Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 5 2016

 TABA YA LETLAKALA LA KA NTLE | O KA HWETŠA KAE KHOMOTŠO?

Kamoo Modimo a Neago Khomotšo

Kamoo Modimo a Neago Khomotšo

Moapostola Paulo o hlalosa Jehofa * e le “Modimo wa khomotšo yohle, yo a re homotšago ditlaišegong tša rena tšohle.” (2 Bakorinthe 1:3, 4) Ka go re’alo, Beibele e re kgonthišetša gore ga go na motho yo Modimo a ka palelwago ke go mo thuša le gore ga go na masetlapelo ao Tatago rena wa magodimong a ka palelwago ke go re homotša go ona.

Ke therešo gore re swanetše go dira se sengwe ge e ba re nyaka gore Modimo a re homotše. Ngaka e ka re thuša bjang ge e ba re se ra ya go yona? Moporofeta Amose o botšiša ka gore: “Na ba babedi ba ka sepela mmogo ba sa lakana?” (Amose 3:3) Ka baka leo Mangwalo a re kgothaletša gore: “Batamelang Modimo gomme o tla le batamela.”Jakobo 4:8.

Re ka kgonthišega bjang gore Modimo o tla re batamela? Sa pele, ke ka gobane o re botša leboelela gore o nyaka go re thuša. (Bona  lepokisi leo le sepedišanago le sehlogo se.) Sa bobedi, ka gobane re na le bohlatse bjo bo kgodišago bja batho bao Modimo a ilego a ba homotša, e lego batho ba kgonthe ba mehleng ya rena le ba mehleng e fetilego.

Kgoši Dafida o be a tlwaelane kudu le masetlapelo, go swana le ba bantši mehleng yeno bao ba nyakago gore Modimo a ba thuše. O kile a kgopela Jehofa ka gore: “Ekwa lentšu la ka ge ke go lopa ke llela gore o nthuše.” Na Modimo o ile a araba? Ee, o ile a araba. Dafida o okeditše ka gore: “Ke thušitšwe, moo pelo ya ka e hlalalago.”Psalme 28:2, 7.

TEMA YEO JESU A E KGATHAGO GO HOMOTŠENG BAO BA LLAGO

Modimo o be a rerile gore Jesu a kgathe tema e kgolo kudu tabeng ya go nea khomotšo. Gare ga mešomo e mengwe yeo Modimo a e filego Jesu, o be a swanetše go ‘tlema ba dipelo tše di kwelego bohloko’ le go ‘homotša bohle bao ba llago.’ (Jesaya 61:1, 2) Go etša ge go boletšwe e sa le pele, Jesu o be a kgahlegela ka mo go kgethegilego batho bao ba “lapišitšwego le go imelwa.”Mateo 11:28-30.

Jesu o homoditše batho ka go ba nea keletšo e bohlale, ka go ba swara ka botho, gomme mabakeng a mangwe, o ba homoditše ka go fodiša malwetši a bona. Ka letšatši le lengwe molephera o kile a kgopela Jesu a re: “Ge feela o rata, o ka ntlhwekiša.” Jesu ka go mo kwela bohloko, o ile a araba a re: “Ke a rata. Hlweka.” (Mareka 1:40, 41) Ke moka molephera o ile a fola.

 Lehono, Morwa wa Modimo ga a gona lefaseng gore a re homotše ka go lebanya. Eupša Tatagwe e lego Jehofa, “Modimo wa khomotšo yohle,” o tšwela pele a thuša bao ba nyakago thušo. (2 Bakorinthe 1:3) Ela hloko mekgwa e mene e megolo yeo Modimo a e dirišago go homotša batho.

  • Beibele. “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.”Baroma 15:4.

  • Moya o Mokgethwa wa Modimo. Ka moragonyana ga gore Jesu a hwe, phuthego ka moka ya Bokriste e ile ya tsena nakong ya khutšo. Ka baka la eng? E be e “sepela ka go boifa Jehofa le ka go homotšwa ke moya o mokgethwa.” (Ditiro 9:31) Moya o mokgethwa, e lego matla a Modimo a šomago, ke o matla kudu. Modimo a ka o diriša go homotša motho le ge e le ofe yo a lego boemong le ge e le bofe.

  • Thapelo. Beibele e eletša ka gore: “Le se ke la belaela ka selo.” Go e na le moo, e re: “Tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano.”Bafilipi 4:6, 7.

  • Bakristegotee le Rena e ka ba bagwera ba kgonthe bao re ka ithekgago ka bona dinakong tše thata. Moapostola Paulo o hlalosa badirišani ba gagwe e le ‘bao ba tlogago ba mo matlafatša’ dinakong tša ‘kgateletšego le ditlaišegong.’Bakolose 4:11; 1 Bathesalonika 3:7.

Eupša o ka ba o ipotšiša gore dilo tše ka moka di šoma bjang bophelong bja kgonthe. A re kweng seo se ilego sa diragalela batho bao ba ilego ba lebeletšana le mathata ao go boletšwego ka ona mathomong a sehlogo se. Ka go swana le bona, o ka utolla gore Modimo o sa dutše a phethagatša kholofetšo ye e homotšago, e rego: “Go etša monna [goba morwa] yo mmagwe a dulago a mo homotša, le nna ke tla dula ke le homotša ka mo go swanago.”Jesaya 66:13.

^ par. 3 Jehofa ke leina la Modimo bjalo ka ge le utolotšwe ka Beibeleng.