Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

Leina le lebotse goba botumo, le dira gore batho ba go tshepe le go go hlompha

“Leina le Lebotse le Phala Mahumo a Mantši Kudu”

“Leina le Lebotse le Phala Mahumo a Mantši Kudu”

LEINA le lebotse goba botumo, le bohlokwa kudu mo e lego gore dinageng tše dingwe le šireletšwa semolao. Se se ka akaretša go itšhireletša ga motho ge a senywa leina (ge go phatlaladitšwe taba ya maaka ka yena goba e gašitšwe ditabeng) le ge a thomeleditšwe (ge go boletšwe maaka ka yena). Se se re gopotša polelwana ya bogologolo yeo e rego: “Leina le lebotse le phala mahumo a mantši kudu; go amogelwa go phala silifera le gauta.” (Diema 22:1) Re ka dira’ng gore re be le leina le lebotse le gore ba bangwe ba re hlomphe? Beibele e ka re nea ditšhišinyo tše dibotse.

Ka mohlala, nagana ka seo Beibele e se bolelago go Psalme 15. Ge mopsalme a be a araba potšišo e rego, “Ke mang a ka bago moeng tenteng ya [Modimo]?” o ile a ngwala gore: “Ke yo a . . . [tlwaetšego] go dira toko e bile a bolela therešo ka pelong ya gagwe. Ga se a thomeletša . . . Ga se a dira wa gabo tše mpe, ga se a goboša mogwera wa gagwe. . . . O gana le ge e le mang yo a hlabišago dihlong . . . Ge e ba a ka ikana ka tše di ka mmakelago mathata, ga a fetoge. . . . Ga se a amogela letsogo-le-kobong.” (Psalme 15:1-5) Na o be o ka se hlomphe motho yo a phelago ka melao e bjalo e mebotse ya Beibele?

Seka se sengwe seo se dirago goremotho a hlomphege ke boikokobetšo. Diema 15:33 e re: “Boikokobetšo bo eta kgodišo pele.” Nagana ka se: Batho bao ba ikokobeditšego ba lemoga moo ba ka kaonefatšago gona gomme ba šoma ka thata go dira bjalo. Gape ba ikemišetša go kgopela tshwarelo ge ba kgopišitše motho yo mongwe. (Jakobo 3:2) Batho bao ba ikgogomošago ga ba bjalo, go e na le moo ba kgopišega feela. Diema 16:18 e re: “Boikgantšho bo eta go wa pele, gomme moya wa boikgogomošo o eta go kgopša pele.”

Lega go le bjalo, go thwe’ng ge e ba motho yo mongwe a go senya leina ka go go thomeletša? Na o swanetše o kitimela go lokiša boemo, mohlomongwe o sa tuka bogale? Ipotšiše gore: ‘Ge e ba ke leka go hlatswa leina la ka, na e tla be e le gona ge ke phatlalatša maaka ao?’ Le ge ka dinako tše dingwe e ka ba mo go swanetšego go iša taba go ba molao, eupša Beibele e nea keletšo ye e bohlale, e rego: “O se ke wa hlaganela go bega molato.” Go e na le moo, e re: “Sekišana [goba, boledišana] le wa geno.” (Diema 25:8, 9) * Go rarolla ditaba ka tsela ye go ka go thuša gore o se lefe ditshenyagalelo tša molao.

Beibele ga e fo ba puku yeo e bolelago ka bodumedi. Ke puku yeo re ka e tshepago bakeng sa go re hlahla bophelong. Bohle bao ba phelago ka bohlale bja yona ba ithuta go ba le dika tšeo di dirago gore ba hlomphege gomme seo se dira gore ba be le leina le lebotse.

^ par. 5 Melao e mengwe ya motheo ya mabapi le go rarolla dikgohlano e hwetšwa go Mateo 5:23, 24; 18:15-17.