Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 4 2016

 BEIBELE E FETOŠA MAPHELO

Ke Paletšwe Gantši Pele Nka Atlega

Ke Paletšwe Gantši Pele Nka Atlega
  • NGWAGA WA MATSWALO: 1953

  • NAGA: AUSTRALIA

  • BOPHELO BJA PELE E EBA MOKRISTE: O BE A LEMALETŠE GO BOGELA DISWANTŠHO TŠA BATHO BA SA APARAGO

BOPHELO BJA KA BJA NAKONG E FETILEGO:

Ka 1949, tate o ile a hudugela Australia a etšwa Jeremane. O be a tlile go tlo nyaka mošomo diintasetering tša meepo le tša go fehla mohlagase gomme a dula motse-magaeng wa Victoria. O ile a nyalana le mma a le moo gomme nna ka belegwa ka 1953.

Ka morago ga mengwaga e sego kae, mma o ile a thoma go ithuta Beibele le Dihlatse tša Jehofa, ka gona dithuto tša Beibele ke tše dingwe tša dilo tšeo ke di gopolago tša bjaneng bja ka. Lega go le bjalo, tate o be a sa rate bodumedi le ge e le bofe. Mma o be a mo tšhaba ka ge a ile a thoma go ba šoro le go ba yo a boifišago. Mma o ile a tšwela pele a ithuta Beibele ka sephiring gomme a rata dithuto tša yona. Ge tate a be a sa tšwile, mma o be a botša nna le kgaetšedi ya ka seo a bego a ithuta sona. O ile a re botša ka lefase la nakong e tlago la Paradeise le kamoo re bego re tla thaba ka gona ge re ka latela ditekanyetšo tša Beibele tša boitshwaro.Psalme 37:10, 29; Jesaya 48:17.

Ke ile ka gapeletšega go tloga gae ge ke na le mengwaga e 18 ka baka la bošoro bja tate. Le ge ke be ke dumela seo mma a bego a nthutile sona ka Beibeleng, ke be ke sa tšeele godimo bohlokwa bja sona. Ka gona ke be ke sa phele go ya ka seo ke ithutilego sona. Ke ile ka thoma go šoma ke le ramohlagase meepong ya malahla gomme ka nyala ge ke na le mengwaga e 20. Re bile le morwedi wa pele ka morago ga mengwaga e meraro, ke moka ka naganišiša lefsa ka seo se bego se le bohlokwa bophelong bja ka. Ke ile ka thoma go ithuta Beibele le Dihlatse tša Jehofa ka ge ke be ke tseba gore Beibele e ka thuša lapa la rena. Eupša mosadi wa ka o be a ganetša Dihlatse kudu. Ka morago ga gore ke ye sebokeng sa tšona, o ile a re ke kgethe magareng ga go ithuta Beibele le go tšwa ka gae. Ka ge ke be ke ikwa ke se na matla, ke ile ka ineela mantšung a gagwe gomme ka kgaogana le Dihlatse. Ka morago ke ile ka itsholela go se phegelele seo ke bego ke tseba gore se nepagetše.

Ka letšatši le lengwe, bašomigotee le nna ba ile ba mpontšha diswantšho tša batho bao ba sa aparago. Di be di kgahliša e bile di selekiša, gomme di ile tša ntlogela ke imetšwe ke letswalo le molato. Ge ke gopola seo ke bego ke ithutile sona ka Beibeleng, ke be ke tloga ke nagana gore Modimo o tlo nkotla. Eupša ge ke dutše ke bogela diswantšho tša batho ba sa aparago, pono ya ka ka tšona e ile ya thoma go fetoga. Ge nako e dutše e eya, ke ile ka thoma go di lemalela goba go ba lekgoba la tšona.

Mengwageng e 20 e latetšego, ke ile ka tlogela ganyenyane-ganyenyane seo mma a bego a lekile go nthuta sona. Seo ke bego ke se tsenya ka monaganong se ile sa bonagala boitshwarong bja ka. Ke be ke rogana e  bile ke dira metlae e gobogilego. Ke ile ka thoma go ba le pono e kgopamego ka thobalano. Ke be ke ratana le basadi ba bangwe le ge ke be ke sa dula le mosadi wa ka. Ka letšatši lengwe ke ile ka itebelela seiponeng gomme ka re: ‘Ga ke go rate.’ Ke be ke itšhišingwa go e na le gore ke itlhomphe.

Lenyalo la rena le ile la thubega gomme bophelo bja ka bja šarakana. Ka gona, ke ile ka rapela Jehofa go tšwa pelong gomme ka thomološa go ithuta Beibele ka morago ga mengwaga e 20 ke kgaoditše. Ka nako yeo tate o be a hlokofetše gomme mma a kolobeditšwe, e le Hlatse ya Jehofa.

KAMOO BEIBELE E FETOTŠEGO BOPHELO BJA KA:

Bophelo bja ka bo be bo sa dumelelane le dithuto tša boitshwaro tša ka Beibeleng. Eupša lebakeng le ke be ke ikemišeditše go ba le khutšo ya monagano yeo e holofetšwago ke Beibele. Ke ile ka dira phetho ya go leka go hlwekiša tsela ya ka ya go bolela le gore ke se sa galefa o šoro. Ke ile ka ba ka phetha ka gore ke tlogele bophelo bjo bo gobogilego, ke kgaotše go petšha, go nwa kudu le go kgaotša go utswetša mothwadi wa ka.

