Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  No. 6 2017

 TABA YA LETLAKALA LA KA NTLE | MPHO E DI PHALAGO TŠOHLE KE EFE?

Go Nyakana le Mpho e di Phalago Tšohle

Go Nyakana le Mpho e di Phalago Tšohle

Ga go bonolo go hwetša mpho yeo motho a ka e thabelago. Eupša tsela yeo motho yoo a tlago go amogela mpho yeo ke yona e tla bontšhago gore ruri o e tšeela godimo. Le gona mpho yeo motho yo mongwe a e tšeelago godimo, yo mongwe a ka no se e tšeele godimo.

Ka mohlala mofsa a ka tšea sedirišwa sa morago bjale sa elektroniki e le mpho e di phalago ka moka. Ka lehlakoreng le lengwe motho yo mogolo a ka thabela mpho yeo e lego bohwa bja lapa. Ditšong tše dingwe batho ba bagolo le ba bafsa ba tšea mpho yeo e di phalago tšohle e le tšhelete, ka ge yo a e newago a ka kgona go reka seo yena a se nyakago.

Go sa šetšwe ditlhohlo, batho ba bantši ba sa tšwela pele ba nyakana le mpho yeo e ka thabelwago ke motho yo bohlokwa go bona. Le ge gantši go ka no se be bonolo go hwetša mpho e bjalo, go naganišiša ka dintlha tše dingwe go ka re thuša gore re atlege. A re hlahlobeng dintlha tše nne tšeo di ka thušago gore motho yo a newago mpho a e thabele.

Seo motho yoo a se kganyogago. Monna yo mongwe wa Belfast, kua Northern Ireland, o sa tšea mpho ya sethuthuthu yeo a ilego a e hwetša ge a na le mengwaga e 10 goba 11 e le mpho yeo e di phalago tšohle. Ka baka la’ng? O hlalositše gore: “Ka gobane ke be ke tloga ke se nyaka.” Mantšu ao a bontšha gore dilo tšeo motho a di kganyogago ke tšona di laolago ge e ba mpho e tla tšeelwa godimo goba go se bjalo. Ka gona, nagana ka motho yoo o nyakago go mo nea mpho. Leka go nagana ka selo seo motho yoo a ka se tšeelago godimo, ka gobane selo seo motho a se tšeelago godimo gantši e ka ba sona seo a se kganyogago. Ka mohlala gantši bomakgolo le borakgolo ba rata go fetša nako ba na le malapa a bona. Ba ka kganyoga go bona bana ba bona le ditlogolo nako le nako. Mpho yeo ba ka e tšeelago godimo e ka ba gore lapa le ye le bona maikhutšong.

E le gore o tsebe seo motho a se kganyogago, o swanetše go ba motheetši yo botse. Beibele e re kgothaletša gore re ‘akgofele go kwa, re diege go bolela.’ (Jakobo 1:19) Ka mehla ge o boledišana le bagwera goba ba lapa, leka go theetša e le gore o tsebe dilo tšeo ba di ratago le tšeo ba sa di ratego. Seo se tla go thuša gore o ba nee mpho yeo ba tla e thabelago.

 Seo motho yoo a se hlokago. Motho yo a newago mpho a ka e tšeela godimo gaešita le ge e le e nyenyane goba e sa ture ge feela e ka mo hola. Eupša o tla tseba bjang seo motho yo mongwe a ka bago a se hloka?

Boemong bjoo go ka bonagala tsela e bonolo ya go tseba seo e le go botšiša motho yoo seo a se hlokago goba a se nyakago. Lega go le bjalo, batho ba bantši bao ba neago dimpho ba bona go dira bjalo go ka se ba thabiše, ka ge ba nyaka go nea motho mpho yeo a ka e ratago ntle le go dira gore a tsebe ka seo. Go oketša moo, le ge batho ba bantši ba ka bolela ka bolokologi ka dilo tšeo ba di ratago goba tšeo ba sa di ratego, eupša ga se gantši ba ka go botšago ka tšeo ba di hlokago.

Ka gona, šetša maemo a motho yoo. Na ke motho yo mofsa, yo mogolo, yo a sego lenyalong, yo a hladilwego goba yo a hladilego, mohlologadi, yo a šomago goba yo a rotšego modiro? Ke moka nagana gore ke mpho ya mohuta mang yeo e ka holago motho yoo.

E le gore o lemoge seo motho yo o nyakago go mo nea mpho a se hlokago, boledišana le batho bao ba kilego ba ba boemong bjo bo swanago le bja gagwe. Ba ka go botša ka dilo tšeo ka go kgethega motho yoo a di hlokago, e lego tšeo ba bantši ba ka no se di tsebego. Ka go dira bjalo, o tla kgona go nea motho yoo mpho yeo a tlogago a e hloka yeo ba bangwe ba ka no se naganego go mo nea yona.

