Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! NO. 1 2016

 TABA YA LETLAKALA LA KA NTLE

O ka Thaba le ge o na le Mathata!

O ka Thaba le ge o na le Mathata!

O nagana gore lethabo la gago le kgongwa kudu ke sefe sa dilo tše di latelago?

  • boemo bja gago

  • dikarolwana tša gago tša leabela

  • tsela yeo o lebelelago dilo ka yona

BA BANGWE ba ka kgetha “boemo,” mohlomongwe e le ge ba re: “Ke be ke tla thaba . . . 

  • “ge feela ke be ke na le tšhelete e ntši”

  • “ge feela ke be ke le lenyalong leo le thabišago”

  • “ge feela ke be ke phetše gabotse mmeleng”

Lega go le bjalo, therešo ke gore tsela yeo o lebelelago dilo ka yona e phala boemo bja gago le dikarolwana tša leabela ge go tliwa tabeng ya go ba le lethabo. E bile tšeo ke ditaba tše dibotse. Ka baka la’ng? Ka gobane go fapana le boemo bja gago goba dikarolwana tša leabela, e lego dilo tšeo o sa kgonego go di laola, o ka kgona go laola tsela yeo o lebelelago dilo ka yona.

“SEHLARE SE SE FODIŠAGO”

Seema sa Beibele se re: ‘Pelo e thabilego e etša sehlare se se fodišago, eupša moya o nyamilego o fetša motho matla.’ (Diema 17:22) Ka mantšu a mangwe, tsela yeo o lebelelago dilo ka yona e tloga e le bohlokwa! E ka kgoma taba ya ge e ba o tla fihlelela selo seo o nyakago go se dira goba o tla itlhoboga, goba ge e ba tiragalo ya masetlapelo e tla go dira motho yo kaone goba yo mobe le go feta.

Batho ba bangwe ba ka no se dumelelane le kgopolo yeo. Mo gongwe ba ka re:

  • ‘Go re’ng ke swanetše go fihla mathata a ka ka go itira eka ke na le kholofelo bophelong?’

  • ‘Boemo bja ka bo ka se fetoge le ge nka leka go ba le pono e botse.’

  • ‘Go e na le gore ke lore ka dilo di lokile, go kaone gore ke di lebelele ka tsela ya kgonthe.’

Dikgopolo tšeo di ka bonagala di kwagala. Lega go le bjalo, go lebelela dilo ka tsela e botse go a hola. Ka mohlala, ela hloko maemo a latelago.

 Ge ba le mošomong, Alex le Brian ba šoma ka thata dilong tše di sa swanego. Ka morago ga gore molebeledi wa bona a lekole mošomo wa bona, o bontšha yo mongwe le yo mongwe diphošo tše dikgolo mešomong ya bona.

  • Alex: “Ke tloga ke tšere nako e telele e bile ke šomile ka thata mošomong wo, fela ga se ka o kgona! Nka se tsoge ke kgonne mošomo wo. Go sa šetšwe gore ke šoma ka thata gakaakang, ga nke o kgotsofatša. Ke sa itshwenyetša’ng?”

  • Brian: “Mong wa ka o mpontšhitše dilo tšeo a di ratilego ka mošomo wa ka, eupša ke dirile diphošo tše dikgolo tše sego kae. Ke ithutile dithuto tše bohlokwa tšeo di tla nthušago gore ke kaonefatše nakong e tlago.”

O NAGANA ENG?

  • Dikgweding tše tshelelago go tloga ga bjale, ke mošomi ofe yo a tlago go kgona mošomo kudu—na ke Alex goba ke Brian?

  • Ge e ba o be o le mothwadi, ke monna ofe go bao ba babedi yo o bego o ka rata go mo thwala goba go dira gore a dule a go šomela?

  • Ge o nyamišwa, o itshwara go swana le ofe go banna bao ba babedi?

Andrea le Brittney ba fela ba hlaselwa ke bodutu. Yo mongwe le yo mongwe wa bona o lebeletšana le boemo ka tsela ya gagwe.

