Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 3 2016

 BEIBELE E FETOŠA MAPHELO

Ke Ile ka Ithuta go Itlhompha le go Hlompha Basadi

Ke Ile ka Ithuta go Itlhompha le go Hlompha Basadi
  • NGWAGA WA MATSWALO: 1960

  • NAGA: FORA

  • BOPHELO BJA PELE E EBA MOKRISTE: E BE E LE YO ŠORO, E LE LEKGOBA LA DIHLARETAGI E BILE A SA HLOMPHE BASADI

BOPHELO BJA KA BJA NAKONG E FETILEGO:

Ke belegetšwe Mulhouse, ka leboabohlabela bja Fora, torotswaneng ya batho bao ba šomago yeo e tsebegago ka bošoro. Ge ke be ke sa gola, tikologong ya gešo go be go tletše dintwa tše šoro ka malapeng. Ka lapeng lešo, banna ba be ba nyenyefatša basadi e bile ba sa nyake go kwa seo ba se bolelago. Ke be ke rutilwe gore mosadi o swanetše go ba ka khitšhing, a hlokomele monna le bana.

Ke gotše ga boima. Ge ke be ke na le mengwaga e lesome, tate o ile a bolawa ke go nwa bjala ka tsela e feteletšego. Ka morago ga mengwaga e mehlano, buti wa ka yo mogolo o ile a ipolaya. Ka wona ngwaga woo, ke ile ka bona ge yo mongwe wa leloko a bolaya yo mongwe nakong ya ge go be go lwewa ka gae gomme ke ile ka tšhoga kudu. Ditho tša lapa di ile tša nthuta go šomiša dithipa le dithunya le gore ke lwe ge go be go hlokagala. Ka ge ke be ke le lesogana leo le tshwenyegilego maikwelong, ke ile ka thoma go ithala di-tattoo mmeleng le go nwa bjala.

Ge ke be ke na le mengwaga e 16, ke be ke enwa mapotlelo a 10 go ya go a 15 a bjala letšatši le lengwe le le lengwe, gomme go se go ye kae ka thoma go šomiša dihlaretagi. Ke ile ka rekiša dikgerekgere ka ba ka thoma go utswa e le gore ke kgone go reka dilo tšeo. Ge ke na le mengwaga e 17, ke be ke šetše ke etšwa kgolegong. Ke ile ka golegwa ka makga a 18 ka baka la go utswa le go senya.

Boemo bja ka bo ile bja mpefala mathomong a mengwaga ya ka ya bo-20. Ke be ke kgoga diphuthelwana tše e ka bago tše 20 tša patše ka letšatši le go diriša heroin le dihlaretagi tše dingwe. Ke nyakile go hwa ka makga a mantši ka baka la go diriša dihlaretagi ka tsela e feteletšego. Ke ile ka thoma go rekiša dihlaretagi, ka gona ke be ke dula ke itlhamile ka dithipa le dithunya. Ka nako e nngwe, ke be ke leka go thunya monna yo mongwe, eupša ka mahlatse kolo e ile ya betha tšhisepere ya lepanta la gagwe! Ge ke be ke na le mengwaga e 24, mma o ile a hlokofala gomme seo sa oketša kgalefo ya ka. Batho bao ba bego ba ntšhaba, ba be ba tshelela ka lehlakoreng le lengwe la seterata ge ba mpona ke tšwelela. Ke be ke fetša mafelobeke a mantši ke le kgolegong ka baka la dintwa goba ke le sepetlele gore ke yo rokwa dintho.

Ge ke na le mengwaga e 28, ke ile ka nyala. Ka baka la tsela yeo ke bego ke phela ka yona, ke be ke sa sware mosadi wa ka ka tlhompho. Ke be ke mo roga le go mmetha. Re be re sa dire selo mmogo bjalo ka banyalani. Ke be ke ipotša gore go lekane ge ke mo fa mabenyabje a mantši ao ke a utswitšego. Ke moka go ile gwa direga selo se sengwe seo ke bego ke sa se letela. Mosadi wa ka o ile a thoma go ithuta Beibele le Dihlatse tša Jehofa. Ka morago ga thuto ya gagwe ya mathomo, o ile a kgaotša go kgoga, a  se sa amogela tšhelete yeo ke e utswitšego gomme a mpušetša mabenyabje ao ke bego ke mo file ona. Ke be ke galefile kudu. Ke be ke mo ganetša go ithuta Beibele gomme ke fela ke mmudulela ka muši wa sekerete sefahlegong. Le gona ke be ke mo nyatšiša ka batho mo motseng.

