Gantši go ngwalwa ka barongwa e bile ba bontšhwa diswantšhong le dimubing. Eupša barongwa ke bomang, le gona ba dira eng?

Barongwa ke bomang?

SEO BEIBELE E SE BOLELAGO

 

Pele Modimo a ka bopa dilo ka moka le batho ba mathomo, o be a šetše a bopile dibopiwa tše bohlale kudu tšeo di phagametšego batho. E bile dibopiwa tšeo di feta batho ka maatla. Dibopiwa tšeo di dula lefelong letee le Modimo, e lego lefelo leo batho ba sa kgonego go le bona goba go fihla go lona. (Jobo 38:4, 7) Beibele e bitša dibopiwa tšeo tše di phagamego gore ke “meoya” le gore ke “barongwa.”—Psalme 104:4, Phetolelo ya Kgale. *

Go na le barongwa ba bakae? Ke ba bantši kudu. Barongwa bao ba dikologilego sedulo sa bogoši sa Modimo palo ya bona ke “dimiriate tša dimiriate” goba “dikete tše lesome ge di balwa ga dikete tše masome.” (Kutollo 5:11; mongwalo wa tlase) Ge e ba seo se bolelwago se tšewa ka tsela ya kgonthe, gona barongwa ke ba dimilione tše makgolo.

“Ka bona go dikologa sedulo sa bogoši go na le barongwa ba bantši . . , palo ya bona e le dimiriate tša dimiriate le dikete tša dikete.”—Kutollo 5:11.

Barongwa ba be ba dira eng mehleng ya kgale?

SEO BEIBELE E SE BOLELAGO

 

Barongwa ba be ba šoma e le baboleledi ba Modimo goba a ba roma go iša melaetša bathong. * Gape Beibele e bolela gore ba be ba dira mehlolo yeo e tšwago go Modimo. Ka mohlala, Modimo o ile a roma morongwa gore a šegofatše Aborahama le gore a mo thibele gore a se dire sehlabelo ka morwa wa gagwe e lego Isaka. (Genesi 22:11-18) Morongwa o ile a iponagatša go Moshe kgabong ya mollo gare ga sehlare sa meetlwa gore a mo nee molaetša o bohlokwa. (Ekisodo 3:1, 2) Nakong ya ge moporofeta Daniele a be a lahlelwa ka moleteng wa ditau, ‘Modimo o ile a romela morongwa wa gagwe gore a tswalele melomo ya ditau.’—Daniele 6:22.

“Ke moka morongwa wa Jehofa a iponagatša go [Moshe] a le kgabong ya mollo gare ga sehlare sa meetlwa.”—Ekisodo 3:2.

 Barongwa ba dira eng gona bjale?

SEO BEIBELE E SE BOLELAGO

 

Re ka se tsebe dilo ka moka tšeo barongwa ba di dirago lehono. Eupša Beibele e re ba swaregile ka go thuša batho ba dipelo tše di botegago gore ba tsebe Modimo.—Ditiro 8:26-35; 10:1-22; Kutollo 14:6, 7.

Jehofa o ile a bontšha mopatriareka Jakobo toro yeo go yona a ilego a bona barongwa ba rotoga e bile ba theoga ka “manamelo” ao a tsemilwego mo lefaseng gomme ntlha ya ona e fihla legodimong. (Genesi 28:10-12) Seo Jakobo mohlomongwe a ka bago a ile a se nagana ka morago ga go bona toro yeo, ke seo le rena re ka se naganago. Ke gore Jehofa Modimo o sa dutše a roma barongwa lefaseng e le gore ba thuše batho bao ba botegago bao ba nyakago thušo.—Genesi 24:40; Ekisodo 14:19; Psalme 34:7.

“A bona manamelo a tsemilwe mo lefaseng gomme ntlha ya ona e fihla magodimong; a bona barongwa ba Modimo ba rotoga e bile ba theoga ka ona.”—Genesi 28:12.

^ par. 6 Beibele e bolela gore dibopiwa tše dingwe tša moya di ile tša se kwe Modimo, gomme e bitša barongwa bao ba babe gore ke “batemona.”—Luka 10:17-20.

^ par. 11 Ge e le gabotse, lentšu la Seheberu le la Segerika ao a dirišitšwego ka Beibeleng bakeng sa “morongwa” ka bobedi a bolela gore “moromiwa.”