Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! NO. 1 2017

Mosadi yo bohlale o hlompha letswalo la gagwe

 PONO YA BEIBELE

Go Ntšha Mpa

Go Ntšha Mpa

Bana ba dimilione tše masome bao ba sa hlwago ba belegwa ba bolawa ka boomo ngwaga le ngwaga, e lego palo yeo e fetago ya badudi ba dinaga tše dintši.

Na ke kgetho ya motho goba ke taba ya boitshwaro?

SEO BATHO BA SE BOLELAGO

Basadi bao ba ntšhago dimpa ba dira bjalo ka mabaka a fapafapanego, ao a akaretšago mathata a tša ikonomi, mathata a ditswalano, go nyaka go tšwetša pele dithuto tša bona goba mošomo, goba go se nyake ga motho go godiša ngwana a nnoši. Lega go le bjalo, ba bangwe ba lebelela go ntšha mpa e le boitshwaro bjo bo fošagetšego—e le go senya boikarabelo bjoo bo filwego mosadi wa moimana.

SEO BEIBELE E SE BOLELAGO

Modimo o lebelela bophelo e le bjo bokgethwa, kudukudu bophelo bja motho. (Genesi 9:6; Psalme 36:9) Molao wo wa motheo o šoma le ngwaneng yo a golago ka popelong, e lego lefelo leo Modimo a le dirilego gore le šireletše ngwana yo a sa dutšego a bopega. Mongwadi wa Beibele o itše: “O dirile gore ke dule ke širetše ka mpeng ya mma.” O okeditše ka gore: “Mahlo a gago a mpone ke sa thoma go bopega, gomme ka pukung ya gago go be go ngwadilwe ka ga matšatši ao ditho tša ka ka moka di bopilwego ka ona.”Psalme 139:13, 16.

Tsela yeo Modimo a lebelelago bophelo bja ngwana yo a sa hlwago a belegwa e bonagatšwa gape le Molaong wa gagwe, wo a o neilego Baisiraele gotee le letswalong la rena leo re le filwego ke yena Modimo. Molao wa Modimo o be o bolela gore motho yo a bego a ka hlasela mosadi wa moimana gomme a bolaya ngwana wa gagwe yo a sa hlwago a belegwa, o be a ahlolelwa lehu—mmolai o be a lefa ka bophelo bja gagwe bakeng sa bophelo bjo a bo fedišitšego. (Ekisodo 21:22, 23) Ke therešo gore baahlodi ba be ba swanetše go naganela maikemišetšo a motho yoo le maemo a gagwe.Numeri 35:22-24, 31.

Gape batho ba belegwa ba na le letswalo. Ge motho a theetša letswalo la gagwe, ka go hlompha bophelo bja ngwana wa gagwe yo a sa hlwago a belegwa, seo se dira gore a thabe. * Ge e ba a sa theetše letswalo la gagwe, le ka mo tshwenya goba la mo latofatša. (Baroma 2:14, 15) Ruri nyakišišo e bontšha gore basadi bao ba ntšhago dimpa ba ba kotsing e kgolo ya go tshwenywa ke dipelaelo le kgateletšego ya monagano.

Ka gona, go thwe’ng ge e ba go bonagala motho a tšhogile go godiša ngwana, kudukudu ge e ba a be a sa rera go ima? Ela hloko kholofetšo e homotšago ya Modimo go bao ba phelago ka melao ya gagwe, e rego: “Yo a botegago o tla dirišana le yena ka potego; monnatia [goba mosadi] yo a hlokago bosodi o tla dirišana le yena ka go hloka bosodi.” (Psalme 18:25) Gape re bala gore: “Gobane Jehofa o rata toka, e bile a ka se tlogele bao ba mmotegelago.”Psalme 37:28.

“Ge letswalo la bona le dutše le hlatselana le bona gomme menagano ya bona e ba latofatša goba gaešita le go ba lokafatša.”Baroma 2:15.

 Go thwe’ng ge e ba o kile wa ntšha mpa?

SEO BATHO BA SE BOLELAGO

Ruth yo e lego mma yo a se nago molekane, o itše: “Ke be ke šetše ke na le bana ba bararo ba banyenyane gomme ke bona gore nka se kgone go hlokomela ba bane. Lega go le bjalo, ka morago ga gore ke ntšhe mpa, ke ile ka ikwa ke dirile selo se sebe kudu.” * Eupša na Ruth o be a dirile selo seo Modimo a bego a ka se mo lebalele sona?

SEO BEIBELE E SE BOLELAGO

Jesu Kriste o bonagaditše seo Modimo a se naganago ge a be a re: “Ke tletše go biletša badiradibe boitsholong, e sego go bitša baloki.” (Luka 5:32) Ee, ge re itshola e le ka kgonthe bakeng sa phošo yeo re e dirilego, e bile re kgopela Modimo gore a re lebalele, o dira bjalo ka go rata, gaešita le go re lebalela dibe tše dikgolo. (Jesaya 1:18) Psalme 51:17 e re: “Pelo e robegilego le e setlegilego o ka se e nyatše, wena Modimo.”

Modimo o nea motho yo a itsholago letswalo le le hlwekilego gotee le khutšo ya monagano ge a mo rapela ka boikokobetšo. Bafilipi 4:6, 7 e re: “Dilong tšohle tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano.” * Ka morago ga gore Ruth a ithute Beibele le go tšhollela Modimo pelo ya gagwe, o ile a ba le khutšo yeo ya monagano. O ile a ithuta gore Modimo “o lebalela e le ka kgonthe.”—Psalme 130:4.

[Modimo] ga se a re swara gaešita le go ya ka tšeo di lebanego dibe tša rena; le gona ga se a re tlišetša tšeo di swanelago melato ya rena.”Psalme 103:10.

^ par. 8 Go ba kotsing ga bophelo bja mma goba bja ngwana go ka se lokafatše go ntšhwa ga mpa. Ge e ba nakong ya ge ngwana a tlo belegwa batswadi ba ka swanelwa ke go kgetha magareng ga bophelo bja mma le bja ngwana, gona ba swanetše go dira phetho. Dinageng tše dintši tšeo di hlabologilego, go kaonefatšwa ga tša kalafo go dirile gore boemo bjoo bo be gona ka sewelo.

^ par. 12 Leina le fetotšwe.

^ par. 14 Kholofelo ya tsogo ya bahu le yona e ka tlaleletša khutšong ya motho ya monagano. Bona sehlogo sa “Dipotšišo tše Tšwago go Babadi” ka go Morokami wa April 15, 2009, seo se ahlaahlago melao ya motheo ya Beibele yeo e sepedišanago le kgonagalo ya go ka tsošwa ga ngwana yo a sa hlwago a belegwa yo a hlokofetšego.