Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  No. 2 2016

 TABA YA LETLAKALA LA KA NTLE

Ke ka Baka la Eng Jesu a Ile a Tlaišega le go Hwa?

Ke ka Baka la Eng Jesu a Ile a Tlaišega le go Hwa?

“Ka motho o tee [Adama] sebe se tsene lefaseng gomme lehu la tsena ka sebe.”Baroma 5:12

O be o ka re’ng ge o be o ka botšišwa gore: “Na o nyaka go phela ka mo go sa felego?” Mohlomongwe batho ba bantši ba be ba ka re ba a nyaka eupša ba nagana gore seo ga se kgonege. Ba re lehu ke karolo ya bophelo, moo ka moka ga rena re felelago gona.

Le gona, a re re potšišo yeo e be e ka fetošwa gomme wa botšišwa gore: “Na o nyaka go hwa?” Ka tlwaelo, batho ba bantši ba ka araba ka gore aowa. Se se bontšha’ng? Se bontšha gore ka tlhago re kganyoga go phela, go sa šetšwe mathata le diteko tšeo re lebeletšanago le tšona. Beibele e bontšha gore Modimo o bopile batho ba na le kganyogo ya go phela. Ge e le gabotse, e re “o tsentše bosafelego dipelong tša [bona].”—Mmoledi 3:11.

Lega go le bjalo, therešo ke gore batho ga ba phele ka mo go sa felego. Ka gona, go senyegile kae? Go feta moo, na go na le seo Modimo a se dirilego go lokiša boemo bjo? Beibele e araba dipotšišo tše ka tsela e kgothatšago, gomme dikarabo tšeo di sepedišana le lebaka leo ka lona Jesu a ilego a tlaišega le go hwa.

MOO GO SENYEGILEGO GONA

Dikgaolo tše tharo tša mathomo tša puku ya Beibele ya Genesi di re botša gore Modimo o ile a nea batho ba babedi ba pele, e lego Adama le Efa, kholofelo ya bophelo bjo bo sa felego gomme a ba botša seo ba bego ba tla swanelwa ke go se dira gore ba e fihlelele. Ke moka pego e hlalosa kamoo ba ilego ba palelwa ke go kwa Modimo gomme ba lahlegelwa ke kholofelo yeo. Taba yeo e hlaloswa ka tsela e bonolo moo e lego gore ba bangwe ba akgofela go e tšea e le nonwane. Eupša ka go swana le Diebangedi, puku ya Genesi e bontšha gabotse gore pego ye e nepagetše e bile ga se nonwane. *

Go se kwe ga Adama go feleleditše ka eng? Beibele e araba ka tsela ye: “Ka motho o tee [Adama] sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Adama o dirile sebe ka go se kwe Modimo. Ka go re’alo o ile a lahlegelwa ke kholofelo ya go phela ka mo go sa felego gomme a feleletša a hwile. Ka ge re le ditlogolwana tša gagwe, o dirile gore re be le sebe. Ka baka leo, re a babja, re a tšofala le go hwa. Tlhaloso ye e dumelelana le seo borathutamahlale ba se utolotšego mabapi le leabela. Eupša na go na le seo Modimo a se dirilego go lokiša boemo bjo?

 SEO MODIMO A SE DIRILEGO

Ee, Modimo o dirile ditokišetšo tša go lopolla, goba go rekolla seo Adama a dirilego gore se lahlegele ditlogolwana tša gagwe, e lego kholofelo ya go phela ka mo go sa felego. Modimo o phethagaditše seo bjang?

Beibele go Baroma 6:23 e re: “Moputso woo sebe se o lefago ke lehu.” Se se bolela gore sebe se feleletša ka lehu. Adama o ile a dira sebe, ka gona a hwa. Ka mo go swanago, le rena re dira dibe gomme ka baka leo re welwa ke moputso wa sebe, e lego lehu. Eupša re belegetšwe boemong bjo bja sebe, gomme seo ga se phošo ya rena. Ka gona Modimo ka lerato o rometše Morwa wa gagwe e lego Jesu, gore a tlo amogela ‘moputso wa sebe’ sa rena. Se se šoma bjang?

Lehu la Jesu le bula tsela e išago bophelong bjo bo thabišago bja ka mo go sa felego

Ka ge motho o tee e lego Adama, yo a bego a phethagetše, a re baketše sebe le lehu ka go se kwe, go be go nyakega motho yo a phethagetšego yoo a bego a tla botega go fihla lehung gore a tlo re lokolla bothateng bjoo. Beibele e hlalosa taba ye ka tsela ye: “Go etša ge ka go se kwe ga motho o tee ba bantši ba ile ba dirwa badiradibe, ka mo go swanago ka go kwa ga motho o tee ba bantši ba tla dirwa ba lokilego.” (Baroma 5:19) “Motho [yoo] o tee” e bile Jesu. O tlogile legodimong, a ba motho yo a phethagetšego *, gomme a re hwela. Ka baka leo, go a kgonega gore Modimo a re amogele gomme re be le kholofelo ya go phela ka mo go sa felego.

