Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  No. 4 2016

 TABA YA LETLAKALA LA KA NTLE | KAMOO O KA FETOŠAGO MEKGWA YA GAGO

2. Laola Maemo a Gago

2. Laola Maemo a Gago
  • O ikemišeditše go ja gabotse, eupša o tloga o lekega go ja ice cream.

  • O ipoditše gore o nyaka go tlogela go kgoga, eupša mogwera wa gago, yo a tsebago gore o leka go tlogela go kgoga, o go nea sekerete.

  • O ipoditše gore o ya go itšhidulla lehono, eupša o tšwafa go nyaka diteki tša go kitima!

Na o kgona go bona boemo bjo bo swanago mehlaleng ye? Go lemogilwe gore gantši tikologo yeo re lego go yona, e lego maemo ao re itsenyago ka gare ga ona le batho bao re fetšago nako re na le bona, e re tutuetša go atlega tabeng ya go šomela mekgweng e mebotse le go tlogela e mebe.

MOLAO WA MOTHEO WA BEIBELE: “Yo bohlale ke yo a bonego kotsi a ikuta, eupša ba se nago temogo ba fetile ba wela kotsing.”Diema 22:3.

Beibele e re eletša gore re naganele pele. Ka go dira bjalo, re ka šetša go phema maemo ao a ka dirago gore re palelwe ke go fihlelela dilo tšeo re nyakago go di dira gomme ra ipea maemong a mabotse. (2 Timotheo 2:22) Ka boripana, ke ga bohlale gore re laole maemo.

Dira gore go be thata go dira dilo tšeo di fošagetšego gomme go be bonolo go dira dilo tšeo di nepagetšego

SEO O KA SE DIRAGO

  • Dira gore go be thata go dira dilo tšeo di fošagetšego. Ka mohlala, ge e ba o nyaka go phema dijo tšeo di se nago phepo, leka go dira gore dijo tšeo di se be gona ka khitšhing. Ka tsela yeo, ge o lekega go tla ba bonolo gore o se ke wa ineela.

  • Dira gore go be bonolo go dira dilo tšeo di nepagetšego. Ka mohlala, ge e ba o rulaganya go thoma ka go itšhidulla ge o tsoga, bea diaparo tša go itšhidulla kgauswi le mpete pele o robala. Ge o ka dira gore go be bonolo go thoma, o tla kgona go tšwela pele.

  • Kgetha bagwera ka šedi. Ya šika le e garago, le yona e tla gara. (1 Bakorinthe 15:33) Phema go gwerana le batho bao ba go kgothaletšago mekgwa yeo o lekago go e tlogela, gomme o gwerane le bao ba ka go kgothaletšago mekgwa e mebotse.