Bao ke šomago le bona ba be ba sa kwešiše lebaka leo ka lona ke bego ke nyaka go dira diphetogo tše bjalo tše dikgolo kudu. Ba tšere mengwaga e meraro ba duletše go nthumola gore ke boele mekgweng ya ka ya kgale. Ge ke be nka boela ganyenyane mekgweng yeo, mohlomongwe ka go galefa goba go rogana, ba be ba goeletša ka tsela ya phenyo ba re: “Agaa! Joe yo re mo tsebago o boile.” Mantšu ao a be a nkweša bohloko kudu. Gantši ke be ke ikwa ke paletšwe.

Mošomong wa ka go be go tletše diswantšho tša batho ba sa aparago tšeo di bego di le ka tsela ya elektroniki le tšeo di phrinthilwego. Bašomigotee le nna ba be ba tlwaetše go romela diswantšho tše di gobogilego ba diriša dikhomphutha tša bona, go etša le ge nna ke be ke tlwaetše go dira bjalo nakong e fetilego. Ke be ke leka go tlogela mokgwa woo ke bego ke o lemaletše, eupša go bonagala ba be ba ikemišeditše go mpalediša. Ke ile ka kgopela motho yo a bego a ithuta Beibele le nna gore a nthekge le go nkgothatša. O ile a ntheetša a sa fele pelo ge ke dutše ke mo tšhollela sa mafahleng. O ile a mpontšha kamoo nka lwantšhago go lemalela ga ka diswantšho tše di gobogilego a diriša ditemana tše itšego tša Beibele, gomme a nkgothaletša gore ke tsome thušo ya Jehofa ka go phegelela thapelong.Psalme 119:37.

Ka letšatši le lengwe ke ile ka kgopela bašomigotee le nna gore re kopane. Ge ba se na go kgobokana, ke ile ka ba botša gore ba nee banna ba babedi piri, bao ba bego ba ipoletše gore ba lemaletše bjala. Sehlopha seo se ile sa hlaba lešata sa gana sa re: “O ka se dire seo! Banna ba ba thatafalelwa ke go lwantšha temalelo ya bona ya bjala!” Ke ile ka araba ka re: “Ee, le nna ke thatafalelwa ke go lwantšha temalelo ya ka.” Go tloga letšatšing leo go ya pele, banna bao ba ile ba lemoga ntwa ya ka ya go lwantšha diswantšho tša batho ba sa aparago gomme ba se sa hlwa ba nkgapeletša gore ke boele mekgweng ya ka ya kgale.

Ge nako e dutše e eya, ke ile ka fenya go lemalela ga ka go bogela diswantšho tša batho ba sa aparago, ke thušwa kudu ke Jehofa. Ka 1999, ke ile ka kolobetšwa ka ba Hlatse ya Jehofa. Ke be ke leboga gore ke filwe sebaka se sengwe sa gore ke phele bophelo bjo bo hlomphegago le bjo bo thabišago.

Ga bjale ke kwešiša lebaka leo ka lona Jehofa a hloilego dilo tšeo ke bego ke di rata ka nako e telele. Ka ge e le Tate yo lerato, o be a nyaka go ntšhireletša tshenyong yeo e bakwago ke diswantšho tša batho ba sa aparago. Mantšu a Diema 3:5, 6 a tloga a bolela therešo! Ditemana tšeo di re: “Bota Jehofa ka pelo ya gago ka moka gomme o se ke wa ithekga ka tlhaologanyo ya gago. Mo ele hloko ditseleng tša gago ka moka gomme yena o tla letliša ditsela tša gago.” Dithuto tša ka Beibeleng ga se ya ba tšhireletšo feela eupša di feleleditše di dirile gore ke atlege.Psalme 1:1-3.

KAMOO KE ILEGO KA HOLEGA KA GONA:

Nakong e fetilego, ke be ke itšhišingwa, eupša ga bjale ke a itlhompha e bile ke na le khutšo ya ka gare. Ke phela bophelo bjo bo hlwekilego e bile ke a kwa gore Jehofa o ntebaletše le gore o a nthekga. Ka ngwaga wa 2000, ke ile ka nyalana le Karolin, mosadi yo mobotse wa Mokriste yoo a ratago Jehofa go swana le nna. Legae la rena ke lefelo la khutšo. Ruri re tšea go ba karolo ya barwarre bao ba hlwekilego le bao ba nago le lerato ba Bakriste bao ba hwetšwago lefaseng ka moka e le tokelo e kgolo.

Ithute ka mo go oketšegilego

Ke Eng Seo se Diregago Thutong ya Beibele?

Lefaseng ka bophara, Dihlatse tša Jehofa di tsebega ka go etela batho magaeng a bona go ba swarela thuto ya mahala ya Beibele. Bona kamoo e swarwago ka gona.

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.

O ka Ganetša Teko!

O ka thušwa ke megato e meraro gore o be le boikemišetšo.