Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) 2006-07-15

Mmušo wa Modimo o Phala Mebušo Yohle

Mmušo wa Modimo o Phala Mebušo Yohle

JESU KRISTE o rutile balatedi ba gagwe gore: “Le swanetše go rapela ka tsela ye: ‘Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.’” (Mateo 6:9, 10) Thapelo ye yeo e tsebjago ke ba bantši e le Tatawešo, goba Thapelo ya Morena, e hlalosa morero wa Mmušo wa Modimo.

Leina la Modimo le tla kgethagatšwa ka thušo ya Mmušo. Lenyatšo ka moka leo le kgobetšwego leineng le, ka baka la borabele bja Sathane le bja batho le tla phumolwa. Se se bohlokwa. Lethabo la dibopiwa ka moka tše bohlale le ithekgile ka go swara leina la Modimo e le le lekgethwa le go amogela ka go rata tshwanelo ya gagwe ya go buša.—Kutollo 4:11.

Go tlaleletša moo, Mmušo wa Modimo o hlomilwe bakeng sa go dira gore “thato ya [Modimo] e direge le mo lefaseng bjalo ka ge e direga legodimong.” Thato yeo ke efe? Ke go tsošološa tswalano gare ga Modimo le batho, yeo Adama a e lahlilego. Le gona Mmušo o tla phetha morero wa Mmuši wa Legohle e lego Jehofa, wa go tsošološa paradeise mo lefaseng moo batho ba lokilego ba tlago go phela ka mo go sa felego. Ee, Mmušo wa Modimo o tla fediša tshenyo ka moka yeo e bakilwego ke sebe sa mathomo gomme wa dira gore morero wa Modimo wa lerato ka lefase o phethege. (1 Johane 3:8) Ge e le gabotse, Mmušo wo le seo o tlago go se phetha ke molaetša o mogolo wa Beibele.

O Phala e Mengwe Bjang?

Mmušo wa Modimo ke pušo ya kgonthe yeo e nago le matla a magolo. Moporofeta Daniele o re tsopoletše bogolo bja matla a wona. Nywageng e fetilego o boletše e sa le pele gore: “Modimo [o tlo] tsoša mmušô wo . . . O [tlago] xo phšatla mebušô e mengwê [ya batho] ka moka wa e fediša.” Go oketša moo, go fapana le mebušo ya batho yeo e tšwelelago le go timelela ge histori e dutše e phethega, Mmušo wa Modimo ke “wo o ka se kexo wa šwalalanywa neng le neng.” (Daniele 2:44) Ga go felele fao. Mmušo wo o tloga o phala mebušo ya batho ka dilo tšohle.

Mmušo wa Modimo o na le Kgoši e phagamego.

Hlokomela gore Kgoši yeo ke mang. ‘Dilorong le diponong’ tšeo Daniele a ilego a di bontšhwa, o bone Kgoši ya Mmušo wa Modimo e le bjalo ka yo “e kexo ké Morwa-motho,” e tlišwa go Modimo yo Matla ohle gomme e neelwa “boxoši le kxodišô le mmušô” tša ka mo go sa felego. (Daniele 7:1, 13, 14) Morwa-motho yoo ga se yo mongwe ge e se Jesu Kriste—Mesia. (Mateo 16:13-17) Jehofa Modimo o kgethile Morwa wa gagwe ka noši, Jesu, gore e be Kgoši ya Mmušo wa Gagwe. Ge Jesu a be a le lefaseng o ile a botša Bafarasei ba kgopo gore: “Mmušo wa Modimo o gare ga lena,” e le ge a bolela gore yena, yoo e tlago go ba Kgoši ya Mmušo woo, o gare ga bona.—Luka 17:21.

Jehofa o kgethile Jesu Kriste gore e be Kgoši ya Mmušo wa Gagwe

Mo bathong, ke Mmuši ofe yo a nago le ditshwanelo  tša go buša go swana le Jesu? Jesu o šetše a hlatsetše gore e tloga e le Moetapele wa toka, wa go botega le yo a nago le kwelobohloko. Diebangedi di mo hlalosa e le monna yo a gatago mogato le yo a nago le lerato le borutho gotee le maikwelo a tseneletšego. (Mateo 4:23; Mareka 1:40, 41; 6:31-34; Luka 7:11-17) Go feta moo, Jesu yo a tsošitšwego bahung ga e sa le lekgoba la lehu goba la mafokodi a mangwe ao batho ba nago le ona.—Jesaya 9:5, 6.