Nako e swanetšego. Beibele e re: “Lentšu leo le bolelwago ka nako e swanetšego ke le lebotse gakaakang!” (Diema 15:23) Lengwalo le le bontšha gore mantšu a rena ao a bolelwago ka nako e swanetšego a ka dira phapano e kgolo. Go bjalo le ka ditiro tša rena. Bjalo ka ge mantšu ao a bolelwago ka nako e swanetšego a ka kgahla motho yoo a a kwago, mpho yeo e newago ka nako e swanetšego goba tiragalong yeo e swanetšego e ka thabiša motho yoo.

Mogwera wa gago o a nyala goba o a nyalwa. Mofsa o kgauswi le go aloga sekolong. Banyalani ba letetše go ba le ngwana. Tše ke tše dingwe tša ditiragalo tšeo go tšona gantši batho ba neago ba bangwe dimpho. Ba bangwe ba hwetša e le mo go holago go ngwala ditiragalo tše bjalo tša bohlokwa tšeo di tla diregago ngwageng o tlago. Ka go dira bjalo, ba ka kgona go rulaganya mpho e bohlokwa e sa le pele bakeng sa tiragalo e nngwe le e nngwe. *

Ka gona, o se ke wa no tlwaela go fa batho dimpho ka ditiragalo tšeo di kgethegilego feela. Re ka thabela go fana dimpho ka nako le ge e le efe. Lega go le bjalo, o swanetše go ba šedi. Ka mohlala, ge e ba monna a be a ka nea mosadi mpho ntle le lebaka, mosadi yoo a ka phetha ka gore monna yoo o na le kgahlego go yena. Ge e ba go se bjalo, mpho yeo e ka baka go se kwešišane goba kgakanego. Seo se dira gore re hlahlobe ntlha e nngwe ya bohlokwa, e lego maikemišetšo a go nea mpho.

Maikemišetšo a go nea mpho. Bjalo ka ge mohlala o fetilego o bontšha, ke mo gobotse go ipotšiša ge e ba motho yo o mo neago mpho a ka se gakanege gore o mo nea yona ka maikemišetšo afe. Ka lehlakoreng le lengwe, ke mo go botse gore monei a hlahlobe maikemišetšo a gagwe a go nea motho yo mongwe mpho. Le ge batho ba bantši ba ipotša gore maikemišetšo a bona a go nea dimpho a a kwagala, ba bantši ba fana dimpho dinakong tše itšego mo ngwageng ka gobane ba ikwa ba gapeletšega go dira bjalo. Gape ba bangwe ba nea dimpho e le ge ba holofetše gore ba tla swarwa ka tsela e kgethegilego goba ba hwetša selo se itšego.

O ka dira eng go kgonthišetša gore o nea mpho ka maikemišetšo a mabotse? Beibele e re: “Ditaba tša lena ka moka di direge ka lerato.” (1 Bakorinthe 16:14) Dimpho tša gago di tla amogelwa ka lethabo ge e ba di newa ka maikemišetšo a mabotse le go tshwenyega ka bao o ba neago tšona, gomme o tla thabišwa ke go nea go tšwa pelong. Ge o nea go tšwa pelong o thabiša Tatago rena wa legodimong. Moapostola Paulo o ile a reta Bakriste ba lekgolong la pele la mengwaga ba Korinthe ge ka lethabo le ka go tšwa pelong ba ile ba tšea karolo modirong wa  tlhakodišo go thušeng Bakriste gotee le bona ba Judea. Paulo o ile a ba botša gore: “Modimo o rata monei yo a neago ka go hlalala.”—2 Bakorinthe 9:7.

Go naganišiša ka dintlha tšeo re di ahlaahlilego go ka go thuša kudu gore o nee batho dimpho tšeo di ba thabišago. Dintlha tše le tše dingwe di kgathile tema thulaganyong ya Modimo ya go thuša batho gore ba hwetše mpho e kgolokgolo go di feta. E le gore o tsebe gore mpho yeo ke eng, re go laletša gore o bale sehlogo seo se latelago.

^ par. 13 Gape batho ba bantši ba fana dimpho nakong ya go keteka matšatši a matswalo le a maikhutšo. Lega go le bjalo, gantši ditiragalong tše go dirwa dilo tšeo di thulanago le seo Beibele e se bolelago. Bona sehlogo seo se rego “Babadi ba Rena ba a Botšiša—Na Bakriste ba Swanetše go Keteka Keresemose?” ka makasineng wo.