Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 4 2016

Na o Ikemišeditše go Bapiša Ditumelo tša Gago le Beibele

Na o Ikemišeditše go Bapiša Ditumelo tša Gago le Beibele

NA O ipitša Mokriste? Ge e ba go le bjalo, o gare ga batho ba fetago dibilione tše pedi lefaseng—mo e nyakilego go ba o tee go ba bararo—bao ba ipitšago balatedi ba Kriste. Lehono, go na le madumedi a dikete ao a bitšwago a Bokriste, fela a arogantšwe ke dithuto le dipono tšeo di thulanago. Ka gona go ka direga gore ditumelo tša gago di fapana kudu le tša ba bangwe bao ba ipitšago gore ke Bakriste. Na go na le taba gore o dumela’ng? Ee, go na le taba—ge e ba o nyaka go phela ka tsela ya Bokriste yeo e rutwago ka Beibeleng.

Balatedi ba pele ba Jesu Kriste ba ile ba tsebja e le “Bakriste.” (Ditiro 11:26) Go be go sa hlokagale gore ba hlaolwe ka maina a mangwe ka ge go be go na le tumelo e tee feela ya Bokriste. Bakriste ka botee ba ile ba latela dithuto le ditaelo tša Mothomi wa Bokriste e lego Jesu Kriste. Go thwe’ng ka kereke yeo o e tsenago? Na o dumela gore e ruta seo Kriste a bego a se ruta le seo balatedi ba pele ba Kriste ba bego ba se dumela? O ka kgonthišetša seo bjang? Go na le tsela e tee feela yeo e ka go thušago gore o tsebe—o ka diriša Beibele go hlahloba seo.

Ela hloko se: Jesu Kriste o be a hlompha Mangwalo  kudu e le Lentšu la Modimo. O be a sa dumelelane le bao ba bego ba nyenyefatša dithuto tša Beibele ka go etiša pele ditlwaelo tša batho. (Mareka 7:9-13) Ka gona, ga go pelaelo gore re ka phetha ka gore balatedi ba therešo ba Jesu ba tla thea ditumelo tša bona Beibeleng. Ka gona, Mokriste yo mongwe le yo mongwe o dira gabotse go ipotšiša gore, ‘Na dithuto tša kereke ya ka di dumelelana le Beibele?’ E le go araba potšišo yeo, ke ka baka la’ng o sa bapiše seo kereke ya gago e se rutago le seo ge e le gabotse Beibele e se bolelago?

Jesu o itše go rapela ga rena Modimo go swanetše go thewa therešong, therešo yeo e hwetšwa ka Beibeleng. (Johane 4:24; 17:17) Le gona moapostola Paulo o itše go phologa ga rena go ithekgile ka gore re fihle “tsebong e nepagetšego ya therešo.” (1 Timotheo 2:4) Ka gona, go bohlokwa gore ditumelo tša rena di thewe therešong e nepagetšego ya Beibele. Go phologa ga rena go tloga go ithekgile ka yona!

KAMOO RE KA BAPIŠAGO DITUMELO TŠA RENA LE BEIBELE

Re go laletša gore o bale dipotšišo tše di latelago tše tshela gomme o bone kamoo Beibele e arabago dipotšišo tšeo. Lebelela ditemana tša Beibele tšeo di bontšhitšwego gomme o naganišiše ka dikarabo. Ke moka ipotšiše gore, ‘Dithuto tša kereke ya ka di bjang ge di bapišwa le seo Beibele e se bolelago?’

Dipotšišo tše tše dikopana di ka go thuša gore o bapiše ditumelo tša gago le Beibele. Na o ikemišeditše go bapiša dithuto tše dingwe tša kereke ya gago le seo Beibele e se bolelago? Dihlatse tša Jehofa di ka thabela go go thuša gore o hlahlobe therešo e kwagalago ya Beibele. Ke ka baka la’ng o sa kgopele yo mongwe wa Dihlatse gore a ithute Beibele le wena mahala? Goba o ka tsena Wepesaeteng ya rena ya jw.org/nso.

 

Ithute ka mo go oketšegilego

Na Madumedi ka Moka a a Swana? Na Modimo o a Amogela ka Moka?

Dilo tše pedi tšeo di bolelwago ka Beibeleng di nea karabo.

Dihlatse tša Jehofa di Dumela Eng?

Hwetša ka boripana ditumelo tša rena tše 15 tša motheo.