Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 4 2016

 TABA YA LETLAKALA LA KA NTLE | KANEGELO YA GO PHOLOGA GA BEIBELE

Kanegelo e Bohlokwa

Kanegelo e Bohlokwa

Ga go na sengwalwa sa bodumedi seo se swanago le Beibele. Ga go na puku e nngwe yeo e ilego ya tutuetša ditumelo tša batho ba bantši kudu ka nako e telele gakaakaa. Le gona, ga go na puku e nngwe yeo e ilego ya hlahlobišišwa le go swaiwa diphošo kudu go swana le yona.

Ka mohlala, diithuti tše dingwe di belaela gore Dibeibele tša mehleng yeno ke dikopi tšeo di ka botwago tša dingwalwa tša mathomong. Moprofesara yo mongwe wa dithuto tša bodumedi o re: “Re tloga re sa kgodišege gore re ngwalolotše sengwalwa sa mathomong ka mo go nepagetšego. Dikopi feela tšeo re nago le tšona ke tšeo di tletšego diphošo, gomme bontši bja tšona di ngwadilwe ka morago ga ge dikopi tša mathomong di be di na le mengwaga e makgolo di ngwadilwe. Go molaleng gore ga di swane le tšona ka ditsela tše dintši.”

Ba bangwe ba belaela go nepagala ga Beibele ka baka la dithuto tša madumedi ao ba lego go ona. Ka mohlala, Faizal o be a rutilwe ke lapa labo leo e sego la Bakriste gore Beibele ke puku e kgethwa, eupša e fetošitšwe. O re: “Ka baka leo, ke be ke belaela ge batho ba be ba nyaka go bolela le nna ka Beibele. Go ba gona, ba be ba sa swara dikopi tša mathomong tša Beibele. Ba be ba swere tšeo di fetošitšwego!”

Na go na le taba gore Beibele e fetošitšwe goba ga se ya fetošwa? Ela hloko dipotšišo tše di latelago: Na o ka dumela dikholofetšo tše di homotšago tša Beibele tša bokamoso ge e ba o sa tsebe gore dikholofetšo tšeo di be di le gona dingwalweng tša mathomong? (Baroma 15:4) Na o be o ka diriša melao ya motheo ya Beibele go dira diphetho tša bohlokwa tša mabapi le mošomo, lapa goba borapedi ge e ba Dibeibele tša mehleng yeno e be e le dikopi tše di fošagetšego tšeo di ngwadilwego ke batho?

Gaešita le ge dipuku tša mathomong tša Beibele di hweletše, re ka hlahloba dikopi tša bogologolo—go akaretša le dingwalwa tše diketekete tša Beibele. Dingwalwa tšeo di phologile bjang go bola, maiteko a go ganetšwa le go fetošwa ga seo se ngwadilwego? Go phologa ga dingwalwa tšeo go ka thuša bjang gore o kgodišege ka go nepagala ga Beibele ya mehleng yeno yeo o nago le yona? Ela hloko dikarabo tša dipotšišo tšeo kanegelong e latelago ya go phologa ga yona.