Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  No. 5 2017

Motse wa Astana

 DINAGA LE BATHO

Go Etela Kazakhstan

Go Etela Kazakhstan

BATHO ba bogologolo ba Kazakhstan ba be ba phela ka go ralala. Le mehleng ye, badiši ba bangwe ba Kazakhstan ba fudiša diruiwa tša bona mafelong a sa swanego go ya ka dihla tša ngwaga. Ba fetša selemo ba le mafulong ao a lego dikarolong tša godimo tša naga, moo go sa fišego. Ge marega a go ba le lehlwa a batamela, ba iša diruiwa tša bona dikarolong tša tlase tša naga tšeo di ruthetšego.

Batho ba bangwe ba Kazakhstan ba dula ditoropong tšeo di hlabologilego. Lega go le bjalo, tsela ya go phela ka go ralala ya borakgolokhukhu ba bona e bonagala kudu ditšong tša bona, dijong le dilong tšeo ba di dirago ka matsogo. Batho ba Kazakhstan ba thabela bohwa bjo bo humilego ka direto, dikoša le mmino o bapalwago ka diletšo tša gabo bona.

 Ntlwana ya bona ya bogologolo ya nkgokolo yeo e bitšwago yurt, ya batho ba go phela ka go ralala ke sešupo sa motho yo a phelago ka tsela ya tlhago. Badiši ba sa rata di-yurt, le gona batho ba go dula ditoropong ba di diriša bakeng sa merero e kgethegilego. Gape di-yurt di dirišwa e le madulo a boiketlo bakeng sa baeti ba go boga naga. Bokagare bja yurt e ka ba lefelo leo basadi ba Kazakhstan ba le dirišetšago go bontšha bokgoni bja bona bja go kgabiša mašela, go loga le bja go dira mebete.

Ka gare ga yurt

Malapa a kua Kazakhstan a metse-magaeng a tšeela dipere tša ona godimo. Pere e bitšwa ka maina a ka bago a 21 a Sekazakh, gomme leina le lengwe le le lengwe le na le seo le se bolelago. E bile go na le mantšu a fetago a 30 le dipolelwana tša go hlalosa mmala wa boya bja pere. Pere e sa dutše e ka newa e le mpho e bitšago le yeo e tšeelwago godimo. Metseng ya magaeng, bašemanyana ba ithuta go namela dipere e sa le ba banyenyane.

Dijo tša Sekazakh ka mehla di ba le nama gomme gantši ga di tšhelwe dinoko tše dintši. Batho ba Kazakhstan ba rata seno seo se bitšwago koumiss, seo se dirwago ka maswi a pere le seo go thwego se na le phepo. Seno se sengwe seo ba se ratago ke shubat, yeo e nago le makhura le yeo e lego bodilanyana yeo e dirwago ka maswi a kamela.

Ofisi ya lekala ya Dihlatse tša Jehofa kua Almaty e amogela baeng e bile batho ba dumeletšwe go bona meago ya yona.

Lepogo leo le gakantšhago la lehlweng le fetša nako ya selemo le le godimo ga dithaba tša Kazakhstan