Jesu le babuši-gotee le yena ba buša ba le maemong a phagamego.

Le gona, Daniele ponong ya gagwe ya toro o ile a bona “sethšaba sa bakxêthwa . . . [se] fiwa mmušô le boxoši.” (Daniele 7:27) Jesu ga a buše a nnoši. O na le ba bangwe bao ba tlago go buša le yena e le dikgoši le go hlankela e le baperisita. (Kutollo 5:9, 10; 20:6) Ge moapostola Johane a ngwala mabapi le bona o itše: “Ka lebelela, gomme, bonang! Kwana e eme Thabeng ya Tsione e na le ba dikete tše lekgolo-masome-nne-nne . . . bao ba rekilwego lefaseng.”—Kutollo 14:1-3.

Kwana ke Jesu Kriste ge a le maemong a gagwe Mmušong. (Johane 1:29; Kutollo 22:3) Thaba ye ya Tsione e šupa legodimo. * (Baheberu 12:22) Jesu le babuši-gotee le yena ba 144 000 ba buša ba le legodimong. Ruri ba tloga ba buša ba le maemong a phagamego kudu! Ka ge ba le legodimong, ba tla kgona go bona gohle. Ka ge magodimo e le bodulo bja “mmušo wa Modimo,” o bitšwa gape gore ke “mmušo wa magodimo.” (Luka 8:10; Mateo 13:11) Ga go na dibetša, gaešita le ditlhaselo tša nuclear, tšeo di ka fihlelelago mmušo woo wa magodimo le go o wiša. Ga o fenyege, le gona o tla phethagatša morero wo Jehofa a o neilego wona.—Baheberu 12:28.

Mmušo wa Modimo o na le baemedi bao ba botegago mo lefaseng.

Re tseba se bjang? Psalme 45:16 e re: “O tlo . . . bea bakxôma lefaseng ka moka.” Boporofeteng bjo, “O” e emela Morwa wa Modimo. (Psalme 45:6, 7; Baheberu 1:7, 8) Ka gona, Jesu Kriste ka noši o tla kgetha bakgoma bao e lego baemedi. Re ka kgodišega gore ba tla phethagatša ditaelo tša gagwe ka potego. Gaešita le lehono, banna ba swanelegago bao ba hlankelago e le bagolo ka phuthegong ya Bokriste ba rutwa gore ba se ke ba “buša” badumedi-gotee le bona, eupša ba ba šireletše, ba ba lapološe le go ba homotša.—Mateo 20:25-28; Jesaya 32:2.

Mmušo o na le balata ba go loka.

Mahlong a Modimo ke ba-ila-bokgopo le baloki. (Diema 2:21, 22) Beibele e re: “Ba bolêta e tlo ba bôná beng ba naxa; ba tlo thaba ka botlalô bya moláô.” (Psalme 37:11) Balata ba Mmušo ke ba boleta—ba rata go rutwa, ba ikokobeditše e bile ba bonolo. Dilo tšeo ba di kgahlegelago kudu ke tša moya. (Mateo 5:3) Ba nyaka go dira se se nepagetšego le gona ba latela tlhahlo ya Modimo.

Mmušo wa Modimo o hlahlwa ke melao e phagamego.

Melao le melao ya motheo yeo e laolago Mmušo wo e tšwa go Jehofa Modimo ka noši. Go e na le gore e re gatelele ka mo go sa lokago, e a re hola. (Psalme 19:7-11) Batho ba bantši ba šetše ba holwa ke go phela ka melao ya Jehofa ya go loka. Ka mohlala, go ela hloko keletšo ya Beibele mabapi le banna, basadi le bana go kaonefatša bophelo bja malapa a rena. (Baefeso 5:33–6:3) Ge re latela keletšo e rego re ‘apare lerato,’ tswalano ya rena le ba bangwe e a kaonefala. (Bakolose 3:13, 14) Le gona ge re phela ka melao ya motheo ya Mangwalo, re hlagolela mekgwa e mebotse ya go šoma le go ba le pono e nepagetšego ka tšhelete. (Diema 13:4; 1 Timotheo 6:9, 10) Go phema botagwa, dikopano tše di gobogilego tša botona le botshadi, go kgoga le go lemalela dihlare-tagi go ka thuša go šireletša bophelo bja rena bjo bobotse bja mmele.—Diema 7:21-23; 23:29, 30; 2 Bakorinthe 7:1.

