Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! NO. 4 2016

 Pono ya Beibele || Bobotse Bja ka Ntle

Bobotse bja ka Ntle

Bobotse bja ka Ntle

Tsela yeo motho a lebelelago bobotse ka yona e ka dira gore a thabe goba a nyame.

Ke ka baka la eng re rata bobotse?

Bjoko bja motho bo lemoga bobotse ka ditsela tšeo di sa dutšego di sa kwešišege. Beibele ga e hlalose gore se se direga bjang, eupša e utolla lebaka leo ka lona re ratago dilo tše dibotse—Modimo o re file dika tša gagwe. (Genesi 1:27; Mmoledi 3:11) Gape o bopile mmele o raraganego kudu wa motho, a o bopa ka tsela e makatšago le go o dira gore o šome ka tsela e makatšago. Tabeng yeo, mongwadi wa kgale wa dikoša o itše: “Ke tla go reta ka gobane ke dirilwe ka tsela e makatšago yeo e mpoifišago.”Psalme 139:14.

Lega go le bjalo, lehono batho ba lebelela bobotse bja ka ntle ka tsela e se nago tekatekano, e lego tshekamelo yeo e kgothaletšwago ke kgwebo ya tša fešene le mekero e tumilego ya ditaba. Go ya ka puku ya Body Image, dinyakišišo tše dintši tšeo di dirilwego ditšong tša ka Bodikela “di šišinya gore kagego ya mmele ke selo se nnoši seo se thabišago motho.” Lega go le bjalo, pono e bjalo yeo e fokolago e ka bolela go hlokomologa selo se sengwe sa bohlokwa kudu, e lego pelo ya motho.1 Samuele 16:7.

Ditlogo tše dintši di gatelela ka tsela e fošagetšego ponagalo ya mmele le go gogela ga motho ka tša thobalano

Taba yeo e sepedišanago le go šetša bobotse bja ka ntle, ke kgopolo yeo e golago ya go šetša tsela yeo motho a gogelago ka yona go tša thobalano, kudukudu go basadi. Pego ya 2007 ya American Psychological Association (APA) e re: “Mekerong ka moka yeo go dirilwego dinyakišišo go yona, go na le bohlatse bjo bo lekanego bja gore basadi ba bontšhwa go ya ka tsela yeo ba gogelago ka yona ka tša thobalano.” Beibele e na le lebaka le lebotse la go re kgothaletša ka go tia gore re pheme go huetšwa ke tshekamelo e bjalo!Bakolose 3:5, 6.

“Go ikgabiša ga lena e se be ga ka ntle . . . , eupša e be ga motho wa sephiring wa pelo wa seaparo se se sa senyegego sa moya wo o homotšego le o boleta, wo e lego wa bohlokwa bjo bogolo mahlong a Modimo.”1 Petro 3:3, 4.

Ke ka baka la eng go le bohlokwa go ba le pono e lekalekanego?

Ba bangwe ge ba bolela ka bobotse bja ka ntle ba re: “Ge e ba o le botse, kgantšha mmele wa gago!” Pego ya APA e re ditlogong tšeo kgopolo yeo e tlwaelegilego, bafsa bao ba lego mahlalagading le bao ba sa hlwago ba tsena mahlalagading ba ithuta go itebelela e le “bao ba kganyogwago ke ba bangwe . . . gore ba ba lebelele le go lekola ponagalo ya bona.” Pono yeo e ka ba e gobatšago kudu. Ge e le ga botse, go ya ka pego ya APA, selo  se segolo seo ba tša leago le ba tša maphelo ba tshwenyegilego ka sona ke gore yona kgopolo yeo e ka dira gore go be le “ditlamorago tše dintši tša maikwelo tšeo di sa kgahlišego.” Tšona di ka akaretša dipelaelo le “go itšhišingwa . . . , go se je gabotse, go inyatša le kgateletšego ya monagano goba go ikwa o gateletšegile.”

“Tloša bohloko pelong ya gago, o efoše nama ya gago bošula; ka gobane bofsa le bosogana ke lefeela.Mmoledi 11:10.

Ke pono ya mohuta mang yeo e bontšhago go hlaphogelwa monaganong?

Beibele e tswalanya “go hlaphogelwa ga monagano,” goba go ba le tlhaologanyo, le go se solege. (1 Timotheo 2:9) Ela hloko se: Batho bao ba ikokobeditšego ga se gore ga ba na kwešišo goba ga ba na mohola, goba ga se gore ga ba tshwenyege ka ponagalo ya bona, eupša ba itebelela ka tsela e swanetšego le yeo e nago le tekatekano. Gape ba naganela maikwelo a ba bangwe gomme ka go re’alo ba bangwe ba ba tšeela godimo le go ba hlompha, e bile ka godimo ga tšohle ba amogelwa ke Modimo. (Mika 6:8) Go feta moo, ba ka kgona go ba le bagwera ba kgonthe le go gogela batho bao e ka bago balekane ba bona ba lenyalo bao ba sa kgahlwego feela ke tswalano ya kgauswiuswi ya monna le mosadi eupša ba kgahlwa gape ke lenyalo leo le swarelelago le leo le thabišago.

Ka gona, go na le mabaka a mantši ao ka ona Beibele e re kgothaletšago gore re šetše motho wa ka gare, e lego “motho wa sephiring wa pelo.” (1 Petro 3:3, 4) Ruri bobotse bja ka gare ga bo tšofale. Ge e le gabotse, bo ka kaonefala ge nako e dutše e eya! Diema 16:31 e re: “Hlogo e putswa ke mphapahlogo wa botse ge e hwetšwa tseleng ya go loka.” Ka baka leo, go sa šetšwe gore ke ba banyenyane goba ke ba bagolo, batho bao ba latelago keletšo yeo e phagamego ya Beibele ba ka se hwetše feela botse bjo bo swarelelago eupša ba tla hwetša le seriti le kgotsofalo.

“Go bogega go a fora gomme botse ke lefeela; eupša mosadi yo a boifago Jehofa o ikhweletša theto.”Diema 31:30.

Ithute ka mo go oketšegilego

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.