Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  No. 4 2016

Dintlo tšeo e kego ke ditente tšeo di bitšwago Di-yurts Moeding wa Tash Rabat

 DINAGA LE BATHO

Go Etela Kyrgyzstan

Go Etela Kyrgyzstan

KA GE Kyrgyzstan e dikologilwe ke dithaba tše ditelele tšeo di apešitšwego ke lehlwa dihloreng tša tšona, naga ye e kua Asia Bogareng gomme e dikologilwe ke Kazakhstan, Uzbekistan, Tajikistan le China. Mo e ka bago diperesente tše 90 tša naga yeo go tletše dithaba. Kyrgyzstan e ikgantšha ka go ba le molokeloke wa Dithaba tše ditelele kudu tša Tian Shan, tša bophagamo bja dimithara tše 7 439. Mo e ka bago diperesente tše nne tša naga yeo go tletše dithokgwa. Ka baka leo go a kgahliša go tseba gore se sengwe sa dithokgwa tše dikgolo lefaseng tšeo di imeletšego tša ditokomane tšeo di bitšwago di-walnut se hwetšwa kua Kyrgyzstan.

Dihlatse tša Jehofa di ruta batho ba dikete ba Kyrgyzstan Beibele

Batho ba Kyrgyzstan ba tsebja kudu ka go amogela baeng le go hlompha. Kua Kyrgyzstan go tlwaelegile go bitša motho yo mogolo ka tsela ya tlhompho le go mo šuthelela setulong dinamelweng tša batho bohle gotee le go mo mmea maemong ao a hlomphegago kudu tafoleng.

 Ka tlwaelo malapa a moo a ba le bana ba bararo goba go feta moo. Gantši Morwa yo monyenyane o šala ka gae le batswadi, gaešita le ka morago ga ge a nyetše gomme a ba hlokomela ge ba tšofetše.

Banenyana ba rutwa e sa le ba banyenyane dilo tšeo di nyakegago gore e tle e be basadisadi malapeng a bona. Ge ba le mahlalagading ba ba ba šetše ba kgona go hlokomela lapa. Gantši monyadiwa o fiwa mpho ya lenyalo. Yona e ka akaretša dilo tša mehutahuta tša go ala mpete, diaparo tša mehutahuta le mmete wo o logilwego ka diatla. Monyadi o lefa magadi ka tšhelete le ka diruiwa.

Nakong ya menyanya le mahu, go hlabja nku goba pere. E segwa go ya ka ditho gomme setho se sengwe le se sengwe se na le motho yo a se fiwago. Go ithekgile ka mengwaga ya baeng le maemo a bona, yo mongwe le yo mongwe wa bona o newa setho seo se mo lebanego; moetlo wo le wona o sepedišwa ka tlhompho. Ke moka batho ba solelwa dijo tšeo di ratwago ke batho ba moo tšeo di bitšwago beshbarmak. Di jewa ka diatla.

Komuz ke seletšo sa mmino seo se ratwago