Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  No. 2 2017

 TABA YA LETLAKALA LA KA NTLE | NA O TLA AMOGELA MPHO E KGOLOKGOLO YA MODIMO?

Mpho ya Moswananoši

Mpho ya Moswananoši

MOTŠHENE wa go betla phentshele wa sebopego sa sekepe wo o swerwego ke Jordan o bonagala o tlwaelegile. Lega go le bjalo, ke se sengwe sa dilo tšeo a di tšeelago godimo tšeo a nago le tšona. Jordan o hlalosa gore: “Ke o filwe ke Russell, yo e bego e le mogwera wa lapa lešo yo a tšofetšego, ke sa le yo monyenyane kudu.” Ka morago ga lehu la Russell, Jordan o ile a kwa gore Russell o kgathile tema e bohlokwa kudu bophelong bja makgolo le rakgolo ba gagwe gotee le bja batswadi ba gagwe, e bile a ba kgothatša dinakong tša mathata. Jordan o re: “Ka ge bjale ke kwele mo gontši ka Russell, ke tšea mpho ye e nyenyane e le bohlokwa kudu go feta le ge e le neng pele.”

Ka ge re bone ka seo se diragaletšego Jordan, batho ba bangwe ba ka tšea mpho e le bohlokwa goba e se bohlokwa. Lega go le bjalo, motho yo a amogelago mpho yo a nago le tebogo, a ka e tšea e le bohlokwa kudu e bile e le ya moswananoši. Beibele e hlalosa mpho ya bohlokwahlokwa ka mantšu a ao a tlwaelegilego, ao a rego: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”Johane 3:16.

Mpho yeo e ka nea motho yo a e amogelago bophelo bjo bo sa felego! Na go na le mpho yeo e ka e phalago? Le ge ba bangwe ba ka ba ba sa lemoge bohlokwa bja mpho yeo, Bakriste ba therešo ba e tšeela “godimo kudu.” (Psalme 49:8; 1 Petro 1:18, 19) Lega go le bjalo, ke ka baka la’ng Modimo a ile a gafa bophelo bja Morwa wa gagwe e le mpho bakeng sa lefase?

Moapostola Paulo o hlalosa lebaka la seo ka mantšu a rego: “Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle.” (Baroma 5:12) Motho wa pele e lego Adama, o dirile sebe ka go se kwe Modimo ka boomo gomme ka go re’alo a hwetša kotlo ya lehu. Adama o dirile gore ditlogolo tša gagwe goba batho ka moka, ba welwe ke lehu.

 “Moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.” (Baroma 6:23) E le gore Modimo a lokolle batho kotlong ya lehu, o ile a romela Morwa wa gagwe e lego Jesu Kriste lefaseng gore a tlo gafa bophelo bja gagwe bjo bo phethagetšego bakeng sa lefase. Motheong wa sehlabelo seo, se se tsebjago e le “topollo,” bohle bao ba dumelago go Jesu ba tla hwetša bophelo bjo bo sa felego.Baroma 3:24.

Ge Paulo a bolela ka ditšhegofatšo ka moka tšeo Modimo a di neago barapedi ba gagwe ka Jesu Kriste, o re: “A go lebogwe Modimo bakeng sa mpho ya gagwe e sa lefelelwego le e sa hlalosegego.” (2 Bakorinthe 9:15) Ruri topollo ke e kgahlišago kudu moo e lego gore ga re kgone go e hlalosa ka botlalo. Lega go le bjalo, gare ga dimpho ka moka tše dibotse tšeo Modimo a di neilego batho, ke ka baka la’ng topollo e le ya bohlokwahlokwa? Ke ka tsela efe e sa swanego le dimpho le ge e le dife tšeo di tšwago go Modimo? * Le gona, re swanetše go arabela bjang topollong? Re go laletša gore o bale dikarabo tša ka Beibeleng tša dipotšišo tšeo dihlogong tše pedi tše di latelago.

^ par. 8 Jesu o “gafile moya wa gagwe bakeng sa rena” ka go rata. (1 Johane 3:16) Lega go le bjalo, ka ge sehlabelo se e be e le karolo ya morero wa Modimo, lelokelelo le la dihlogo le bolela kudu ka tema yeo Modimo a e kgathago e le Monei wa topollo.