Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  No. 5 2017

 TABA YA LETLAKALA LA KA NTLE | BARONGWA—NA GO TSEBA KA BONA GO BOHLOKWA?

Na Barongwa ba ka Tutuetša Bophelo bja Gago?

Na Barongwa ba ka Tutuetša Bophelo bja Gago?

Mathapameng a mangwe ka Sontaga, Kenneth le Filomena bao ba dulago Curaçao, ba ile ba etela banyalani ba bangwe bao ba bego ba ithuta le bona Beibele.

Kenneth o re: “Ge re fihla, ntlo e be e tswaletšwe gomme koloi e se gona. Eupša ke ile ka no ikwa ke gapeletšega gore ke founele mosadi wa lapeng leo.”

Mosadi yoo o ile a araba founo gomme a hlalosa gore monna wa gagwe o ile mošomong. Lega go le bjalo, eitše ge a lemoga gore Kenneth le Filomena ba ka ntle, a ba bulela mojako gore ba tsene.

Ba ile ba bona di sa tloga fase gore mosadi yoo o be a lla. Ge Kenneth a rapela gore ba thome go ithuta Beibele, mosadi yoo o ile a thoma go lla gape. Ka botho Kenneth le Filomena ba ile ba mmotšiša gore bothata ke eng.

Mosadi yoo o ile a hlalosa gore o be a rerile go ipolaya thapameng yeo. Ka gona, ge founo ya Kenneth e tsena, ke ge a be a ngwalela monna wa gagwe go mo hlalosetša lebaka la gagwe la go ipolaya. O ile a ba botša gore o gateletšegile monaganong. Ka gona ba ile ba mo kgothatša ba diriša Beibele. Kgothatšo yeo e ile ya phološa bophelo bja gagwe.

Kenneth o re: “Re ile ra leboga Jehofa ge a dirile gore re thuše mosadi yo yo a bego a imetšwe. Kudukudu re leboga ge a ile a re tutueletša gore re mo founele, mohlomongwe a diriša morongwa goba moya wa Gagwe o mokgethwa.” *

Na Kenneth le Filomena ba nepile ka go dumela gore Modimo o ile a tsena ditaba gare, mohlomongwe a diriša morongwa goba moya wa Gagwe o mokgethwa? Goba na e no ba taba ya gore Kenneth o founne ka nako ya maleba?

Ga re tsebe. Eupša seo re se tsebago ke gore Modimo o diriša barongwa ba gagwe go thuša batho ditabeng tša Modimo. Ka mohlala, Beibele e re Modimo o ile a diriša morongwa go hlahla moebangedi wa Mokriste e lego Filipi. Filipi o be a swanetše go thuša mohlankedi wa Moethiopia yo a bego a nyaka tlhahlo ditabeng tša Modimo.—Ditiro 8:26-31.

Madumedi a mantši a kgothaletša batho go dumela go dibopiwa tša moya tše di nago le matla a fetago a tlhago. Tše dingwe tša dibopiwa tšeo di hlaloswa e le dibopiwa tše botho tšeo di phethago thato ya Modimo goba tšeo di hlokomelago batho. Batho ba bantši ba dumela gore barongwa ba gona. Ba dumela le gore dibopiwa tšeo tša moya di ba tutuetša ka tsela e itšego yeo e ba holago. Lega go le bjalo, batho ba bangwe ba bantši ga ba dumele gore go na le barongwa.

Na ka nnete barongwa ba gona? Ge e ba go le bjalo, ba tšwa kae? Nnete ke efe ka barongwa? Na ba ka tutuetša bophelo bja gago? Anke re hlahlobeng bohlatse bja seo.

^ par. 8 Jehofa ke leina la Modimo bjalo ka ge le hwetšwa ka Beibeleng.—Psalme 83:18.