Mmušo wa Modimo ke pušo yeo e hlomilwego ke Modimo. Kgoši ya wona—Mesia, e lego Jesu Kriste—le babuši-gotee le yena ba ikarabela go Modimo bakeng sa go godiša melao ya  Gagwe ya go loka le melao ya gagwe ya motheo e lerato. Balata ba Mmušo, go akaretša le baemedi ba wona ba lego lefaseng, ba thabela go phela ka melao ya Modimo. Ka gona, Modimo o tla pele go babuši le balata ba Mmušo. Ka gona, Mmušo e tloga e le pušo ya Modimo—bolaodi bja Modimo. O tla atlega go phetha merero ye o hlometšwego gore o e phethe. Eupša Mmušo wa Modimo, wo o tsebjago gape e le Mmušo wa Mesia, o tla thoma neng go buša?

Mmušo o Thoma go Buša

Selo seo se ka re thušago go kwešiša gore Mmušo o thoma neng go buša, se hwetšwa mantšung a Jesu. O boletše gore: “Jerusalema e tla gatakelwa ke ditšhaba go fihla ge dinako tše di beilwego tša ditšhaba di phethega.” (Luka 21:24) Jerusalema e be e le motse o nnoši lefaseng ka moka wo ka go lebanya o bego o tswalanywa le leina la Modimo. (1 Dikxoši 11:36; Mateo 5:35) E be e le mošate wa mmušo wo o dumeletšwego ke Modimo wa lefaseng. Motse wo o be o swanetše go gatakelwa ke ditšhaba ka tsela ya gore bolaodi bja Modimo bathong ba gagwe bo be bo tla šitišwa ke mebušo ya lefase. Se se be se tla thoma neng?

Kgoši ya mafelelo yeo e ilego ya dula sedulong sa Jehofa kua Jerusalema e ile ya botšwa gore: “Tloša seala, O rolê mphapahlôxô! . . . Xo tlo bá xwa tla e a swanetšwexo ke wôna, ka o nea yêna.” (Hesekiele 21:30-32) Mphapahlogo o be o swanetše go rolwa hlogong ya kgoši yeo, gomme pušo ya Modimo bathong ba Gagwe e be e tla šitišwa. Se se phethagetše ka 607 B.C.E. ge Bababilona ba fediša Jerusalema. Nakong yeo e bego e tla latela ya “dinako tše di beilwego,” Modimo o be a ka se be le mmušo lefaseng wo o bego o tla emela bogoši bja gagwe. Ke feela bofelong bja mabaka ao, mo Jehofa a bego a tla nea matla a go buša go yo a mo ‘swanetšego’—Jesu Kriste. Nako yeo e be e tla ba e kaaka’ng?

Boporofeta ka pukung ya Beibele ya Daniele bo re: “Rêmang sehlare seo Le se fedišê; fêla, Le šadišê thitô ya sôna mmung, e šalê è tlemilwe ka dithsipi le ka mefiri . . . xo bê xo fetê mabaka a šupaxo.” (Daniele 4:23) Ka ge re tla bona, “mabaka a šupaxo” a go boletšwego ka wona a lekana le “dinako tše di beilwego tša ditšhaba.”

Ka Beibeleng, dihlare di swantšhetša batho, babuši le mebušo ka dinako tše dingwe. (Psalme 1:3; Jeremia 17:7, 8; Hesekiele, kgaolo 31) Sehlare sa seswantšhetšo se ile sa “bônwa ke ba maxomô a lefase lohle.” (Daniele 4:11) Ka gona, bobuši bjo bo bego bo swantšhetšwa ke sehlare seo se bego se tla rengwa le go tlengwa bo ile bja fihla “maxomong a lefase,” bja akaretša mebušo ya batho ka moka. (Daniele 4:17, 20, 22) Ka gona sehlare se swantšhetša bogoši bjo bo phagamego bja Modimo, kudu-kudu tswalanong ya bjona le lefase. Bobuši bjo bo ile bja buša ka nakwana mo lefaseng setšhabeng sa Isiraele ka mmušo wo o hlomilwego ke Jehofa. Sehlare sa seswantšhetšo se ile sa rengwa gomme thito ya sona ya tlengwa ka ditšhipi le mefiri e le go se thibela go gola. Se se be se bontšha gore pušo yeo e bego e emela Modimo mo lefaseng  e be e tla kgaotša go buša, ka ge go diregile ka 607 B.C.E.—eupša e be e ka se kgaotše ya ba moka. Sehlare se be se tla dula se tlemilwe go ba go fihla “mabaka a šupaxo” a fetile. Mafelelong a nako yeo, Jehofa o tla nea moja-bohwa yo a swanelegago bobuši, Jesu Kriste. Go molaleng gore “mabaka a šupaxo” le “dinako tše di beilwego tša ditšhaba” di šupa lebakeng le le swanago la nako.