LEBAKA LEO KA LONA JESU A ILEGO A TLAIŠEGA LE GO HWA

Lega go le bjalo, ke ka baka la’ng go be go nyakega gore Jesu a hwe gore a phethagatše se? Modimo Ramatlaohle o be a ka fo laela gore ditlogolwana tša Adama di dumelelwe go phela ka mo go sa felego. Ruri o be a na le matla a go ka dira bjalo. Eupša ge Modimo a ka be a ile a dira bjalo, o be a tla be a tshetše molao wa gagwe wa gore moputso wa sebe ke lehu. Molao woo ga e fo ba molao wo o sa rego selo wo o ka phaelwago ka thoko goba wa fetošwa e le gore dilo di itshepelele ka tsela ya maleba. O sepedišana le toka ya kgonthe.—Psalme 37:28.

Ge nkabe Modimo a ile a se dire dilo ka toka tabeng ye, batho ba ka be ba ile ba ipotšiša ge e ba a be a ka se dire bjalo le ditabeng tše dingwe. Ka mohlala, na o be a tla dira dilo ka toka ge a hlaola gore ke bomang go ditlogolwana  tša Adama bao ba swanelegago go hwetša bophelo bjo bo sa felego? Na o be a ka botwa gore a ka phethagatša dikholofetšo tša gagwe? Taba ya gore Modimo ka mehla o kgomarela toka ge a phološa batho e re kgonthišetša gore o tla dula a dira se se lokilego.

Ka lehu la Jesu la sehlabelo, Modimo o re buletše tsela ya go phela ka mo go sa felego lefaseng la Paradeise. Ela hloko mantšu a Jesu ao a ngwadilwego go Johane 3:16, ao a rego: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” Ka go re’alo, lehu la Jesu ga e fo ba bohlatse bja gore Modimo ka mehla o kgomarela toka, eupša ke bohlatse bjo bogolo bja gore o rata batho.

Lega go le bjalo, ke ka baka la’ng Jesu a ile a swanelwa ke go tlaišega le go hwa ka tsela e bohloko yeo e hlalositšwego Diebangeding? Ka go kgotlelela ga gagwe teko e kgolo kudu le go dula a botega, Jesu o ile a ganetša ka mo go feletšego mantšu a Diabolo a gore batho ba ka se dule ba botegela Modimo ge ba lekwa. (Jobo 2:4, 5) Mantšu ao a ka ba a ile a bonagala a kwagala ka morago ga gore Sathane a goketše Adama yo a phethagetšego gore a dire sebe. Eupša Jesu—yo a bego a phethagetše go swana le Adama—o ile a dula a ekwa go sa šetšwe go tlaišega o šoro. (1 Bakorinthe 15:45) Ka go re’alo, o ile a bontšha gore Adama le yena nkabe a ile a kwa Modimo ge nkabe a ile a kgetha go dira bjalo. Ka go kgotlelela ge a be a lekwa, Jesu o re beetše mohlala wo re swanetšego go o latela. (1 Petro 2:21) Ka ge Morwa yo wa Modimo a ile a kwa ka mo go feletšego, Modimo o ile a mo putsa ka go mo nea bophelo bja go se hwe legodimong.

KAMOO O KA HOLEGAGO KA GONA

Jesu o ile a hwa e le ka kgonthe. Tsela e išago bophelong bjo bo sa felego e bulegile. Na o nyaka go phela ka mo go sa felego? Ge e ba go le bjalo, Jesu o bontšhitše seo re swanetšego go se dira ge a be a re: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.”—Johane 17:3.

Bagatiši ba makasine wo ba go laletša gore o ithute mo go oketšegilego ka Jehofa, yena Modimo wa therešo, le ka Morwa wa gagwe Jesu Kriste. Dihlatse tša Jehofa tša lefelong la geno di tla thabela go go thuša. Le gona, o ka hwetša tsebišo e holago ka go ya Wepesaeteng ya www.jw.org/nso.

^ ser. 8 Bona sehlogo se se rego “The Historical Character of Genesis,” ka go Insight on the Scriptures, Bolumo 1 letlakala 922, yeo e gatišišwego ke Dihlatse tša Jehofa.

^ ser. 13 Maria o ile a imišwa ke ge Modimo a fetišetša bophelo bja Morwa wa gagwe popelong ya gagwe a etšwa legodimong, gomme moya o mokgethwa wa Modimo o ile wa šireletša Jesu gore a se ke a fetelwa ke go se phethagale ga Maria.—Luka 1:31, 35.

Ithute ka mo go Oketšegilego

SEGOPOTŠO

Gopola Lehu la Jesu

Re go laletša gore o tle o be le rena tiragalong ye ya bohlokwa. O tla ithuta kamoo bophelo bja Jesu le lehu la gagwe di ka go holago ka gona.

Ke Eng Seo ge e le Gabotse Beibele e se Rutago?

Topollo—Mpho e Kgolo Kudu ya Modimo

Topollo ke eng? E bolela’ng go wena?