Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 2 2016

Ruri go kwa Temošo Yeo e Newago e sa le Pele go ka go Phološa!

Ruri go kwa Temošo Yeo e Newago e sa le Pele go ka go Phološa!

KA December 26, 2004, tšhišinyego ya lefase ya bogolo bja 9,1 e ile ya šišinya sehlakahlaka sa Simeulue, seo se lego kgauswi le lebopo la ka leboabodikela bja Sumatra, Indonesia. Batho ka moka bao ba bego ba le lebopong ba be ba lebeletše lewatleng. Maphoto a be a sobelela kua gare ga lewatle ka tsela yeo e sa tlwaelegago. Gateetee, ke ge batho ka moka ba thoma go kitimela mebotong, ba goeletša ba re, “Smong! Smong!” e lego kamoo ba bitšago tsunami ka gona. Pele go fela metsotso e 30, maphoto ao a ile a boa ka matla a šwahlela lebopong, a senya magae a mantši le metsana e mentši.

Sehlakahlaka sa Simeulue e bile lefelo la pele leo le ilego la hlaselwa ke tsunami ye yeo e ilego ya senya kudu. Lega go le bjalo, go badudi ba 78 000, go ile gwa hwa ba 7 feela. Ke ka baka la’ng go se gwa hwa batho ba bantši ge go bapišwa le bao ba hwilego ditsunaming tše dingwe? * Badudi ba sehlakahlakeng seo ba tlwaetše gore: ‘Ge e ba lefase le šišinyega ka matla gomme maphoto a lewatle a sobelela kua gare, tšhabela mebotong, ka gobane go se go ye kae maphoto a tlo boa ka matla.’ Batho ba sehlakahlakeng sa Simeulue ba be ba ithutile ka seo se bego se diregile nakong e fetilego go lemoga ge tsunami e etla ka go bona phetogo yeo e diregago lewatleng. Go kwa temošo yeo e newago e sa le pele go ile gwa ba phološa.

Beibele e bolela ka masetlapelo ao a tlago, e lego “masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.” (Mateo 24:21) Eupša masetlapelo ao ga se go fedišwa ga polanete ya Lefase ke ditiro tša batho tšeo di senyago lefase goba dikotsi tša tlhago—ka gobane morero wa Modimo ke gore lefase le dule le le gona go iša mehleng ya neng le neng. (Mmoledi 1:4) Go e na le moo, masetlapelo a magolo ke nako yeo ka yona Modimo a tlago “go senya bao ba senyago lefase.” Modimo o tla fediša bobe ka moka le tlaišego. (Kutollo 11:18; Diema 2:22) Ruri yeo e tla ba tšhegofatšo e kgolo!

Go feta moo, phedišo yeo e tlago e ka se fediše batho bao ba se nago molato go swana le ditsunami, ditšhišinyego tša lefase goba go thuthupa ga dithabamollo. Beibele e re “Modimo ke lerato” gomme yena Modimo yoo leina la gagwe e lego Jehofa, o holofetša gore “baloki bona e tla ba beng ba lefase, ba tla dula mo go lona ka mo go sa felego.” (1 Johane 4:8; Psalme 37:29) Ka gona, o ka phologa bjang masetlapelo ao a magolo le go tlo thabela ditšhegofatšo tšeo Modimo a re holofeditšego tšona? Sephiri ke se: Ekwa temošo yeo e newago e sa le pele!

ŠETŠA DIPHETOGO TŠEO DI DIREGAGO LEFASENG

Ga re tsebe letšatši leo ka lona Modimo a tlago go fediša bobe ka moka le tlaišego, ka gobane Jesu o itše: “Ge e le mabapi le letšatši leo le iri, ga go na yo a tsebago, gaešita le barongwa ba magodimo le ge e le Morwa ga ba tsebe, eupša ke Tate feela yo a tsebago.” Lega go le bjalo, Jesu o re kgothaleditše gore re ‘dule re phakgame.’ (Mateo 24:36; 25:13) Re phakgametše eng? Beibele e re hlalosetša ka maemo ao a tla diregago pele Modimo  a tliša bofelo. Go etša ge badudi ba sehlakahlaka sa Simeulue ba ile ba lemošwa ke ge maphoto a sobelela kua gare ga lewatle gore tsunami e a tla, le go fetoga ka lebelo ga ditiragalo tša lefase go re nea sešupo sa gore bofelo bo kgauswi. Lepokisi leo le sepedišanago le sehlogo se le bolela ka tše dingwe tša ditiragalo tšeo di diregago ka nako e tee lefaseng, tšeo Beibele e bolelago ka tšona.

