Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 5 2016

 TABA YA LETLAKALA LA KA NTLE | O KA HWETŠA KAE KHOMOTŠO?

Ka Moka re Nyaka go Homotšwa

Ka Moka re Nyaka go Homotšwa

Na o gopola o ewa ge o be o sa le ngwana? Mohlomongwe o ile wa itshega seatleng goba wa kgoboga letolo. Na o sa gopola kamoo mma wa gago a ilego a go homotša ka gona? Mohlomongwe o ile a go hlapiša nthong ke moka a go pantiša. O ile wa lla, eupša wa ikwa ga kaone ka morago ga gore a go botše mantšu a homotšago le gore a go gokarele. Nakong ya ge o be o sa le ngwana, o be o dula o homotšwa.

Eupša bophelo bo a thatafa ge re dutše re gola. Mathata a a gola gomme ga go sa le bonolo go hwetša khomotšo. Ka manyami, mathata a ge motho a godile ga se gantši a ka rarollwago ka go pantišwa le go gokarelwa ke mma. Ela hloko mehlala e sego kae.

  • Na o kile wa kwešwa bohloko ke go felelwa ke mošomo? Julian o re ge a rakwa mošomong, o ile a šala a gateletšegile kudu. O ile a ipotšiša gore: ‘Ke tla hlokomela bjang lapa la ka? Ke ka baka la’ng khamphani e nagana gore ga ke na mohola mola ke šomile ka thata ka mengwaga e mentši?’

  • Mohlomongwe o imetšwe ka baka la go senyegelwa ke lenyalo. Raquel o hlalosa ka gore: “Ge monna wa ka a be a ntlogela ke sa letela dikgweding tše 18 tše di fetilego, ke ile ka nyama. Go be go le bjalo ka ge eka pelo ya ka e tšwile diripa tše pedi. Ke be ke kwele bohloko mmeleng le maikwelong. Seo se ile sa ntšhoša.”

  • Mohlomongwe o na le bothata bjo bogolo bja tša maphelo bjo bo bonagalago bo sa kaonefale. O ka fela o ikwa ka tsela yeo mopatriareka Jobo a ilego a ikwa ka gona, yoo a ilego a lla ka gore: “Ke ganne bophelo; nka se phele go iša mehleng ya neng le neng.” (Jobo 7:16) Mohlomongwe o ikwa ka tsela yeo Luis e lego monna yo a nago le mengwaga e 80 a ilego a ikwa ka gona, o ipoletše ka gore: “Ka dinako tše dingwe ke ikwa ke nyaka go hwa.”

  • Goba mohlomongwe lehu la yo o mo ratago le dira gore o ikwe o nyaka go homotšwa. Robert o hlalosa gore: “Ke thomile ke sa kgolwe ge morwa wa ka a se na go hlokofala kotsing ya sefofane. Ke ile ka kwa bohloko, e lego bohloko bjoo Beibele e bo swantšhago le go ikwa eka o hlabja ke tšhoša e telele.”Luka 2:35.

Robert, Luis, Raquel le Julian ba ile ba hwetša khomotšo, gaešita le maemong ao a gateletšago. Ba ile ba e hwetša go Yo a ba phalago bohle, e lego Modimo Ramatlaohle. Modimo o nea bjang khomotšo? Na le wena a ka go nea khomotšo yeo o e nyakago?