Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) 2006-07-15

Mmušo wa Modimo ke Eng?

Mmušo wa Modimo ke Eng?

BATHO ba ile ba welwa ke masetlapelo a nyamišago gakaakang mathomong a histori ya bona! Morongwa o ile a rabela kgahlanong le bolaodi bja Yoo a mmopilego. Lerabele le le ile la goketša mosadi wa mathomo Efa gore a je seenywa se se ileditšwego. Ge morongwa a bolela ka mosadi yo le monna wa gagwe Adama, o itše: “Le ka se kê la hwa lehu. Xe e le Modimo, yêna ó tseba xore mohla Lè se jaxo mahlô a lena a tlo buduloxa la ba byalo ka Modimo, la tseba botse le bobe.” (Genesi 2:16, 17; 3:1-5) Morongwa yo wa lerabele o ile a feleletša a bitšwa Diabolo le Sathane.—Kutollo 12:9.

Na Efa o ile a theetša mantšu a Sathane? Beibele e re botša gore: “Mosadi a bôna sehlare seo è le se se bose xe se ka lewa, sè ratêxa xe se lebêlêlwa, sè kxanyoxêxa ka xe se hlalefiša; a bá a fula dienywa tša sôna, a ja, a neêla le monna wa xaxwe e a bexo a na le yêna; le yêna a ja.” (Genesi 3:6) Ee, banyalani ba pele, Adama le Efa, ba ile ba tlatša Sathane ge a rabela. Ka baka leo ba ile ba lahlegelwa ke Paradeise, bona gotee le ditlogolo tša bona. Bana bao ba bego ba tla ba belega ba phethagetše, ba e-na le tebelelo ya bophelo bjo bo sa felego, ba ile ba abela sebe le lehu.—Baroma 5:12.

Mmuši yo a Phagamego wa legohle, Jehofa Modimo o ile a arabela bjang? O ile a rulaganya gore go be le tokišetšo ya go lebalela dibe. (Baroma 5:8) Le gona, Jehofa Modimo o ile a rulaganya go hloma pušo yeo e tlago go kgona go rarolla mathata. Thulaganyo ye e bitšwa, “mmušo wa Modimo.” (Luka 21:31) Mmušo wo ka ge o hlometšwe go thekga pušo ya legohle ya Modimo, o na le morero o kgethegilego.

Morero wa Mmušo wa Modimo ke ofe? Dibopego tše dingwe tša ona ke dife, le gona o fapana bjang le mebušo ya batho? Mmušo wo o be o tla thoma neng go buša? Dipotšišo tše di tla ahla-ahlwa sehlogong se se latelago.