Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  No. 6 2016

 TABA YA LETLAKALA LA KA NTLE | NA O KWEŠIŠA SEO SE DIREGAGO LEGODIMONG?

Ke Bomang Bao ba Dulago Legodimong?

Ke Bomang Bao ba Dulago Legodimong?

Beibele e re botša ka dipono tše mmalwa tšeo di kgahlišago tšeo di dirago gore go be bjalo ka ge eka re bona ka lefelong leo le sa bonagalego la legodimong. Re go laletša gore o di ele hloko. Le ge dilo tšeo di hlaloswago diponong di se tša swanela go tšewa ka tsela ya kgonthe, di ka go thuša gore o se ke wa bona feela bao ba dulago lefelong la moya ka leihlo la kgopolo, eupša o kgone go kwešiša kamoo ba ka go kgomago ka gona.

JEHOFA KE YO A PHAGAMEGO

“Sedulo sa bogoši se be se le boemong bja sona legodimong, go na le yo a dutšego go sona. Yo a dutšego go sona, ka ponagalo o swana le leswika leo le bitšwago jasepere le leswika la bohlokwa la mmala o mohwibidu, gomme go dikologa sedulo sa bogoši go na le molalatladi woo ka ponagalo o swanago le leswika leo le bitšwago emeralede.”Kutollo 4:2, 3.

“Go be go tagile go mo dikologa. Go be go na le selo se se swanago le molalatladi woo o bago marung letšatšing la ge pula e ena. Ke kamoo phadimo e dikologilego e bego e le ka gona. E be e swana le ya letago la Jehofa.”Hesekiele 1:27, 28.

Dipono tše tšeo di bonwego ke moapostola Johane le moporofeta Hesekiele, di bontšha letago la Modimo yo Godimodimo, Jehofa, le dilo tšeo re ka kgonago go di bona ka leihlo la kgopolo, e lego maswika ao a kgahlišago le a bohlokwa, molalatladi le sedulo sa bogoši seo se nago le letago. Di re botša gore moo Jehofa a lego gona go botse ka tsela yeo e makatšago, go a kgahliša e bile go na le khutšo.

Dipontšho tše tša Modimo di dumelelana le mantšu a mopsalme yo a ngwadilego gore: “Gobane Jehofa ke yo mogolo, e bile o swanelwa ke go tumišwa kudu. Ke yo a boifišago go feta medimo e mengwe ka moka. Gobane medimo ka moka ya meraforafo ga e na mohola; eupša ge e le Jehofa o dirile magodimo. Seriti le letago di pele ga gagwe; matla le botse di sekgethweng sa gagwe.”Psalme 96:4-6.

Le ge Jehofa e le Yo a Phagamego, o re laletša gore re mmatamele ka thapelo gape o re kgonthišetša gore o a re kwa. (Psalme 65:2) Modimo o re rata kudu e bile o na le taba le rena, moo moapostola Johane a ngwadilego gore: “Modimo ke lerato.”1 Johane 4:8.

JESU O NA LE MODIMO

“[Morutiwa wa Mokriste Stefano], a tsepelela legodimong a tletše moya o mokgethwa gomme a bona letago la Modimo le la Jesu a eme ka letsogong la le letona la Modimo, gomme a re: ‘Bonang! Ke bona magodimo a bulega gomme Morwa wa motho a eme ka letsogong le letona la Modimo.’”Ditiro 7:55, 56.

Pejana ga ge Stefano a bona pono yeo, Jesu o ile a bolawa ka baka la hlohleletšo ya baetapele ba Bajuda, e lego bona bao Stefano a bolelago le bona. Pono yeo e ile ya kgonthišetša gore Jesu o tsošitšwe bahung e bile o a phela le gore o a hlompšha. Moapostola Paulo o ngwadile mabapi le se gore: ‘Jehofa o tsošitše Jesu bahung gomme a mo dudiša ka letsogong la gagwe le letona mafelong a legodimong, ka godimodimo ga mmušo o mongwe le o mongwe, bolaodi, matla, borena le leina le lengwe le le lengwe le le bitšwago, e sego feela tshepedišong ye ya dilo, eupša le go ye e tlago go tla.’Baefeso 1:20, 21.

