Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 6 2016

 TABA YA LETLAKALA LA KA NTLE | NA O KWEŠIŠA SEO SE DIREGAGO LEGODIMONG?

Dipotšišo Mabapi le Bao ba Lego Lefelong la Moya

Dipotšišo Mabapi le Bao ba Lego Lefelong la Moya

Na o kile wa ipotšiša ka lefelo la moya le ka bao ba dulago go lona? Ge e ba go le bjalo, ga o tee. Ke kgale batho ba ipotšiša ka taba ye. Ba bangwe ba dumela gore lefelong la moya go dula badimo bao ba swanelwago ke go hlompšha. Ba bangwe ba nagana gore ke lefelo leo le thabišago le leo le nago le khutšo leo le bitšwago legodimo, moo go tletšego barongwa le batho ba go loka bao ba hlokofetšego. Lega go le bjalo, ba bangwe ba nagana gore lefelo la moya ke legae la medingwana e mentši.

Batho ba bantši ba bolela gore re ka se tsebe selo ka lefelo la moya ka lebaka la gore ga go na yo a kilego a ya gona a ba a boya gore a tle a re hlalosetše. Tsela yeo ya go bea mabaka e fošagetše. Jesu Kriste o phetše legodimong, lefelong la moya pele a ka tla lefaseng. O boletše le baetapele ba bodumedi ba lekgolong la pele la mengwaga gore: “Gobane ke theogile legodimong, e sego go tlo dira thato ya ka, eupša go dira thato ya yo a nthomilego.” Ka gona Jesu o be a tseba seo a bolelago ka sona ge a be a botša baapostola ba gagwe gore: “Ntlong ya Tate go na le madulo a mantši.”Johane 6:38; 14:2.

Tatago Jesu ke Modimo, yo leina la gagwe e lego Jehofa, gomme ‘ntlo’ ya Jehofa e legodimong. (Psalme 83:18) Ka gona, ga go na yo a ka hlalosago lefelo la moya ga kaone go feta ka tsela yeo Jehofa Modimo le Jesu Kriste ba ka le hlalosago ka yona. Ba utolotše ditaba tše dintši ka lefelo la moya ba diriša dipono tšeo ba di neilego batho bao ba botegago.

Sehlogo seo se latelago se ahlaahla dikarolo tša Beibele tšeo di hlalosago dipono tše mmalwa tšeo batho ba di bonego. Ge o dutše o bala ka dipono tše, gopola gore lefelo la moya ga le na dilo tšeo re ka kgonago go di swara goba go di bona. Ka gona, go ena le gore Modimo a re hlalosetše dilo a diriša polelo ya lefelong la moya, yeo re bego re ka se e kwešiše, o ile a diriša dipono gore re kgone go kwešiša seo lefelo la moya le lego sona. Dipono tšeo di tla go thuša go kwešiša bao ba dulago lefelong la moya “madulong a mantši.”