Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  No. 4 2016

Beibele e Re’ng ka go Ratana ga Batho ba Bong bjo bo Swanago?

Beibele e Re’ng ka go Ratana ga Batho ba Bong bjo bo Swanago?

DINAGENG tše dintši go sa ngangišanwa ka manyalo a batho ba bong bjo bo swanago. Lega go le bjalo, ka 2015 Kgoro e Phagamego ya United States e tsebišitše gore manyalo a batho ba bong bjo bo swanago a dumeletšwe ka semolao nageng yeo ka moka. Ka morago ga tsebišo yeo, ba bantši ba ile ba kgeregela Inthaneteng gore ba dire dinyakišišo ka taba yeo. E nngwe ya dipotšišo tšeo di bego di botšišwa kudu ke e rego: “Beibele e re’ng ka manyalo a batho ba bong bjo bo swanago?”

Beibele ga e bolele ka go lebanya ka ditokelo tša semolao mabapi le manyalo a batho ba bong bjo bo swanago. Potšišo e bohlokwa kudu ke e rego, Beibele e re’ng ka go ratana ga batho ba bong bjo bo swanago?

Le ge ba batho ba bantši ba sa hlahlobe Beibele ka kelohloko, ba nagana gore ba tseba karabo, eupša dikarabo tša bona di a ganetšana! Ba bangwe ba bolela gore Beibele ga e dumelelane le taba ya go ratana ga batho ba bong bjo bo swanago. Ba bangwe ba re taelo ya Beibele ya gore “o rate wa geno” e thekga motho le ge e le ofe gotee le boitshwaro bjo bongwe le bjo bongwe bja tša thobalano.Baroma 13:9.

BEIBELE E RE’NG?

Ke taba efe go tše tše tharo, yeo o naganago gore ke therešo?

  1. Beibele e ganetša ditiro tša go ratana ga batho ba bong bjo bo swanago.

  2. Beibele e dumelela ditiro tša go ratana ga batho ba bong bjo bo swanago.

  3. Beibele e kgothaletša go hloya batho bao ba ratanago e le ba bong bjo bo swanago.

DIKARABO:

  1. THEREŠO. Beibele e re: “Banna ba ba robalago le banna . . . ba ka se je bohwa bja mmušo wa Modimo.” (1 Bakorinthe 6:9, 10) Se se šoma le go basadi.Baroma 1:26.

  2. MAAKA. Beibele e ruta gore thobalano e swanetše go dirwa feela ke motho yo motona le yo motshadi bao ba nyalanego.Genesi 1:27, 28; Diema 5:18, 19.

  3. MAAKA. Le ge Beibele e ganetša ditiro tša go ratana ga batho ba bong bjo bo swanago, ga e kgothaletše kgethollo, ditiro tša bosenyi tša lehloyo goba go tlaišwa ka tsela le ge e le efe ga batho bao ba ratanago ba bong bjo bo swanago.Baroma 12:18. [1]

 Dihlatse tša Jehofa di Dumela Eng?

Dihlatse tša Jehofa di dumela gore seo Beibele e se rutago ka boitshwaro ke tsela e kaone ya go phela; le gona di kgetha go phela ka yona tsela yeo. (Jesaya 48:17) [2] Se se bolela gore Dihlatse tša Jehofa di gana boitshwaro le ge le bofe bjo bo hlephilego bja tša thobalano, go akaretša le go ratana ga batho ba bong bjo bo swanago. (1 Bakorinthe 6:18) [3] Ye ke tsela ya bophelo yeo Dihlatse di e kgethilego gomme di na le tokelo ya go e kgetha.

Dihlatse tša Jehofa di phegelela go latela Molao wa Gauta ka go swara ba bangwe ka tsela yeo di ka ratago go swarwa ka yona

Ka nako e swanago, Dihlatse tša Jehofa di phegelela “khutšo le batho bohle.” (Baheberu 12:14) Le ge Dihlatse tša Jehofa di gana ditiro tša go ratana ga batho ba bong bjo bo swanago, ga di gapeletše ba bangwe gore ba lebelele dilo bjalo ka tšona; gape ga di tšee karolo ditirong tša bosenyi tša go hloya batho bao ba ratanago e le ba bong bjo bo swanago. E bile Dihlatse ga di thabe ge di ekwa ka ditiro tše bjalo. Dihlatse tša Jehofa di phegelela go latela Molao wa Gauta ka go swara ba bangwe ka tsela yeo di ka ratago go swarwa ka yona.Mateo 7:12.