  • Andrea o lebiša šedi e kgolo go yena. O gana go direla batho ba bangwe dilo ka ntle le ge bona ba ka mo direla se itšego pele. O ipotša gore: ‘Go re’ng ke swanetše go itshenyetša nako ka batho bao ba sa ntirelego selo ge ke ba diretše dilo?’

  • Brittney o leka ka thata go bontšha batho ba bangwe botho le go ba direla dilo, go sa šetšwe gore ba bonagala ba leboga goba go se bjalo. O diriša Molao wa Gauta—o swara batho ba bangwe ka tsela yeo a bego a ka rata gore ba mo sware ka yona. (Luka 6:31) Brittney o fo thabišwa ke ge a direla ba bangwe dilo tše dibotse.

O NAGANA ENG?

  • Ke ofe go basadi ba ba babedi yo o bego o ka ratago gore e be mogwera wa gago?

  • Ke ofe yo a ka ikwago a kgotsofetše ka ditswalano tša gagwe le batho ba bangwe?

  • Ge e ba o fela o hlaselwa ke bodutu, na o itshwara go swana le Andrea goba go swana le Brittney?

O ka be o tseba batho bao ba swanago le Brian le Brittney. O ka ba wa nagana gore o swana le bona. Ge e ba go le bjalo, ga go pelaelo gore tsela yeo o lebelelago dilo ka yona e ka dira phapano bophelong bja gago. Ka lehlakoreng le lengwe, go thwe’ng ge e ba o swana kudu le Alex goba Andrea? Ela hloko ditsela tše tharo tšeo ka tšona Beibele e ka go thušago go ba le pono e botse kudu ka mathata a bophelo.

 1 PHEMA GO HLOKA KHOLOFELO

BEIBELE E RE: “Ge o nolega moko mohlang wa ditlalelo, matla a gago a tlo felela.”—Diema 24:10, Phetolelo ya Kgale.

SEO E SE BOLELAGO: Go hloka kholofelo bophelong go tla go fetša matla ao o a nyakelago go kaonefatša boemo bja gago goba go lebeletšana le bjona.

KA MOHLALA: Juliza ga se a ka a thaba bjaneng bja gagwe. Tatagwe o be a lemaletše bjala gomme lapa labo le diila. Ba be ba phelela go huduga. Mathomong, Juliza o be a hloka kholofelo ka boemo bja gagwe bja bophelo. Eupša seo se ile sa fetoga. O ile a thušwa ke’ng? Juliza o re: “Le pele batswadi ba ka ba ka fenya mathata a bona, Beibele e ile ya nthuša gore ke kaonefatše pono ya ka ka dilo. Le go fihla le lehono, seo se bolelwago ke Beibele se nthuša gore ke se dule ke nagana ka dilo tše di fošagetšego. Bjale, ge batho ba bontšha dika tšeo ke sa di ratego, ke leka go kwešiša lebaka leo ka lona ba itshwarago ka tsela yeo.”

Go etša ge Juliza a ithutile, Beibele ke puku ya melao ya motheo yeo e kwagalago. Keletšo ya yona e ka go thuša gore o lebeletšane le maemo ao a sa kgahlišego. Ka mohlala, Baefeso 4:23 e re: “Le dule le mpshafatšwa matleng a lena a tutuetšago monagano.”

Go etša ge temana yeo e bontšha, o ka kgona go fetoša pono ya gago. O ka “mpshafatšwa” monaganong wa gago. Lega go le bjalo, go dira phetogo yeo ke mogato o tšwelago pele. Ke ka baka leo temana yeo e rego re swanetše go ‘dula re mpshafatšwa.’

2 ŠETŠA DILO TŠE DIBOTSE

BEIBELE E RE: “Go yo madimabe matšatši ka moka ke a mabe; eupša pelo e thabilego ke monyanya wa ka mehla.”—Diema 15:15, Phetolelo ya Kgale.

SEO E SE BOLELAGO: Ge e ba o lebelela dilo ka moka ka tsela e fošagetšego, o tla ikwa o ‘hlaka’ gomme letšatši le lengwe le le lengwe le tla bonagala e le le ‘lebe’ goba le sa thabiše. Eupša ge e ba o šetša dilo tše dibotse, o tla ba le “pelo e thabilego” wa ba wa ikwa o kgotsofetše. Kgetho ke ya gago.

