Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! NO. 5 2016

 MADIRENG A LEFASE

Go Lebiša Tlhokomelo e Kgethegilego Amerika

Go Lebiša Tlhokomelo e Kgethegilego Amerika

Ditaba tšeo di tšwago Karolong ya Lefase ya ka Bodikela di bontšha bohlokwa bja bohlale bja Beibele bjo bo sa felelwego ke nako.

GO FOKOTŠA KGATELETŠEGO—NA E KA BA KA GO FOKOTŠA GO BALA DI-EMAIL?

Go ya ka nyakišišo yeo e dirilwego kua Vancouver, Canada, batho ba ka fokotša kgateletšego ge ba ka bala di-email gararo feela ka letšatši go e na le go di bala gantši. Kostadin Kushlev, yo a bego a eteletše pele nyakišišo yeo, ge a bolela ka mafelelo a yona o itše: “Batho ba hwetša go le thata go lwantšha mokgwa wa go bala melaetša ya e-mail, mola go lwantšha mokgwa woo go ka fokotša kgateletšego ya bona.”

SEO GO KA NAGANWAGO KA SONA: Re phela ‘dinakong tše di hlobaetšago tšeo go lego thata go lebeletšana le tšona.’ Ka gona, re swanetše go nyaka ditsela tša go fokotša kgateletšego.2 Timotheo 3:1.

GO ATA GA DIHLAPI TŠEO DI BEGO DI REILWE KA BONTŠI

Pego ya Wildlife Conservation Society (WCS) e re: “Go utolotšwe gore go ata ga dikgopa, matlapakgerere le dihlapi go kaonefetše mafelong ao mmušo o thibetšego batho go tloša dilo le ge e le dife tša tlhago” kua Belize le dihlakahlakeng tše dingwe tša Caribbean. Pego yeo e oketša ka gore: “Go ka tšea bonyenyane ngwaga go ya go mengwaga e tshela gore mehuta ya dihlapi tšeo di reilwego ka bontši e boele e ate mafelong ao mmušo o thibetšego batho go tloša dilo le ge e le dife tša tlhago, eupša gore di boele di ate ka mo go feletšego . . . go ka tšea mengwaga e masomesome.” Janet Gibson, molaodi wa lenaneo la WCS, o boletše ka Belize gore: “Go molaleng gore mafelong ao mmušo o thibetšego batho go tloša dilo le ge e le dife tša tlhago a ka thuša go oketša mehutahuta ya dihlapi le ya diphedi ka kakaretšo nageng yeo.”

SEO GO KA NAGANWAGO KA SONA: Na go fetofetoga ga dilo tša tlhago go bontšha gore go na le Mmopi yo bohlale?Psalme 104:24, 25.

BOŠORO KUA BRAZIL

Tirelo ya ditaba ya Agência Brasil e bega gore bošoro bo a oketšega kua Brazil. Ka 2012, palo ya dipolao e ile ya feta 56 000, e lego palo e fetago dipalo ka moka tšeo di kilego tša begwa ka ngwaga ke ba Lefapha la tša Maphelo. Setsebi sa tšhireletšego ya batho ka kakaretšo, e lego Luís Sapori o dumela ka gore koketšego yeo e bontšha go hlokega ga boitshwaro. O itše ge batho ba se sa hlompha melao ya setšhaba seo se hlabologilego, “ba thoma go itšeela molao matsogong e le gore ba hwetše dilo tšeo ba di nyakago.”

NA O BE O TSEBA? Beibele e boletše ka nako yeo ka yona lerato ‘le tlago go fola’ le go oketšega ga go hloka molao.Mateo 24:3, 12.