Na Beibele e Kgothaletša Kgethollo?

Batho ba bangwe ba sa dutše ba re Beibele e kgothaletša kgethollo kgahlanong le batho bao ba ratanago e le ba bong bjo bo swanago, e bile ba re bao ba phelago ka melao ya Beibele ba a kgetholla. Ba re: ‘Beibele e ngwadilwe nakong ya ge batho ba be ba se ba hlwa ba bulega megopolo. Lehono re amogela batho ba merafo ka moka, ditšhaba ka moka, le mekgwa ka moka ya boitshwaro ditabeng tša thobalano.’ Batho bao ba tšea go gana go ratana ga batho ba bong bjo bo swanago go swana le go kgetholla batho ba mmala o mongwe. Na papišo yeo ke ya maleba? Aowa. Ka baka la eng?

Ka gobane go na le phapano magareng ga go gana boitshwaro bja go ratana ga batho ba bong bjo bo swanago le go gana batho ba go ratana e le ba bong bjo bo swanago. Beibele e botša Bakriste gore ba hlomphe batho ba mehuta ka moka. (1 Petro 2:17) [4] Eupša seo ga se bolele gore Bakriste ba swanetše go amogela mehuta ka moka ya boitshwaro.

Ela hloko papišo ye: A re re mohlomongwe o lebelela go kgoga go le kotsi e bile go sa amogelege. Go thwe’ng ge e ba mošomigotee le wena a kgoga? Na o ka lebelelwa o le motho yo a sa sepelego le mabaka ka ge pono ya gago le ya gagwe di sa swane tabeng ya go kgoga? Na taba ya gore yena o a kgoga gomme wena ga o kgoge e bolela gore o a mo kgetholla? Ge mošomigotee le wena a be a ka re o fetoše pono ya gago ka go kgoga, na seo se be se ka se mo dire gore e be motho wa go se be le pono e bulegilego le yo a kgethollago?

Dihlatse tša Jehofa di kgetha go phela ka melao ya Beibele ya boitshwaro. Di gana ditiro tšeo Beibele e di ganago. Eupša ga di kwere e bile ga di tlaiše batho bao mekgwa ya bona ya go phela e fapanego le ya tšona.

Na Pono ya Beibele ke e Sehlogo?

Go thwe’ng ka batho bao ba nago le dikganyogo tša go ratana e le ba bong bjo bo swanago? Na ba belegwe ba le bjalo? Ge e ba go le bjalo, na e be e ka se be ga sehlogo go bolela gore ba fošitše ge ba latela dikganyogo tša bona?

Beibele ga e bolele gore go ratana ga batho ba bong bjo bo swanago ke selo sa tlhago, eupša e a dumela gore mekgwa e itšego bathong ba bangwe e tsemile medu. Lega go le bjalo, Beibele e bolela gore ge e ba re nyaka go kgahliša Modimo, re swanetše go lahla mekgwa e mengwe, go akaretša le ditiro tša go ratana ga batho ba bong bjo bo swanago.2 Bakorinthe 10:4, 5.

Ba bangwe ba ka bolela gore pono ya Beibele e sehlogo. Eupša ba bolela seo go ya ka kgopolo ya gore re swanetše go kgotsofatša dikganyogo tša rena goba ya gore ge e le dikganyogo tša thobalano tšona di bohlokwa kudu mo e lego gore ga se tša swanela go laolwa, e bile di ka se laolege. Lega go le bjalo, Beibele e nea batho seriti ka go bolela gore ba ka kgona go laola dikganyogo tša bona. Ka go se swane le diphoofolo, ba ka kgona go kgetha gore ba se kgotsofatše dikganyogo tša bona.Bakolose 3:5. [5]

Ela hloko papišo ye: Ditsebi tše dingwe di bolela gore mekgwa e mengwe ya boitshwaro, e bjalo ka go galefa, e ka ba e le ya tlhago. Beibele ga e bolele ka go lebanya gore go galefa ke ga tlhago, eupša e dumela gore batho ba bangwe ba ‘ba bogale’ e bile ‘ba a befelwa.’ (Diema 22: 24; 29:22) Lega go le bjalo, Beibele e bolela gape gore: “Lesa go galefa gomme o tlogele go befelwa.”Psalme 37:8; Baefeso 4:31.

Ke batho ba sego kae bao ba ka se dumelelanego le keletšo yeo goba ba bolela gore ke e sehlogo go bao ba nago le mokgwa wa go befelwa. Ge e le gabotse, le tšona ditsebi tšeo di dumelago gore go befelwa ke karolo ya leabela, di šoma ka thata go thuša batho bao gore ba kgone go laola mekgwa e bjalo.