 Go tlaleletša tabeng ya go hlalosa ka boemo bja Jesu bjo bo phagamego, Mangwalo a bontšha gore Jesu ka ge a swana le Jehofa, o na le taba kudu le batho. Nakong ya bodiredi bja gagwe mo lefaseng, Jesu o ile a fodiša bao ba babjago, le go tsoša bahu. Ka lehu la gagwe la sehlabelo, o bontšhitše lerato leo a nago le lona go Modimo le go moloko wa batho. (Baefeso 2:4, 5) A eme ka letsogong le letona la Modimo, Jesu kgauswinyane o tla diriša matla a gagwe a taolo le go tliša ditšhegofatšo go batho bao ba kwago lefaseng ka moka.

BARONGWA BA HLANKELA MODIMO

“Ka [moporofeta Daniele] fela ke lebeletše go fihlela go bewa didulo tša bogoši gomme Motala wa Mabaka [Jehofa] a dula fase. . . . Go na le ba milione (1 000 000) bao ba ilego ba tšwela pele ba mo hlankela, le ba dikete tše lesome (10 000) ga dikete tše lesome (10 000) bao ba ilego ba tšwela pele ba eme pele ga gagwe.”Daniele 7:9, 10.

Ponong ye ya legodimong, Daniele ga se a bona morongwa o tee, eupša o bone barongwa ba bantši. Ruri yeo e swanetše go ba e bile pono e kgahlišago kudu! Barongwa ke dibopiwa tša moya tšeo di kgahlišago, tše bohlale le tše matla. Maemo a bona a akaretša baserafi le bakerubi. Beibele e bolela ka barongwa ka makga a fetago a 250.

Barongwa ga se batho bao ba kilego ba phela mo lefaseng. Modimo o bopile barongwa kgale, pele ga ge a ka bopa batho. Ge a bopa lefase, barongwa ba be ba le gona ba lebeletše gomme ba gobela ka go hlalala.Jobo 38:4-7.

Tsela e nngwe yeo ka yona barongwa bao ba botegago ba hlankelago Modimo ka yona ke ka go tšea karolo modirong o bohlokwa kudu wo o dirwago lefaseng lehono, e lego go bolela ditaba tše dibotse tša Mmušo wa Modimo. (Mateo 24:14) Go tšea karolo ga bona modirong wo go utolletšwe moapostola Johane ponong, yo a ngwadilego gore: “Ka bona morongwa yo mongwe a fofa gare ga legodimo a na le ditaba tše dibotse tša ka mo go sa felego gore a di tsebiše bao ba dulago lefaseng, le go ditšhaba tšohle, meloko yohle, maleme ohle le batho bohle.” (Kutollo 14:6) Le ge lehono barongwa ba sa bolele le batho go swana le ge ba dirile ka dinako tše dingwe mehleng e fetilego, ba thuša ka go hlahla bao ba bolelago ditaba tše di botse go batho ba dipelo tšeo di botegago.

 SATHANE O TIMETŠA BA BANTŠI KUDU

“Ntwa ya tsoga legodimong. Mikaele [Jesu Kriste] le barongwa ba gagwe ba lwa le drakone gomme drakone le barongwa ba yona ba lwa, eupša ya se ke ya fenya, le gona gwa se ke gwa hlwa go hwetšwa madulo a bona legodimong. Ka gona drakone e kgolo ya lahlwa, yona noga ya kgale yeo e bitšwago Diabolo le Sathane, yeo e timetšago lefase ka moka; ya lahlelwa lefaseng gomme barongwa ba yona ba lahlwa le yona.”Kutollo 12:7-9.

Legodimong go be go sa dule go na le khutšo. Mathomong a histori ya batho, yo mongwe wa barongwa o ile a ba le kganyogo ya go nyaka go rapelwa, a rabela kgahlanong le Jehofa, a ba Sathane, e lego leina leo le bolelago gore “Moganetši.” Ka morago barongwa ba bangwe le bona ba ile ba tlatša borabele bjoo gomme ba bitšwa batemona. Ka ge ba le kgopo ka mo go feteletšego, ba ganetša Jehofa ka tsela e šoro e bile ba dirile gore batho ba bantši ba dire dilo tšeo di thulanago le tlhahlo ya Jehofa e lerato.

Sathane le batemona ba gagwe ke ba kgopo e bile ba sehlogo. Ke manaba a batho gomme ba dirile gore batho ba tlaišege kudu mo lefaseng. Ka mohlala, Sathane o bolaile leruo le bahlanka ba Jobo monna yo a botegago. Sa go latela, a bolaya bana ka moka ba lesome ba Jobo ka go dira gore “phefo e kgolo” e wiše ntlo yeo ba bego ba le ka go yona. Ka morago ga moo, Sathane a otla Jobo ka “dišo tše šoro go tloga kgatong ya lenao go ya phogong.”Jobo 1:7-19; 2:7.

