KA GE go na le maleme a mantši kudu mo lefaseng, ao e ka bago a 7 000 ga bjale, seo se ka thatafiša ditaba tša go tšea maeto, tša kgwebo, tša thuto le tša pušo. Go be go dutše go le bjalo go tloga mehleng ya bogologolo. Ka mohlala, mo e ka bago mengwaga e 2 500 e fetilego, nakong ya ge go buša Kgoši Ahasiwerosi (mohlomongwe Xerxes I), Baperesia ba ile ba romela ditaelo tša semmušo tikologong ka moka, “go tloga ka India go fihla ka Ethiopia, e lego dilete tše lekgolo-masomepedi-šupa (127). Selete se sengwe le se sengwe sa ngwalelwa ka mokgwa wa sona wa go ngwala gomme setšhaba se sengwe le se sengwe sa ngwalelwa ka leleme la gabo sona.” *

Lehono, mekgatlo e mentši—gaešita le mebušo—e ka se leke go dira modiro woo o thata. Lega go le bjalo, go na le mokgatlo o tee woo o dirilego seo ka katlego. Dihlatse tša Jehofa di gatiša dimakasine, mananeo a go theetšwa, dibidio le dipuku tše dintši—go akaretša le Beibele—ka maleme a fetago a 750 ge a kopantšwe. Se se akaretša le dipolelo tša diatla tšeo e ka bago tše 80. Dihlatse gape di gatiša mehuta e fapafapanego ya dingwalwa tša Braille bakeng sa bao ba foufetšego.

Go oketša moo, Dihlatse tša Jehofa ga di boelwe ka tša ditšhelete ka maiteko ao di a dirago. Ge e le gabotse, bafetoledi ba tšona le bašomi ba bangwe ka moka ke baithaopi. Ke ka baka la’ng di dira maiteko a makaaka a go fetolela ka maleme a mantši kudu, le gona di dira seo bjang?

^ par. 3 Bona Esitere 8:9 ka Beibeleng.