Ke therešo gore a mangwe a maemo ao goba ditiragalo tšeo di bontšhitšwego lepokising leo di kile tša direga ka tekanyo e itšego nakong e fetilego. Eupša Jesu o itše ge re bona “dilo tše ka moka,” re tla tseba gore bofelo bo batametše. (Mateo 24:33) Ipotšiše gore: ‘Ke neng historing moo dilo ka moka tšeo di boletšwego sehlogong se (1) di ilego tša direga lefaseng ka moka, (2) di ilego tša direga ka nako e tee, e bile (3) di ilego tša mpefalela pele?’ Go molaleng gore dilo tšeo ka moka di direga mehleng yeno.

BOHLATSE BJA GORE MODIMO O A RE RATA

Yo e kilego ya ba mopresidente wa United States o itše: “Didirišwa tša go nea temošo e sa le pele . . . di phološa maphelo.” Ka morago ga tsunami yeo ya 2004, go ile gwa hlangwa sedirišwa seo se tla lemošago badudi ba tikologong yeo ka tsunami yeo e ka bago gona, e le go leka go thibela gore go se ke gwa tla gwa lobja maphelo. Ka mo go swanago, Modimo o dirile tokišetšo ya gore batho ba newe temošo e sa le pele, pele bofelo bo etla. Beibele e boletše e sa le pele gore: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mateo 24:14.

Ngwageng o fetilego, Dihlatse tša Jehofa di feditše diiri tša ka godimo ga dibilione tše 1,9 di botša batho molaetša wa Beibele dinageng tše 240 ka maleme a ka godimo ga a 700. Tiragalo ye ya mehleng yeno e nea bohlatse bjo matla bja gore bofelo bo batametše. Ka ge Dihlatse tša Jehofa di rata baagišani ba tšona, ga di senye nako ge di le gare di lemoša ba bangwe ka letšatši la Modimo la kahlolo leo le batamelago ka lebelo. (Mateo 22:39) Taba ya gore tsebišo ye e ka go hola ke bohlatse bja gore Jehofa o a go rata. Gopola gore “[Modimo] ga a rate gore go fedišwe le ge e le  mang, eupša o rata gore bohle ba fihlelele boitsholo.” (2 Petro 3:9) Na o tla bontšha gore o leboga lerato la Modimo gomme wa kwa temošo yeo e newago e sa le pele?

TŠHABELA MOO GO ŠIRELETŠEGILEGO!

Gopola gore badudi ba metsana ya sehlakahlakeng sa Simeulue ya kgauswi le lebopong ba ile ba tšhabela mebotong gore ba šireletšege ge ba be ba bona maphoto a sobelela kua gare ga lewatle; ga se ba ka ba leta go fihlela maphoto a boa. Ba ile ba phološwa ke go tšea kgato ka go se dikadike. E le gore le wena o phologe masetlapelo ao a tlago, o swanetše go kwa ditemošo tša Modimo pele o šiwa ke nako. Bjang? Moporofeta Jesaya o ile a budulelwa gore a ngwale ka taletšo yeo e kgahlišago ya go laletša batho “mehleng ya bofelo,” e lego nako yeo re phelago go yona. Taletšo yeo e re: “Etlang re rotogeleng thabeng ya Jehofa, . . . o tla re ruta ditsela tša gagwe gomme ra sepela mebileng ya gagwe.”—Jesaya 2:2, 3.

Go rotogela thabeng go go nea sebaka sa go bona dilo o le kua godimo le gore o šireletšege. Ka tsela e swanago, go tseba ditsela tša Modimo ka go bala Beibele go thuša batho ba dimilione lefaseng ka bophara lehono gore ba fetoše maphelo a bona. (2 Timotheo 3:16, 17) Ka go dira bjalo, ba thoma go “sepela mebileng [ya Modimo]” gomme a ba amogela le go ba šireletša.

Na o tla amogela taletšo yeo gomme Modimo a go šireletša ka lerato mehleng ye e hlobaetšago? Re go kgothaletša gore o hlahlobišiše bohlatse bja Mangwalo ba gore re phela ‘mehleng ya bofelo’ bjo bo lego lepokising leo le sepedišanago le sehlogo se. Dihlatse tša Jehofa tša lefelong la geno di tla thabela go go thuša go kwešiša gabotse mangwalo ao a lego lepokising leo le kamoo a ka go thušago ka gona. Goba mo gongwe o ka hwetša dikarabo tša dipotšišo tšeo o ipotšišago tšona ka go ya Wepesaeteng ya rena ya www.jw.org/nso. Lebelela ka tlase ga DITHUTO TŠA BEIBELE > DIPOTŠIŠO TŠA BEIBELE DI A ARABJA.

^ ser. 3 Tsunami ye ya 2004 e ile ya bolaya batho ba ka godimo ga ba 220 000—e lego e nngwe ya ditsunami tšeo di sentšego kudu tšeo di begilwego historing.

Ithute ka mo go oketšegilego

Na re Phela “Mehleng ya Bofelo”?

Ela hloko kamoo ditiro le boitshwaro bja batho bjo bo re dikologilego bo hlatselago gore ga bjale re phela “mehleng ya bofelo” yeo Beibele e boletšego ka yona e sa le pele.