KA MOHLALA: Ka morago ga gore Yanko a buiwe, a tlošwe serurugi bjokong, o ile a ba le mafokodi mmeleng ao a ilego a kgoma mosepelo wa gagwe le polelo. Yanko o ile a fetša mengwaga e mentši a nyamile o šoro ka ge a be a nagana gore seo se tla mo šitiša go fihlelela dilo tšeo a nyakago go di dira. Eupša o ile a fetoša tsela yeo a bego a bona dilo ka yona. Bjang? O re: “Go e na le gore ke šetše mafokodi a ka, ke ithutile go dula ke nagana ka ditaba tšeo di kgothatšago.”

Tsela e nngwe yeo Yanko a fihlelelago se ke ka go bala ditemana tša Beibele. O re: “Se se dira gore ke dule ke nagana ka dilo tše dibotse. Ga se ka phaela ka thoko dilo tše dikgolo tšeo ke nyakago go di fihlelela, eupša ga bjale ke šeditše dilo tše dinyenyane tšeo nka di fihlelelago. Ge dikgopolo tšeo di nyamišago di šwahlela monaganong wa ka, ke naganišiša ka mabaka a mantši ao a ntirago gore ke thabe.”

Bjalo ka Yanko, le wena o ka fenya dikgopolo tša gago tša go hloka kholofelo ka go nagana ka dilo tše dibotse. Ge e ba o lebeletšane le maemo ao a sa kgahlišego—mohlomongwe e le bothata bja tša maphelo go etša Yanko—ipotšiše gore: ‘Na ruri nka itlhoboga boemong bjo? Na ke gona ge go fedile, goba se e fo ba e le tšhitišo ya nakwana?’ Ithute go gana dikgopolo tše fošagetšego ka go dula o nagana ka dilo tše di agago.

 3 DIRELA BA BANGWE DILO

BEIBELE E RE: “Go na le lethabo le legolo go neeng go feta go amogeleng.”—Ditiro 20:35.

SEO E SE BOLELAGO: Go nea ka go hloka boithati go dira gore monei a kgotsofale e le ruri. Ka baka la’ng? Ka gobane ga se ra bopelwa go fo hlokomela dinyakwa tša rena feela. (Bafilipi 2:3, 4; 1 Johane 4:11) Go thabela go nea go ka re thuša kudu go lebeletšana le maemo a sa kgahlišego bophelong.

KA MOHLALA: Josué o golofetše kudu mokokotlong (e lego bolwetši bja spina bifida). Gantši o opelwa o šoro. Eupša o thabela bophelo ka go thuša ba bangwe. O re: “Go e na le gore ke re, ‘Nka se kgone go dira seo,’ ke thabela go nagana ka ditsela tše di holago tša go thuša batho ka dinyakwa tša bona tša letšatši le letšatši. Ke hwetša ditsela tša go direla ba bangwe dilo, gomme se se nthabiša kudu.”

SEO O KA SE DIRAGO

Tsoma dibaka tša go bontšha boikgafo. Ka mohlala, na o ka apeela moagišani yo a babjago? Na o tseba batšofadi bao ba hlokago thušo ka mešongwana ya ka gae?

Šetša tsela yeo o lebelelago dilo ka yona go swana le kamoo o bego o tla hlokomela serapa sa gago ka gona. Tumola sekoro seo se nago le mpholo sa dikgopolo tše fošagetšego le go hloka kholofelo bophelong. Bjala peu ya go ba le kholofelo gomme o humiše bophelo bja gago ka ditiro tšeo di tšweletšago maikwelo a thabišago. O tla buna dienywa tša maikwelo tšeo di tlago go dira gore bophelo bja gago e be bjo bo kgotsofatšago le go feta. Le gona seo se tla kgonthišetša therešo ya gore tsela yeo o lebelelago dilo ka yona e tloga e le bohlokwa!

Batho ba bangwe ba phema go ja dijo tše itšego ka baka la boemo bja bona bja tša maphelo; le wena o ka ithuta go gana dikgopolo tše di fošagetšego

Ithute ka mo go oketšegilego

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.