Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! NO. 6 2016

 NA DI HLAMILWE?

Ditlhale tša Kgopa ya ka Lewatleng

Ditlhale tša Kgopa ya ka Lewatleng

GO SWANA le dikgopa tšeo di bitšwago di-barnacle, dikgopa tša ka lewatleng di itshwareletša maswikeng, dikoteng le dikepeng. Lega go le bjalo, ka go se swane le dikgopa tšeo di bitšwago di-barnacle, tšeo di itshwareletšago ka go tia selong se itšego, dikgopa tša ka lewatleng di itshwareletša le go lekelela ka ditlhale tše dintši tše di tshesane tšeo di bitšwago ditlhale tša byssus. Le ge mokgwa wo o dira gore kgopa e kgone go lokologa ge e dutše e eja le go kgona go tloga lefelong le lengwe go ya go le lengwe, go ka bonagala ditlhale di se tša tia go ka kgotlelela ge di itiwa ke maphoto a lewatle. Ditlhale tša byssus di kgona bjang go thuša kgopa gore e kgone go dula e lekeletše gomme e se gogolwe ke maphoto?

Ela hloko: Ditlhale tša byssus di tiile ka thoko e nngwe mola di le boleta e bile di a ngangega goba go taramologa ka thoko e nngwe. Banyakišiši ba hweditše gore go tia ga ditlhale tša kgopa ka diperesente tše 80 le goba boleta ga tšona ka diperesente tše 20, go bohlokwa kudu bakeng sa go thuša kgopa gore e kgone go itshwareletša ka go tia. Ka baka leo, ditlhale tša byssus di kgona go kgotlelela go gogwa le go kgorometšwa ka matla ke meetse a ka lewatleng.

Moprofesara Guy Genin o re seo se hweditšwego nyakišišong se a “makatša,” gomme o okeditše ka gore: “Mohlolo wa sephedi se o letše tabeng ya go agwa ga sona ka tsela e bohlale ka go kopanywa ga dikarolo tše tiilego le tše boleta.” Boramahlale ba dumela gore tsela yeo ditlhale tša byssus di hlamilwego ka yona e ka thuša dilong tše dintši go swana le go kgomaretša dilo meagong le dikepeng tša ka tlase ga meetse, go kgomaretša mešifa marapong le go tswalela dintho tša diophareišene. Moprofesara J. Herbert Waite wa Yunibesithing ya California kua Santa Barbara, U.S.A., o itše: “Tlholo e tletše ka dilo tšeo di makatšago tšeo re ka ithutago go tšona ge go tliwa tabeng ya ditsela tša go kgomarela ga dilo.”

O nagana eng? Na ditlhale tša byssus tša kgopa ya ka lewatleng di bile gona ka go itiragalela? Goba na di hlamilwe?

Ithute ka mo go oketšegilego