Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  No. 4 2017

 NA O HLAMILWE?

Mmala o Motalalerata wa Thokolo

Mmala o Motalalerata wa Thokolo

GO NA le thokolo e nyenyane yeo e hwetšwago dinageng tša Afrika, ya mmala o tseneletšego o motalalerata wo o sa kago wa bonwa seenyweng. Lega go le bjalo, thokolo ye ga e na seela se setalalerata. Bjale mmala wa yona o kgahlišago o tšwa kae?

Ela hloko: Ka gare ga letlakala la thokolo go na le ditlhalenyana goba digarane tše ditshesane tšeo di dutšego bjalo ka mahlokwana a mankgwari. Ditlhalenyana tše di hlatlagana di eya godimo gomme tša feleletša di dirile sebopego sa go tatagana, eupša ga se tša hlatlagana ka go lebana. Ditlhalenyana tšeo ga se tša mmala o motalalerata. Mmala woo o dirwa ke tsela yeo ditlhalenyana tšeo di hlatlaganego ka yona. Ka gona, mmala o tseneletšego, wo o phadimago le wo o fetofetogago wa thokolo o dirwa ke go hlatlagana ga ditlhalenyana tše, e sego seela sa yona. Ge o e lebeletše, e ka bonala e le e talalerata. Eupša ge o e lebelela go tšwa mahlakoreng a sa swanego, e ka bonala e na le mebala e tswakanego. Mmala o motalamorogo o bonala o tswakane le o mopinki goba o moserolwana. Seo se bakwa ke ge ditlhalenyana di dutše di hlatlagana ka ditsela tše di sa lemogegego. Go oketša moo, ge mebala yeo e tsitsinkelwa, ga se mmala o tee eupša e bonala e le mebala e ikemetšego.

Ka ge mmala wa dithokolo tše o sa tšwe seeleng, mmala wa tšona ga o fetoge le ge di wetše fase. Ge e le gabotse, dithokolo tše dingwe tšeo di kgelwego mengwageng e makgolo e fetilego, di sa phadima go swana le tšeo di sa tšwago go kgewa. Banyakišiši ba bangwe ba bolela gore le ge thokolo ye e sa jewe ka ge e no ba le dithapo, fela e goka dinonyana tšeo di e bonago gore di nyake go e ja.

Boramahlale ba dumela gore mmala wa thokolo ye o ka dira gore batho ba nyake go tšweletša ditaye tšeo di sa tšwego ka pela, pampiri ya maitirelo yeo e sa kgeigego ka pela le dilo tše dingwe.

O nagana eng? Na mmala o motalalerata wa thokolo ye o bile gona ka go itiragalela? Goba na o hlamilwe?