Lega go le bjalo, kgauswinyane Sathane o tla be a se sa le gona. Ga e sa le a lahlelwa lefaseng, o a tseba gore “o na le nako e kopana.” (Kutollo 12:12) Sathane o tlo fedišwa, gomme tšeo ke ditaba tše dibotse!

BAO BA TŠWAGO LEFASENG

“O [Jesu] reketše Modimo batho go tšwa molokong o mongwe le o mongwe, lelemeng le lengwe le le lengwe, morafong o mongwe le o mongwe le setšhabeng se sengwe le se sengwe, o ba dirile gore e be mmušo le baperisita ba Modimo wa rena gomme ba tla buša e le dikgoši godimo ga lefase.”Kutollo 5:9, 10.

Go swana le ge Jesu a tsošitšwe bahung mo lefaseng gore a yo phela legodimong, go tla ba bjalo le ka ba bangwe. Jesu o boditše baapostola ba gagwe ba botegago gore: “Ke a tloga ke ya go le lokišetša lefelo. Le gona, . . . ke tla buša ka boa, ka le amogela gae go nna gore moo ke lego gona le lena le be gona.”Johane 14:2, 3.

Bao ba yago legodimong ba ya moo ka morero. Bona gammogo le Jesu, ba tlo bopa Mmušo woo  mafelelong o tlago go buša badudi ba lefaseng ka moka le go ba tlišetša ditšhegofatšo. Wo ke Mmušo woo Jesu a boditšego balatedi ba gagwe gore ba o rapelele thapelong ya mohlala yeo e rego: “Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”Mateo 6:9, 10.

SEO BAO BA LEGO LEGODIMONG BA TLAGO GO SE DIRA

“Ka [moapostola Johane] kwa lentšu le le hlabošago le le tšwago sedulong sa bogoši le re: ‘Bonang! Tente ya Modimo e bathong, . . . o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.’”Kutollo 21:3, 4.

Pono ye ya boporofeta e šupa nakong ya ge Mmušo wa Modimo, woo o bopšago ke Jesu le bao ba tsošitšwego bahung mo lefaseng, o tlago go fediša pušo ya Sathane gomme wa dira gore lefase e be paradeise. Go ka se sa ba le dilo tšeo di bakelago batho bohloko le manyami. Gaešita le lehu le ka se hlwe le sa ba gona.

Go thwe’ng ka ba dibilione bao ba hlokofetšego gomme ba ka se tsošetšwe go yo phela legodimong? Nakong e tlago, ba tla bušetšwa bophelong ba na le kholofelo ya go tlo phela ka mo go sa felego lefaseng la Paradeise.Luka 23:43.

Dipono tše di re kgonthišetša gore Jehofa Modimo le Morwa wa gagwe, Jesu Kriste, gotee le barongwa le bao ba rekilwego go tšwa lefaseng, ka moka ba na le taba le rena kudu e bile ba nyaka go re bona re phela gabotse. Gore o ithute ka mo go oketšegilego ka seo ba tlago go se dira, re go laletša gore o ikgokaganye le Dihlatse tša Jehofa goba o ye Wepesaeteng ya rena ya www.jw.org/nso, o taoneloute puku ya Ke Eng Seo ge e le Gabotse Beibele e se Rutago?

Ithute ka mo go Oketšegilego

DIPOTŠIŠO TŠA BEIBELE DI A ARABJA

Ke ka Baka La’ng ke Rapela? Na Modimo o tla Nkaraba?

Ge o rapela, go ithekgile ka wena gore Modimo a go arabe.

DIPOTŠIŠO TŠA BEIBELE DI A ARABJA

Na Jesu e be e fo ba Motho wa go Loka?

Lebaka leo ka lona Jesu wa Natsaretha e bego e le motho yo a nago le tutuetšo e matla yo a kilego a phela mo lefaseng.

DIPOTŠIŠO TŠA BEIBELE DI A ARABJA

Mmušo wa Modimo o tla Phetha Eng?

Ithute seo o ka se letelago ge mmušo wa Modimo o tla be o buša lefase.

DIPOTŠIŠO TŠA BEIBELE DI A ARABJA

Na Diabolo o Gona e le ka Kgonthe?

Na Diabolo ke bobe bjoo bo lego go batho, goba na ke motho wa kgonthe?