Beibele e re thuša go kwešiša botelele bja “mabaka a šupaxo.” E lekanya matšatši a 1 260 le “nako [nako e tee] le dinako [dinako tše pedi, bontši] le seripa sa nako”—e lego palo-moka ya “dinako” tše tharo le seripa. (Kutollo 12:6, 14) Se se ra gore palo yeo ge e balwa gabedi, goba dinako tše šupa, e lekana le matšatši a 2 520.

Ge re bala matšatši a kgonthe a 2 520 go tloga ka 607 B.C.E re fihla go 600 B.C.E. Lega go le bjalo, dinako tše šupa di bile gona nako e telele go feta yeo. Di be di dutše di tšwela pele ge Jesu a be a bolela ka “dinako tše di beilwego tša ditšhaba.” Ka gona, dinako tše šupa ke tša boporofeta. Ka baka leo, re swanetše go diriša molao wa Mangwalo wa gore: “’Bakeng sa letšatši xwa êma ngwaxa.” (Numeri 14:34; Hesekiele 4:6) Ge go le bjalo, mabaka a šupago a go buša ga mebušo e matla ya lefase ka ntle le gore Modimo a tsene ditaba gare a dira palo-moka ya nywaga e 2 520. Ge re bala nywaga e 2 520 go tloga ka 607 B.C.E. e re fihliša go 1914 C.E. Wo ke ngwaga wo “dinako tše di beilwego tša ditšhaba,” goba mabaka a šupago, di fedilego ka wona. Se se ra gore Jesu Kriste o thomile go buša e le Kgoši ya Mmušo wa Modimo ka 1914.

“Mmušo wa Gago a o tle”

Ka ge Mmušo wa Mesia o šetše o hlomilwe legodimong, na re swanetše go tšwela pele re rapelela gore o tle, bjalo ka ge Jesu a ile a ruta thapelong ya mohlala? (Mateo 6:9, 10) Ee. Kgopelo yeo e swanetše, e bile e sa dutše e kwagala. Mmušo wa Modimo kgaufsinyane o tla tiiša matla a wona a feletšego a go buša mo lefaseng.

Ruri batho ba botegago ba tla šegofatšwa ge seo se direga! Beibele e re: “Modimo ka noši o tla ba le bona. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” (Kutollo 21:3, 4) Ka nako yeo ‘go ba ba agilego fao go ka se be le e a rego: Ke a babja!’ (Jesaya 33:24) Bao ba kgahlišago Modimo ba tla hwetša bophelo bjo bo sa felego. (Johane 17:3) Ge re letile go phethega ga boporofeta bjo le diporofeto tše dingwe tše dibotse tša Beibele, a re ‘tšweleng pele re tsoma mmušo pele le toko ya Modimo.’—Mateo 6:33.

Balata ba lefaseng ba Mmušo wa Modimo ba tla thabela ditšhegofatšo tše dintši

^ ser. 10 Kgoši Dafida wa Isiraele ya bogologolo o ile a thopa sebo sa Thaba ya Tsione ya Lefaseng go Bajebusi gomme a se dira motse-mošate wa gagwe. (2 Samuele 5:6, 7, 9) O ile a ba a iša Polokelo goba Areka e kgethwa moo. (2 Samuele 6:17) Ka ge Areka e be e tswalana le go ba gona ga Jehofa, ge go bolelwa ka Tsione go be go thwe ke madulo a Modimo gomme e ba seswantšho se se swanetšego sa legodimo.—Ekisodo 25:22; Lefitiko 16:2; Psalme 9:11; Kutollo 11:19.