Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  No. 2 2017

 TABA YA LETLAKALA LA KA NTLE | NA O TLA AMOGELA MPHO E KGOLOKGOLO YA MODIMO?

O tla Arabela Bjang Mphong e Kgolokgolo ya Modimo?

O tla Arabela Bjang Mphong e Kgolokgolo ya Modimo?

“Lerato leo Kriste a nago le lona le a re tutuetša . . . O hwetše bohle gore bao ba phelago ba se sa hlwa ba iphelela, eupša ba phelele yena yo a ba hwetšego.”2 Bakorinthe 5:14, 15.

MPHO ya moswananoši e swanetše go re tutuetša gore re leboge. Jesu o gateletše thuto yeo ka morago ga gore a fodiše banna ba lesome bao ba bego ba swerwe ke bolwetši bjo šoro bjo bo bego bo sa alafege ka nako yeo. Yo mongwe wa banna bao ba lesome o ile “a boela morago a reta Modimo ka lentšu le le hlabošago.” Jesu o itše: “Na ga se gwa hlwekišwa ba lesome? Bjale ba bangwe ba senyane ba kae?” (Luka 17:12-17) Re ithuta’ng? Ruri re ka lebala kapejana ditiro tše botho tšeo ba bangwe ba re direlago tšona!

Topollo ga e swane le mpho le ge e le efe. Ke mpho yeo e fetago tšohle tšeo di kilego tša newa. Ka gona, o swanetše go arabela bjang go seo Modimo a go diretšego sona?

  • Tseba Monei wa yona. Topollo ga e fo tlišetša batho bophelo bjo bo sa felego ka go itiragalela. Go e na le moo, ge Jesu a be a rapela Modimo o itše: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Ge motho a be a ka go botša gore monna yo a itšego o phološitše bophelo bja gago ge o be o sa le ngwana, na o be o ka se rate go kwa ka mo go oketšegilego ka monna yoo le lebaka leo ka lona a go phološitšego? Jehofa Modimo, yo a neilego  mpho ya topollo yeo e phološago bophelo, ga a nyake feela gore o tsebe gore ke yena mang eupša o nyaka le gore o be mogwera wa gagwe wa kgauswi. Beibele e kgothaletša gore: “Batamelang Modimo gomme o tla le batamela.”Jakobo 4:8.

  • Dumela topollong. “Yo a dumelago go Morwa o na le bophelo bjo bo sa felego.” (Johane 3:36) Go dumela go bolela’ng? Go bolela go tšea kgato; go nyakega gore motho a tšee kgato go bontšha gore o dumela topollong. (Jakobo 2:17) Ke go tšea kgato ya mohuta mang? Mpho e ba ya gago ge o bontšha gore o a e amogela. Ka gona o swanetše go bontšha gore o amogela topollo. Bjang? Ithute kamoo Modimo a nyakago o phela ka gona gomme o dire sona seo. * Rapela Modimo gore a go lebalele le go rapelela letswalo le le hlwekilego. Batamela Modimo o kgodišegile gore topollo e nea kgonthišetšo ya bokamoso bja ka mo go sa felego bja khutšo, polokego le katlego bakeng sa bohle bao ba dumelago go yona!Baheberu 11:1.

  • Eba gona Segopotšong sa lehu la Jesu. Jesu o hlomile tiragalo ya ngwaga le ngwaga ya go re gopotša ka tokišetšo ya topollo. Ge a bolela mabapi le go gopola tiragalo yeo, o itše: “Dulang le dira se e le go nkgopola.” (Luka 22:19) Dihlatse tša Jehofa di tla gopola lehu la Jesu ka Labobedi la di-11 tša April 2017, ka morago ga ge letšatši le sobetše. Lenaneo la gona, leo le tšeago mo e ka bago iri, le tla akaretša polelo yeo e hlalosago bohlokwa bja lehu la Jesu le kamoo le tlišago mehola ya gona bjale le ya nakong e tlago. Ngwagola, batho bao e ka bago ba dimilione tše 20 lefaseng ka moka ba bile gona Segopotšong. Re go laletša ka borutho gore o be le rena ge re tla be re arabela mphong e kgolokgolo ya Modimo.

^ par. 7 Tsela e kaonekaone ya go tseba Modimo le go batamela go yena ke go ithuta Lentšu la gagwe e lego Beibele. Ithute tsela ya go dira se ka go kgopela Hlatse ya Jehofa goba ka go ya Wepesaeteng ya rena ya www.jw.org/nso.