Barongwa bao ba tshepagalago ba tloga ba kgahlegela dilo tšeo batho ba di dirago. E bile ba swaregile kudu ka go dira thato ya Jehofa. Ge Modimo a be a bopa lefase, barongwa ba ile ba “goelela gotee ka lethabo, gomme barwa ba Modimo ka moka ba gobela ka go hlalala.” (Jobo 38:4, 7) Go theoša le histori, barongwa ba be ba dutše ba duma go “lebeledišiša” dilo tšeo di porofetilwego tša mabapi le seo se tlo diregago lefaseng “gore ba di kwešiše.”—1 Petro 1:11, 12.

Beibele e bontšha gore ka dinako tše dingwe barongwa ba ile ba šireletša barapedi ba therešo, e le gore thato ya Modimo e direge. (Psalme 34:7) Ka mohlala:

  • Ge Jehofa a be a tlo fediša metse e mebe ya Sodoma le Gomora, barongwa ba ile ba thuša Lota wa go loka le ba lapa la gagwe go tšhaba motseng.—Genesi 19:1, 15-26.

  • Mehleng ya Babilona ya bogologolo, masogana a mararo a Baheberu a ile a lahlelwa ka sebešong sa mollo gore a hwele moo. Modimo o ile a ‘romela morongwa wa gagwe gore a hlakodiše bahlanka ba gagwe.’—Daniele 3:19-28.

  • Ka morago ga gore Daniele wa go loka a fetše bošego ka moka a le ka moleteng wa ditau, o ile a hlalosa gore o phologile ka baka la gore “Modimo . . . o romile morongwa wa gagwe a tswalela melomo ya ditau.”—Daniele 6:16, 22.

Ke kgale barongwa ba thuša batho bao ba botegago

BARONGWA BA BE BA THEKGA PHUTHEGO YA BOKRISTE YA LEKGOLONG LA PELE LA MENGWAGA

Ka dinako tše dingwe, baromiwa ba Modimo bao e lego barongwa ba be ba thuša Bakriste ba lekgolong la pele la mengwaga ge go be go nyakega gore go phethwe morero wa Jehofa. Ka mohlala:

  • Morongwa o ile a bula mejako ya kgolego gomme a hlahla baapostola bao ba bego ba golegilwe moo gore ba botše batho ka Modimo tempeleng.—Ditiro 5:17-21.

  • Morongwa o ile a laela moebangedi Filipi gore a ye tseleng ya leganata yeo e bego e tloga Jerusalema e eya Gatsa. Filipi o be a swanetše go bolela ka Modimo le Moethiopia yo a bego a etšwa go rapela Jerusalema.—Ditiro 8:26-33.

  • Ge go fihla nako ya Modimo ya gore bao e sego Bajuda e be Bakriste, morongwa o ile a iponagatša ponong go letona la madira a Roma e lego Koronelio. Morongwa o ile a laela Koronelio gore a biletše moapostola Petro ntlong ya gagwe.—Ditiro 10:3-5.

  • Ge moapostola Petro a be a golegilwe, morongwa o ile a iponagatša go yena gomme a mo ntšha kgolegong.—Ditiro 12:1-11.

 KAMOO BARONGWA BA KA GO THUŠAGO KA GONA

Ga go na bohlatse bjo bo bontšhago gore ga bjale Modimo o diriša barongwa go thuša batho ka mohlolo, go swana le ditiragalo tšeo di hlalositšwego ka Beibeleng. Lega go le bjalo, ge Jesu a be a bolela mabapi le mehla ya rena, o itše: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.” (Mateo 24:14) Na o be o tseba gore barutiwa ba Kriste ba hlahlwa ke barongwa modirong wo?

Barongwa ba thuša modirong wa go bolelwa ga ditaba tše dibotse tša Modimo lefaseng ka moka

Lengwalo la Kutollo le bontšha gore barongwa ba be ba tlo swarega kudu ka modiro o bohlokwa. Ba be ba tlo thuša batho lefaseng ka moka go ithuta ka Jehofa Modimo le ka morero wa gagwe bakeng sa batho. Moapostola Johane o ngwadile gore: “Ka bona morongwa yo mongwe a fofa gare ga legodimo a na le ditaba tše dibotse tša ka mo go sa felego gore a di tsebiše bao ba dulago lefaseng, le go ditšhaba tšohle, meloko yohle, maleme ohle le batho bohle, a bolela ka lentšu le le hlabošago a re: ‘Boifang Modimo gomme le mo nee letago, gobane iri ya kahlolo ya gagwe e fihlile, ka gona rapelang Yo a dirilego legodimo, lefase, lewatle le didiba tša meetse.’” (Kutollo 14:6, 7) Ditiragalo tše dintši tša mehleng yeno di bontšha gore barongwa ba thekga modiro wa lefase ka moka wa go bolela ka Mmušo wa Modimo. Ka gona, gaešita le ge modiradibe o tee a itshola gomme a boela go Jehofa, “lethabo e ba le legolo gare ga barongwa ba Modimo.”—Luka 15:10.

Go tlo direga eng ge modiro wa go ruta ka Beibele o phethilwe? Ka nako yeo, “madira a legodimong” a barongwa a tlo thekga Jesu Kriste, yo e lego Kgoši ya dikgoši, ge a tla be a elwa “ntweng ya letšatši le legolo la Modimo Ramatlaohle” ka Haramagedone. (Kutollo 16:14-16; 19:14-16) Barongwa ba matla ke bona ba tla bego ba phetha dikahlolo tša Modimo ge Morena Jesu “a tlo lefetša . . . bao ba sa kwego ditaba tše dibotse tša mabapi le Morena wa rena Jesu.”—2 Bathesalonika 1:7, 8.

Ka gona, kgodišega gore barongwa ba a go kgahlegela. Ba tshwenyegile kudu ka gore batho bao ba nyakago go hlankela Modimo ba thabe. Ka baka leo Jehofa o ba dirišitše gantši go matlafatša le go šireletša bahlanka ba gagwe bao ba botegago ba mo lefaseng.—Baheberu 1:14.

Yo mongwe le yo mongwe wa rena o lebanwe ke go dira kgetho e bohlokwa. Na re tla theetša le go dira ka go dumelelana le ditaba tše dibotse tša Beibele tšeo di bolelwago lefaseng ka moka? Dihlatse tša Jehofa tša lefelong la geno di tla thabela go go thuša gore o holwe ke thušo ya barongwa ba matla ba Modimo.