Dihlatse tša Jehofa di na le pono e swanago ge go tliwa tabeng ya boitshwaro le ge e le bofe bjo bo thulanago le melao ya Beibele, go akaretša thobalano magareng ga monna le mosadi bao ba sa nyalanago. Ditabeng tše ka moka, keletšo ya Beibele ke yeo e šomago ge e re: “Yo mongwe le yo mongwe wa lena a tsebe go laola mmele wa gagwe ka kgethego le kgodišo, e sego ka kganyogo ya megabaru ya go robala ga monna le mosadi.”1 Bathesalonika 4:4, 5.

“Seo ke se ba Bangwe ba Lena le Bego le le Sona”

Lekgolong la pele la mengwaga, bao ba bego ba nyaka go ba Bakriste ba be ba etšwa ditlogong tše di sa swanego le mekgweng e sa swanego gomme ba bangwe ba bona ba ile ba dira diphetogo tše dikgolo maphelong a bona. Ka mohlala, Beibele e bolela ka “diotswa goba barapedi ba medimo ya diswantšho goba dihlotlolo goba banna ba ba boloketšwego merero yeo e sego ya tlhago,” gomme e oketša ka gore: “Seo ke se ba bangwe ba lena le bego le le sona.”1 Bakorinthe 6:9-11.

Ge Beibele e bolela gore “seo ke se ba bangwe ba lena le bego le le sona,” na e bolela gore bao ba kgaoditšego ditiro tša go ratana e le ba bong bjo bo swanago ga ba sa ba le kganyogo ya go ratana le batho ba bong bjo bo swanago le bja bona? Ga go bjalo le gatee, ka gore Beibele e eletša gape ka gore: “Tšwelang pele le sepela ka moya gomme le ka se ke la phetha kganyogo ya nama.”—Bagalatia 5:16.

Hlokomela gore Beibele ga e bolele gore Mokriste a ka se tsoge a bile le kganyogo e mpe. Go e na le moo, e re o tla kgetha go se kgotsofatše kganyogo yeo. Bakriste ba ithuta go laola dikganyogo tše bjalo gomme ga ba dulele go nagana ka tšona go fihlela ba di kgotsofatša.Jakobo 1:14, 15. [6]

Beibele e bontšha phapano magareng ga kganyogo le go dira. (Baroma 7:16-25) Motho yo a nago le kganyogo ya go ratana le batho ba bong bjo bo swanago le bja gagwe a ka kgona go laola dilo tšeo a naganago ka tšona, go swana le ge a ka kgona go laola kganyogo le ge e le efe e fošagetšego, go akaretša tshekamelo ya go galefa, go hlotlola le go ba le megabaru.1 Bakorinthe 9:27; 2 Petro 2:14, 15.

Le ge Dihlatse tša Jehofa di tšeela godimo melao yeo e lego ka Beibeleng, ga di gapeletše batho ba bangwe go ba le pono e swanago le ya tšona ka dilo. Gape Dihlatse ga di leke go fetoša melao yeo e šireletšago ditokelo tša batho bao tsela ya bona ya bophelo e fapanego le ya tšona. Molaetša woo Dihlatse tša Jehofa di o swerego ke molaetša o mobotse, gape di thabela go o botša bohle bao ba o theetšago.Ditiro 20:20.

^ 1. Baroma 12:18: “Ebang le khutšo le batho bohle.”

^ 2. Jesaya 48:17: “Nna, Jehofa, ke Modimo wa lena, Yo a le rutago gore le holege.”

^ 3. 1 Bakorinthe 6:18: “Tšhabang bootswa!”

^ 4. 1 Petro 2:17: “Godišang batho ba mehuta ka moka.”

^ 5. Bakolose 3:5: “Ka gona bolayang mekgwa ya lefase yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi.”

^ 6. Jakobo 1:14, 15: “Yo mongwe le yo mongwe o lekwa ka go gogwa le go goketšwa ke kganyogo ya gagwe. Ke moka kganyogo ge e gotše e tswala sebe.”

Ithute ka mo go oketšegilego

DIPOTŠIŠO TŠA BEIBELE DI A ARABJA

Na go na le Seo Beibele e se Bolelago ka go Nyalana ga Batho ba Bong bjo bo Swanago?

Mothomi wa lenyalo o tloga a tseba seo se nyakegago gore lenyalo le tie le go thabiša.