Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  No. 1 2016

 PONO YA BEIBELE

Legodimo

Legodimo

Thuto ya legodimo ke yeo e tsošitšego ditaba tša go hloka ntlha le thito le dingangišano tše dikgolo. Lega go le bjalo, seo Beibele e se rutago ka legodimo se fapane kudu le seo batho ba bantši ba se rutilwego.

Legodimo ke eng?

SEO BATHO BA BANGWE BA SE BOLELAGO

Go na le ditumelo tše di fapafapanego ka legodimo le morero wa lona. Ka mohlala:

  • Batho ba bantši bao ba ipolelago gore ke Bakriste ba ka dumelelana le New Catholic Encyclopedia yeo e bitšago legodimo gore ke “bodulo bja mafelelo bja bašegofatšwa bao ba hwelago Moreneng.”

  • Rabi Bentzion Kravitz o bolela gore bodumedi bja Sejuda bo ruta kudu ka bophelo bja gona bjale go feta go ruta ka bophelo bja ka morago ga lehu. Eupša o šišinya gore “legodimong, moya (soul) o ipshina kudu, e lego seo se bolelago gore o ba le temogo e kgolo le go ikwa o le kgauswi kudu le Modimo go fapana le nakong e fetilego.” Lega go le bjalo, Kravitz o dumela gore “le ge bodumedi bja Sejuda bo dumela tabeng ya legodimo, Torah ga e bolele kudu ka lona.”

  • Mahindu le Mabuddha a dumela gore legodimo ke dikarolo tša moya tšeo di fapafapanego. Ke lefelo leo motho a dulago go lona ka lebakanyana moo ka morago a tlago go tswalwa lefsa lefaseng goba a fetelago Nirvana goba Buddhahood, e lego dikarolo tšeo di phagametšego legodimo.

  • Ba bangwe ba ganetša kgopolo le ge ele efe ya legodimo gomme ba tšea kgopolo ye e le ya bjana.

Thuto ya legodimo e na le ditaba tše dintši tša go hloka ntlha le thito

SEO BEIBELE E SE BOLELAGO

Ka Beibeleng, lentšu “legodimo” le bolela dilo tše dintši. Ka mohlala:

  • Genesi 1:20 e hlalosa go bopša ga dinonyana tšeo di “[fofago] godimo ga lefase sebakabakeng sa magodimo.” Tabeng ye, lentšu “legodimo” le šupa go lefaufau, e lego leratadima leo le bonagalago.

  • Jesaya 13:10 e bolela ka “dinaledi tša legodimo le dihlopha tša tšona,” e lego seo rena re se bitšago sebakabaka.

  • Beibele e bolela ka ‘lefelo leo Modimo a dulago go lona magodimong’ gomme ya re go na le ‘barongwa legodimong.’ (1 Dikgoši 8:30; Mateo 18:10) Hlokomela gore mantšu “magodimo” le “legodimo” ga e fo ba dipolelo tša seswantšhetšo, eupša a hlalosa lefelo la kgonthe la bodulo. *

“Lebelela o le legodimong o bone o le bodulong bja gago bjo bo phagamego bjo bokgethwa le bjo bobotse.”Jesaya 63:15.

 Na batho ka moka bao ba lokilego ba ya legodimong ge ba ehwa?

Beibele ga e rute gore lefase e fo ba legae la rena la nakwana moo re letelago go hwa re le gona gomme ra fetela bophelong bjo bongwe bja ka morago ga lehu legodimong. Beibele e hlalosa gabotse gore go tloga mathomong, lehu e be e se karolo ya morero wa Modimo ka batho. Nagana ka se:

  • Modimo o boditše batho ba babedi ba mathomo a re: “Tswalang le ate le tlale lefase.” (Genesi 1:28) Lefase e be e swanetše go ba legae la motho la sa ruri, moo a bego a tla phela ka mo go sa felego. Monna wa mathomo le mosadi ba be tla hwa ge feela ba ka se kwe Modimo. Ka manyami, ba ile ba kgetha go se mo kwe.—Genesi 2:17; 3:6.

  • Go se kwe ga monna yoo wa mathomo go feleleditše ka lehu, e sego feela go yena le mosadi wa gagwe eupša le go bana ba bona. (Baroma 5:12) Na seo se tlogetše batho ba se na kholofelo?

  • Beibele e re “go na le magodimo a mafsa le lefase le lefsa tše re di letetšego go ya ka kholofetšo ya gagwe.” * (2 Petro 3:13) A diriša Mmušo wa gagwe, Modimo o tla bušetša lefase la rena maemong ao a bego a a rerile mathomong, “gomme lehu le ka se hlwe le sa ba gona.” (Kutollo 21:3, 4) Na se se bolela ka bophelo legodimong goba lefaseng? Gore selo se se “sa ba gona,” se swanetše go ba se ile sa ba gona pele. Eupša lehu ga se la ka la ba gona legodimong. Ka gona, go a kwagala gore temana yeo e bolela ka seo se tlago go direga mo lefaseng, moo re bego re reretšwe go dula gona le moo re hlologelago go ba le baratiwa ba rena. Beibele gape e utolla gore bahu ba tla tsošwa gomme ba boelana le baratiwa ba bona.—Johane 5:28, 29.

Batho ba bantši ba ile ba thabela go ithuta seo ge e le gabotse Beibele e se rutago ka legodimo. Ka mohlala, George yo e bego e le Mokatholika o re: “Ke hweditše thuto ya Beibele ya mabapi le go phela ka mo go sa felego lefaseng e le e homotšago. E be e kwagala kudu go feta ya go ya legodimong.” *

“Ge e le magodimo ona, ke magodimo a Jehofa, eupša lefase o le neile bana ba batho.”Psalme 115:16.

^ par. 13 Ee, Modimo ke moya, ga se motho wa nama. (Johane 4:24) Ka gona, lefelo la gagwe la bodulo e swanetše go ba la moya leo e sego karolo ya legohle la rena leo le bonagalago.

^ par. 19 Polelwana “lefase le lefsa” ga se polanete e mpsha ya kgonthe; go e na le moo, ke polelwana ya seswantšhetšo yeo e šupago go lekoko la batho bao ba phelago lefaseng bao ba amogelwago ke Modimo.—Psalme 66:4.

^ par. 20 Beibele e ruta gore ge Mmušo wa Modimo o buša, ke feela ba sego kae—ba 144 000—bao ba tlago go buša le Jesu legodimong.—1 Petro 1:3, 4; Kutollo 14:1.

Ithute ka mo go Oketšegilego

DITABA TŠE DIBOTSE TŠE DI TŠWAGO GO MODIMO!

Morero wa Modimo ka Lefase ke Ofe?

Beibele e hlalosa lebaka leo Modimo a bopilego lefase, tlaišego e tla fela neng, gomme bokamoso ke bofe ka lefase le bao ba dulago go lona.

DITABA TŠE DIBOTSE TŠE DI TŠWAGO GO MODIMO!

Mmušo wa Modimo ke Eng?

Kgoši ya Mmušo wa Modimo ke mang, gomme ke eng seo Mmušo woo o tlago go se fihlelela?