Bošegong bjo bongwe ge ke be ke tagilwe kudu, ke ile ka fiša folete ya rena. Mosadi wa ka o ile a phološa nna le morwedi wa rena wa mengwaga e mehlano dikgabong tša mollo. Ge bjala bo tšwile, ke ile ka ipona molato kudu. Ka pelong ke be ke ikwa eka Modimo a ka se tsoge a ntebaletše. Ke ile ka gopola mantšu a moruti yo mongwe a gore badiradibe ba ya diheleng. Le gona ngaka ya ka ya tša monagano e ile ya mpotša gore: “Go fedile ka wena! O ka se sa loka.”

KAMOO BEIBELE E FETOTŠEGO BOPHELO BJA KA:

Ka morago ga gore folete ya rena e fse, re ile ra yo dula le batswadi ba mosadi wa ka. Ge Dihlatse di etla go etela mosadi wa ka, ke ile ka di botšiša gore: “Na Modimo a ka ntebalela dibe tša ka ka moka?” Di ile tša mpontšha lengwalo la 1 Bakorinthe 6:9-11 ka Beibeleng. Temana yeo e bolela ka mehuta ya boitshwaro bjo Modimo a bo hloilego, eupša e tlaleletša ka gore: “Seo ke se ba bangwe ba lena le bego le le sona.” Mantšu ao a ile a nkgonthišetša gore go fetoga go a kgonega. Ke moka Dihlatse di ile tša nkgonthišetša gape gore Modimo o a nthata ka go mpontšha lengwalo la 1 Johane 4:8. Ka ge ke be ke kgothaditšwe ke seo Dihlatse di mpoditšego sona, ke ile ka di kgopela gore di ithute Beibele le nna gabedi mo bekeng, gomme ka thoma go ya dibokeng tša tšona tša Bokriste. Ke be ke rapela Jehofa ka mehla.

Lebakeng la kgwedi feela, ke ile ka dira phetho ya go tlogela dihlaretagi le bjala. Go se go ye kae, ke ge ke šetše ke ekwa gore mmele wa ka o a lwa! Ke ile ka tshwenywa ke ditoro tša go tšhoša, ke opša ke hlogo, ke swarwa ke dihlabi le go ba le maswao a mangwe a bolwetši. Lega go le bjalo, ka nako e swanago ke be ke ekwa eka Jehofa o ntshwere ka seatla e bile o a mmatlafatša. Ke ile ka ikwa kamoo moapostola Paulo a ilego a ikwa ka gona. Ge a bolela ka thušo yeo Modimo a mo filego yona, o ngwadile gore: “Dilong tšohle ke na le matla ka baka la yo a mphago matla.” (Bafilipi 4:13) Ge nako e dutše e eya, ke ile ka kgona go tlogela go kgoga motšoko.2 Bakorinthe 7:1.

Beibele ga se ya nthuša feela gore ke kgone go laola bophelo bja ka, eupša e bile e kaonefaditše lapa la rena. Tsela yeo ke bego ke swara mosadi wa ka ka yona e ile ya fetoga. Ke ile ka thoma go mo hlompha kudu le go diriša mantšu a rego “hle” le “ke a leboga.” Le gona ke ile ka thoma go ba tate yo kaone go morwedi wa rena. Ka morago ga go fetša ngwaga ke ithuta Beibele, ke ile ka latela mohlala wa mosadi wa ka ka go neela bophelo bja ka go Jehofa gomme ka kolobetšwa.

KAMOO KE ILEGO KA HOLEGA KA GONA:

Ke kgodišegile gore melao ya motheo ya Beibele e phološitše bophelo bja ka. Ba leloko bao e sego Dihlatse tša Jehofa le bona ba lemoga gore nkabe ke bolailwe ke go diriša dihlaretagi gampe goba ke hwile ka baka la go rata dintwa.

Bophelo bja lapa la ka bo fetotšwe ke dithuto tša Beibele ka mo go feletšego ge di ntlhalosetša ka boikarabelo bja ka ke le monna yo a nyetšego e bile ke le tate. (Baefeso 5:25; 6:4) Re ile ra thoma go dira dilo mmogo re le lapa. Ga bjale, go e na le gore ke gapeletše mosadi wa ka gore a šome ka khitšhing, ke thabela go mo thekga mešomong ya gagwe ya go ruta batho Beibele ka nako e tletšego. Le gona, yena o thabela go nthekga karolong ya ka ya go etelela pele phuthego.

Taba ya gore Jehofa Modimo o a nthata le kwelobohloko ya gagwe di nkgomile kudu. Ke tloga ke thabela go ruta batho ba bangwe dika tša Modimo, kudukudu bao ba lebelelwago ba se sa na mohola, ka ge le nna ba bantši ba be ba ntebelela ka tsela yeo. Ke a tseba gore Beibele e na le matla a go thuša yo mongwe le yo mongwe go phela bophelo bjo bo hlwekilego le bjo bo nago le morero. Beibele ga se ya nthuta feela go rata ba bangwe le go ba hlompha, bobedi banna le basadi, eupša e bile e nthutile go itlhompha.

Ithute ka mo go oketšegilego

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.