti’—o tla swara Sathane le batemona ba gagwe, a ba lahlela ka sekoting gomme a ba tswalelela ka moo nywaga e sekete. (Luka 8:30, 31; 1 Joh. 3:8) Mogato woo ke mathomo a go pšhatlwa ga hlogo ya noga. *Gen. 3:15.

16. Go ba ga Sathane ka gare ga “sekoti” go bolela’ng go yena?

16 “Sekoti” seo Sathane le batemona ba gagwe ba tlago go lahlelwa ka go sona ke eng? Lentšu la Segerika a′bys·sos leo le dirišitšwego ke Johane le bolela “selo seo se išago fase kudu.” Le bile le fetolelwa e le “seo se sa lekanywego le selo, sa go hloka magomo,” le “molete o mogologolo o se nago selo.” Ka gona, ke lefelo leo go sego motho yo a ka fihlago go lona ge e se Jehofa le morongwa yo a mo kgethilego ‘yo a swerego senotlelo sa sekoti.’ Ge Sathane a le ka moo, o tla ba a le boemong bja go swana le lehu e le gore ‘a se ke a hlwa a timetša ditšhaba.’ Ruri “tau [yeo] e rorago” e tla ba e feditšwe matla!—1 Pet. 5:8.

DITIRAGALO TŠEO DI LEBIŠAGO NAKONG YA KHUTŠO

17, 18. (a) Ke ditiragalo dife tšeo di sego tša hlwa di bonwa tšeo re di hlahlobilego go fihla ga bjale? (b) Ka morago ga ditiragalo tše, re tla tsena nakong efe ya bophelo bja rena?

17 Re kgauswi le go tlo bona ditiragalo tše dikgolo le tše di makatšago. Re fagahletše go bona kamoo mantšu a rego: “Go na le khutšo le polokego,” a tlago go phethagala ka gona. Ke moka re tla bona ge Babilona o Mogolo a fedišwa, ge Gogo wa naga ya Magogo a hlasela, ge ntwa ya Haramagedone e thoma le ge Sathane le batemona ba gagwe ba lahlelwa ka sekoting. Ka morago ga ditiragalo tše, ge bokgopo ka moka bo tla ba bo fedišitšwe, re tla thoma karolo e mpsha ya bophelo bja rena—Pušo ya Kriste ya Nywaga e Sekete, moo go yona re tlago go thabela go bona “go ata ga khutšo.”—Ps. 37:10, 11.

18 Go tlaleletša ditiragalong tše hlano tšeo re šetšego re di ahlaahlile go fihla ga bjale, go sa na le ‘dilo tše dingwe tše di sa bonwego’ tšeo re nyakago go “iša mahlo a rena” go tšona. Re tla ahlaahla ditiragalo tšeo sehlogong se se latelago.

^ ser. 2 Ditiragalo tšeo tše lesome di ahlaahlwa sehlogong se le seo se latelago.

^ ser. 6 Bona Seremo se Segolo sa Kutollo se Batametše! matlakala 251-258.

^ ser. 14 Polelwana e lego go Daniele 2:44 ya gore ‘o tla fediša mebušo ye ka moka’ e šupa go mebušo ya lefase yeo e swantšhetšwago ke dikarolo tša seswantšho se. Lega go le bjalo, boporofeta bjo bongwe bja Beibele bjo bo sepedišanago le bjo bo bontšha gore “dikgoši tša lefase ka moka” di tla lwa le Jehofa nakong ya “letšatši le legolo la Modimo Ramatlaohle.” (Kut. 16:14; 19:19-21) Ka gona, nakong ya Haramagedone go ka se fedišwe feela mebušo ya seswantšho seo eupša go tla fedišwa le mebušo e mengwe ka moka ya lefase.

^ ser. 15 Mogato wa mafelelo wa go pšhatlwa ga hlogo ya noga o direga ka morago ga ge go fedile nywaga e sekete gomme Sathane le batemona ba gagwe ba lahlelwa ka “letsheng la mollo le sebabole.”—Kut. 20:7-10; Mat. 25:41.