Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! NO. 6 2016

 PONO YA BEIBELE

Go Swara Nako

Go Swara Nako

Gaešita le batho bao ba dulago ba šiiwa ke nako ba bona go le bohlokwa go swara nako. Beibele e re nea bohlale tabeng ye.

Go swara nako go bohlokwa gakaakang?

LEBAKA LEO KA LONA GO LEGO BOHLOKWA

Ba bangwe ba hweditše gore go fihla mabakeng pele ga nako go fokotša kgateletšego. Gape go swara nako go okeletša motho botumo bjo bobotse. Bjang?

Go swara nako go bontšha go ba le bokgoni. Ge o swere nako, se se bontšha gore o leka go laola bophelo bja gago, gomme ga o dumelele maemo a go thibela go dira dilo tšeo o nyakago go di dira.

Go swara nako go bontšha gore o ka botwa. Setšhabeng seo gantši dikholofetšo di sa phethagatšwego e bile di hlokomologwago, batho ba tšeela godimo bao ba phethagatšago dikholofetšo tša bona. Batho bao ba botwago ba hlompšha ke bagwera le ba lapa. Bathwadi ba tšeela godimo bao ba fihlago mošomong ka nako le bao ba fetšago mošomo wa bona ka nako. Bašomi bao ba botwago ba ka putswa ka go fiwa boikarabelo bjo bogolo le mogolo o montši.

SEO BEIBELE E SE BOLELAGO

Ka Beibeleng go na le ditemana tšeo di bolelago ka go swara nako. Ka mohlala, Beibele e re: “Dilo ka moka di dirwe ka bothakga le ka thulaganyo.” (1 Bakorinthe 14:40) Ge batho ba babedi ba dumelelane go kopana lefelong le itšego ka nako e itšego, go bohlokwa e bile ke ga maleba gore ba fihle ka nako. Gape Beibele e re: “Selo se sengwe le se sengwe se na le nako ya sona e beilwego, gaešita le dilo tšohle ka tlase ga magodimo di na le nako ya tšona.” (Mmoledi 3:1) Mantšu ao a dikologilego temana ye a bontšha gore go na le “nako ya go bjala le nako ya go tumola se se bego se bjetšwe.” (Mmoledi 3:2) Balemi ba bjala mabele ka nako ya maleba gore ba tle ba bune kudu ka mo go ka kgonegago. Ka mantšu a mangwe, balemi ba a boelwa ge ba swara nako ya go lema.

Beibele e utolla lebaka leo le kwagalago kudu la go swara nako: Se se bontšha go hlompha batho ba bangwe le nako ya bona e bohlokwa. (Bafilipi 2:3, 4) Go fapana le seo, bao ba dulago ba dira gore ba bangwe ba ba emele ka mehla, ge e le gabotse ba ka ba ba utswa nako ya bona.

“Le se ke la kgahlegela ditaba tša lena feela, eupša le kgahlegele le tša ba bangwe.”Bafilipi 2:4.

 Ke eng seo o ka se dirago gore o sware nako?

SEO BEIBELE E SE BOLELAGO

Beibele e re kgothaletša go rulaganya dilo e sa le pele. (Diema 21:5) Ge o hwetša gore ka mehla o palelwa ke go swara nako yeo e beilwego, go ka direga gore o na le dilo tše dintši kudu tšeo o swanetšego go di dira. Ke ka lebaka la eng o sa fokotše dilo tšeo di se nago mohola e bile di go jelago nako? Beakanya nako e ntšinyana ya go phetha mabaka gomme o ikemišetše go fihla ka pela. Seo se tla go thuša go lebeletšana le maemo ao a sa letelwago, a bjalo ka pitlagano ya dinamelwa goba boemo bjo bo sa kgahlišego bja leratadima.

Beibele gape e re kgothaletša go ba le boipoetšo. (Diema 11:2) Se se bolela go tseba mo o felelago gona. Pele o ka dumela gore o tla phetha lebaka goba mošomo o itšego, lebelela maemo a gago. Ka go dumela goba go rera go dira dilo tše dintši tšeo o ka se kgonego go di fihlelela, o okeletša wena le ba bangwe kgateletšego le go nolega moko.

Go oketša moo, Beibele e re botša gore re šomiše nako ya rena ka bohlale. (Baefeso 5:15, 16) Thoma pele ka go dira mešomo e bohlokwahlokwa. (Bafilipi 1:10) Ka mohlala, ge o diriša dinamelwa tša batho bohle goba o emetše ba bangwe, ikhole ka nako yeo ka go bala goba ka go rulaganya dilo tšeo o tlago go di dira letšatšing leo.

“Maano a motho yo mafolofolo a a mo hola.”Diema 21:5.