Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  No. 4 2016

 TABA YA LETLAKALA LA KA NTLE | KAMOO O KA FETOSAGO MEKGWA YA GAGO

3. Phegelela, o se ke wa Lapa

3. Phegelela, o se ke wa Lapa

Go na le kgopolo e tlwaelegilego ya gore go tšea matšatši a 21 go hlagolela mokgwa o mofsa. Ka gona, maemong a kgonthe dinyakišišo di bontšha gore batho ba bangwe go ka ba tšea nakwana—mola ba bangwe go ka ba tšea nako e ntši—go dira diphetogo tše dikgolo. Na seo se swanetše go go nyamiša?

Ka gona, nagana ka boemo bjo: Akanya o nyaka go hlagolela mokgwa wa go itšhidulla gararo ka beke.

  • Bekeng ya mathomo o kgona go fihlelela seo.

  • Bekeng ya bobedi o kgona go ya gabedi feela.

  • Bekeng ya boraro, o kgona go ya matšatši ka moka.

  • Bekeng ya bone o ya letšatši le letee.

  • Bekeng ya bohlano, o kgona gape go itšhidulla matšatši ka moka gomme go tloga ka nako yeo go ya pele o dula o itšhidulla.

Go tšere dibeke tše hlano gore o tlwaelane le mokgwa wa gago o mofsa. Go ka bonagala eka ke nako e telele, eupša ge o ka kgona go fihlelela seo o nyakago go se dira, o tla thabela gore o hlagoletše mokgwa o mobotse o mofsa.

MOLAO WA MOTHEO WA BEIBELE: “Moloki le ge a ka wa gašupa, o tla tsoga gape.”Diema 24:16.

Beibele e kgothaletša go phegelela. Mafelelong sa bohlokwa ga se gore re wele gakae eupša ke gore re tsogile gakae.

Mafelelong sa bohlokwa ga se gore re wele gakae eupša ke gore re tsogile gakae

SEO O KA SE DIRAGO

  • O se ke wa phetha ka gore ge o ka wela mokgweng woo gape go ra gore ke gona ge o paletšwe. Letela gore o tla fela o wela mokgweng woo ge o dutše o šomela go o tlogela.

  • Tsepamiša kgopolo nakong ya ge dilo di sepetše gabotse. Ka mohlala, ge e ba o leka go kaonefatša tsela yeo o boledišanago le bana gago ka yona, ipotšiše gore: ‘Ke neng la mafelelo moo ke bego ke nyaka go kgadimola bana baka gomme ka kgona go itshwara? Go e na le gore ke ba kgadimole, ke ile ka dira eng? Nka kgona bjang go dira seo gape?’ Dipotšišo tšeo di ka go thuša go kgonthišetša gore o ka kgona go e na le gore o dulele go nagana ka go palelwa ga gago.

Na o ka rata go tseba kamoo melao ya motheo ya Beibele e ka go thušago ka gona dikarolong tše dingwe tša bophelo, tše bjalo ka go lebeletšana le dipelaelo, go aga lapa leo le thabilego le go hwetša lethabo la kgonthe? Boledišana le yo mongwe wa Dihlatse tša Jehofa, goba o ye wepesaeteng ya rena ya, jw.org/nso.

Ithute ka mo go oketšegilego

DITABA TŠE DIBOTSE TŠE DI TŠWAGO GO MODIMO!

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.